فين التقرير الشامل عن الوجان

[mohamed1979]

المشاركة الأصلية كتبت بواسطة AboNoRa قريبا جداااااااا هنعمل تقرير مصور عن العربية بس بصراحة العربية وسعرها مش مستاهلين تقارير نارية ولا حاجة الموضوع كلة عبارة عن فرقعه مفتعلة لتحريك السوق الراكد ليس اكثر ولا العربية جديدة ولا سعرها متميز

ايه الكلام الغريب ده
اولا العربيه امكانيتها عاليه جدا
وسعرها مستاهل جدا
هات عربيه بنفس الأمكانيات والقوه والكفاءه
ايه تانى بنفس السعر و الأمكانيات و الأمان التى توفرها اللوجان
ولا يمكن حضرتك مقتنع بالصينى مع كل الأحترام لمحاوله الصينى اختراق السوق المصرى
وبعدين السوق مش راكد ولا حاجه السوق فيه بيع وشراء بصوره جيده


والله الموفق

[pro mada]

انا رايي من راي ابو نورا ( حبيبي و ميرسي علي تثبيت موضوعي ) العربيه مش جامده للدرجه ( ماعدا انها بتطير و بتعوم ههههههههههه ) و مسنين التقرير بفارغ الصبر ( مش اوي يعني الا اذا كان تقرير من ابو نورا )

[yasser_25869]

السلام عليكم ياجماعة
انا معجب جدا بالعربية اللوجان وعشان كده انا جايب تقرير من النت ان شاء الله يعجبكم
رينو لوجان 2010
تقرير مصور
الحمد لله...إستلمنا عربية حمايا يوم الأحد الماضي...
رينو لوجان موديل 2010...فول أوبشن (أعلي فئة)
سعرها 66900...و هو السعر الرسمي...تم الحجز والإستلام بفرع محمد زكي بالقطامية...و فترة التسليم كانت في خلال 15 يوم تقريباً
ما يلي هو سرد لتفاصيل السيارة...و كما تعرفون...الصور أبلغ طريقة لإيضاح الإشياء
1. السيارة من الخارج

تتميز السيارة بخطوط بسيطة...واضحة المعالم بدون تعقيد أو محاولة لإثبات عبقرية التصميم كعادة سيارات رينو...السيارة تشعرك بعض الشئ بأنها شاهين موديل 2050...و هي بالفعل تعتبر في رأيي الوريث الشرعي للشاهين في شوارعنا المصرية...

السيارة تصميمها كومباكت نوعاً ما...تشعرك بأنها صغيرة و طولها مدكوك في بعضه...لكنها تخبئ بداخلها مساحات مهولة سوف نتكلم عنها لاحقا...



يمكن ملاحظة شريط الكروم أسفل الشنطة...و هو متوافر في الفول أوبشن فقط
المرايات الجانبية:


جنوط حديد بطاسات...و كاوتش 185 15


لمبة الستوب:

با يوجد توربيدو (البلاستيك الأسود) خلف الكابوت تحت المساحات (كما بالصورة):

تانك البنزين...فتجه من الخارج:

وهذه مفاتيح السيارة....واحد مزود بريموت كنترول لفتح و غلق السيارة عن بعد...و الأخر بدون..
مع العلم ان ان المفاتيح مشفرة..أي لا يمكن عمل نسخ منها إلا بالرجوع إلى التوكيل أو أحد المتخصصين...
و مع العلم أيضاً ان الريموت متوافر في الفول أوبشن فقط

2. السيارة من الداخل:

تتميز السيارة بالوسع الشديد سواء في المنطقة الامامية أو الخلفية أو الشنطة...
التابلوه و العدادات و الكونصوال الأوسط يتميزوا بالبساطة في التصميم...مع عدم إغفال إضافة بعض التكنولوجيا الحديثة
الخامات الداخلية مقبولة إلي حد كبير...و تتفوق علي الفيرنا و اللانوس بدرجة كبيرة...من حيث جودة الخامات و التشطيب..

نبدأ بأهم جزء بالسيارة...و هو الجزء الخاص بمالكها و سائقها....مقعد القيادة...
وضعية القيادة كانت غريبة بالنسبة لي...كنت حاسس اني مرتفع جداً...لكن أعتقد الكرسي كان مرفوع...لأن به خاصية تعديل إرتفاعه...وجدت عيب إخر تتفوق فيه سيارتي البيكانتو بشدة...وهو مساحة الزجاج الامامي...حيث انها كانت ضيقة و غير مريحة في بداية الامر...لكن مع التعود أصبح كل شئ جيداً

عجلة القيادة و تحتوي علي إيرباج للسائق:

العدادات:
الخلفية البيضاء و شاشة المعلومات في الفول أوبشن فقط
عدادت البنزين و الحرارة...ديجيتال في شاشة المعلومات


دعونا نلقي نظرة علي وظائف كومبيوتر المعلومات:
القائمة الاولي: إستهلاك البنزين باللتر كل 100 كيلومتر

القائمة الثانية: المسافة المتبقية حتي نفاذ البنزين بالتنك:

القائمة الثالثة: المسافة المقطوعة من بداية الرحلة:


القائمة الرابعة: متوسط السرعة:


القائمة الخامسة..كم لتر بنزين مستخدم منذ بدء الرحلة:

القائمة السادسة و الأخيرة: عداد الكيلومتر الاساسي:


منظر عام للعدادات أثناء الليل:

زراع المساحات...و به زر التحكم بوظائف الكومبيوتر:

زراع الإشارات و التحكم في الفوج لايت الامامي و الخلفي...و لمفاجأتي...به زر الكلاكس (حيث لا يوجد كلاكس بالدركسيون)

مفتاح التحكم في إرتفاع النور الامامي....و الطريف انه لا يعتمد علي موتور في الفانوس مثل باقي السيارات...لكن يعتمد علي واير زي بتاع فرامل العجل


ننتقل إلى الكنصول الأوسط:

فتحات التكييف:

سي دي بلاو بونكت..أوديو فقط بدون إم بي 3...لكن صوته محترم و نقي جداً...و بسيط للغاية في الإستخدام...أهم ما يميزه ان لون خلفيته و الزراير الخاصة به...نفس لون الثيم العام للسيارة و هو البرتقالي
يوجد بالسيارة عدد 4 سماعات..2 بالإبواب الأمامية...و إثنين في الرف الخلفي...قايمين بالواجب و زيادة

وحدة التحكم ببعض وظائف السيارة (من اليمين)
1- الزجاج الكهربائي الأييمن
2- مفتاح غلق و فتح السنتر
3- مفتاح الإنتظار
4- سخان الزجاج الخلفي
5- الزجاج الكهربائي الأيسر

لوحة التحكم بالتكييف:

منطقة للأكواب و بها طفاية متحركة حسب الحاجة:

عصا الفتيس:

زرار التحكم بالمرايات الكهرباء
و زر منع فتح الزجاج الكهربائي

الزجاج الكهربائي الخلفي:

هذا مكان تخزين ظريف بالتابلوه...ممكن إستخدامه للمناديل...

و ده درج التابلوه...مضاء و في أخره يوجد فيشة الكومبيوتر الخاص بالسيارة مغطاه بغطاء بلاستيكي:

ننتقل الأن لسقف السيارة...حيث يوجد جراب ظريف للنظارة:

الشماسة اليمنى..بها مراية...أما الخاصة بالسائق...فبدون:

تنجيد الكراسي و الخامة ممتازين...
نوع التنجيد ده في الفول أوبشن فقط:

شكل بطانة الباب...و هي في رأيي جميلة جداً:
اللون الفضي في جميع أجزاء المقصورة موجود فقط في الفول أوبشن

عتب السيارة رينو (في الفول أوبشن فقط)

مساحة الأرجل بالكنبة...ممتازة عن حق...لاحظوا ان كرسي السائق راجع علي أخره...و قعدت علي الكنبة كانت مريحة جداً و الكرسي بالكاد يلمس ركبتي...العربية ممكن تشيل 3 مستريحين قوي و ممكن 4 بس مزنقين شوية..

مساند الرأس الخلفية:

الشنطة: ممكن أفرش و انام فيها...510 لتر

العدة: مثبتة علي جانب الشنطة:
الإستبن...نفس الماركة و المقاس ميشلان صناعة روماني

3. غرفة المحرك
منظمة بعناية و تقفيلها جيد...

غطاء المحرك:
بطارية جافة ماركة تيودور...بترخيص من رينو:
4-تقييم مبدئي

ملحوظة: بالطبع هذا ليس الحكم النهائي على أداء السيارة...لعدم تعاملي معها بالشكل الكافي و نظراً لعدم وصولها لل3000 كيلو...و هي في رأي المسافة الكافية لتليين السيارة بشكل كامل...لذلك...ما يلي هو مجرد تقييم مبدئي مبني علي قيادة داخل البلد و على طريق سريع لمسافة 50 كيلو متر...و بالطبع قد تتغير وجهة نظري في بعض الأشياء مع مرور الوقت

المحرك

نبدأ ندور العربية...نسمع صوت المحرك و هو عالي بشكل ملحوظ...يعني العربية دي مش من العربيات اللي تبقى قاعد فيها و مش عارف إذا كانت دايرة ولا لأ...بالعكس...صوته -وإن كان خافت- لكنه ملحوظ....

ندي الغيار الاول و نبتدي نتحرك...طبعاً لم أتجاوز ال3000 لفة نظراً ان السيارة لم تكن قد تخطت ال 250 كيلو بعد...و بالتالي لم أجد تسارع مبهر

الغياراين الأول و الثاني تشعر من خلالهم ان صوت الموتور عالي و خشن...لكن يتضائل هذا الشعور بمجرد تعدي سرعة ال 50 كيلو/ساعة...و مع الغيار الثالث و ما بعده

رغم ان المحرك هو نفسه الموجود في الميجان 1...لكن أشعر انه أكثر خشونة منه...نظراً لخبرتي بالميجان 1 لمدة حوالي 6 شهور ...

بالتأكيد سوف يتحسن أداء المحرك و يهدأ بشكل كبير مع مرور الوقت...لذلك لست قلقاً من هذا الشأن

إستهلاك البنزين ممتاز...إلى الأن...الإستهلاك 8.3 لتر لل100 كيلو داخل البلد...و ده رقم جميل بالنسبة لل 1600 في التليين لسه
الفرامل

فرامل السيارة كانت غريبة في بادئ الأمر...لازم تدوس عليها جامد عشان تديك القوة اللي انت عايزها...مش من لمسة واحدة زي ما انا متعود في البيكانتو...لأ لازم تدوس و تدوس...الكلام ده جوه البلد...لكن على الطريق أداءها سريع و إستجابتها كويسة...و أكيد بعد الصيانة الأداء هايتحسن

العفشة

من أجمل الأشياء في هذه السيارة هي عفشتها...فعلاً مش مصدقها لحد الآن...لكم ان تتخيلوا ان السيارة أنعم من السكودا أوكتافيا و الجولف 5 و الماتريكس و البيكانتو و الفيرنا و النوبيرا و اللانوس...(انا سايق العربيات دي لمدة طويلة عشان مبقاش بفتي)...و صدقوني السيارة في نفس مستوى نعومة التويوتا كورولا 2005 (العربية دي سافرت بيها عشان مبقاش بفتي برضو)

صوت العفشة متدني للغاية مهما كان عنف النقرة أو المطب...نفس الكلام بالنسبة لتعامل المساعدين و السوست مع المطبات...تشعر انك محمول علي وسادة من ريش النعام او وسادة هوائية...إنفصال تام عن الأرض سواء صوتياً أو إنفعالياً...

في نفس الوقت...العفشة مصممة لأسوء أنواع الطرق...لأن اللي مايعرفش رومانيا (البلد الأم)...تعتبر من أسوء الطرق في العالم و العربية دي متصممة ليهم و لدول العالم الثالث المعروف عن طرقهم انها غير أدمية...عشان كده كان لازم يصمموا العربية للتوافق مع طبيعة هذه الطرق

فقط تأكد انك قمت بتقليل الضغط داخل الإطارات بعد إستلام السيارة...لأن أول مرة سوقتها كرهت نفسي و جالي إرتجاج في العمود الفقري...

الثبات

معقول جداً و أكثر مما أحتاج في عربية بالحجم و السعر ده....هي مش ممتازة في الغرز و المناورات السريعة...نظراً لعفشتها الخلفية و المبنية على Single beam + إرتفاع مركز الثقل مما يضعف من ثباتها أثناء المناورات على سرعات عالية...يعني جربت أخطف الدركسيون شمال على سرعة 90...شعرت بالمنطقة الخلفية تتأرجح بعض الشئ بعد ان أنهيت الخطفة...لكنها بالأساس سيارة عائلية مش للغرز و التنطيط... و لو نظرنا لمنافساتها لن يكونوا أفضل حالاً بدرجة كبيرة

لكن...السيارة في الطرق الطوالي و القيادة المعتدلة علي سرعة....راسية جداً بدون أي توتر أو إنفعال...مهما كانت حالة الطريق غير مستقرة...عفشتها الناعمة تعطيك الثقة و الأمان..

من الأخر...ثباتها مرضي جداً بالنسبة لي...مش منتظر أكثر من كده

أدوات القيادة

الدركسيون و الباور...هو ممكن نقول عليه هاف باور (رغم ان مافيش حاجة إسمها هاف باور) لكن فعلاً الدركسيون تقيل ...مش ناعم و سهل زي معظم العربيات اللي ركبتها...أكيد بعد كده هايخف...لكن على الطريق السريع مخلي العربية ثابته و مش بتلعب

دواسة البنزين...فيها حاجة غريبة جداً و دي لاحظنها في عربيتين لوجان عندنا...زنة الموتور محسوسة فيها و كأن الدواسة مربوطة في الموتور و بتنقل كل الزنة بتاعت لرجليك...و ده شئ مزعج و غير مريح

دواسة الفرامل...كما تحدثنا عنها من قبل

دواسة الدبرياج...من أنعم دواسات الدبرياج اللي ضغط عليها في حياتي...مافيش أي مجهود مبذول من ناحيتي عشان أدوس عليها...لكن يعيبها ان لازم تضغط لأخر الدواسة عشان تعرف تنقل...غير كده هاتسمع زعيق التروس...عكس معظم السيارات...نقطة الفصل بتبقى عند نص الدواسة كده

عصا الفتيس...مسكته جميلة و سلس جداً في نقلاته...لم أشعر بأي خشونة أو صعوبة في النقل...يعيبه فقط الإهتزاز مثل السيارات القديمة على السلانسيه...

ملاحظات أخرى

أماكن زراير الزجاج الكهربائي غريبة و غير مريحة في بادئ الامر...كل ما كنت أركب أقعد أدور على الزراير في الباب و بعدين أفتكر انها مش هنا...لكن بعد 4 مرات بالظبط إيدي إتحركت اوتوماتيك ناحية الكونصول الأوسط...و 6 مرة بدل ما كنت بانزل كل زجاج لوحدة...بقيت أدوس بالإبهام و السبابة على الزرارين مع بعض...و خلاص الدنيا بقت عادية جداً من غير مضايقة...هي ينقصها وحدة رفع عشان ترفع الزجاج لما تقفل العربية بدل وجع القلب بتاع الزراير

الكلاكس صوته مزعج جداً جداً...و عامل زي بتاع الأجرة...لازم أغيره في أقرب وقت...من كتر ما هو مزعج بحس بيه في الدواسات ...موضوع الزرار اللي في دراع الإشارة ده مش وحش بس...هايدايق لو كنت بتحود و عايز تزمر في نفس الوقت...

كرسي السائق يتم تعديل إرتفاعه بطريقة غريبة جداً...زي كراسي المكتب...دراع ترفعه من تحت و بثقلك تنزله لتحت أو ترفع نفسك عشان يترفع معاك...المشكلة ان انا رفيع ...فا وزني مكانش سامح إني أنزله لتحت...

قفلة الباب محترمة جداً و مكتومة...مافيش صوت باب تلاجه أو باب الحمام...الأكرة الخارجية كانت محتاجة تبقى أقيم من كده شوية

مستوى الرؤية في الخلف صعب...و ده نظراً لإرتفاع الشنطة...لازم يتم تركيب باركينج سنسور...هايحل الأزمة دي

الكاسيت كما ذكرت قبل كده...صوته ممتاز و إستقبال الراديو رائع بدون الحاجة إلى تركيب الإريال

التكييف مجربتوش...بس حمايا بيقولي جربه و ممتاز

التقييم المبدئي (النهائي)

انا مقتنع بهذه السيارة بنسبة 100%...هي سيارة تجمع بين الكماليات و العملية و الإسم و القوة و النعومة و السعر في باقة واحدة متكاملة...

بالسعر و الإمكانيات دي و خصوصاً مع الحملية الإعلانية المروجة لها...المنافسين هايجدوا صعوبة كبيرة في التصدي لها و الوقوف أمامها

[ابو يمني]

يا استاذ ياسر نسيت اهم حاجة وهي اسعار قطع الغيار الي ان شاء الله هتخليك تكرة العربيات الرينو كلها لان سعرها مبالغ في جدا ومتقوليش عشان اوربي انت مش راكب مرسيدس ولا بي ام دبليو عشان تبقي قطع الغيار بالسعار دي

[flashfox]

انا يا جماعة عملتلكم تقرير مفصل عنها للمميزات اللي الناس بتشكر فيها والعيوب واسعار قطع الغيار اللي كل الناس مقلقة منها