تقرير صيانة 60000 كم وتقييم لهيونداي فيرنا

[YahiaAshraf]

العربية موديل 2010 هاف اوبشن طبعا فتيس مانيوال
عدادها وقت الصيانة كان عامل تقريبا 60150 كم
دا طبعا عدادي فور اتمامه ال 60000 كم بحمد الله كنت على الدائري مارا بالمرج باتجاه مسطرد والطريق كان مزدحم شوية فكنت ماشي بسرعة قليلة جدا فقلت فرصة اصور وانا ماشي بدل ماقف









المهم حددت معاد الصيانة يوم الخميس وتوكلت على الله وطلعت على سبيد سيرفيس في جسر السويس ورا حديقة بدر مباشرة :D
مركز المهندس هاني

قبل ماروح لمركز سبيد كار سيرفيس عديت على اوتو عمرو اشتريت من عنده قطع الغيار اللازمة للصيانة الدورية -صيانة ال 60000 كم- وهي عبارة عن الآتي:-


سير دينامو وسير تكييف أصلي








بليتين كاتينة موبيس -أصلي - لوحدهم ب 185 جنيه





سير الكاتينة الأصلي لوحده دا ب 185 جنيه

سير باور أصلي

طقم بوجيهات أصلي Champion زي اللي كانت راكبة فيها من الفابريكة

فلتر هواء كوري

فلتر بنزين موبيس -أصلي-

مجموع قيمة الحجات دي تقريبا 600 جنيه



دي صورة الموتور قبل ما نبتدي شغل :D
محدش يشتم عشان كانت حالتها يرثى لها الحقيقة







طبعا اللي كان واضح انه خارج بحالة مش كويسة هو سير الباور اما بقية السيور فكان وضعها جيد رغم ان المهندس هاني بيقول انه مينفعش الحكم عليهم بالعين المجردة
البوجيهات طبعا كان ليا تجربة مع بوجيهات NGK 2 شمعة كانت جيدة جدا بس تعبتني في الشتا الحقيقة والعربية كانت بتقطع في بداية اليوم والجو بارد وكدة لكن لما العربية كانت بتسخن كانت بتظبط
بدأ العمل في العربية وبدأنا تغيير السيور ودي صور أثناء العمل

طبعا هنا سير الكاتينة لسة راكب -دا القديم - واللي خرج وانا اعتقد انه كان ممكن يمشي اكتر بكتير من 60000 كم لكن المهندس هاني اكدلي ان كدة كويس اوي عليه

بعد ما خلصنا دا رجلشنا فرامل وربطنا عفشة ونضفنا انجيكشن وغيرنا الفلاتر كمان وظبطنا الدنيا
وتم غسيل الموتور وتنضيف السربنتينة
دي صورة موتوري بعد الغسيل





في الواقع مش هتكلم عن المصنعيات لأني واخد خصم خاص في الحقيقة وتمن مصنعية الصيانة لا يذكر بالنسبة للخصم بتاعي ولكن خلونا نتكلم عن السعر قبل الخصم واللي انا شايفه مناسب جدا
مصنعية تغيير سيور 100 جنيه
مصنعية بقية الصيانة 50 جنيه
بعد كدة خدنا الفاتورة التمام المختومة بختم سبيد كار سيرفيس وركبت عربيتي وتوكلت على الله وانا حاسس انها هتقفز من على الارض قفز

ودي صورة للعربية بجوار المهندس هاني
طبعا كاميرة موبايلي مش بالجودة المطلوبة ولكنها كانت صورة للذكرى





تقرير عن السيارة:-

*الموتور : لا يزال الموتور يعطيك احساس التحكم في الطريق من حيث القوة وأنك قادر على التسارع بصورة فجائية متجاوزا كل من هو حولك
لا زال الموتور بنفس حالته وتسارعه الرائع جدا وفي لحظات يمكنك الوصول ل 150 وما بعدها -اخر تسارع عملته للفيرنا من صفر ل 100 كم كان في 10 ثواني- ودا كان قبل الصيانة بشهر تقريبا
يعتبر موتور الفيرنا وسهولة التعامل مع الاجزاء الميكانيكية له من اسهل وأفضل ما يميز الفيرنا
تسارع الفيرنا جيد جدا الى سرعة 160 كم تقريبا من ثم يبدأ التسارع في الانخفاض وتزداد السرعة ببطء قليلا ولكنها تصل ل 200 كم بسهولة ويسر ودون عناء

*العفشة:
عفشة الفيرنا من العفشات الطرية التي تعطيك احساس النعومة على الطريق وتقلل من احساسك بالمطبات على السرعات المنخفضة لكن هذا ينعكس سلبا على ثبات السيارة على الطرق على السرعات العالية وهو ميزة وعيب من كلا الجانبين

*الثبات:
ثبات السيارة ممتاز فيما تحت ال 120كم ولكن بعد ذلك تشعر بخفة وزن السيارة بصورة كبيرة ويزداد احساسك بمطبات الهواء على الطرق ولكن من زيادة حمولة السيارة -عدد الافراد- يزداد ثباتها ليصبح جيدا حتى سرعة 150 كم وهو ثبات رائع جدا
*اختلف أداء السيارة من حيث الثبات مع تغيير الاطارات النسر التي كانت فيها -حيث قضت معي مسافة 48600 كم - بتركيب اطارات جووديير أصبح الثبات أفضل قليلا نسبيا وزادت قدرة الفرامل وقدرة السيارة على التوقف

*القدرة على المناورة:
السيارة رائعة جدا في المناورة حتى 120 كم -انا شخصيا كنت اتخطى السيارات مع تغيير الحارات على الطرق على سرعة 160 وكانت معقولة لحد كبير لكن الغلطة بفورة زي ما بنقول - لذلك تعتبر السيارة جيدة جدا فيما تحت ال 120 كم

*الفرامل:
الكثير يعيبون على الفيرنا على ضعف فراملها ولكن الحقيقة عكس ذلك
مشكلة الفيرنا تكمن في شيئين لا ثالث لهما
الأول وزن السيارة الخفيف نسبيا مع هذا الموتور القوي جدا
الثاني عدم قدرة السائق على التعامل مع الفرامل
من مواصفات الفرامل الجيدة القدرة على الوصول لمرحلة الانغلاق التام -يعني الكاوتش يكسح منك ويكلبش زي ما بنقول بمصطلحاتنا الدارجة او يصرخ منك - هذا ان تم فهذا يعني ان منظومة الفرامل جيدة
اذن هذا يحدث في الفيرنا فالرامل جيدة
لكن مع الوزن الخفيف لجسم السيارة يصبح توقفها شيء صعب
إذا ما العمل.؟!
اولا استخدام الفرامل مع وضع الفتيس في حالة التعشيق حتى تستفيد من الفرملة الاوتوماتيكية للموتور
ثانيا الضغط على الفرامل ولكن ليس للمرحلة التي تجعلها تصل للانغلاق التام ولكن تضغط على الفرامل بكل قوتك دون ان يحدث انغلاق تام وبالتالي تقوم بعمل ال ABS بصورة يدوية ومن ثم تحصل على اقصى استفادة من الفرامل
ثالثا سقط نقلات لو لقيت انك محتاج تقف اسرع بمعنى سقط نقلات عكسية ودا انا بعمله ومفيش منه مشكلة لا تقلقوا

*ارتفاع السيارة عن الأرض:
السيارة مويلات 2010 وما بعدها تم تعديل ارتفاعها عن الارض وتم رفع الشكمان الخاص بها وبالتالي أصبحت أفضل وأصبح من الطبيعي ان يركب بها 4 أضخاص وتتجاوز المطبات بكل سهولة ودون أي مشاكل

*استهلاك البنزين:
داخل المدينة مع استخدام المكيف تستهل تقريبا 20 ليتر بنزين لكل 180 كم
على الطرق السريعة بمتوسط سرعة 100 كم يمكن ان يتكون الاستهلاك 45 ليتر بنزين لكل 550 كم

العربية بقالها معايا تقريبا سنتين ونصف
عملت بيها في خلال الفترة دي 60600 كم
هي جيدة جدا وممتازة ومبتقولش لا الحقيقة
تجري بتجري معاك وعندها استعداد تفترس اي عربية على الطريق معندهاش مانع مطلقا انها تلحق الهزيمة بأي سيارة في نفس فئتها من حيث التسارع ولكن على الطرق السريعة المستقيمة او ما يطلق عليه ال drag race
ليست سيئة في المناورة ولا في العفشة ولا في الفرامل فالفرامل جيدة جدا
كسيارة مدينة فهي رائعة ويمكن أن تحصل على تقييم
8.5/10
أنا أرشح السيارة لمن يرغبون في سيارة اقتصادية جيدة واعتمادية ولكن عليهم ألا يطلبوا منها أكثر مما تستطيع !

منقول من الزميل العزيز
Ashraf_Ibrahim


تحياتى

[michaelmic]

مبروك يا باشا و كنت عاوز اعرف فين اوتو عمرو و انت فعلا ضامن ان حاجاته اصلى اصلى ؟؟؟

[fadymedhat]

الفيرنا عربية ممتازة و الموتور قوى و بتتحمل البهدلة....

[eng/walaaeldeen]

السلام عليكم
مجهود مشكور

والله المستعان

[mohamedhendawy]

ممكن ياباشا عنوان سبيد كار سيرفس
وارقام تلفونات ان امكن علشان انا داخل على الصيانه انا كمان وعايز اعملها قربت على 60 الف