البيه البواب..سفالة وقلة أدب وازعاج ليل نهار هو وعياله..ارجو المساعدة

[Mohamed H Mohamed]

السلام عليكم..حضرتك المشكلة بتاعتي تبدو بسيطة ولكنها مشكلة كبيرة في اي دولة قانون وأي دولة محترمة، احنا في العمارة بنعاني معاناة كبيرة جداً من البواب وأطفاله والازعاج غير الطبيعي اللي بيعملوه ليل نهار لدرجة ان جيراننا من العمارة المقابلة اشتكوا صاحب عمارتنا ولكن لا حياة لمن تنادي، أسرتي فيهم ناس كبار في السن مابيعرفوش يناموا ولا حتى يتكلموا في التليفون من كثر الازعاج والصراخ بتاع الاطفال والبواب نفسه هو ومراته وكثير بيتخانقوا وبنسمع الفاظ في منتهى القذارة والانحطاط!..وانا مش قادر اشتغل وجيراننا اللي بيذاكروا مش عارفين يفتحوا كتاب، العيال بتلعب في جنينة العمارة وكأنها جنينة القصر بتاعهم وفي داهية السكان، حاولنا بكل الطرق السلمية مع صاحب العمارة ومع البواب لدرجة اعطائهم اموال والتكفل بمصاريف دراسة الاطفال يمكن يتعلموا الأدب في المدرسة، ولكن للاسف المقابل كان قلة أدب وسفالة وازعاج اكثر من الأول وكمان بيستقبلوا ضيوف بعيالهم كل يوم، الطبيعي اني فكرت اتقدم ببلاغ في القسم بس حضرتك عارف طبعاً حال الأقسام النهاردة ومش بعيد "يستهيفوا" الشكوى وموضوع الازعاج يعتبر رفاهية في بلدنا رغم انه المفروض في اي دولة محترمة ده جريمة والمفروض انه حتى ضد الشرع والاخلاق قبل كل شيء..أنا حضرتك فكرت أقدم بلاغ في صاحب البيت نفسه طالما موضوع الازعاج مش هيفيد..يعني هو باني غرفة خشبية للبواب في حديقة العمارة وده السبب الرئيسي طبعاً في الازعاج المستمر لأنهم شغالين لعب وصراخ ليل نهار وهما في كشك بين عمارتين
السؤال هو:
- هل الغرفة الخشبية دي تعتبر مخالفة؟ وايه الاجراء اللي اقدر اتخذه عشان الغرفة دي تتشال وبالتالي يرجعهم الغرفة الاصلية اللي داخل العمارة اللي المفروض يقعدوا فيها ونخلص من قرفهم وازعاجهم
- لو أمكن في الحالة دي أعمل بلاغ ازعاج هل توجد مواد في القانون المصري تجرم الازعاج وإيه هي؟
ألف شكر لحضرتك مقدماً وآسف على الإطالة وأرجو الإفادة عشان احنا خلاص فعلاً مش عارفين لا ننام ولا نرتاح ولا نشتغل

[mokema]

انت وباقى سكان العمارة اجتمعو على رائى واحد واستغنو عن خدماته وامتنعو عن دفع مرتبه الشهرى. ايه المشكلة

[نبيل عبدالرحمن]

إنتم عاملينها مشكلة وفى ايديكم الحل
فى ألف واحد يتمنى يشتغل بواب
إطردوا البواب ده هو وأسرته وجيبوا واحد تانى يكون بدون أولاد وإشترطوا عليه كده ولو صاحب العمارة عارض يبقى زى ما قال mokemaما تدفعوش له أجرته وخلاص

[aamke]

أنا مبدئيا بأيد فكرة الأخ موكيما ، في حالة عدم نفعها اذهب للقسم و اجمع عدد من الجيران بالعقار و اذهبوا للقسم و اعملوا محضر إزعاج ضدهم و ضد صاحب العمارة اللي مقويهم على السكان و اذكر عدم استطاعة الطلبة على المذاكرة و عدم استطاعة كبار السن على الراحة و الهدوء .... إلخ

[Mohamed H Mohamed]

ألف شكر لحضراتكم أولاً على التفاعل والمساعدة..

بالنسبة لطرد البواب للاسف مش في ايدينا، العمارة احد العمارات القديمة بمصر الجديدة ومعظمها تقريباً ايجار قديم يعني..الموضوع في ايد صاحب العمارة وهو قالها على بلاطة كدة مرة ان مش هيلاقي حد يديله نفس المبلغ الا البواب ده! والله قبله جيه كذا بواب وكلهم معاهم اولاد بس محصلش حاجات بالسفالة دي..هو غالباً عايز يطرد السكان عشان يبيع الشقق تمليك ولمح لنا قبل كدة انه بيحاول يرضينا بس لو مش عاجبني في اماكن كثير تانية..

عموماً لو الموضوع هيوصل للقسم هاوصله لوحدي وبالكثير ممكن يتضامن معايا جار واحد..أه كل الجيران بتشتكيهم ومش طيقاهم بس وقت الجد ووقت ما اطلب منهم اننا نروح القسم حضراتكم عارفين السلبية بقى..فأنا محتاج حل قانوني عشان اخلص منهم ومش عارف هل موضوع الاوضة الخشب بناءه ده قانوني كدة في الجنينة؟ لو مش قانوني يبقى تتهد والمشكلة تتحل..انا اعرف ان زمان كان في اوضة برضو زيها واتشمعت وصاحب البيت جاب واسطة من القسم وفتحها تاني وبعدين اتهدت واتبنت الاوضة الخشب