التقرير الاول عن الالنترا الشكل الجديد

[احمد باشا]

بسم الله الرحمن الرحيم

انا اول مره اعمل تقرير عن عربيه عشان كده اعذروني لو في حاجه مش واضحه واتمني ان الي عاوز يعرف حاجه يسالني

ندخل في الموضوع

انا استلمت العربيه من غبور المنصوره يوم الاحد الي فات(ABS+1AIR BAG) ... طبعا لفيت حواليها وبصيت فيها من جوه ومن بره وكله كان تمام الحمد لله .... بس العربيه كان عليها طن تراب من بره و 2 طن تراب من جوه ..... من بره ممكن افهمها انما من جوه ازاي مش فاهم .... بس ده غبور بقا متوقع منه اي حاجه.

ندخل بقا في الجد
انا عملت بالعربيه لغايه دلوقتي 350 كيلو اغلبهم علي الطريق السريع ....انا طبعا ما زودتش عن 120 عشان لسه التليين ده غير اني اصلا مش من محبي الجري .... العربيه ثابته جدا جدا علي الطريق وخدت علي ملفات علي سرعه 80 وكانت ثابته جدا ..... صوت الموتور مش مسموع نهائي..... العزل بتاع العربيه ممتازتقريبا مش بسمع اي صوت بره العربيه... المشكله بس في صوت احتكاك الكاوتش مع الطريق عالي شويه

بالنسبه للتكيف انا شغلته علي 2 عشان التليين برضه بس فوق الممتاز العربيه كلها اتكيفت في اقل من 3 دقايق

الفرامل ممتازه .... عكس الكلام الي كنت بسمعه عن الهيونداي عموما ... مش عارف ده عشان ال ABS ولا ده العادي في الانترا الجديده.

العربيه من الداخل

اولا الصالون واسع جدا... يعني انا قاعد ومرجع الكرسي للاخر (طولي 180 سم ) والي ورايا نفس طولي وركبه مش لمسه ضهر الكرسي بتاعي .... وامبارح كان معايا 3 ورا (احجام متوسطه ) وكنت شايف انهم مستريحين اوي

نور العربيه من الداخل ممتاز واذا كان ما عجبنيش ان مفيش نور في الدرج الي قدام الكرسي الي جنبي ... بالنسبه لنور العربيه من بره انا شايفه كويس وان كان مفيش فرق كبير بين النور العالي و النور المتوسط .

انا سمعت بعض الشكاوي قبل ما استلم العربيه ان سقفها واطي وان راس الي سايق بتلمس السقف ... ده مش حقيقي اطلاقا الا اذا كان طول الي سايق معدي 2 متر وشويه .... بس اعتقد ان الي قال كده جرب العربيه والكرسي متعلي علي الاخر لان الكرسي بيعلي ويوطي.

نيجي بقا للشنطه

انا شايف انها واسعه جدا وانا مسافر خدت شنطتين متوسطين وكان المكان يكفي مش اقل من 3 شنط كمان
وبما اننا بنتكلم علي الشنطه فنقول بقا كمان ان الاستبن بنفس مقاس الاطارات الي راكبه في العربيه مش زي العربيات التانيه الي فيها عجل مقاس اصغر .

بالنسبه للكاسيت انا مش بهتم بالموضوع اوي يعني بس امكانياته كويسه و فيه AUX و USB و CD وانا شخصيا مش محتاج اكتر من كده ... بالنسبه للسماعات بقا في اتنين كبار في البابين الي ورا و اتنين زيهم قدام و اتنين صغيرين في البابين الي قدام وده كافي جدا بالنسبه ليا.

العدادات شكلها كويس جدا و الكمبيوتر بتاع العربيه ممتاز زي بتاع الكروز بالزبط

عيوب العربيه من وجهه نظري لغايه دلوقتي
1- وانت سايق مش شايف الكبوت نهائي و لا شايف الشنطه ولازم تعتمد اعتماد كلي علي مرايات الجنب و احساسك بالعربيه .
2- صوت احتكاك الكاوتش مع الاسفلت عالي شويه ومسموع جوه العربيه .
3- خامات التابلوه متوسطه ممكن نقول انها اقل من خامات الكروز.
4- لما بشغل التكييف سحب العربيه بيقل شويه وان كان مش كتير برضه.
5-عفشتها الي حد ما ناشفه شويه بس لا تقارن بالي سمعته عن السيراتو.

دي كانت عيوب العربيه عموما ... العيوب الي لقيتها في عربيتي بقا بعد ما استلمتها

1- الساعه كل ما ازبطها واقفل العربيه اكتر من 10 دقايق ترجع للساعه 1 تاني واعتقد دي هتتزبط في الصيانه .
2- العربيه مش بتعمل لوك للابواب لوحدها لما العربيه تمشي اعتقد العيب ده كمان هيتزبط في الصيانه.
3- زرار اللوك بتاع الابواب مش بينور لما انور نور العربيه هو وزراير زبط المرايات وده مش عارف برضه في الصيانه ولا هما مش بينوروا اصلا .

اتمني اكون قدرت اعمل تقرير كويس و اشوفكم بقا في التقرير التاني ان شاء الله بعد صيانه ال 1000

ياريت الي عنده اي استفسار يضيفه وانا ان شاء الله ارد عليه

الف مبروك يا ابو حميد وربنا يديك خيرها ويكفيك شرها ويسلام بقا لو تعملنا تقرير مدعوم بالصور تبقي انتا كدا جيبت من الاخر

والف شكر علي التقرير الجميل ده وتقبل تحياتي

[MAS_Ismail]

الف*شكر*علي*التقرير*الممت از

[سيدة القصر]

تقرير رائع فى انتظار المزيد مدعمة بالصور

[Joker2012]

عربية جميلة عيبها الاساسي ارتفاع سعرها