قواعد اختيار زيت الموتور.. إزاي تعرف الزيت المناسب؟؟؟

[محمد حسن عبد الرحمن]

الف الف مليون شكر ليك يا باشا حضرتك لفت نظرنا الى شئ مهم جدا وهو علاقة زيت المحرك باستهلاك البنزين بس ليا أستفسار بسيط جدا وأرجو من حضرتك الرد عليا فيه ليا أصحابى سواقين تاكسى ويضعون بالمحرك زيت موبيل دلفاك (الخاص بمحركات الديزل) (الجاز) علما بأن سيارتهم موديلات حديثة لادا سواء أن كانت أنجكشن أو كرابراتير وأحدهم نصحنى بوضعه لسيارتى لادا 2106 - 1500 سى.سى - موديل 83 - هل الكلام ده صحيح ومياثرش على حاجة سوء أن كانت بمحركاتهم البنزين كربراتير وأنجكشن وهل هيأثر على محرك سيارتى الادا موديل 83.
ولسيادتكم جزيل الشكر ووافر الإحترام وفائق الإحترام.
وموفق بأذن الله فى مواضيع القادمة ومن تقدم إلى تقدم.

أخوك محمد

[borio1704]

المشاركة الأصلية كتبت بواسطة محمد حسن عبد الرحمن الف الف مليون شكر ليك يا باشا حضرتك لفت نظرنا الى شئ مهم جدا وهو علاقة زيت المحرك باستهلاك البنزين بس ليا أستفسار بسيط جدا وأرجو من حضرتك الرد عليا فيه ليا أصحابى سواقين تاكسى ويضعون بالمحرك زيت موبيل دلفاك (الخاص بمحركات الديزل) (الجاز) علما بأن سيارتهم موديلات حديثة لادا سواء أن كانت أنجكشن أو كرابراتير وأحدهم نصحنى بوضعه لسيارتى لادا 2106 - 1500 سى.سى - موديل 83 - هل الكلام ده صحيح ومياثرش على حاجة سوء أن كانت بمحركاتهم البنزين كربراتير وأنجكشن وهل هيأثر على محرك سيارتى الادا موديل 83. ولسيادتكم جزيل الشكر ووافر الإحترام وفائق الإحترام. وموفق بأذن الله فى مواضيع القادمة ومن تقدم إلى تقدم. أخوك محمد

مش عارف أقول لحضرتك إيه والله ... الأسئلة بتاعة حضراتكم هي اللي بتخلي الموضوع له قيمة حقيقية، وأنا بصراحة باتعلم منها كتير عشان بافضل أدور لحد ما ألاقي الجواب

خلينا نجاوب....

أولا: نظام حقن الوقود (كاربيراتير أو إنجكشن) مالوش أي علاقة بنظام التزييت نهائي، وبالتالي أي نوع زيت هتحطه في العربية مش هيفرق مع كون العربية كاربيراتير أو إنجكشن

إنما اللي بيفرق في العربيات الحديثة هو قيم الخلوص الصغيرة مابين الأجزاء المتحركة وسرعات دوران الموتور العالية ، اللي عايزة زيت له خصائص معينة عشان تزيت بكفاءة عالية


ثانيا: زيت دلفاك غالبا بيبقى أحادي الدرجة... يعني لزوجته عايزة موتور شغال علطول.. مش بيقف.
إنما ممكن تلاقي منه زيت متعدد الدرجات على فكرة


ثالثا: لو زيت دلفاك مكتوب عليه رمز خدمة لمحركات الديزل والبنزين يبقى مفيهوش مشاكل ، إنما لو مكتوب عليه رمز الخدمة للديزل بس (يعني عليه حرف الـC، وحرف الـS مش موجود) في الحالة دي استخدام الزيت ده مش صح... وهأقولك ليه دلوقتي:

* ميزة زيت موتور الديزل إنه فيه خصائص تنظيف عالية عشان تنظف الترسبات ومكونات الكربون اللي بتطلع في مواتير الزيت أكتر من مواتير البنزين، ومواد التنظيف دي (عادة بتبقى مواد معدنية زي الزنك) بتقلل من كفاءة التزييت، والحكاية دي بتظهر قوي في المواتير اللي بتعمل مشاوير قصيرة وما بتلحقش تسخن.

* زيوت مواتير الديزل مش موجود منها زيوت خفيفة قوي، يعني مافيهاش زيت 0w30 مثلا، والزيوت دي ممكن تبقى مطلوبة في المواتير الحديثة عشان موضوع الخلوصات الضيقة اللي اتكلمنا عليه عشان الزيت يوصل لكل الأماكن الضيقة بسهولة، على عكس مواتير الديزل اللي المصممين بتوعها بياخدوا موضوع لزوجة الزيت ده في اعتبارهم ويعملوها بخلوصات أكبر شوية وحتى الرولمان بلي اللي بيركب بيكون أكبر شوية، ده غير إن سرعات دوران مواتير الديزل أبطأ من مواتير البنزين بشكل عام.

* لو انت معاك عربية سبور وعايز تقرص على موتورك ... ابعد تماما عن أي زيت موتور ديزل، لإن موتورك هيودع قريب قوي نتيجة التآكل اللي هيحصل بسبب إن الزيت مش بيعمل طبقة لزجة كافية على الأجزاء المتحركة... لإنه ببساطة معمول عشان ينضف قبل ما يكون بيزيت... ده حتى ممكن مواد التنظيف تعمل تآكل على الشميز والسبايك بالذات لو كان الموتور ده نسبة الانضغاط فيه عالية (زي معظم المواتير الحديثة اللي عايزة بنزين 92 فما فوق) أو لو كان فيه تربو.

* أي زيت بيستهلك وينقص مع الاستخدام، ومواد التنظيف المعدنية اللي في زيوت مواتير الديزل بتطلع مع العادم وممكن تسد علبة البيئة بتاعة الشكمان.

لو عايز تسخدم الزيت ده لازم تعمل الآتي:

1. تشغل عربيتك بصفة مستمرة من غير وقوف بقدر الإمكان
2. تغير زيت بسرعة (كل 1000 أو 2000 كم بالكتير)
3. ما تقرصش على الموتور (ما تعليش الـRPM عن 3000)

مش هقولك انت عربيتك قديمة ومش هتفرق معاك الخلوصات والكلام ده... بس احسبها وشوف الكلام ده يمشي معاك ماديا ومعنويا ولا لأ



...

[سامح عمارة]

السلام عليكم
بارك الله فيك على المجهود الطيب جعله الله فى ميزان حسناتك .....لان فعلا فى مشكلة عندنا فى مصر وهى على اى اساس يتم اختيار الزيت ....والكل طبعا اما بيفتى او مش عارف .....
اشكرك جدا على المجهود الطيب
----------------------------------------

[svneleven]

المشاركة الأصلية كتبت بواسطة borio1704 بصراحة.. ما كنتش عارف.. أعمل موضوع جديد ولا أرد على موضوع قديم بيتكلم على الزيت.. بس قلت أعمل موضوع جديد عشان المعلومة توصل بسرعة خلينا نبدأ السوق فيه أنواع زيوت كتير قوي... اللي بيقعد 5000 كم، واللي يقوللك 10000 كم، واللي يقولك 25000 كم، واحنا كده كده بنغيره على 3000 كم!!!!، ده غير إن كل واحد بسعر، وواحد يقلك خد الزيت ده أنا مجربه، والتاني يقوللك على نفس الزيت كلام تاني.... إيه اللخبطة دي؟؟؟؟؟؟؟؟ ولإن معظمنا مش عارف الفرق ما بين الزيوت ، فإحنا بنعتمد على عمال تغيير الزيوت والمعلومات من الميكانيكية في موضوع تغيير الزيت ده.. وبصراحة مش كل اللي بيقولوه مظبوط لإنه مش مبني على معلومات علمية... أهم قاعدة في اختيار الزيت هو إنك ترجع لكتالوج عربيتك وتشوف إيه الزيت المناسب اللي يتحط في العربية... على فكرة اللي مكتوب في الكتالوج ده هو أقل نوع زيت مسموح إنك تحطه.. يعني مفيش مشاكل إنك تحط زيت أحسن طيب إزاي أعرف إذا كان الزيت ده كويس ولا لأ؟؟؟؟؟؟؟؟ فيه قواعد عالمية وأرقام مكتوبة على علبة الزيت.. ومنها تقدر تعرف الزيت ده مناسب لعربيتك ولا لأ أي زيت عربيات في العالم بيتعرف من حاجتين.. اللزوجة ومستوى الخدمة أولا: اللزوجة ودي بتتعرف من رقم الـSAE إيه الـSAE دي؟؟؟ دي جمعية مهندسي السيارات في أمريكا Society of Automotive Engineers وحددت طريقة تكويد تعرف منها لزوجة الزيت عن طريق أرقام... كل ما زاد الرقم.. زادت لزوجته إزاي؟؟؟ الرقم الصغير يعني زيت خفيف (0، 5، 10، 15، 20)... والرقم العالي يعني زيت تقيل (30، 35، 40، 45، 50 ....) المهم... الزيت اللي بنستخدمه في معظم عربياتنا هو زيت متعدد درجات اللزوجة إزاي؟؟ يعني زيت بيديك أداء وكأن فيه خليط زيوت ..خفيف وتقيل ! ! ! ! ! ! ! ! ! ! ؟ ؟ ؟ ؟ إنما هي في الواقع زيت خفيف وعليه إضافات من البوليمرز بيسموها محسنات مؤشر اللزوجة (Viscosity Index Improvement) وهدفها إن الزيت يحتفظ بلزوجته ويخفش مع ارتفاع درجة الحرارة ليه كده؟؟؟ الغرض من الزيت متعدد اللزوجة إنه لما تيجي تشغل عربيتك وهي باردة.. الزيت بيبقى له لزوجة معينة بتخليه يوصل لأجزاء الموتور المختلفة ويبقى فيه طبقة تزييت مناسبة للتشغيل.. ولما الموتور يسخن... الطبيعي إن الزيت يبدأ يخف مع ارتفاع درجة الحرارة.. بس ده حيخلي طبقة الزيت ضعيفة، فالبوليمرز بتخلي الزيت محتفظ بنفس درجة اللزوجة لما كان بارد... الزيت في الحالة دي بيتصرف وكإن فيه زيت تقيل سخن، وده سبب وضع درجتين لزوجة على العبوة. عشان كده الزيت بيبقى مكتوب عليه درجة اللزوجة بتاعة خليط الزيوت (المفترض) مثلا: 20W-50 الزيت الخفيف درجة لزوجته 20 ... والزيت التقيل درجة لزوجته 50 5W-30 الزيت الخفيف درجة لزوجته 5 ... والزيت التقيل درجة لزوجته 30 15W-40 الزيت الخفيف درجة لزوجته 15 ... والزيت التقيل درجة لزوجته 40 الأرقام دي بتتحدد حسب حرارة الجو ....... مش درجة حرارة الموتور طب إزاي نعرف إن الزيت ده لزوجته تنفع لجو مصر؟؟؟ الجو في مصر درجة الحرارة فيه عالية نسبيا.. وفي الشتا صعب توصل لتحت الصفر (لو اتكلمنا عن الصعيد في الشتا .. فيه بعض أماكن صحراوية ممكن توصل درجة الحرارة الصغرى لحوالي صفر) زي ما مكتوب في كتالوجات العربيات.. الزيوت اللي تشتغل في مصر من غير مشاكل هي: 20W-50 20W-40 15W-40 20W-40 15W-50 ودي حتديك مجال واسع جدا... من أول 15 تحت الصفر... لحد 80 مئوية في كتالوج العربية في قسم الصيانة صفحة الزيت لازم تلاقي رسمة زي دي لاحظ درجات الحرارة (حرارة الجو) ومدى التشغيل بتاع كل زيت زي ما إنت شايف... مفيش زيت محدد... اشتري أقرب زيت مناسب تلاقيه في السوق يكون مناسب للجو في مصر طيب .... مادام كل الزيوت دي ممكن تشتغل ... هل فيه فرق في كفاءة التشغيل؟؟؟ - ميزة الزيت الـ15w-50 عن 15w-30 مثلا ... إن الزيت الأثقل (الـ50) حيديك حماية أكبر لأجزاء الموتور وبالتالي الموتور عمره حيبقى أطول... إنما الزيت الأخف (الـ30) حيديك توفير أعلى في البنزين - الزيت الـ10w-40 على وجه الخصوص يفضل عدم استخدامه لإن نسبة البوليمرز اللي فيه عالية قوي، والبوليمرز ماهياش مواد تزييت. الموضوع كبر قوي !!!!!!!! طيب... إيه اللي بيخللي بعض الزيوت تقعد في العربية 1000.. 3000... 5000... 10000 كيلو؟؟؟؟؟؟ ده اللي بنسميه مستوى الخدمة ثانيا: مستوى الخدمة الموضوع ده متشعب شوية بس أهم حاجة فيه درجة الزيت نفسه ودي ليها كود ورقم بيتعرف منه نوع الزيت (دي كمان؟؟؟) بس المرة دي بكذا طريقة... بس أشهر كود مكتوب على علب الزيوت في مصر هو كود الـAPI إيه الـAPI دي؟؟ دي معهد البترول الأمريكي American Petroleum Institute وبيحدد حاجة إسمها رمز الخدمة (Service Symbol) اللي منها بيحدد عمر الخدمة بتاع الزيت ده حوالي كام كيلو وبيعمل على كل زيت رمزين...(S) للمواتير البنزين.. و(C) للمواتير الديزل (السولار) مثلا: زيت مكتوب عليه API SJ/CF يعني إيه الكلام ده؟؟؟ يعني الزيت ده مستواه (J) لمواتير البنزين... ومستواه (F) لمواتير الديزل وده كويس ولا وحش؟؟؟؟ كل ما كان الحرف اللي مكتوب متأخر في الأبجدية الانجليزية.. كان الزيت ده أحسن يعني (G) أحسن من (F)... و(M) أحسن من (L) طبعا.. كل ما كان الرمز ده أعلى ... الزيت يبقى أغلى أحسن زيت حاليا مستواه (N) لمواتير البنزين.. و(J) لمواتير الديزل مفيش حاليا أقل من SF لمواتير البنزين... وCD لمواتير الديزل طيب... ليه بيبقى الزيت مكتوب عليه يقعد 10000 كيلو واحنا نغيره على 5000 بس؟؟؟ راجع أي كتالوج عربية وحتلاقيه بيقوللك.. إن لو العربية بتشتغل في ظروف الخدمة الشاقة.. يبقى لازم تغيره أسرع وظروف الخدمة الشاقة هي: 1- القيادة في الزحام 2- مشاوير قصيرة (أقل من 15 كيلو) 3- تدوير متكرر للسيارة على البارد خلال اليوم (تدويرها بعدما تبرد تماما) 4- القيادة في جو بارد جدا أو في جو حار جدا 5- القيادة في جو مغبر 6- القيادة في الرمل أو الطين 7- ترك السيارة على السلانسيه لمدد طويلة 8- أحمال عالية أو قطر سيارات أخرى 9- تدوير المحرك على دوران عالي لمدد طويلة عموما... أقل زيت حاليا (SF) مناسب للعربيات اللي اتعملت قبل سنة 1985، وكل ما كانت العربية جديدة لازم يتحط فيها زيت أعلى اللي عايز معلومات أكتر ممكن يرجع للوصلة دي: http://www.api.org/certifications/en...010_120210.pdf أمال يعني إيه زيوت تخليقية؟؟؟؟ بالنسبة لأنواع الزيوت... ففيه نوعين من الزيوت بشكل أساسي زيت معدني... وزيت تخليقي الزيت المعدني Mineral Oil هو زيت مصدره البترول المستخرج من باطن الأرض (وده سبب تسميته "معدني" لإنه بييجي عن طريق التعدين) وبيتم تكريره وتنقيته وممكن بيتحط عليه إضافات تحسن من خواصه الزيت التخليقي Synthetic Oil هو زيت... تكوينه الكيماوي معدل في المعمل من زيوت لها خواص مختلفة عن الزيت الناتج.. (زي فكرة السمن النباتي.. هو زيت نباتي بس مهدرج وتحول إلى سمن) مش بالضرورة يكون مصدره الزيت المعدني.. فيه منه نوعين 1- نوع تخليقي 100% من زيوت غير معدنية.. ودي في منها كذا نوع.. بس مش عايز أصعّب الموضوع أكتر من كده 2- نوع نصف تخليقي من زيوت معدنية وزيوت غير معدنية بحيث إن الزيوت المعدنية ماتزيدش عن 30% مميزات الزيوت التخليقية: 1- سرعة تدفق أعلى من الزيت العادي، فيقدر يزيت الموتور أحسن 2- أداء أحسن في درجات الحرارة العالية قوي والمنخفضة قوي 3- ثبات كيماوي وفيزيائي أفضل (يعني مش بيتحلل أو يفقد لزوجته بسرعة) 4- معدل بخر أقل 5- مضاد للتأكسد والتحلل الحراري وتكون الرواسب، لإنه خالي من الشوائب والمواد الضارة 6- مش محتاج يتغير بسرعة، وده حيوفر في الفلوس ويحافظ على البيئة 7- موفر في الوقود لإنه بيساعد الموتور يتحرك بسهولة أكبر 8- بيحافظ على الموتور لما بندوره الصبح لإنه بيوصل بسرعة للأجزاء اللي ما اتزيتتش 9- عمر أطول للموتور في اختبارات زيت موبيل 1 على سبيل المثال.. العربية اللي كانوا بيختبروه فيها مشيت حوالي 200 ألف كيلومتر من غير ما الزيت يحصله حاجة عيوب الزيوت التخليقية 1- لازم يشتغل على مواتير بتستخدم بنزين خالي من الرصاص (كل البنزين 90، 92، 95 في مصر خالي من الرصاص) 2- غير مفضل في المواتير الرحوية أو الدوارة Rotary (ودي نادرة ومش موجودة إلا في المازدا RX-6، RX-7، RX-8) 3- لو العربية اللي حتستخدمه شغالة طول اليوم (زي التاكسيات والميكروباصات)، مش حيبقى فيه فرق محسوس بينه وبين الزيت العادي، لإن ميزة الزيت التخليقي الأساسية هي لما بتيجي تدور الموتور. من وجهة نظري.. الزيت التخليقي أحسن بكتير.. وممكن تغير الزيت مع الفلتر مرة واحد في السنة.. مهما كانت عدد الكيلومترات اللي بتمشيها في السنة.. مع إنه أغلى بكتير (يمكن ضعف الزيت العادي) بس كده فعلا يبقى موفر، وبيحافظ على العربية بس لو عربيتك بتاكل زيت.. انسى الموضوع ده تماما.. لإنك حترمي فلوسك على الأرض ... منقول بتصرف من مشاركاتي على منتدى نايل موتورز

متأخره بس جزاك الله كل خير.

[طارق المحلاوى]

كتالوج السيارة بتاعتى (اسبيرانزا 516) موديل 2008 بيقول أحط موبيل0W40 سعر العبوة 4 لتر ب 275 جنيه - وبعدين غيرت لموبيل XHP 15W50 (ده فى التوكيل )سعر 4 لتر ب157 جنبه ..السؤال دلوقتى ...مفيش ماركة ارخص بنفس المواصفات؟؟ ...واحد زميلى عنده نفس العربية وجرب يحط مصر وان تقريبا 20W50 سعر 4 لتر ب90 جنيه وبيقول ماشيه زى الفل ..!!! ياترى ايه رايكم؟؟؟ وشكرا مقدما