نصائحكم قبل السمكره و دوكو للسياره

[احمد عبد المقصود سيد]

الاخوه الكرام اعضاء الملتقى .....
لقرب ميعاد فحص السياره . نويت انشاء الله اعمل سمكره و ارشها دوكو .
ارجو النصيحه قيل البدء ان كانت هناك نصائح لمن سبق له هذا العمل . علما بأنى
سألت عن رش العربيه عند واحد كويس و شفت شغله قاللى 1800 جنيه و كان اخر
كلام 1600 جنيه . هذا الكلام فى السويس . ايه رأيكم ؟
و شكرا مقدما لكل من قدم نصائحه ......

[SUPER MARIO]

ازيك يا عم احمد ربنا معاك و يوفقك و السعر يعتبر غالى شوية بس لو صنيعى نضيف و خامات محترمة يبقى كويس و ياسس صح
بس هى العربية كلها سمكرة و لا اجزاء بسيطة

[zing0]

حضرتك هتعمل السمكرة و الدوكو عند نفس الصنايعى؟ منصحكش
يعنى ورشة تجديد سمكرة و دوكو مع بعض = 1800 ج ؟
على حسب السمكرة اللى فيها طبعاً
الدوكو لواحده أقل واجب 1000 الى 1200
لو تقصد دوكو بس 1800 يبقى غالى شوية إلا لو هيخدمها صح الصح و بخامات ممتازة
ممكن واحد يعملها بأسعار أقل بس إتأكد انه هيرشها بدون ملمع و مش هيدخلها فرن (كابينه)
المهم السمكرة, علشان لو فيه بارومه و رش عليها, هتضطر تعملها بعد شهر (البوية هتطقطق و تقع لواحدها) و هتدفع سمكرة و دهان تانى

الأهم بقى: الوقت, لو مستعجل عليها علشان الفحص متعملهاش
خسارة , فلوس عالأرض
لو الوقت ضيق , هات نص كيلو لاكية و شوية بنزين أو نفط و فرشاه أو روله صغيرة و غطى المرايات و الكاوتش و الزجاج و خلافه بأكياس أو ورق جرايد و ادهنها (فوق البارومه عادى) و سيبها تنشف و روح رخص و جدد عادى (المهندس عاوز شكل و خلاص و كده كده بيمدوا أيديهم)
و بعد كده تشتغل فى السمكرة بتاعتها براحتك و طبعاً اللاكية هيتحرق مع المعجون القديم و تأسس صح على نضافه.

و ده رد أحد الإخوه (مش فاكر صاحب الرد بصراحه)

روس مستفادة عند عمل دوكو وسمكرة للسيارة من واقع خبرتى الشخصيه: معلش هكتب بالعامية عشان سهوله توصيل الافكار 1- متوديش العربيه لسمكرى يكون ليه علاقة ببتاع الدوكو لانهم هيشتغلوك هيشتغلوك بس يفضل يكونوا فى نفس المنطقه 2- روح لحد يكون قريب عشان تقدر تتابع العربيه كل يوم 3- فضى العربيه من كل حاجة و الاستبن و كل حاجة فى الشنطة قبل ما توديها للسمكرى...وطبعا رخصتك معاك مهما يكن متسبهاش لحد 4- خد قراية عداد ال كم اول ما تسيبها للسمكرى عشان ناس كتيرة بتستهبل و تعمل بيها مشاوير خاصة و بيبقى مستهتر لانه سمكرى و هيعرف يعمل فيها اى حاجة...كل يوم وانت عنده راجع على القراية و عدى الفروق اللى اقل من 5 كم لانه ساعات بيروح يشتريلها حاجة من محل قريب مثلا...لكن تلاقى 20-30 كم يبقى فى ان 5- خلى تنك البنزين واصل لربعه عشان ميستهبلش و يسحبهم (حصل معايا انى كنت مفول التانك وراجع بيه فاضى بعد ما خلصوا شغل و بيقولى عايز حساب 10 لتر بنزين حطهم من نفسه عشان ميعطلش الشغل !!!! استهبااااااااااااااال 6- ميغركش ان الصنايعى يحلف بالدنيا و الدين و وووو لان 90 % منهم معندهمش لا زمة ولا ضمير