اهتزاز زائد بعد تغيير طقم دبرياج - 128 نوفا
السلام عليكم
غيرت طقم الدبرياج الأسبوع اللي فات ل 128 نوفا، وللأسف منفعش أكون مع الميكانيكي أثناء تغييره، ونتيجة للظروف والدي أخد العربية من الميكانيكي بعد ما خلصها.
بعد عملية التغيير بقيت حاسس إن الموتور كأنه في صالون العربية. صوت الموتور عالي و فيه اهتزاز محسوس بشكل زايد، وده مش فارق إذا كنت ممور و واقف أو كنت على سرعة بطيئة أو عالية، ومش فارق إذا كنت دايس على دواسة الدبرياج أو لأ.
والهزة دي منتظمة (مش زي مثلاً لما الكربرتير يبقى مش مزبوط). وأنا ماسك الدركسيون ببقى كأني ماسك خلاط. حتى وأنا بدور العربية بحس نفس الشيء للمارش (صوت عالي و حاسس بحركته كأنه تحت رجلي).
إيه الاحتمالات الممكنة لعيب زي ده؟ إن شاء الله هرجع للميكانيكي في اليومين دول. بس بفضل إني أكون سابق بخطوة، عشان لو مثلاً فضل يقوللي لأ مفيهاش حاجة أقوله مثلاً طب بص على كذا أو إنت متأكد من كذا ولا لأ.
طقم الدبرياج الجديد كان فاليو، وعلى حسب ما فهمت إن الموتور إتشال وأتسقط في التغيير.
جزاكم الله خيراً.
|
14-10-2011, 03:36 AM
