دعوه لملاك السيراتو الخليجي - راسلو شركة كيا
 

الموضوع إمتناع الوكيل عن صيانة الخليجي
الحقيقة كنت قد قرأت عن هذا الموضوع من أيام في الصحف ولم يذكر الإعلان مطلقا إمتناع الوكيل عن الصيانه للماركه ولكن لما إتصلت علي سبيل التأكد لحجز الصيانه رفضوا عمل صيانة السيارة بدعوي أنها خليجي ... المهم طلبت من موظفة ( إستقبال مكالمات حجز الصيانه ) شخص مسئول أكلمه فأعطتني رقم م/ خالد فاروق مدير الصيانه ... طبعا إتصلت ولطعوني علي الويتنج نصف ساعة وأنا مصر علي مكالمة أي حد يقولي وبخاصة مدير الصيانه بنعملش صيانه للخليجي ..... المهم الموظفه المهندس/ خالد مش علي مكتبه .. طيب حد من المهندسين ... ربع ساعه وردت علي أنسه أنا متأكد أنها موظفه عادية .... قالت دي تعليمات جاينا من الإدارة لو عايز تكلمهم إتفضل .... المهم خدت رقم تليفوني وقالت ها تخلي مدير الصيانه يكلمني ... أنا قولتها المكالمه دي أنا مسجلها عشان ها بعتها شركة كيا بره ... قالت وحضرتك فاكر إن إحنا هانزل إعلان من غير ما تكون كيا عارفه قولتها الإعلان لم يذكر رفضكم عمل الصيانه ده تحذير إن الضمان لا يسري علي السيارات الخليجي وبعدين ده من حق أي وكيل ماركه إن الضمان يسري علي السيارات المباعه من طرفه فقط ... لكن بإعتباركم وكيل ماركه .. ليس من حقكم الإمتناع عن صيانه الماركه طالما أنا متحمل كل التكلفه ..... ده تلبيس علي الناس ... وأنا عن نفسي هارفع عليكم وعلي شركة كيا قضية بإمتناعكم عن صيانة السيارة ... يعني لو واحد نازل من أي دولة خليجية ومعاه سيارة كيا وحصل لها عطل وعايز يعملها صيانه في وكيل كيا المعتمد تقولوا له جرها للسعوديه إعملها صيانه هناك ......أولا أنا عارف إن دي مناورة من الوكيل ومش هايقدر يستمر في رفض الصيانه ... بس نوع من الضغط علي الناس عشان متشتريش الخليجي ....وأنا لو عايز أعملها صيانه في أماكن كتير للصيانه بس ... يفهم التجار الجشعين دول إن الناس فاهمه حقوقها ... وأنا بدعو جميع ملاك كيا الخليجي يخشوا علي الويب الخاص بالشركه ويبعتوا ليهم إميل شكوي بذلك ....والأميل من علي ويب الشركه من contact us وبعدين تختار aftar sales service وشكرا

http://www.kiamotors.com/

رد: دعوه لملاك السيراتو الخليجي - راسلو شركة كيا
 

سبق وان كان لنا وقفه ضد الحملة على منتجات كيا وخصوصا سيارة السيراتو ،،، ولكن ليس من حق وكيل كيا الاقليمي في مصر الامتناع عن صيانة السيارات ذات المواصفات الخليجية او الغير مباعة عن طريق الوكيل في مصر ...!

على الأخوة اصحاب السيارات المشتراه من غير الوكيل (مواصفات خليجية او غيرها) مراسلة الشركة الأم واعتقد انها لن تتخلى عنهم لانها بالتاكيد تخاف على سمعتها ...
وكلنا يعرف ان الشركة لم تدخل في منافسة الشركات الاخرى (التي في مستواها) الا من فترة قصيرة جدا ...

شكراً للأخ خالد

تحياتي

رد: دعوه لملاك السيراتو الخليجي - راسلو شركة كيا
 

يا جماعة انا ليا حكاية كدا ف الموضوع دا
انا كان معايا عربية فورد ف الكويت وحصل مشكلة بيني و بين الوكيل و دا ممكن احكيهولكو بالتفصيل بعدين
المهم
روحت داخل علي موقع فورد دوت كوم و بعتلهم شكوي كذا كذا كذا
عايز اقولكم انا بعت الميل دا الساعة 7 بالليل .. لقيت تاني يوم الساعة 10 كدا رد من المدير الاقليمي بتاع الشرق الاوسط المكتب بتاعو في دبي .. المهم قالي احنا اسفين اوي علي المشكلة دي و دي مش سياسة فورد مع العملاء خالص و طلب مني 3 طلبات
1- رقم الشاسيه بتاع العربية
2- العربية ماشية قد ايه دلوقتي
3- طريقة اتصال مباشرة معاك
المهم شكرتو و بعتلو التلت حاجات دول
عايز اقولوكو ان تاني يوم مدير التسويق بتاع الوكيل بنفسو كان بيتصل بيا و بيغرقتني بالاعتذارات و كان مصمم يرفد الناس اللي اتعاملو معايا بس انا طبعا رفضت عشان ماتسببش ف قطع عيش حد .. وعايز اقولوكو ان المشكلة اتحلت بدون ما ادفع اي فلوس بس ...... ابعت ايميل تاني للراجل اللي رد عليا اقولو ان انا خلاص مش زعلان و ان المشكلة اتحلت و كدا
وفعلا بعتلو و روحت سألتو سؤال كدا بالمرة
لو اشتريت عربية فورد فوكاس من الكويت و نزلتها مصر هل يبقي الضمان و الصيانة بتوعها ساريين في مصر
رد عليا ب اختصار
ان العربية اللي انت شاريها شايلة علامة فورد مش شايلة علامة اي توكيل تاني ف الدنيا .. و فورد بتختار وكلائها اللي يريحو العملا بتوعها مش اللي بيضايقوهم .. و الوكيل هوه مجرد وسيط محلي بينك و بين فورد العالمية

الحكاية دي تاكلوكو مجموعة حاجات
1- ان انت لو اشتكيت للشركة الام ممكن يوصل الموضوع لانهم يسحبو الوكالة منو لو عملاء الماركة مش راضيين عن الوكيل
2- ان انت لازم تطالب بحقك للنهاية و ماتسكوتش لان المشكلة فينا ك مصريين اننا مش بنطالب ب حقوقنا .. دا انتو عارفين ان الضمان بتاع كيا ف اي حتة ف العالم 7 سنين .. و هيونداي 10 سنين علي فكرة
3- ان الشركة الام نفسها هيه اللي بتدي الضمان و هيه اللي بتبقي حاسبة التكاليف بتاعتو و هيه بثمن العربية .. مش الوكيل هوه اللي بيحدد قيمة الضمان كام من تمن العربية .. ف بالتالي سواء انت دفعت تمن العربية للشركة الام ف الكويت و لا ف مصر ولا ف اي حتة يبقي من حقك ان اي عيوب صناعة تظهر تتصلح (لانك دافع تمنها) و الشركة الام بقي هيه تتصرف مع الوكيل ف موضوع التكلفة .. لكن سواء هنا او الكويت او امريكا .. الشركة الام هيه اللي بتدي الضمتن ( لأن هيه اللي مصنعة) و هيه اللي بتسعر العربية و هيه اللي بتتحمل الرسوم لو حاجة جوة الضمان ( واسالو اللي شغالين ف التوكيلات)
تحياتي,,,
محمد اسماعيل

رد: دعوه لملاك السيراتو الخليجي - راسلو شركة كيا
 

موضوع غريب جدا من الوكيل ، وبأعتقادي استثنائي لأن توكيل كيا في سورية يستقبل أي سيارة كيا حتى لو خليجيptmnlo123per111

رد: دعوه لملاك السيراتو الخليجي - راسلو شركة كيا
 

موضوع ممتاز جدا ً وبجد يحتاج لوقفة جماعية

انا اعرف ان غبور كمان مش بيقبل الخليجى ( من فترة 3 سنوات تقريبا ً ) ومش

دلوقتى بيقبلها ولا لا ودلوقتى كيا

متابع بإهتمام وفى انتظار الجديد