مشكله فى دبرياج عربيتى الفيرنا

[احمد سويلم]

السلام عليكم ورحمه الله وبركاته
ازيكم يارجاله المنتدى ؟ وعاملين ايه ؟
ياجماعه انا عندى مشكله فى دبرياج عربيتى من اسبوع ومش لاقى حل !!!

الموضوع بالتفصيل

ببص بصه ع الميه والزيت وكده لقيت زيت الباكم للفرامل والدبرياج ناقص فقولت اغيره واشتريت علبه زيت باكم وحقنه ماكس (ولمونه) وشفطت بالحقنه الزيت القديم (على قد ماقدرت ) وزودت الزيت الجديد وشكرا على كده
بعدها بيومين الصبح جاى اطلع بالعربيه لقيت الغيارات تقيله بشكل فظيع بالرغم من ان انا دايس دبرياج على الاخر
المهم طلعت على الميكانيكى وقولتله عليلى الدبرياج شوى فالميكانيكى نزل كده من عند بدال الدبرياج وفعلا علهولى الراجل ومشيت بيها طول اليوم مفيش ا مشكله والغيارات ناعمه معايا

تانى يوم الصبح لقيت نفس المشكله فطبعا طلعت على الميكانيكى لقيت عنده زحمه وقالى كده هاتحتاج طقم اصلاح دبرياج اللى هوا جلد وبيستم
واتفقنا ان احنا نعمل الموضوع ده تانى يوم وقولتله طيب عليلى برضو الدبرياج شوى عشان اعرف امشى بالعربيه والراجل علاه وفعلا مشيت طول اليوم عادى جدا مفيش اى مشكال فى الدبرايج والغيارات ناعمه جدا جدا


تانى يوم كنت مستعجل جدا الصبح وطلعت بالعربيه بسرعه والغيارات برضوا كانت تقيله
والمفاجاه
بعد ربع ساعه من المشى بالعربيه لقيت الغيارات نعمت لوحديها وبقت زى الفل فاستغربت جدا !!

روحت للميكانيكى تانى يوم وعملنا الشغلانه اللى هوا قالى عليها واخد هوا الدبرياج عن طريق كارك ودوس وطلعنا جربنا العربيه والدبرايج والغيارات اصبحوا ناعمين بصراحه


النهارده الصبح لقيت المشكله زى ماهيا وطبعا اتضايقت جدا
ده حتى قولت رأييى فى السيده والده غبور

ياريت خبراء المنتدى يقولولى اعمل ايه

[احمد سويلم]

وياريت ياجماعه محدش يقولى اسطوانه او ديسك لان العربيه فى حاله الزيرو ومفيش اى مشاكل فى السحب (الاسطوانه ) ومفيش اى مشاكل فى رجرجه او رعشه او تقل دواسه (الديسك )
العربيه موديل 2010
ومن يوم ما اشتريتها على الزيرو ومحدش حط رجله عليها الا محمد تونسى المشرف بتاعنا هنا اللى هو المفروض انه زعلان منى حاليا

[M.TONSY]

يا عم انا مش زعلان ولا حاجة
وعموما لو المشكلة دى عندك بتبقى موجودة الصبح بس وبتروح لوحدها ومفيش عضة فى الغيارات ده يبقى عيب زيت الفتيس هتلاقيك لما غيرته غيرت بزيت لزوجته عالية زيادة عن اللزوم عن الزيت المخصص ليه وفقا لدليل الصانع وهو 90/75W API GL4
والمشكلة دى دايما تبان الصبح بدرى فى داخلة الشتا وبرودة الجو لانها بتخلى زيت الفلفلين التقيل بيبقى عامل زى الشحم وبعد كدة بيحل مع حركة التروس
وحلها انك تنزل الزيت الموجود وتحط الزيت المخصص ليها واحذر الزوت السايبة الموجودة عند محلات الزيت اشترى عبوات موبيل باللزوجة الموضحة بعاليه ومتحطش اكتر من 2 كيلو فقط علشان الاويل سيلات فى الفتيس ما تضربش

[waelsalah]

المشاركة الأصلية كتبت بواسطة M.TONSY يا عم انا مش زعلان ولا حاجة وعموما لو المشكلة دى عندك بتبقى موجودة الصبح بس وبتروح لوحدها ومفيش عضة فى الغيارات ده يبقى عيب زيت الفتيس هتلاقيك لما غيرته غيرت بزيت لزوجته عالية زيادة عن اللزوم عن الزيت المخصص ليه وفقا لدليل الصانع وهو 90/75W API GL4 والمشكلة دى دايما تبان الصبح بدرى فى داخلة الشتا وبرودة الجو لانها بتخلى زيت الفلفلين التقيل بيبقى عامل زى الشحم وبعد كدة بيحل مع حركة التروس وحلها انك تنزل الزيت الموجود وتحط الزيت المخصص ليها واحذر الزوت السايبة الموجودة عند محلات الزيت اشترى عبوات موبيل باللزوجة الموضحة بعاليه ومتحطش اكتر من 2 كيلو فقط علشان الاويل سيلات فى الفتيس ما تضربش

صباح الخير
والله ينور على افادتكم القيمه
وربنا يستر طريقنا جميعا يارب

فين لو سمحتم مكان زيت الدبرياج واتابعه كل اد ايه ؟
وهل بيتغير كله ولا بيتزود وخلاص ؟
اعتقد ان دبرياج الفيرنا مش على سلك ؟. صح ولالا ؟

وشكرا جزيلا

[احمد على 1999]

بس اللى انا فهمته كده ان اللى اتغير هو زيت الباكم مش زيت الفتيس و لا خضرتك فعلا كنت غيرت زيت الفتيس كمان ؟

انا فى رايى و الله اعلم ان الموضوع مش حيخرج عن اخد هوا مظبوط و لا كان ليها لازمة اساسا تغيير زيت الباكم و كمان حكاية اصلاح طقم الدبرياج