نصيحة بخصوص ستروين C4 جراند بيكاسو

[ksayeds]

من فضلكم انا محتاج نصيحة :
انا عجباني جدا سيارة C4 جراند بيكاسو 2011 الموتور 1.6لتر بقوة 156 حصان. لكن الحقيقة لما سألت عن السيارة و الوكيل و خدمة ما بعد البيع لقيت ان الردود متباينة و مختلفة جدا بين الناس لدرجة اصابتني بالحيرة الشديدة جدا و بعد ما كنت خلاص هشتري رجعت ف كلامي. عشان كده عاوز اسأل اللي عنده العربية اخبارها ايه؟ ايه هي اهم عيوبها؟ و اخبار الوكيل و خدمته ايه؟ و كمان ايه حكاية قطع الغيار ذات الاسعار النارية و اللي كمان مش موجودة؟
حاليا انا عربيتي نيسان 2002 ب 1.3لتر و 87 حصان ياباني و الحقيقة الصيانة بعملها عند السبع و هم متميزين جدا فيها و معنديش مشاكل معاهم تقريبا.

شكرا مقدما للنصيحة

[ayman abdelrazek]

هى طبعا السياره تحفه بس قطع غيارها حاليا غاليه جدا وقليل منها استيراد ولازم تبقى السياره بنزين مش جاز لأن الجاز منها فاشله وسيئه جدا ولو مقتنع وهتشترى لازم تفحصها فحص دقيق جدا فى التوكيل وبس وربنا يوفقك

[Eng.Ahmed Wagdy]

طبعا عربيه مفهاش كلام عليها ... بس عيوبها في قطع غيارها غالية جدا وتقريبا موجوده في التوكيل بس و طبعا ملهاش سوق في بيعها و ممكن تخسر نص تمنها في سنتين بص حضرتك علي C4 كانت جديده ب 120 انهارده مستعمله ب 65 ~ 70 الف و كذلك C3 كانت ب 85 جديده و مستعمله ب 45 الف .... طبعا ابعد عن الديزل خليك في البنزين

[ksayeds]

أ. ايمن : اشكر لحضرتك الرد هى العربية زيرو موديل 2011 لكن انا نسيت اسأل على موضوع الجاز بصراحة لانى كنت فاكر ان كله بنزين. بس، انا روحت التوكيل و شفتها لقيتها فعلا جميلة و متميزة فى الاستخدام بأكتر من شكل. المآخذ اللى عندى ان:
1-الاستبن من تحت مش داخل العربية
2-الجنوط 16 مش 17 فى الجراند. و انا حاسس انها محتاجة 17 لان حجمها ضخم كمان البيكاسو جنوطها 17

موديل 2012 هينزل شهر سبتمبر ، و هيكون اغلى 5-6 الاف جنية و هيكون جنوط 17 (بحسب التوكيل) ...انا كده هستنى شوية لما ينزل ان شاء الله

شكرا جزيلا لرأى حضرتك السديد و على الرد

[ksayeds]

م. احمد وجدى:
شكرا للرد . الحقيقة حضرتك فتحت موضوع مهم جدا جدا و مرعب جدا و هو اعادة البيع. العربية تمنها 225الف....طيب لو بعت بعد سنتين هتنزل النص و لو بعد 5 اكتر من النص برضه؟ طب ايه بلاش الزيرو؟ انا مش هاوي تغيير اصلا الا بعد فترات و ده اللي خلاني عاوز اجيب ستروين بالرغم من ان موضوع اعادة البيع صعبة و بتخسر ، لاني بصراحة سمعت فيها قصايد شعر من رواد المنتدي. واضح ان العربية مش واخدة حقها في مصر لسة بسبب قطع الغيار الغالية (بالرغم من ان الياباني غالي جدا جدا) و المشاكل المرتبطة بالتوكيل القديم.
شكرا مرة اخرى للاهتمام و الرد