احذروا ناشيونال موتورز النصابين

[aymamgad]

اشتريت لانسر شارك الكاملة من ناشيونال موتورز اسيوط اول الشهر و طبعا يادوب مشيت بيها حاجة بسيطة لغاية ورقها ما خلص ... وفجاة قفلت العربية بالريموت عادى خالص و نزلت اشترى حاجة ... رجعت لقيت العربية مش راضية تفتح خالص !!!
قعدت ادوس بالريموت اكتر من مرة فى كل حتة مافيش فايدة !!!
قلت خلاص افتح بالمفتاح ... وكانت الصدمة ان المفتاح مش راضى يفتح !!!!
كلمت التوكيل و كان الرد : هات سمكرى يفكلك الشبكة اللى قدام و يكشف على البطارية اكيد ضعيفة (مع انى كنت ماشى بالعربية!!)
انا كنت هاتجنن لسة شارى العربية و افك الشبكة ؟
لا و كمان سالت ايه دخل البطارية بالباب اللى مش بيفتح بمفتاحه ؟؟؟؟
وكان الرد : ؟؟؟؟ لا احد يعرف !!!
المهم انا كنت ع الطريق و ما فيش حد ... تطوع واحد كهربائى طيب ييجى معايا و لما شاف العربية جديدة صعب عليه و قال لى : لو فكيتلك الشبكة الدنيا قدام هتبوظ !!
وسالنى : مفيش مفتاح تانى ؟ وافتكرت انى سالت نفس السؤال وقالولى لا هوا واحد بس !!
المهم قدر عن طريق الرفرف يفتح الكبوت و يوصل للبطارية و لقيها سليمة خالص !!
طبعا حصلت بهدلة علشان يوصل للبطارية دا غير الحاجات اللى قعد يجربها و كنت واقف جنبه حاسس انى هاعيط من المهزلة اللى عايشها مع عربية المفروض انى جايبها جديدة و دافع فيها تحويشة عمرى ودلوقتى بقها مفتوح و بيتلعب فيها !!!
خدت تاكس ودخت على بتاع ساعات علشان اغير حجر الريموت (يمكن ؟) وقالولى الحجر سليم خالص .. مع كدة حطيت واحد جديد !
المهم جربنا كل حاجة و مفيش فايدة ... اتصلت بمهندس الشركة و كان رده انى اجيبله العربية القاهرة (طبعا كوميديا لو عرفتوا ان العربية واقفة فى طريق اسيوط - سوهاج و مش بتتحرك !!! دا غير انها اتوماتيك ما بتتزقش)
دا غير الوقت اللى ضاع و البهدلة اللى خدتها و انا دلوقتى سايب العربية على الطريق و مشيت اشوف شغلى
لو برمجة المفتاح طارت المفتاح هيفتح الكالون بتاع الباب عادي
انا قلت نفس الكلام بالحرف لبتاع التوكيل .. وكانت الردود :
-العربية دى جاية بمفتاح واحد !!!
-موضوع ان المفتاح ما بيفتحش دى غريبة و عمرها ما حصلت !!
اللي انا باقوله

فيه حاجة ملعوب فيها مش تمام
انا سألت مدير الصيانة على الموضوع ده قال لي
فيه مفتاح طوارئ حديد داخل الريموت (يتم سحبه من مكانه فيظهر مفتاح كامل عادي جدا حديد) بحيث ان المفروض يتم الفتح به في حالة ما اذا الريموت لم يعمل فأنا مستغرب جدا ان المفتاح الحديد لم يفتح الباب حيث ان فتح الباب في الحالة دي ليس له اي علاقة بالدوائر الكهربية

, شنطه العربيه مش راضية تفتح بالريموت و مافيش مكان لمفتاح !!

انا اعصابى اتحرقت .... كل يوم يقولولى هانبعت لك حد ... و العربية واقفة على الطريق
حضر احد الفنيين بعد ان قام احد العاملين بالتوكيل بالاتصال به .. و الرجل فنى تويوتا اصلا ... لما شاف العربية قال لى :
يا باشا ايه البهدلة دى !!!
طبعا صعب عليه منظرها و طبعا هوا عارف انها عربية جديدة
المهم باستخدام عتلة حديد عرف يفتح الباب ولقى كالون الباب بايظ خالص و قال بالحرف :
انا عمرى ما شفت حاجة زى كدة فى عربية جديدة فى حياتى !!!
وسالنى - كالعادة - على المفتاح التانى !! و كالعادة برضه استغرب خالص لما سمع موضوع انى استلمت واحد
و لقى الريموت بايظ خالص و قاللى تشغلها بالمفتاح و انا هاظبطلك الكالون
وطبعا انا دلوقتى كل حاجة باعملها بالمفتاح


اتصلت بالتوكيل "ناشيونال موتورز" وكان كلامهم معناه "بالذوق" = اخبط راسك فى الحيط !!
ولكن علشان يثبتوا انهم لسه بنى ادمين دلونى على ورشة فى القاهرة اعمل مفتاح و اصلح الحاجات اللى باظت على حسابى !!!!!!!!!!!!!!!!!!


واليكم المفاجات الجديدة :
قبل ذهابى لعمل المحضر فكرت اتمم على كل حاجة فى العربية ووجدت التى :
- كهرباء تحريك المرايا تعمل كلها فى اتجاة واحد !!! (زر الاتجاة الاخر لايعمل مطلقا)
- الجزء المعدنى الذى ينزلق عليه مقعد السائق مكسور من الخلف (والجزء البلاستيك المرتبط به ملزوق بحاجة زى الامير كدة!!)
- لا يوجد غطاء محرك والمواسير الخارجة منه مغطاة بلحام زى بتاع الكهربا (معرفش دا عادى ولا ايه)
- ززر تحريك الرشاش يعمل ولكن لا يخرج ماء (برضه معرفش دا عادى ولا ايه)
- جزع من الشبكة الخارجية مكسور على الجنب
- و اخيرا و من ساعة فتح العربية يظهر انذار afs off ولما رجعت للكتالوج وجدت ان دا معناه "خلل فى النظام" (متهيألى كمبيوتر العربية شخص مشاكل بلدنا كلها بالكلمة دى )
وبالضغط على زر ال afs وجدت انه لا يعمل

ارجوكم دلونى على خطوات "عملية" اعملها علشان اخد حقى (غير انى البس حزام ناسف وادخل فى توكيل ناشيونال موتورز المشمحترم)

[pro mada]

مش عارف اقول ايه بصراحه
دي مهزله بمعني الكلمه
مفيش غير الدعاء و الصبر

لو العربيه بتمشي عادي وديها لأي ميكانيكي او كهربائي معرفه و ارميها عنده ( مؤقتا ) عشان لو حصل حاجه تاني تبقي في السليم و الكلام ده مبدئيا عشان العربيه متتبهدلش اكتر من كده

و لو العربيه مبتنطقش يبقي تجيب و نش المرور عشان توديها للميكانيكي ( بس هتدفع 500 جنيه تقريبا )

تاني خطوه
كهربا العربيه تتفحص كويس عشان اكيد في مشكله كبيره في الكهربا و هتتحل ان شاء الله

و المفاجات اللي حضرتك شفتها دي عيوب صناعه هتتحل في التوكيل غصب عن عنهم عشان دي قله ادب

و ابدأ في الخطوات دي و قولي عملت ايه عشان انا بجد محروق دمي منهم بصراحه و بعدين نشوف ايه النتيجه و ربنا يساهل

[محمد حنفى]

الله يكون فى عونك
بالنسبة لموضوع البطارية ... لو فصلت كل شئ بيفصل فى العربية (ناقل الحركة - فتح الأبواب) وتصبح قطعة حديد ليس لها أى منفعة
وناهيك بقى عن البوابة إذا عطلت العربية كلها تقف

[محمد حمزه2000]

اولا الله يصبرك

ثانيا هدىء من روعك انا عارف انك متظايق جدا واي حد مكانك ممكن يثور
ولكن اهم شىء صحتك صدقني

اعتقد من الناحية القانونية من حقك توضب كل شىء في التوكيل ويرجعولك كل شىء زي مكان ان شاءالله

والف مبروووك على السيارة الله يعطيك خيرها ويكفيك شرها


وادعو من الله ان يصلح الحال ويرحمنا من قليلي الزمم في هذا الزمن الغريب

زعلان علشانك والله
ولكن لا نقول الا قدر الله وما شاء فعل
سلامي وتحياتي لشخصكم الرقيق

اخوك

[AbOnOrA]

كلام استاذ ميدو صحيح الى حد كبير لو البطارية (ميتة) او السلك الواصل من البطارية للعربية مقطوع او متأكل العربية فعلا هتبقى جثه هامدة لكن المفروض المفتاح الحديد يشتغل (بس انا معرفش فيها ايموبلايزر ولا لاء ولو فيها نظامة ايه)

اللى انا فاهمة منك ان العربية شغالة دلوقتى بس المشكلة فى الكهرباء والريموت والحاجات اللى ذكرتها بس شغاله صح ؟؟

لو مش شغالة يبقى قصتك مع كهربائى وبتاع كوالين لو شغالة يبقى ركز معايا فى المهم

- كهرباء تحريك المرايا تعمل كلها فى اتجاة واحد !!! (زر الاتجاة الاخر لايعمل مطلقا)

( عيب كهرباء برضو بس الحاجات ديه تتحل مع كهربائى نظيف يعنى لو العربية لسه مش دايرة خلى اى حد يدورها بعدين باقى الحاجات ديه لازم كهربائى متخصص فى العربيات العالية

- الجزء المعدنى الذى ينزلق عليه مقعد السائق مكسور من الخلف (والجزء البلاستيك المرتبط به ملزوق بحاجة زى الامير كدة!!)

شىء مقلق فعلاً بس مقدرش افتى فيه من غير ما اشوفها

- لا يوجد غطاء محرك والمواسير الخارجة منه مغطاة بلحام زى بتاع الكهربا (معرفش دا عادى ولا ايه)

فيه عربيات كتير بتنزل من غير غطا الموتور ده طبيعى واللحام الشيكارتون ده طبيعى بردو فى العربية للاسف

- ززر تحريك الرشاش يعمل ولكن لا يخرج ماء (برضه معرفش دا عادى ولا ايه)

كهرباء برضو او لو العربية فى الضمان يتحل

- جزع من الشبكة الخارجية مكسور على الجنب

بسيطة معلش اذا كان الكسر يقلل متانتها يبقى (تبت) عليها بسيلكون او حاجة علشان متتكسرش خالص من اى تريحة مع عربية تانية فى الاكصدام وما اكثر التريحات فى طرقنا لكن لو متينة سيبها زى ماهى

- و اخيرا و من ساعة فتح العربية يظهر انذار afs off

- مشاكل الكهرباء ديه كلها وارد انها تكون السبب فى الايروير على الكمبيوتر فلازم العربية يتكشف عليها بالجهاز ويتقرى العطل ايه ويتشال

الاهم من كل ده بقى العربية انت جايبها خليجى ؟؟؟
لان لو خليجى يبقى موقفك صعب شوية لان زى ما انت عارف الخليجى مش بيبقى عليه ضمان

لكن لو جايبها عادى وبضمان يبقى حضرتك تسلمهم العربية وتملى كل مشاكلك فى العربية لمهندس الاستقبال وتاخد صورة من ال job وهو مايفيد انهم استلمو العربية وتعمل فيهم محضر شرطة وشكوى فى جهاز حماية المستهلك او اى جمعية حقوق مستهلك ويستحسن الجهاز مباشرة
وتفهمهم انك هتعمل كده وعلى صوتك وقول اللى انت عايزة بس لما تمسك ما يفيد استلام العربية فى ايدك

اهم اهم حاجة بقولها لكل الناس
يا جماعة اللى يروح يشترى زيرو يكشف على العربية كويس جدددددددداً
بالظبط كانة بيعاين عربية مستعملة

فيه ناس كتير للاسف فاكره ان معنى انه بيشترى زيرو يبقى العربية مفيهاش الهواء وده مش صحيح
ساعات العربيات بتتخبط منهم فى السكة ويغيرو فيها حاجات (والله ده بيحصل) وساعات كبوت بيتجرح يقومو راشينه وساعات يجى يسلم عربية بطاريتها تكون بايظة يقوم مبدلها من عربية تانية والعربية التانية صاحبها هو وحظة وقيس على كده اى حاجة من الرفايع وارد انها تكون متغيرة او اتشالت

فلازم لازم يا جماعة اللى يروح يستلم عربية جديدة (يفليها) سورى يعنى حتة حتة لان ياما شوفت ناس بتكتشف بعدين ان حاجات مش شغالة او خبطات فى العربية او كسور وشروخ فى البلاسيتكات والفيبر ومبياخدش بالة الا بعدين وينشف ريقة فى اقناع الوكيل بعد كده انه استلمها كده وان ده عيب صناعة

انا مقدر ضيقتك طبعاً بس قدر الله وماشاء فعل وصدقنى قضاء اخف من قضاء وبإذن الله الحاجات ديه كلها بسيطة وتتحل فى اول صيانة ان شاء الله وصدقنى عربيات كتير بيبقى فيها حاجات زى كده وبتتحل بعد اول صيانة وانت نفسك هتنساها خالص بعد كده فمعلش اهى اخدت العين وبإذن الله ترجع احسن من الاول ميت مره وتفرح بيها ان شاء الله