حادث ولكن قدر ولطف !

[Ahmed Sami mohamed]

السلام عليكم
مش هطول عليكم فى الكلام انا عملت حادثه كنت راكب مع خالى الموتسيكل وراحين نجيب شغل من طنطا ( طريق اسكندريه _ طنطا ) وبالقرب من منطقه سمرمون خبطتنا عربيه نص نقل دوبل من الجنب فخالى اللى كان سايق الموتسيكل اتخبط براسه فى العربيه وبعد كده فى الارض وبعد كده على جنب الطريق اليمين وانا زحفت واتقلبت 20 متر على الاسفلت فى نص الطريق والحمد لله العربيات ورايا وقفت وكانت نتيجه الحادثه ...

ليا أنا شخصياً
1_ 9 جروح .
2_ كدمات وسحجات فى مختلف انحاء الجسم .

خالى
1_ جرح فى الراس خد 14 غرزه .
2_ كسر فى 5 ضلوع فى الصدر

سبب اصابتى /
انى طرت من على الموتسيكل وزحفت 20 متر على الاسفلت .

سبب اصابه خالى /
على الرغم من ان خالى كان لابس الخوذه الا انها امتصت الصدمه الاولى وبعد كده سابت من على راسه لان الكلبس ( زرار التثبيت كان مكسور ) الا انها الحمد لله شالت كتير .

سواق النقل الهربان !
سواق العربيه اللى خبطنا ربنا يسامحه بعد ما خبطنا ورمانا على الاسفلت بدمنا سابنا وجرى .

رساله /
أحب اوجه رساله للسواق اللى خبطنا , انته يمكن خبطتنا وسبتنا على الاسفلت بدمنا فى نص الطريق وطلعت تجرى , لكن مش هندى عليك بل بالعكس ربنا ميحطك فى موقف زى ده , مش عشانك انته عشان أهلك ميتخضوش عليك ويحصلهم زى محصل للاهلى لما عرفوا انى فى المستشفى .

رساله شكر /
بجد لازم اشكر شرطه النجده والاسعاف على طريق طنطا _ اسكندريه لانى اتصلت بيهم الساعه 11.2 كان عربيات النجده قدامى الساعه 11.8 وبعد كده الاسعاف اللى مسبناش طول محنا فى المستشفى والنجده اللى اتصلت بيا بعد ما مشينا وشافونى ان كنت بخير او محتاج اى حاجه .

اخر حاجه يارب تكونوا استفدتم درس من الحادثه دى , الحداثه حصلت واحنا ماشين بالراحه جدا ولابسين الخوذه وفى اقصى اليمين .... ساعات انته بتخاف على نفسك وعلى غيرك , بس غيرك مبيخافشى عليك !

[jojojojojo]

الف سلامه عليك وعل خال حضرتك بس ارجوك بعد الحادثه متركبش موتسيكلات تاني عشان هي اصلا ملهاش اماكن مخصصه في الطرق زي البلاد التانيه والطرق مش مساعده اننا نركب وسيله نقل مفيهاش اي عوامل الامان في البلد قل فيه الامان والحمد لله انها جت علي قد كده لاقدر الله حادثه الموتسيكلات بموته بس الحمد لله والف سلامه تاني مره وربنا يشفيكم ويشفي جميع المسلمين

[hal71]

ألف حمدلله على السلامة و أرجو من الجميع عدم إستعمال الموتسيكلات لأنها عبارة عن نعوش متحركة و وسيلة مهينة جداً للإنتقال

[mhamdy75]

الف مليون سلامة لك ولخالك

[Ahmed Sami mohamed]

شكراً للاهتمام حضراتكم
وفعلا اليوم ده كنا هناخد العربيه بس جوه طنطا كان فيه قلق وضرب والشوارع الكبيره فيها مظاهرات فقولنا ناخد الموتسيكل خفيف ونخش بيه فى الشوارع الصغيره , لكن الحمد لله على كل حال ♥