جولة فى فورميلا اﻷهرام 2011 و دعوة للنقاش

[حازم شاهين]

خسارة العشرين جنيه

دى كانت العبارةإللى قالها صديقى و إحنا خارجين من معرض فورميلا اﻷهرام 2011 ، صحيح للوهلة اﻷولى قد يبدوا المعرض مخيبا للآمال ، فالجميع كان يترقب المعرض للوقوف على أحدث موديلات السيارات إللى نتابع أخبارها على النت و فى المجلات بقالنا شهور و منتظرين نشوفها على الطبيعة فى مصر.
لكن فى الحقيقة و بعد مراجعة الملاحظات إللى كت بدونها و أنا بتنقل فى قاعات المعرض لقيت إن العارضين قدموا عدد لابأس به من السيارات الجديدة على الرغم من إن توقيت المعرض غير مناسب لظروف السوق المصرى، لكن إنطباع صديقى يجي ﻷى حد رايح المعرض علشان يدور على حاجة محددة بمعنى لو واحد رايح يدور على عربيات فى فئة معينة مش هيلاقى تنوع كبير لكن إللى رايح يتفرج على كل حاجة هيلاقى حاجات كتير تلفت نظره و تثير اﻹهتمام.

مين إللى مجاش

نتكلم اﻷول عن أبرز الغائبين علشان إللى هيروح المعرض ما يتوقعش إنه يشوف موديلات بعينها ،المعرض تميز بغيابات مهمة

ميتسوبيشى

لعل أبرزها و أهمها كالمعتاد من سنتين غياب شركة ميتسوبيشى فبعد تعيين وكيل جديد للسيارة فى مصر كنت أتوقع منه أنه يمهد للعودة للسوق بقوة من خلال المشاركة فى المعرض ده ، لكن يبدوا إن المشاكل القانونية منعت مثل هذا التوجد و بالتالى متتوقعش تشوف ميتسوبيشى فى المعرض (و لا فى السوق طبعا)

تويوتا و هوندا

غريب جدا موقف الشركات اليابانى بوجه عام فيبدوا إنهم آثروا الغياب مش عارف ليه تويوتا بالتحديد معندهاش مشاكل و تعتبر أكثر اليابانيين نجاحا فى السوق المصرى لكن و من خلال إنطباعى عن جناحهم فى أتوماك السنة إللى فاتت حسيت إن الجناح كان ممل ﻷقصى درجة و مفيش عليه أى إقبال من الحضور و يفتقر ﻷى جديد أو مثير، و أعتقد ضعف نتائج مشاركاتهم فى أتوماك السابقة كانت سبب رئيسى فى عدم المشاركة فى فورميلا السنة دى باﻹضافة طبعا ﻹن معندهومش جديد يقدموه للناس ، فى إنتظار الكرولا الجديدة و العربية إللى هتتجمع فى مصر.

كما غاب أيضا
سكودا -سيتروين
كرايسلر عامة و جيب خاصة
لاندروفر
لادا - ماهيندرا - بريليانس - جريت وول - جيلى

فى حين شاركت شركة سايبا بجناح كامل لكن فاضى خالص مفيهوش أى سيارات

لكن فى الحقيقة برضه معرفش لو كان الغايبين دول إشتركوا كانو هيجيبولهم مكان منين

طيب مين أهم إللى شارك

كل الباقى شارك على الرغم من إن البعض كانت مشاركاته محدودة نوعا ما زى إسبيرانزا مثلا لكن أهم مشاركتين فى رأيى كانت لمرسيدس نتيجة لمكانتها الكبيرة فى مصر و كمان فولفو إللى بتظهر السنة دى بعد كل المشاكل و التعثر فى السنتين إللى فاتو

صورة أرشيفية ﻷعوام سابقة

جولة فى قاعات المعرض

يبدأ المعرض كالمعتاد بقاعة سيارات الدفع الرباعى و قد اقتصرت مشاركات بعض الشركات على هذه القاعة فقط و لم تشارك بموديلات أخرى و منها بورش و فولكس فاجن و إسبيرانزا و جاك .
و لفت اﻷنظار فى هذه القاعة سيارة بورش كايين إس هايبريد

و كمان السيارة التجارية (كابينة مزدوجة) فولكس فاجن أماروك

و بى إم دبليو X1

و أخيرا لفت نظرى بحكم اﻹنتماء السيارة إسبيرانزا تيجو ليميتد باﻹضافات الشكلية المتميزة.

و بعد المرور بقاعة مخصصة للبنوك و أخرى لشركات قطع غيار و تعديل و مجلات و مواقع نت ننزل إلى الدور السفلى حيث قاعة السيارات التاريخية و هى قاعة تجذب اﻷنظار لكنى أعتقد إن السيارات المعروضة هى هى كل سنة لكن الفرجة على السيارات دى ظريف و مثير و يعتبر فرصة نادرة للتصوير بجانب هذه السيارات.

ثم تبدأ بعد ذلك قاعات عرض السيارات

أول قاعة
تشمل أجنحة BMW مرسيدس ، رينو ، جاجوار ، فورد

و تعتبر السيارة فورد موستانج Mustang GT Convertible موديل 2011 مجمة جناح فورد و هىمزودة بمحرك 5000 CC بقوة 412 حصان و فتيس أتوماتيك سرعات (طبعا ممنوع اللمس أو حتى اﻹقتراب) ،

كمان الفورد تاوروس Taurus السيدان الفخمة المزودة بمحرك 3500 CC

و فى جناح مرسيدس لفت نظرى المجموعة المعروضة كلها بصراحة (مرسيدس دايما محل تقدير و إعجاب) و عجبنى موديل GLK350 4 MATIC لعام 2011

و كمان العربية C180

فى بى إم دبليو كل العربيات مميزة و جميلة لكن الجديد عندهم كان فى X1 و الموديل الجديد من X3
أما جاجوار فعلى الرغم من فخامة و جمال السيارات الثلاث المعروضة إلا أنهم هم نفس الموديلات إللى كانت موجودة فى أتوماك.

رينو فى القاعة دى كانت هى السيارة الشعبية و عرضت لوجان و ميجان و فلونس ..إلخ

القاعة الثانية و هى اﻷكبر و تعتبر قاعتين فى بعض و فيها أجنحة
هيونداى - سيات - شيفروليه - أوبل - كيا - مازدا - سوبارو - بيجو - نيسان - مينى - فولفو - فيات - دايهاتسو - سوزوكى

هيونداى عرضت أهم سياراتها و منها فيرنا و I10 ، I20 ، I30 sw، جينيسيس ، IX35 ، سوناتا و إلنترا ، أكسنت RB و اﻷخيرة تحديدا هى إللى جذبت كل اﻷنظار و بالفعل هى سيارة جميلة فى الشكل و الإمكانيات لكن أعتقد و يتفق معايا ناس كتير إن سعرها محتاج إعادة دراسة و مواصفاتها و صورها موجودة فى قسم هيونداى

، و بالسؤال عن اﻹلنترا أو أفانتى الشكل الجديد قيل لنا على شهر 6 القادم يعنى تقريبا هنشوفها فى أوتوماك.

سيات عرض اﻹبيزا و الليون لكن الجديد كان فى اﻷلتيا XL سيارة MPV أطول شوية من ألتيا العادية و هى فعلا عربية جذابة و جميلة جدا و تصلح للعائلات و السيدات.

شيفرولية عرضت مجموعتها الكاملة من أول السبارك بالشكل الجديد (مقدمة تشبه مقدمة الكروز فى رأيى و رأى ناس كتير مش لايقة على السبارك الصغننة الرقيقة)

و اﻷفيو و اﻷوبترا و الكروز و كمان الميكروباص الصينى N200 و كابتيفا و لانوس

أوبل إكتفت بعرض ثلاث موديلات منهم الكورسا و اﻷسترا هاتشباك و و عربيات اﻷوبل جميلة و قيمة كالمتوقع منها.

كيا عرضت سيراتو هاتشباك ﻷول مرة

بجانب سيراتو العادية و الكوبيه ده باﻹضافة للبكانتو و الريو و السول و الكارينز ، لكن الجميل فى قسم كيا هى العربية كادينزا الفخمة الجميلة بكل معانى الكلمة و هى إبداع جديد من إبداعات بيتر شراير.

مازدا إكتفت بعرض تقليدى لمازدا 3 و مازدا 2

سوبارو ركزت على عرض نماذج مختلفة من السيارة الشهيرة إمبريزا لكن نجمة جناح سوبارو كانت السيارة ليجاسى الرائعة

جناح بيجو متألق كالمعتاد قدم مفاجأة كبيرة بعرض السيارة الرياضية الفاخرة RCZ كوبيه إللى أقصى إرتفاع ليها 135 سم و مزودة بمحرك 1600 CC يعطى قدرة رهيبة تقدر بـ 156 حصان.

و كمان السيارة الجميلة اﻷنيقة 508 الوريث الشرعى لموديلات 504 و 505 ، 407 ، 607 لكن بمستوى جديد من الفخامة و هى توأم السيارة سيتروين C5 و على فكرة العربية دى هيتم تجميعها فى الصين بمصانع شركة دونج فينج.

و كذلك السيارة 5008 MPV إللى إبتدى إنتاجها فى 2009 محرك 1600 برضه بقدرة 120 حصان

كمان عرضت بيجو سيارات 207 و 308 و 3008

نيسان لم تقدم جديد لكن عربياتها كانت محل إهتمام الجمهور بشكل عام نتيجة لتميز أسعارها للأسف نسيت أسأل على معلومات عن السيارة المميزة قاشقاى يمكن علشان مش بتعرض ﻷول مرة.

فولفو
جناح قوى و مشاركة متميزة و أسعار نار لكن تواجد فولفو فى المعرض مثل مفجأة سارة لمحبى العلامة السويدية الصينية بعد استبعاد شبح اﻹفلاس كمان الجناح شمل تشكيلة متميزة و متنوعة من الموديلات من فئات 40 ، 60 ، 70 ، 80 ، 90 وبأسعار أقلها يتجاوز الربع مليون جنيه.

فيات
عرضت فيات مفاجأة 2011 و تمثلت فى عودة السيارة التى أشاد بها الجميع لينيا و عرض نموذج مزود بناقل سرعة أتوماتيك رائع الجمال باﻹضافة

إلى تشكيلة منتجاتها المتميزة 500 و برافو و بونتو بتشكيلاتها المختلفة

باﻹضافة إلى السيارة الرخيصة و التى تذكرنا بسيارات السبعينات و هى السيارة ألبيا و المخصصة لمنافسة رينو لوجان و الصينى و لكن هيهات.

كما عرضت شركات مينى كوبر و دايهاتسو و سوزوكى موديلاتها أيضا

قاعة 3
ليفان - فاو - بى واى دى - إكسبلوجن - مابل و إنجلون - سايبا

تجمعت العلامات الصينى فى القاعة اﻷخيرة و معها أيضا موديلات لسيارات تجارية صينى متعددة و لكن لا يوجد أى جديد فى هذه القاعة سوى بعض التخفيضات و العروض لتنشيط المبيعات، و كما قلت أيضا تواجدت سايبا بجناح كامل و مجهز جيدا و لكن بدون أى سيارة للعرض !!!!

و تنتهى أخيرا جولة المعرض بقاعة معرض اليخوت و الرياضات البحرية الذى أقيم بالتوازى مع معرض فورميلا اﻷهرام للإستفادة من جمهورة كما أظن.

فريق مصر موتورز لتغطية المعرض فى العام الماضى

ملاحظات حول المعرض

1- على الرغم من محاولة بعض الشركات تقديم بعض الجديد إلا أن ظروف توقيت المعرض يبدو أنه غير مناسب لظروف السوق المصرى حيث يأتى فى بداية العام صحيح و لكن فى فترة خمول و ركود فى المبيعات فى حين أن توقيت معرض أتوماك يكون فى بداية موسم المبيعات مما يجعل معرض أتوماك أقوى و أكبر و أنجح كثيرا، لذا فإن على المسؤلين عن تنظيم المعرض محاولة البحث فى توقيت المعرض و محاولة تغييره .
2- مساحة العرض فى قاعة المؤتمرات محدودة و أحيانا تؤثر على جودة العرض لبعض الشركات ، كما أن تصميم بعض القاعات يزيد من طول خط سير المعرض .
4- تخصيص قاعة لسيارات الدفع الرباعى تبدوا خطوة لا معنى لها فإذا كان هذا هو المنهج فى تصميم قاعات المعرض كان يجب تخصيص قاعة للسيارات الصغيرة و أخرى للسيارات السيدان و أخرى للسيارات الفاخرة و هكذا.
5- قاعة السيارات التاريخية أو القديمة رغم طرافتها إلا أنها تمر مرور الكرام بالنسبة للزائرين إلا من قلة ترغب فى تصوير سيارة أو أخرى.

أرجو أن تكونوا قد إستمتعتم بهذه الجولة السريعة و إنتظروا التغطية المصورة من قلب المعرض فى خلال ساعات إن شاء الله و أطلب من اﻷعضاء بدء نقاش حول المعرض و ما قدمه.

الصور بالموضوع كلها أرشيفية و من عدة مواقع على اﻹنترنت

[بدر بسيونى]

اول اشكرا يااستاذ حازم التغطية بس انا اتصدمت كل دول مااشتركوش السنة دى بجد حاجة غريبة وملفته

وخصوصا متسوبيشى اللى المفروض كانت اول من يشترك

[حازم شاهين]

صح أنا إستغربت فعلا و كنت متوقع التوكيل الجديد يعمل دعاية إستعداد لرجوعه السوق لكن يمكن المشاكل القانونيه هى إللى منعته من المشاركة

[hazem_khidr]

شكرا حازم باشا علي التغطيه
في انتظار الصور

[أحمد فاروق سيد]

خسارة العشرين جنيه

سبحان الله
نفس العبارة اللى قلتها وأنا خارج
بس أنا زودت خمس جنيه بتاع الباركينج
فقلت
يا خسارة الخمسة وعشرين جنية
كنت جبت شيكولاته للأولاد بيهم
فعلاً المعرض السنة ده سئ للغاية
وأنتظروا التقرير المصور إن شاء الله