Fiat 126

[bassambassam]

السلام عليكم ورحمه الله وبركاته ..

علي اجمد اعضاء ف اجمد منتدي للسيارات ف مصر .. ويمكن العالم العربي كمان ..


انا كنت جاي اسألكم واخد مشورتكم في حاجه تخصني لسه جايبها طازه من اسبوع ,,


انا جبت عربيه 126 فايت
طبعا عارفنها ... اصغر عربيه عرفها تاريخ البشريه :D


بس ف الحقيقه انا جايبها عشان اتعلم عليها السواقه .. وبالمره احفظ الشوارع عشان انا مش خبير ف الشوراع المصريه اوي وكدا وبتاع ..


المهم .. انا عايز اعرف اي حاجه عن العربيه دي ..

مواصفاتها ... امكانياتها .. لو حد اتعامل معاها ,,, انطباعه ايه عنها ..

بتستحمل المشاوير ؟؟

طب لو عايز اظبطها .. ابتدي بايه فيها .. الاهم ايه يعني وبعد كدا المهم ...

اخد بالي من ايه وانا سايقها ؟؟

هيا علي فكره 600 سي سي .. موديل 93

وبصراحه دوخت عليها ع النت .. ومش لاقي شرح جامد ليه ويجيب من الاخر .. من الواضح ان النت جه بعد ما صنعوها :D



كمان طلب ::
انا لسه جديد ف السواقه .. ولسه هطلع الرخصه ان شاء الله قريبا ..
فكنت عايز اعرف .. اخد بالي من ايه ف العربيه .. يعني الزيت وغياره ...
والبنزين والعجل والحاجات دي ,,

ايه اكشف الدوري .. وكل قد ايه ؟؟
الاساسيات اللي اي مستجد ف الحوار ياخد باله منها


فانا اتمني انكم تساعدوني .. وتفيدوني ..


وشكرا

[فاطومه المصريه]

وعليكم السلام

منور المنتدى

ومبروك العربيه عليك حتى لو كانت صغننه بس ربنا يكفيك شرها

وبالنسبه لاسئلتك ان شاء الله الاخوه يفيدوك

[فادى]

الفيات 126 انتجت للمرة الأولى عام 1972 لتستبدل الصغيرة فيات 500. و أوقف انتاجها فى ايطاليا عام 1980 و لكنها استمرت تنتج فى بولندا الى العام 2000, و تم تجميعها فى مصر بواسطة النصر للسيارات فى أوائل التسعينات.
المحرك 594 سى سى يولد قوة قدرها 23 حصان.
وزنها يبلغ 580 كغ تقريبا.
و حققت ال126 نجاحا هائلا و مبيعات جيدة جدا لكنها لم تحظى بشهرة الفيات 500, و تسمى فى المانيا بالBambino أى الطفل الصغير بالايطالية.
ال126 تعتبر نسخة مصغرة من ال127 و لكن بمحرك خلفى, و تم الاعتماد فى صناعتها على عدة عناصر مأخوذة من ال127, و هى أصل السيات 133 التى انتجت لاحقا فى عام 1974.
فى النهاية مبروك عليك عربية لذيذة و مدمجة جدا بقدرات لا بأس بها, و ربنا يديك خيرها و يكفيك شرها.

[bassambassam]

المشاركة الأصلية كتبت بواسطة فاطومه المصريه وعليكم السلام منور المنتدى ومبروك العربيه عليك حتى لو كانت صغننه بس ربنا يكفيك شرها وبالنسبه لاسئلتك ان شاء الله الاخوه يفيدوك

شكرا ليكييا فاطومه .. ويارب يكفيني شرها .. اللهم امين

المشاركة الأصلية كتبت بواسطة فادى الفيات 126 انتجت للمرة الأولى عام 1972 لتستبدل الصغيرة فيات 500. و أوقف انتاجها فى ايطاليا عام 1980 و لكنها استمرت تنتج فى بولندا الى العام 2000, و تم تجميعها فى مصر بواسطة النصر للسيارات فى أوائل التسعينات. المحرك 594 سى سى يولد قوة قدرها 23 حصان. وزنها يبلغ 580 كغ تقريبا. و حققت ال126 نجاحا هائلا و مبيعات جيدة جدا لكنها لم تحظى بشهرة الفيات 500, و تسمى فى المانيا بالBambino أى الطفل الصغير بالايطالية. ال126 تعتبر نسخة مصغرة من ال127 و لكن بمحرك خلفى, و تم الاعتماد فى صناعتها على عدة عناصر مأخوذة من ال127, و هى أصل السيات 133 التى انتجت لاحقا فى عام 1974. فى النهاية مبروك عليك عربية لذيذة و مدمجة جدا بقدرات لا بأس بها, و ربنا يديك خيرها و يكفيك شرها.

الف شكر يا فادي باشا .. تشكر يا باشا علي المعلومات .. انا اول مره اعرف تاريخ العربيه بصراحه :D


وانا منتظر حد يكون تعامل مع العربيه .. يقولي انطباعه عنها .. هيكون فادني كتير جدااا

[hazem_khidr]

الف الف مبروك علي العربيه يا بسام و ربنا يكفيك شرها
ال126 من العربيات اللذيذه جدا و سهله الصيانه و افضل من السيات 133
هو زي ما فادي قالك السيات 133 طلعت بعدها و كانت بتعتبر خليط من ال126 و ال127
الميزه فيها ان تبريد الموتور هوا مش ردياتير زي السيات و دا بيخليها ما تسخنش ابدا.
بالنسبه للصيانه
تغيير سير الدينامو و اعتقد ان الكاتينه بتاعتها جنزير مش بتحتاج تتغير غير كل فين و فين
تغير جميع الفلاتر (زيت و بنزين و هوا) و تغير زيت موتور و اي نوع مش مشكله مش حيفرق
العربيه بتمشي ببنزين 80 عادي جدا وموفره في البنزين التانك بتاعه متهيالي 25 لتر

مافيش اي عيوب مشهوره للعربيه بالعكس من السيارات المعمره اللي قليل لما البارومه تسرح فيها
وربنا يباركلك فيها يا رب