مصر موتورز مجتمع السيارات - ايه احسن سيارة عائلية اّمنة وكبيرة ما بين 70,000 و 80,000.... انا اخترت امجراند !!! انت تختار ايه وليه !! نقاش مفتوح..

نتكلم يصراحة و نقرب وجهات النظر ... كل واحد يتخيل انه معاه 80 الف .. ويحدد احتياجاته و يقرر اختياره موضحا لاسباب ..

انا عن نفسي .. ظروفي خلتني محتاج عربية كبيرة .. عشان طولي 184 سم .. عائليه .. تكون مريحه في السفر لمسافات طويلة .. وبالتالي مهم جدا عوامل الامان .. و محتاج شنطة كبيرة ... شكل العربية يكون جميل مش زي اللوجان .. و تبقى طلتها انيقة و حلوة ... و طبعا زي كل افراد الشعب العادي الكماليات الكثير مفضلة ..و يكون وكيل كويس .. سمعته معقولة ... ميبقاش بتاع مشاكل كبيرة مع العملاء .. لاني من النوع اللي بيعرف يجيب حقه بكل الطرق .. و البدائل كلها بتبقى مطروحة ... و طبعا متبقاش عربية نادرة عشان اعادة البيع و قطع الغيار والكلام المعروف ده ...

استثنيت البي واي دي - عشان بقت تاكسي بشكل مبالغ فيه ( ميزة وعيب ) .. و كمان شكلها 2003 خالص .. غير كدة جميلة جدا و رخيصة في الاقتناء

استثنيت البروتون ساجا اوتومتيك - عشان مش واسعة قوي من جوة .. فقيرة جدا من الداخل والكماليات ضعيفة ( مش عارف كانو هيخسرو ايه لو نزلوها 4 زجاج كهرباء و اتنين ايرباج بدل 1 .. وغلوها يعم ل 80,000 عربية اوتوماتيك واوبشن هتبيع جامد والله) .. غير كدة هيه عربية ممتــــــــــــــــــــــ ـازة وادائها راااااااااائع )

استثنيت البريليانس .. بصراحة حسيت ان في مغالاة .. مش هي ديه قيمتها في و جهة نظري .. و كمان لقيتها ضيقة شويه عليا .. و التسليم بعد شهرين و حوارات ..

استثنيت الجاك J5 لما روحت معرضين لوكيلها في القاهرة و ملقتهاش ... و عرفت ان اوشاناتها نزلت بقت بدون جنوط سبور و تكييف عادي مش تاتش .. و مفيش باركينج سنسور ولا فوج لايت ... و ب 78,000 ... بس هيه بأمانه عربية نضيفة اخر حاجة .. و جمييييييييييييييييلة و فخمة ... تتحب بجد .. و كنت هغامر و اجيبها بس ملقيتهاش في المعارض .. وهي اصلا نادرة .. فكنت هغامر جامد قوي ..

استثنيت ال M11, M12 ليه بقااااااااا ..... بصراحة عدم وجود ايرباج عملي ازمه معاها ... و بلاستيك التابلوه ... هي العربيات شيك و حلوة وادائها مشهودله .. بس مش هاقول عيوب الفينيش .. بس هاقول الخامة المستخدمة ... معجبتنيش قوي

طبعا في عربيات تانية بس كانو خارج النطاق اصلا

خلصت معايا على الجريت وول C30 .. بجد حبتها قوي .. من انضف العربيات الصيني المشهود ليها بالكفائة و جودة الصناعة .. بجد جميلة ... و لكن ... بدون شبورة .. بدون جنوط .. بدون حساسات ركن ..

بس بصراحة لما شفت الامجراند ... خدتني من الجريت وول لاني بجد لقيت كل اللي انا محتاجة في عربية واحدة ..

اسف على الاطالة .. بس حبيت اشارك ,, و الم الشمل بموضوع جديد .. لاني متأكد ان احنا كلنا هنستفيد من الحوار معا !!

وارجع و اكد ان انحياز اي حد لعربيته بسبب انها اكثر ملائمة لظروفة و طباعة الشخصية ...

تحيه من القلب لكل السادة الاعضاء !!