البلاك أوت ....

[الدملاوي]

كله بيسأل ايه حكايه الكهربا اللي كل شويه بتقطع دي ..

تعالوا نشوف ايه الحكايه ^__^

بالأمس حدث بلاك أوت ( power blackout ) فى الهند أدى إلى إنقطاع الكهرباء نهائى عن 670 مليون مواطن بما يمثل ( 10% من سكان العالم ) و تصفه وكالات الأنباء بأنه أكبر بلاك أوت فى التاريخ . . . .
.
هو يعنى إيه بلاك أوت ؟ و ليه بيحصل ؟ و إزاى نتفاداه ؟
.
.
حنشرح ببساطه من غير كلكعه ,,
معنى البلاكأوت إن الكهربات تقطع أوتوماتيكيا عن أكتر من 30% من الدوله فى نفس اللحظه و لمده طويله
..
أسبابه ببساطه : لو فرضنا عندنا فى مصر إن الأحمال الكليه 200 ميجاوات ( أى رقم فرضاً ) ,, و عندنا 12 محطه توليد كل واحده 20 ميجا ( يعنى مجموع 240 ميجاوات بيحيث دايماً بيكون فى زياده ) ..
.
فى وقت الصيف ( زى اليومين دول ) الأحمال بتزيد نتيجه التكيفات و مواتير المياه
و فى نفس الوقت قدره الشبكه بتضعف لأن الحراره العاليه بتأثر بالسلب على الشبكات ...

يرتفع الأحمال إلى 230 ميجاوات مثلاً
,,,
تبدأ الأحمال تزيد على محطه من ال12 إللى حيلتنا , فالمحطه تتحمل زياده فتخرج بره الخدمه أوتوماتيكياً ,, ف يتبقى ال230 ميجاوات على ال11 محطه إللى فاضلين ( 11*20 = 220 ميجاوات ) يبقى فى أحمال زياده على محطه من ال11 الفاضلين , فتخرج المحطه أوتوماتيكياً ,,و يبقى 10 ,,, و هكذا حتى تخرج جميع المحطات و يحدث ظلام تااااااااام فى شبكه الدوله كلها.

حدث فى مصر بلاك أوت فى سنه 2004 و تم إقاله وزير الكهرباء و الطاقه على أثره
و حدث فى أمريكا فى سنه 2003 فى شمال شرق أمريكا تم إقاله محافظين الولايات على أثره
و حدث فى الأردن فى 2004 أيضاً
..
.
طيب هل إللى بيحصل فى مصر دلوقتى و النور بيقطع كل شويه ده بلاكأوت ؟
طبعاً لأ لأنه أولاً مش بيحصل فى نفس اللحظه فى كل الأماكن لكن شويه هنا و شويه هنا و بيكون مقصود مش خارج عن الإراده
مقصود !!!
بالضبط كده , و هو ده الحل الوحيد لتفادى البلاكأوت ,, بيكون فى نظام حمايه متطور جداً بيحكم شبكه الجمهوريه كلها ,, و بمجرد إن النظام بيشعر إن الأحمال قاربت على الوصول للحد الأعلى , يقوم بفصل الأحمال ( يقطع النور عن منطقه معينه ) تفادياً لزياده الأحمال على المحطه و حدوث سلسله خروج المحطات و منها البلاكأوت .
و زى ما بيقولوا العلم نور

[أيمن الروبي]

بس حضرتك لما يكون في تخفيف للأحمال تفاديا حدوث بلاك اوت يكون في عدل في تخفيف الاحمال مش الكهربا تقطع عن المناطق الفقيره والمناطق الراقيه لأ بالرغم ان الاحمال بتزيد في المناطق الراقيه نتيجه زي ما حضرتك قولت التكييفات ومواتير المياه
مثال لحضرتك بسيط عندي في الشغل في المهندسين بدون مبالغه البرج اللي احنا فيه يوجد به ما يقرب من 140 تكييف وفي الشركه الي انا شغال فيها 9 تكييفات وعند حمايا في العجوزه برده البرج فيه ما لا يقل عن 150 تكييف ومع ذلك مستحيل الكهربا تقطع وعلي العكس ممكن تلاقي شارع في المناطق الفقيره لا يوجد به اكثر من 5 تكييفات ولكن المسئولين اللي مش محترمين في شركة الكهربا بيقطعو الكهربا عن المناطق الفقيره والعشوائيه علي اساس سكان هذه المناطق ليسوا بني آدمين ولكن حيوانات بدون اخذ اي اعتبار لشعورهم واكيد حضرتك عارف ده يبقي في ظلم في توزيع الاحمال الكهربائيه علي المناطق
وبالتالي يوجد عنصريه ظاهره جدا بل هي اسوأعنصريه لأنها تميز بين غني وفقير

[dr.death]

المشاركة الأصلية كتبت بواسطة aimooo بس حضرتك لما يكون في تخفيف للأحمال تفاديا حدوث بلاك اوت يكون في عدل في تخفيف الاحمال مش الكهربا تقطع عن المناطق الفقيره والمناطق الراقيه لأ بالرغم ان الاحمال بتزيد في المناطق الراقيه نتيجه زي ما حضرتك قولت التكييفات ومواتير المياه مثال لحضرتك بسيط عندي في الشغل في المهندسين بدون مبالغه البرج اللي احنا فيه يوجد به ما يقرب من 140 تكييف وفي الشركه الي انا شغال فيها 9 تكييفات وعند حمايا في العجوزه برده البرج فيه ما لا يقل عن 150 تكييف ومع ذلك مستحيل الكهربا تقطع وعلي العكس ممكن تلاقي شارع في المناطق الفقيره لا يوجد به اكثر من 5 تكييفات ولكن المسئولين اللي مش محترمين في شركة الكهربا بيقطعو الكهربا عن المناطق الفقيره والعشوائيه علي اساس سكان هذه المناطق ليسوا بني آدمين ولكن حيوانات بدون اخذ اي اعتبار لشعورهم واكيد حضرتك عارف ده يبقي في ظلم في توزيع الاحمال الكهربائيه علي المناطق وبالتالي يوجد عنصريه ظاهره جدا بل هي اسوأعنصريه لأنها تميز بين غني وفقير

معاك في الرأي ده وطبعا في عنصرية علشان احنا بلد ماشية بالكفته قبل الكوسة لو في نص مشكلة في الابراج ام 150 تكييف دي هتلاقي البيه يرفع السماعة علي رئيس الحي أو المحافظ ويرجع الكهربا في اقل مت 10 دقايق ومتتكررش تاني علشان دول عالم تخاف ماتختشيش

شركة الكهربا فيها مديرين بيقبضو مبالغ هلامية وفي الاخر يقولولنا الاحمال !!!!!!

لو انت عايز تخفف الاحمال يا عالم ياجهلة ابني محطات توليد جديدة برضو بفلوسنا اللي بتسرقوها منا علي الفواتير والزبالة اللي مابتتلمش وندفع دم قلبنا نصب و سرقة

مش علشان تقولي اصل الناس مشغله تكيفات او مواتير مياه يبقي اقطع الكهربا علشان الاحمال

سؤال : هي شركة الكهربا دي مش ماشية علي خطة عمل متوقعه في نسبة الزيادة في الاحمال علي مدار ال20 سنة الجاية و الحلول الممكنة ضمان وصول الخدمة بافضل جودة ومعايير ...... والله اشك هم شغالين يجرو سرقة في بعضيهم وفينا وحسبي الله ونعم الوكيل في كل خاين وفاسد ومرتشي

[moca_moca]

علي فكره انا شغال في محطه توليد كهربا بقالي 3 سنين واسمحلي اقولك ان موضوعك ده عباره عن بلحححححح
حسن يونس تولي الوزاره في 2001 لحد دلوقتي يبقا ازاي تم اقالته في 2004 ؟؟؟؟
البلاك اوت يعني اظلام تام مش نسبه

[أيمن الروبي]

المشاركة الأصلية كتبت بواسطة moca_moca علي فكره انا شغال في محطه توليد كهربا بقالي 3 سنين واسمحلي اقولك ان موضوعك ده عباره عن بلحححححح حسن يونس تولي الوزاره في 2001 لحد دلوقتي يبقا ازاي تم اقالته في 2004 ؟؟؟؟ البلاك اوت يعني اظلام تام مش نسبه

طب متقولنا حضرتك الكهربا بتقطع ليه وعندي سؤال مضايقني (ليه بيخفو الاحمال من المناطق الفقيره والعشوائيه والمناطق الراقيه لأ)؟