مساعده ضروري من خبراء الفيات

[m_elswyfe]

معروض عليا فيات 128
موديل 1989
فبريكه من الداخل
مشدوده من شهرين
مطورها كويس
مطلوب 16000
ايه رايكم في السعر
وهل العربيه تتحمل سفر اسبوعيا من القاهره الي الاسكندريه
وكل يوم حوال 70 كيلو
في ناس خوفتني وقالتلي انها بتعطل كتير
وقطع غيرها مش معمره
ارجو الرد للضروره واكون شاكر ليكم

[sayed2077]

السلام عليكم ورحمة الله وبركاته
اولا لو السعر ده لعربيه بحاله زى اللى حضرتك كاتبها فهو جيد جدا

ثانيا العربيه جيده جدا فى السفر ولكن
لازم حضرتك بتعمل الصيانه الدوريه اولا باول
ولو حاجه بايظه تصلحها اول باول(لان اول ما تجيب العربيه فيه مشاكل كتير اوى هتقبلك ولازم تصلحها وطبعا كله بيتكلف فلوس وكده كده اى عربيه مستعمله فى مصر اول ما حد بيشتريها لازم يصرف عليها فى الاول

مثال انا اشتريت سيارتى ال 128 تعبت جدا اول سنه معاها بمعنى الكلمه
من ذهاب لميكانيكيه وكهربائيه وتظبيط على قد ما اقدر مع العلم العربيه كانت كده كده هتمشى ومش هتقول حاجه بس انا اللى بحب اركب الحاجه تبقى مظبوطه صح 100%

وبالنسه للاعطال بتتوقف على اجرائك للصيانه الدوريه باستمرار
و
فهمك فى التصليح قليلا يعنى فى اعطال بتحصل لاسباب تافهه ولكن لو عندك خيرة بسيطه هتحلها بنفسك فى اقل من دقيقه
مثال

مره المروحه بتاعت العربيه مبقتش تشتغل
فتحت الكبوت لقيت السلكه الى متركبه فى المروحه اتشالت من مكانها ركبتها فى مكانها تانى والمروحه اشتغلت وبقت زى الفل

وبالنسبه لقطع الغيار هو فعلا قطع الغيار مش معمره بس الكلام ده ينطبق على المضروب
بمعنى مثال قعدة فتيس فيه منها
صنى ب 30
يوغسلافى ب 40 وده الافضل الى حد ما (انا بفضله)
ايطالى ب 50 (مش بثق فيه اوى لان بيبقى فيه منه مكتوب عليه ايطالى ومضروب)

فطبعا على حسب حضرتك ما بتجيب وده الى بيحدده الفلوس طبعا

وقيس كده على كل قطع الغيار

وعلى العموم انا شايف الاتى

ال 128 عربيه جميله جدا وبتاعت سفر وكل حاجه بس عاوزة الاتى
1:واحد يستحملها اول سنه لان فيه مشاكل كتير اوى هتظهر فى اول سنه من امتلاكها
2:يبقى عندك خبرة ولو بسيطه وفى الاغلب لو استحملت اول سنه معاها فى العطلها وتصليحها هيبقى عندك الخبرة ديه ومش هتفيدك فى ال 128 بس لا ده فى عربيات تانى اللى هتمتلكها طوال حياتك
3:انك تقتنع بالعربيه بمعنى انك تحب العربيه جدا وفعلا هتلاقى منها وفعلا مريحه جدا فى السواقه خصوصا فى السفر اكثر من رائعه والسيطره عليها شديده جدا بس لو العربيه مظبوطه صح مش ضايعه
وربنا يعينك

[m_elswyfe]

أ/ سيد
انا بشكر حضرتك جداااااااا
بجد ربنا يباركلك ويطمن قلبك
يعني اتوكل علي الله
وربنا يسترها
طيب موضوع السفر دا مقلقش منه
لو حبيت اوديها لحد يكشف عليها
اوديها لمين في الجيزه او القاهره
في ناس قالتلي روح اي بنزينه وارفعها وهما بكشفو علي كل حاجه
وشاكر لحضرتك جداااااااا

[AMMI]

بالنسبه لاى عربيه قديمه
اول لما تشتريها هتعمل فيها الاتى
تروح لميكانيكى يغيرلك سير كاتينه وسير دينامو وطقم كهرباء وفلتر هواء وفلتر بنزين وتاخد قراءة العداد وتبقى بعد كده تغير سير الكاتينه كل 40 الف كيلو متر او اضمنلك كل 35 الف كم
وتغير سير الدينامو كل 10 كم
وبعد كده تروح تغير زيت وفلتر زيت وبرضه تاخد قراءة العداد
ديه اهم الحاجات اللى تعملها اول لما تستلم العربيه
بعد كده بقى فعلا اول سنه هتلاقى نفسك مثلا ظهرت مشكله فى المقصات هتغير مره مقصات على اى حاجه تبان معاك
بالنسبه لسعر العربيه وانها لسه مشدوده من شهرين
يعنى دوكو وفرش جديد يبقى العربيه سعرها مناسب جداً
اهم حاجه خد سمكرى معاك يبص عليها
وطبعا لو لقى فيها حاجه ممكن تتعمل عادى ( العربيه بقالها 22 سنه) عادى اشتريها وتوكل على الله وبالتوفيق

[mhamdy75]

طالما هاتسافر بيها يوميا

يبقى تخلى إيدك فيها على طول

وتعملها صيانات كل شهر

---------------

والسعر لو بالحالة دى يبقى كويس