تجربتى مع ليفينا 2011

[احمد الشيمى]

السلام عليكم
وعلى كل اعضاء المنتدى اللى ليهم الفضل فى المعلومات القيمة الموجود واللى استفدت منها كتير.
هذه اول موضوعاتى فى المنتدى وهى عن نيسان ليفينا 2011 بعدشرائها وتجربتى لها وسماحونى على الاطالة

اولا:العربية واسعة اكتر مما تتخيلوا ورا وقدام لدرجة انى ببقى مرجع الكرسى على الاخر وفارد الضهر ولو اى حج قاعد ورايا بيبقى مستريح جدا ومش مضايق من الكرسى ده خالص
فهى واسعة جدا مقارنة بالصنى بعد تجربة ايضا للصنى

ثانيا :شنطة العربية واسعة جدا جدا لدرجة انى كان اتنين اصحابى قاعدين فيها.
غير ان الكراسى الخلفية قابلة للطى على الاخر وبالتالى العربية كانها ربع نقل بعد طى الكراسى الخلفية والاستفادة بيها مع الشنطة بتاعتها .

ثالثا: العربية ارتفاعها جيد جدا على الارض وبتتعامل مع المطبات بشكل جيد جدا حتى مع السرعات العاليه العربية مش بتلمس المطب لانى اخدت مطب على 110 والعربية وما احتكتش خالص بالمطب وكنا 3 راكبين فيها.

رابعا :العربية مريحة جدا جددا فى السواقة من حيث البور بتاعها .

خامسا :العربية بسم الله ما شاء الله جراية على الارض سرعتها بتزيد بسرعة كبيرة اوى على الطريق مش محتاجة انى اضغط على الاكستلير واسيبه زى اى اتوماتيك عشان تنقل (بمعنى اصح مش بكرك لها خالص بتنقل بسرعة فى غيارات الاتوماتيك بتعتها)

سادسا :العربية فيها كاسيت عيبه الوحيد انه بيقره سيديهات اوديو فقط لكن السماعات بتعتها صوتها حلو جدا ومظبوطة بدرجة عالية معا

سابعا:الناس كلها واجهتها مشكلة ان العربيه مش فيها مكان لوضع المتعلقات الشخصية (النظارة والموبايل والمفاتيح والحاجات دى)بس هى فى مكان فوق الكاسيت ممكن وضع هذه الاشياء فيه .

ثامنا :لا يوجد عداد للحرارة فى التابلوه على الرغم من كبر التابلوه المبالغ فيه من رايه الشخصى طبعا لان التابلوه عريض جدا والحرارة يمكن قياسها عن طريق لمبتين واحدة بتنور اخضر مع دوران العربية وبتفصل بعد ااقل من دقيقة وده معناه ان العربية كدة ما فيهاش اى مشكلة خالص ولمبة تانية بتنور احمر وده معناه فى مشكلة فى الحرارة والتوكيل قال لى ان لو اللمبة دى نورت لازم ابضل العربية ومش ادورها لحد ما يجى فنى يشوف ايه المشكلة(واعتقد ان ده عيب ان مش موجود عداد للحرارة)

تاسعا : العربية النور بتاعها كويس جدا لدرجة انى بستخدم الشبورة فقط على اى طريق مظلم دون الحاجة الى الواطى او العالى.

عاشرا:تكيف العربية تلاجة بمعنى الكلمة لانى مش بقدر اوجه نحوى وهو شغال غير ان الزجاج الخلفى والامامى عليه سخان عشان الشبورة فى الشتاء

العربية افضل ما فيها انك مش بتستخدم الريموت خالص ولا المفتاح لان المفتاح طول ماهو موجود فى جبيى على قرب 50 سم ااقدر افتح الابواب وادور العربية من غير مفتح كمان ودى خاصية بتمنع سرقة العربية

وجهة نظرى:
العربية ناقصها شوية اوبشن رغم انها فول اوبشن وبوجهة نظرى ينقصا التالى:
1- يكون فى اضاء للصالون فوق المراة الامامية زى الصنى لان ما فيش غير نور صالون واحد فى السقف وهو اضاءته كافية لكن يصعب الوصول اليه لو انت سايق ومحتاج النور انك تشغله.

2-العريبة مش موجود فيها طقم رفع للزجاج عند قفل السيارة بالريموت لازم ترفع الزجاج بنفسك قبل ما تنزل .(الطقم سالت عليه ب80 ج بس مش معقزل اشترى عربية ب117000 ومش موجود فيها حاجة زى دى)

3-الكلاكس بتاعها تقييل اوى عند الضغط عليه وكبير اوى وصوته مش عالى اوى ولا منخفض اوى .

4-العربية مش موجود فيها حساسات الرجوع للخلف.

5-المرايات الجانبية مش موجود فيها الاشارات للتنبيه يمينا ويسارا.

6-ما فيهاش جهاز انذار هى اى نعم مش محتاجه بس زى ما بنقول انها كماليات.

ما بعد الشراء:
اوتو ايجيبت اتصلت عشان تتاكد انى ما دفعتش مبلغ اكبر من الموجود فعلا فى فاتورة شراء السيارة وبتسال عن شكل واسلوب المعاملة وده كان اسلوب اكتر من راقى فعلا فى المعاملة وده خلانى ارتاح اوى لنيسان.
بعد كدة اتصلت شركة المسئولة عن متابعة الوكلاء عشان تتاكد من رضاء العميل عن السيارة ووكيل البيع ولو فى اى اقتراحات او كدة وده كمان طمنى زيادة وزيادة لنيسان
ولكن ما جعلنى افقد البعض من هذا الرضاء !!!!!!!!!!!!!!!

التوكيل:
حجزت التوكيل عشان صيانة 1000 وطبعا كلن اسلوب اكتر من ممتاز فى التكلم معاك كعميل وبختار كمان الميعاد من اليوم والتاريخ عشان احجز للسيارة وده شى جميل اوى.

انا حاسس انى طولت جدا بس هو كان فى شوية ملاحظات على التوكيل هاذكرها فى وقت لاحق باذن الله واف على الاطاله مرة اخرى وارجو ان تعم الفائدة وانا منتظر اى سوال على العربية.

[Egy News]

1000 مبروك يا فندم بس هل فيها اي مشاكل في التقفيل ؟

[احمد الشيمى]

لا التقفيل اكتر من ممتاز ومفيهوش اى مشكلة

[MmFFoR]

الف الف مبروك و يا ريت رأي حضرتك بعد صيانة الالف
و يا ريت لو في اي ملاحظات في العربية غير نقص الكماليات تفيدنا بيها

[احمد الشيمى]

المشاركة الأصلية كتبت بواسطة mmffor الف الف مبروك و يا ريت رأي حضرتك بعد صيانة الالف و يا ريت لو في اي ملاحظات في العربية غير نقص الكماليات تفيدنا بيها

الله يبارك فيك بعد صيانة الالف العربية حالتها ممتازة جدا وفعلا خرجت كانها لسة جديدة والحمد لله صوت الموتور مظبوط جدا على الرغم من انى نتقل عليها اوى السيارة بكل ما قيها رائع ومظبوط والحمد لله