كلاكيع في كورسا 97 1200سي سي عاوز خبير لو سمحتم

[Dr-Mody]

بسم الله الرحمن الرحيم دي اول مشاركة ليا وعجبنى المنتدي وفكرته جدا جدا
نيجي بقه لموضوعنا عشان الاطاله
العربيه مبدئيا بتسخن من مشوار صغير قوي ... يعني المروحه ما بتشتغلش غير بعد تانى شرطه من ال90 مش عارف ده طبيعي ولا لأ خصوصا انها بتوصل احيااااااانا لل 100 لكن بترجع تانى
المشكلة الاكبر بقه ان العربيه لما توصل لل 90 بحس بنتشه خفيفه ولمبة العطال بتنور وتختفي ولو صدف ووقفت في اشاره العربيه بتبطل وما تدورش تانى غير بعد دقيقه دقيقتين كده وطبعا برضو ده علي حسب مزاج الهانم ... بصراحه انا قرفت منها ما اكدبش عليكم خصوصا انى روحت لميكانيكيه كتير قوي في اسكندريه هنا بس من غير اي جدوي ... اللى يقولى عيب طلومبة بنزين واللى يقولى اسبراتير لما يسخن بيفصل واخيرا وليس ااخرا اخرهم قالى ان دبلة الانجيكشن دايبه وعايزه كليبس ده اللي بيخليها تفصل ...
المشكلة التالته وليست الاخيره ... ان استهلاك العربيه للبنزين افتري افتري يعني مش هزار .. هل ده الطبيعي ولو مش الطبيعي اتصرف ازاى ؟؟ استهلاكها الصفيحه ال 20 ممكن من 50-80 كيلو في الزحمه
ارجو الاهتمام

[AbOnOrA]

بص هى الكورسا اللى معاك ديه من العربيات المعقدة وقليل اللى بيفهم فيها واى حد تانى ممكن يقولك احتمالات للصبح ومش هتعرف الا فيها الا لو وديتها مركز متخصص ويتكشف عليها بالجهاز
انا كان لى صديق عنده واحدة زيها وسخنت منه مرة لحد ما المتور قفش راح عملها عملة وتمام التمام بس من بعدها بقت تعمل حاجات غريبة زى ما بتحكى كده وصرف عليها كتير بسبب فتاوى الميكانيكية وباعها بعد كدة وجاب لانسر كريستاله

انا مش بقولك بيعها ديه عربيه جميلة وناعمة انا عارف واقيم بكتير من حاجات تانية فى الرينج ده بس لازم تظبط ميكانيكى او مركز خدمة متخصص فى اوبل وتتابع معاه صيانات العربيه علشان متتبعكش

وان شاء الله حد من الزملاء يفيديك اكتر واهلاً بيك فى مصرموتورز

[aymanabdelwhab]

علي فكره المروحه مش بتشتغل فعلا الا بعد ال 90 بشرطه وتنزل ده عادي جدا .. انتا تقلق منها لما تعدي ال 100 ومتنزلش

العربيه ال 1200 علي فكره مش فيها تعقيد ولا حاجه الكلام ده في ال 1000 سي سي .. حضرتك بس محتاج ميكانيكي كويس اوي عشان يظبطلك الليله دي ..
انا اول مجبت عربيتي حصلي حاجات غريبه بس اول ما خلصتها الحمد لله والشكر لله عمرها مزعلتني والله ما بفتح الكبوت اللي عشان تغيير الزيت وازود الميه .. فانت توكل علي الله وشوف حد كويس بس
وبالنسبه لاستهلاك البنزين ده مش طبيعي خالص... هي بتطلع دخنه سودا من الشكمان ؟؟
بص ممكن الحساس بتاع البنزين عايز يتغير هو عباره عن ابره كده بتقعد تنقط البنزين هتلاقيه عندك بايظ وفاتحها علي البحري غيره بواحد استيراد نضيف وجربه الاول

[thegiant_2]

اكشف على حساس الميه علشان السخونة ........ وموضوع التنتيش والاستهلاك العالي اكشف ع البوجيهات
والعربية اللي معاك يا بيه ماتوديهاش لاي ميكانيكي اكشف بالكمبيوتر وريح دماغك

[Dr-Mody]

الله ينور يا شباب .. موضوع انها بتفصل خلاص الحمد لله اتحل روحت لواحد ميكانيكي بيفهم علي حسب نصايحكم الكريمة وللاستفاده كانت دبلة الانجيكشن مقطوعه وكان البنزين بيتكتم والعربيه بتشرق وتفصل دايما لكن الحمد لله اتحلت واستهلاك البنزين كمان قل خالص تقريبا وصل النورمال ده لحد دلؤتى الله اعلم ايه اللي ممكن يحصل مش فاضل بس غير موضوع السخونيه ده مش عارفله حل موضوع انى اغير ترموستات ل بتاعة 128 ايه رأيكم فيه ؟؟؟