انا لله و انا اليه راجعون ... العربية جابت جوان سلندر

[zing0]

السلام عليكم
قدر الله و ما شاء فعل
انا لله و انا اليه راجعون
اللهم أجرنى فى مصيبتى و أخلف لى خيراً منها
=========================
إمبارح طلعت بالعربية مع واحد جارى معاه تاكسى فى رحله أسرية للعين السخنه.
و دى كانت أول مرة أسافر بيها بالعربيه من ساعة مجبتها من 3 سنين, كان آخرها مشوار الشغل و زيارات الأقارب, يعنى بالكتير مشوار 40 كيلو رايح جاى.

صحيت الفجر و بصيت عالزيت و المياه و الكلام إللى المفروض نعمله, و توكلنا على الله.
وصلنا بالسلامة و مفيش أى مشكله و قضينا اليوم و رجعنا طبعاً مرهقين.
و بدأنا رحلة العودة, بعد 15 كيلو بالضبط لاقيت عداد الحرارة عالآخر فجأة و لمبة الزيت نورت !!!
ركنت بسرعة و فتحت الكبوت لاقيت دش مياة ساخن من خرطوم إتقطع من فوق الكولية و نزل المياه كلها.
قطعت الجزء إللى إتخرم و ربطت الخرطوم تانى و و جارى بدأ يزود مياة و إحنا مدورين العربية و مزودين بنزين خفيف, المياة طلعت و عليها طبقة من الزيت, الراجل قالى ده جوان, و بص فى غطاء زيت الموتور لاقى طحينة.
المهم طول الطريق من السخنة لحد القاهرة , نمشى شوية و نقف نبرد و نزود مياه و المشى على أول الغيار الرابع (60 - 70 كم/س) و الحمد لله وصلنا بعد أكتر من 5 ساعات.

الراجل خوفنى و عمال يقول دى ممكن تكون عمره مش جوان بس لأنه عدّى عليه الكلام ده قبل كده , على موصلت البيت كان صوت المكنه بقى عالى جداً.

عاوز نصايحكم و رأيكم فى الموضوع ده
و الأهم تدعولنا.

[mr_astra]

معلش اخ زينجو قدر الله وما شاء فعل
الموضوع سهل ما تقلقش
نتيجة ان الخرطوم اتقطع فضى مية التبريد وبناء علية العربية سخنت فجابت جوان

والموتور صوتة على لما وصلت بالسلامة ودة لان لزوجة الزيت نفسها راحت والزيت فقد خواصة نتيجة المياة المختلطة بالزيت

جوان العربية دى بـ 40 جنية
ومصنعية 100 جنية
انما اعتقد ان الوش قفع عندك ولازم يتقشط على المقشطة او الفريزة
وطبعا لازم تعمل صيانة للوش بالكامل عند نفس الخراط بتاع القشط

بس خلى بالك لو قشط اعرف الخراط قشط اد اية عشان نشوف مع بعض تخانة الجوان المناسب ليها

[ahmed_eng2001]

قدر الله و ما شاء فعل ... ان شاء الله تكون بسيطة و الحمد لله انها رجعتك البيت بالسلامة
زى ما قال استاذنا مستر استرا ... و ان شاء الله يكون خير

[AbOnOrA]

قدر الله وماشاء فعل والحمد لله انها جت على قد كده وسترت معاك لحد ماروحت عيالك
واحد صحبى عملتها معاه فى نص السكة واتبهدل بهدلة تخلية ميسافرش مصايف طول عمرة
والفرق انه مخدش بالة لحد مالموتور قفش فدخل فى عمرة كاملة
انت زى مابتحكى الحمد لله الموضوع فى حدود الجوان بس وترويق الموتور نصيحتى متدورش الماتور تانى واقطرها للميكانيكى ولما يحل المكنة كل حاجة هتبان

[nktis]

الحمدلله و قضا اخف من قضا .
و كويس انها روحتك , انا كان الدبرياج بايظ و بيسقط في المشاوير الطويله و لازم اجيبله علبتين زيت و صنايعي يزودوا و كنت اللي فهمته علي قد فهمي ان فيه حاجه زانقه علي حاجه و الاصح يتغير و نفس الكلام من الميكانيكي اللي ماشي معايا علي العربيه و لك ان تتخيل انك تمشي مره فوق 60 ك تاني و التانيه ربنا لطف و كنت وصلت بتاع 4 ك الي ان ركبت واحد جديد و الحمد لله .

برده في نفس المشوار قبل كدا و لقيت بخار و دخنه طالعين من الكبوت بس بدايات و كان لسه في الاول لان يدوب المؤشر كان عدي الطبيعي بكلام فاضي , كان معايا والدتي و لك ان تتخيل القلق و ربنا ستر و وقفت عالطول و سبتها بتاع ربع ساعه و فتحت القربه لان التنفيث كان منها و لقيت المياه الخضراء كلها علي الارض و زودت مياه حنفيه و خلصت مشواري بالراحه و عيني علي المؤشر و كان غطاء القربه اللي ضرب .,. و الميكانيكي قالي اني وقفت في الوقت المناسب و احمد ربنا .

الحمد لله و قدر الله و ما شاء فعل ,,,,,,,,, طربتني يا راجل من العنوان .