اتفرجوا ع الشرطه بتعمل ايه فى الحوادث

[queen]

اولا الحمد لله على كل شىء وقدر الله وما شاء فعل

ارجو تستحملونى ومتزهقوش

كنت خارجه يوم الجمعه م المسجد بعد ما صليت بالعربيه وماشيه على 20 ولاحظت وقوف نصف نقل على جنب . سبته عادى ع اليمين واقف وخدت الشمال مع ملاحظه الكلام ده فى شارع واااااااااااااااااسع جدا فى اكتوبر ومفيش غيرنا احنا الاتنين بس فى الشارع يعنى صحرا

المهم مشيت انا فى حالى على 30 تقريبا وفجأه الاقى النص نقل جاى بسرعه رهيبه من يمينى وبيكسر عليا جامد وهيطيرنى وكل اللى كانوا راكبين معايا صرخوا فيه ايه حد يدخل كده وفى لحظتها فرملت وقلت اهو غبى م اللى بيصادفونى كل يوم ووقفت عشان يعدى هو وكان فى مسافه كويسه تعديه وفعلا هو هدى سرعته وفى لحظه بدل ما يعدى الاقيه زى الصاروخ بيرمى على عربيتى بكل قوته وسايب العربيه بتتزحلق وداخله فيا خد الجمب اليمين من ورا لادام وكسر المرايه وطارت معاه لحد اكتر من 20 متر ادامى على ما بدأ يفرمل كل ده وانا واقفه
ولما نزلنا وقفناه والشارع اتلم نزل وقعد يتأسف ويتنيل وقلنا له خلاص تدفع تصليحها
طبعا الرفرف اتعجن المرايا انتهت وفانوس الغماز خالص الباب اليمين مش بيفتح واتطبق جزء فيه
بهدله فى الاكصدام وثنى وخدوش وكذلك جزء م الكبوت

قال انا شغال عليها تبع موقع شركه مبانى وقعد يتصل بيهم محدش معبره قلنا له خلاص نروح القسم هو سمع الكلمه دى واتجمد وكان هيبوس ايدينا ( طلع الحيوان مش معاه رخصه اصلا ولا بطاقه واكتشفنا ولا هاند بريك ) وبعد محاولاته رحنا معاه الموقع بتاعه ملقيناش حد وحسينا انه بينصب فطلعنا ع القسم

وهناك استقبلنا البيه الظابط وبعد ما سمع منى سألنى انتى عايزه ايه دلوقتى قلتله اعمل محضر قالى الأتى :

• ممكن اعمل محضر ويتحجز الحيوان ويتعرض الصبح ع النيابه وكام يوم وهيخرج وانتى مش هتاخدى حاجه هتكسبى ايه لما يتحبس يومين ويخرج.

• أو اعملك محضر اثبات حاله عشان التأمين ونحدد التلفيات عشان التعويض ويخرج دلوقتى.

ولما سألته انا عارفه انه مش هيقدر يدفع 20 جنيه من تصليحها بس بخصوص الرخص والبطاقه اللى مش معاه هتخرجوه ازاى ويسوق تانى ويخبط ناس تانيه؟؟؟

قالى هعمله ايه يعنى عادى ومفيش حاجه عليه وكده كده هيخرج شوفى انتى ايه الأفيد لك وانا اعمله احنا كل دقيقه فى الموال ده !!!!!!!!!!!!!!!!

ومن هنا لهنا حسينا ان محضر التأمين احسن الوحشين وعملناه واتكتب فيه رقم عربيته وبس يعنى بدون اسمه ولا أى اثبات عليه وانها ملك الغير وقالى عشان التأمين هياخد التعويض من شركته

واخدت صورة المحضر والبيه خرج بعربيته واعتقد كان فاضل يعملنا

السؤال هنا تفتكروا اعمل ايه اكتر من انى اجيب الجانى بنفسى وهو من غير اى ورق واسلمه للشرطه فى واقعه مخالفه واضحه وضوح الشمس

وبعيدا عن الحادثه مش ده المفروض يتعمله محضر تحرى ع الأقل ولا انا جايه من كوكب تانى؟؟؟؟؟؟؟؟؟؟

وايه اللى فرق كده انى مسكته وسلمته للقسم على انه كان جرى وانا يادوب لحقت رقم عربيته وسجلتها فى المحضر!!!
حاسه بالاهانه والذل وانى خدت على قفايا منه ومن القسم وبيتهيألى ان المحضر ده مالوش لازمه لانه بدون اسم السائق معرفش هينفع فى التأمين ولا ايه

واخيراً وديت العربيه عند المركز اللى بتعامل معاه وعملوا مقايسه فعليه هتتكلف حوالى 1500 جنيه وحسبى الله ونعم الوكيل

بس احب اعرف رأيكو وايه كان التصرف الأمثل اللى بيتعمل فى حاله زى كده

[محمد صالح - المحامى]

طب كلام حضرتك ان العربيتين اتحركوا وسابوا مكان الحادثة
يعنى مفيش اثبات ان الحادثة وقت بينك وبينة
---------------------
هل اخدتى صور للحادثة
=========
بالنسبة للمحضر اولا بيبقى محضر اثبات حالة لو النجدة جت وعاينت واسمة اثبات علشان هى بتثبت واقع ملموس
انما لو حضرتك هتحكى الى حصل بدون اثبات يبقى محضر عادى
ومفيش حاجة اسمها يومين وبيطلع الكلام دة الى بيحددة النيابة مش الداخلية حسب خطوة الحادثة
وكمان انتى بتقولى انه مكنش معاه رخصة يعنى دى مصيبة تانية
--------------------------------
فى بعض الضباط او المسئولين عن كتابة المحضر بيكسلوا يمسكوا القلم او يتعبوا دماغهم فى كتابة المحضر او الوقف مع الحق لانهم بيبقى شايفين الموضوع بمنظور تانى وساعات مبيكنوش بيعرفوا يكتبوا اصلا وبيتكسفوا من الاخطاء الاملائية
--------------------------
نصيحة بقى لاى حد يحصل معاه الكلام دة
************************* ***********
- صور الحادثة باى موبايل
- اطلب النجدة
- لو مجتش واضطريت تروح القسم خلى الى هيكتب المحضر يعمل معاينة للعربيتين ويذكر الاضرار بالتفصيل
- المكلف بكتابة المحضر لا يحق له التدخل فى اى اقوال ليكى هو كل وظيفتة انه بينقل شكوتك بالتفصيل فى محضر رسمى
- فى حالة الامتناع من الظابط او من سوف يكتب المحضر يبقى تدخلى لمأمور القسم وتشرحيله بالتفصيل
بيانات المحضر لازم تشمل الاتى
- تاريخ اليوم وساعه كتابة المحضر
- البيانات الكاملة للطرفين من واقع اثبات الشخصية
- بالنسبة للاضرار المادية يجب ذكر الضرر بعد معاية المسئول عن كتابة المحضر وذكر الضرر بالتفصل فى ملحوظة داخل المحضر
======================
رقم المحضر او رقم الاحول لابد من الانتظار حتى تسجيل المحضر فى دفتر احوال القسم وبتحصل على رقم الاحوال لمتابعة القضية فى النيابة التابع لها القسم
لان فى ناس معندهاش ضمير فى الداخلية ممكن ترمى المحضر فى الزبالة
ومحدش يقولى عملنا ثورة والكلام دة معدش موجود
الثورة قدامها 30 سنة علشان تطلع مجتمع سليم

[Eng/salwa]

لا حول ولا قوة الا بالله
ربنا يعوض عليكى اختى الكريمة
انا شقتى بقه كلها اتسرقت وفى 6 اكتوبر برضه
وقسم 6 اكتوبر المحترم لا حياة لمن تنادى
ولا عمل اى حاجة
لدرجة بعد فترة سمعت انهم مسكوا حرامية و مسروقات
وذهبت القسم بالحى السابع
وشاهدت بنفسى صور المسروقات على الحائط
وعندما سألت عن بعضها والذى يشبه بعض مصوغاتى الذهبية و الاب توب و الموبايل
قيل لى ( لأ دى حاجات ناس تانية و استلموها خلاص )
كنت هتجنن ؟؟؟؟؟؟؟؟؟؟؟ يعتى ايه و فين الناس اللى استلموها و امتى وازاى ؟؟؟؟؟

الله اعلم و خرجت محروق دمى ولم املك عمل شئ !!!!!!!


حسبى الله و نعم الوكيل فى كل ظالم

ربنا يعوض عليكم و علينا

[محمد صالح - المحامى]

الظاهر الظابط دة عندة عقدة من سواقة النساء
=============
معنى ان المحضر متكتبش فيه بيانات الجانى يبقى كدا اتقيد ضد مجهول
معنى انه متحفظش عليه واثبت انه بيسوق من غير رخصة انه متواطئ معاه
لان الجانى خالف القانون والى سعادة الظابط المفروض انه شغال علشان يحققه

========================= =========
الحركات الزبالة دى بتتعمل معانا كمحامين كمان يعنى مش المواطنين العاديين فقط
هتلاقية بيقولك معلومات غير صحيحة ذى هيتحبس يومين ويطلع
هتلاقية بيضغط عليكى علشان تتنازلى عن المحضر
وشغل الطبطبة على الجانى علشان شكلة غلبان
اصلنا فى مصر بناخد بالشكل مش بالجريمة
وطبعا دا واضح جدا فى مدى الازدهار الى احنا عايشين فيه دلوقتى مع البلطجية

[mhamdy75]

عشان كده

بنطالب الدكتور مرسى

بتطهير الداخلية