استفسارات هامة قبل شراء الشاهين ارجو دخول الخبراء

[عبدالله منصور]

بسم الله الرحمن الرحيم

السلام عليكم ورحمة الله وبركاته

---

على حسب ميزانيتى

توكلت على الله ونويت اشترى الشاهين لإنى مش لقيت افضل منها من حيث السعر الى معايا الحقيقة


بس ليا شوية استفسارات اتمنى حضراتكم تجاوبونى عليها لإن أهل الخير خوفونى جداً وكرهونى فى الشاهين وقالوا لى كمان ان فى حجات احسن منها وبنفس السعر مع العلم ان ميزانيتى 30 بالتمام والكمال

الاستفسارات :

1 هل فعلاً فى عربيات افضل من الشاهين فى حدود 30 ألف ؟؟

2 ماتور الشاهين 1400 ياترى بياكل بنزين كتير مع العلم انى شاب ومش حمل مصاريف بهدلة ومع العلم بردو انى بعشق حاجة اسمها مشى بالعربية

3 الشاهين جر خلفى ,, ياترى الجر الخلفى دا يزعلنى فعلاً زى ماناس كتير حذرتنى منه مع انى احياناً بركب تاكسيات شاهين بتبقى ماشاء الله عليها ببقى عاوز اقول للسواق ربنا يباركلك

4 هل من الممكن تعديل عدادات الشاهين المتخلفة بشكل عدادات تانى يكون نضيف شوية

5 هل للشاهين تعديلات شبابية حلوة وياريت لو عندكم لينكات مش تبخلوا علينا

6 بدون ما اطول عليكم ياريت فى سطور مميزات وعيوب الشاهين بشكل عآم

شاكراً لكم مقدماً

[عبدالله منصور]

للرفع

للرفع

[فادى]

فيه شاهين فى حدود 30 الف و ده غالبا موديلات من 1996 الى 2003 فى الأوضاع العادية,
لكن بما ان الظروف الحالية مخلية السوق نايم شوية فأنت ممكن تشترى شاهين من موديلات حديثه (2005 و 2006) بهذا السعر لأن اللى معاه اى عربية مش عارف يبيعها.
الشاهين عربية كويسة جدا,
استهلاك البنزين فيها معقول لكنه ليس مثاليا, السيارة دفع خلفى و الدفع الخلفى يستهلك قدرا اكبر من البنزين, لكن الفارق لا يستحق النظر اليه.

هل فعلاً فى عربيات افضل من الشاهين فى حدود 30 ألف ؟؟

فيه عربيات أريح قليلا من الشاهين فى هذه الفئة السعرية, لكنها ليست أفضل لناحية الاعتمادية و الأداء.

3 الشاهين جر خلفى ,, ياترى الجر الخلفى دا يزعلنى فعلاً زى ماناس كتير حذرتنى منه مع انى احياناً بركب تاكسيات شاهين بتبقى ماشاء الله عليها ببقى عاوز اقول للسواق ربنا يباركلك

الجر الخلفى أفضل من الجر الأمامى فى كل شىء, فيما عدا استهلاك الوقود لصالح الجر الامامى, و عشان كده بتلاقى المرسيدس و البى ام دبليو جر خلفى.

5 هل للشاهين تعديلات شبابية حلوة وياريت لو عندكم لينكات مش تبخلوا علينا

الشاهين من العربيات اللى بيبان عليها التعديلات, و شكلها بيبقى حلو, طبعا ممكن تجنط, زجاج "فيميه", و غير ذلك.

6 بدون ما اطول عليكم ياريت فى سطور مميزات وعيوب الشاهين بشكل عآم

المميزات :
1- أداء جيد و خاصة التسارع, و محركها ممتع و متجاوب.
2- ثبات جيد فى المنحنيات.
3- اعتمادية تفوق سعرها
4- تصميم هجومى و رجولى رغم قدمه.
5- قوة تحمل و متانة لا تجدها فى هذا السعر.
6- دفع خلفى.

العيوب :
1- لا توفر الراحة التى توفرها السيارات الحديثة.
2- ثبات على الطرق السريعة قد لا يتناسب مع قدر السيارة بعد ال120 كلم نتيجة لارتفاع نقطة الثقل.
3- ضيق مساحة المقصورة نسبة لحجم السيارة.
4- تصميم قديم بعض الشىء.

[أبو صالح]

شوف يا باشا الشاهين عربيه جميله جدا جدا
جامده بمعني الكلمه
خد مطبات زي ما أنت عاوز
وخش بوشك مع أي حد ولا يهمك
ومش هقولك قطع غيار ببلاش ..... لا وكمان هتبهدل زي ما أنت عاوز ومش هتطلب قطع غيار أصلا
يعني بلغة السواقين عربيه بتقبل الغلط


لــــــــــــــــــــــــ ـــكـــــــــــــــــــــ ــن
وخد بالك من لكن دي أوي
اسهلاك بنزين مش قليل
صالون مش مريح بمعني الكلمه
طارة دركسيون هتعملك عغلات
فرامل نص نص


أه ونسيت أقولك حاجه بتخمس تخميس رهيب ولا البي إم

[hazem_khidr]

لو احتجت حاجه يا عبد الله رقمي معاك
و لو حبيت تشوف عربيه ابقي قولي و لو موجود في المحله حاجي معاك ان شاء الله
دا انت بلدياتي يا راجل