مصر موتورز مجتمع السيارات - BYD عربية أتقن الصينيون صناعتها و فشل المصريون (توكيل القطامية ) في صيانتها

معلش اعذروني لو هطول عليكم شوية بس بجد الشعرة اللي كانت بتخليني أروح أعمل الصيانة في التوكيل إتقطعت و خلاص مش حاعمل الصيانة في التوكيل تاني و هاخد مخاطرة اني أطلع برة الضمان (كدا كدا العربية مش بتتعمل ذي ما أنا عايز لأ ده كمان بتطلع أسوء فمش فارقة بقى )

أنا هقسم الموضوع على تلات أجزاء :
1-الطلبات اللي كتبتها في أمر الشغل
2- الاحداث التي حصلت و العربية في الصيانة (ما شاهدته و الحديث اللي دار بيني و بين الناس من المركز هناك )
3- الاحداث التي حصلت بعد الصيانة

1-الطلبات اللي كتبتها في أمر الشغل :

النهاردة رحت مركز القطامية أعمل صيانة 25000 كم ، و كانت طلباتي إلي إتكتبت في أمر الشغل كالتالي :
1-الكشف على رعشة في العربية من غير تكييف و بتزيد مع التكييف
2-سحب العربية مش ذي الاول (و أنا قولتله يعمل check على الفلاتر و البوجيهات عشان هما متغيروش الصيانة اللي فاتت ، فهو كتب تغيير الفلاتر و البوجيهات إذا لزم الامر )
3-قفل الشنطة فيه مشكلة و هو إن إمكانية اني أمنع الشنطة انها تتفتح من داخل العربية مش شغالة
4-فيه صوت ذي رفة كدا بحس بيه لما بحود يمين بالعربية و أنا ماشي و هو مش دائم الحدوث
5- تبديل العجل اللي ورا مع الامامي و كنت طلبتها بعد أمر الشغل عشان كنت نستها

أنا وصلت الساعة 1 و اللي مكتوب في أمر الشغل + صيانة 25000 المفروض مايخدش ساعة أو ساعة و نص بالكتير خصوصاً إن المركز كان تقريباً فاضي مفيش غير 4 أو 5 عربيات موجودين غيري

2- الاحداث التي حصلت و العربية في الصيانة (ما شاهدته و الحديث اللي دار بيني و بين الناس من المركز هناك )

شوفوه بقى حصل إيه :
1-بعد ما العربية دخلت بعشر دقائق كلموني عشان أنزل ، نزلت لقيت الراجل اللي بيصلح قفل الشنطة بيقوللي القفل مكسور و هيحتاج يتغير ، أنا سألته هو بكام ؟ رد عليا إنه لازم يغير الكونتكت و الببيين الامامين عشان هو مش بيجي لوحده ، ساتله بكام ؟ رد عليا انهم بحوالي 300 جنيه ، قولتله لأ متغيرش رد عليا إنه هيحاول يزبطه على قد مايقدر ، قولتله ماشي .

2- طلعت وقفت في الكافتريا و شفت العربية و هما بيشتغلو فيها.
3- العربية إترفعت على الكوريك و حصل تبديل للعجل
4- فتح الكبوت و ضرب خرطوم الهواء في حوض الموتور
5-حط مياه في المساحات و بص على قربة المياه لقاها ناقصة زودها من نفس المياه اللي هي من الحنفية يعني محطش مياه خضراء
6-للامانة أنا ماشفتش حاجة عملها تاني
7-العربية نزلت من على الكوريك و قعدت من الساعة 2.15 لحد بعد العصر محدش لمسها (يعني حوالي ساعة )
8-دخلت للاستاذة داليا أشتكلها إن العربية بقلها فترة محدش لمسها، كلمت الناس تحت قلولها أصلهم كانو بيصلوا العصر مع العلم إن lلعربية محدش إشتغل فيها من قبل العصر
9-نزلتلهم الورشة ، و سألتهم هي العربية خلصت ولا لسة ؟ ردو عليا انها خلصت و مستنيين بس الكشف بالجهاز و بعد كدا يجربوها
10- سألتهم غيرتوه الفلاتر و البوجيهات ، قالولي لء عشان حضرتك كاتب إذا لزم الامر ، رديت عليهم أيوا يعني هى المفروض تتغير ولا لأ ؟، قالولي اه ، قلتلهم طب ساكتيين ليه من بقالكو ساعة ، المهم غيروه الفلاتر و البوجيهات
11- كان عندي ملاحظتين و أنا واقف، إن الاستاذ اللي بدل العجل جرح الجنط من عند السرة اللي مغطية المسامير و هو بيطلعها هو بمعنى أصح قشر جزء منه و لما سألت إيه دة ، حاولو يقنعوني إن هي كدا و مع اصراري إن هي مكنتش كدا قالولي معلش مكنش قصده و ديه أجزاء مكانيكية واردة تتخدش
12 - الملاحظة التانية إن العربية متحطش كيس على الكرسي ولا على الدركسيون قبل الشغل ، و لما فتحت كلام في الحتة ديه كلهم أجمعو إن عندي حق ، و مدير المركز أخبرني إنه هيجزي العامل المسؤل
13 - الطريف في الموضوع انهم كملو شغل من غير ميحطو كيس على الكرسي ولا على الدركسيون

3- الاحداث التي حصلت بعد الصيانة :

1-نزلت استلم العربية ، و أنا جايب أخري من مياه الحنفية اللي إتحطت في الرادياتير و من الجنط اللي إتقشر و من الساعة اللي ضاعت على الفاضي و العربية واقفة محدش لمسها و من الردود المستفزة اللي كنت بسمعها عشان يبرره بها الأخطاء
2-دخلت للأستاذ صبحي أسأله إيه أخبار الرفة و كانت إيه المشكلة و كمان الرعشة ، رد عليا انهم ربطوه العفشة و كمان مع تغيير الفلاتر و البوجيهات الدنيا هتتزبط و إن مدام المهندس مضى على أمر الشغل و جبهوله يبقى معنى كدا إن كل حاجة تمام و خده بالكو من الحتة ديه كويس
3-دفعت الفلوس و خدت العربية و أنا بقول بيني و بين نفسي كويس انها جت على أد كدا
4-قبل ما أخرج كنت عايز أحط حاجة في الشنطة ، جيت أفتح الشنطة بالمفتاح مش عايزة تتفتح (المفروض إن الصنايعي كان قللي إنه هيحاول فيها لو معرفش هيسبهة )
5-جربت أحط المفتاح في وضع إلغاء قفل الشنطة من الداخل لقيت الكالون بيستجيب و المفتاح بيخرج بس لما جيت جربت اني أفتح الشنطة من الداخل لاقتها فتحت !!!!!!!!!!!
6-هنا بقى ذي ما بيقوله القشة اللي قسمت ظهر البعير ، إتنرفزت و زعقت و ازاي استلم العربية كدا حكييت عن كل اللي ضايقني من ساعة ما العربية دخلت
7-العربية دخلت تاني و شوية لقيت الفني طلع بيقول الكالون دة ملحوم و مش هينفع !!!!!! قولتله نعااااام العربية ديه ذر و من ساعة مجبتها معملتش صيانة برة التوكيل و محدش حط ايده فيها و دة معناه إن عربية نازلة زيرو بكالون ملحوم !!!!!!!!!!!!!!!
8- قولتله أنا كل اللي عايزه دلوقتي إن العربية ذي ما دخلت تطلع لا أكتر ولا أقل
9-حاول يعملها لمدة ساعة و منفعتش و حاولو يقنعوني إن دة طبيعي إن ممكن الكالون ميرجعش ذي الاول عشان هو فيه مشكلة من الاساس و أنا مصمم على رأيي
10-المهم يمين شمال مش عارف إيه اللي حصل طلع إن الكالون ممكن يتغير من غير تغيير الكونتاكت و الابواب !!!!!!!!!!!!!!!!!!!!!!!!! !!! و الكالون كان ب-45 جنيه و طبعاً أنا كنت جبت أخري و قولتله غير
11-طبعاً فى فترة محاولة تصليح الكالون القديم و تركيب الكالون الجديد كان بيدور كلام بيني و بين الناس هناك و بيحوله يبررولي الأخطاء اللي حصلت (المشكلة إن كان فيه ناس شايفة إن عندي حق منهم أستاذ محمد رمضان مدير المركز و ناس بتحاول ترمي العيب عليا و تقولي احنا فهمين شغلنا و لما أجي أذنؤهم في الكلام يسكتوه و دة كان مهندس هناك للأسف مش فكر إسمه )

اللي مضايقني إن ليه العربية ميترجعش عليها و يشوف إيه اللي حصل و إيه اللي محصلش ، و إن محدش قللي إن الكالون باظ و مبقاش يفتح من برة

اللي يشفعلهم هو حسن معاملة الاستاذة داليا و أستاذ محمد رمضان و أستاذ أحمد متولي (مش متأكد من الإسم )

اه بالمناسبة أنا غيرت الكالون مضطر عشان الفني مكنش عارف يرجع العربية ذي الاول بالكالون القديم ، أنا مكنش فرق معايا الموضوع للدرجة اللي تخليني أغيروه

ملاحظة صغيرة ، الرفة اللي في العجل لسة موجودة و الرعشة كمان

النتيجة اللي طلعت بها من إلنهردة اني مش هأامن على عربيتي و هي في التوكيل عشان تعمل الصيانة ، و حاعمل الصيانة برة في أي مركز معروف و أبقى واقف على ايد الصنايعي و هو شغال عشان أعرف إيه اللي بيحصل في عربيتي عشان مش معقول أسافر اسكندرية مع كل صيانة عشان أعمل الصيانة هناك

كلمة السر "معيار الجودة " Quality Assurance\Control