|
سيارات حواء MasrMotors Girls كل ما يهم المرأة عن عالم السيارات |
|
أدوات الموضوع |
#1
|
|||
|
|||
مشوارنا مع السواقه ( للدردشه والاستفادة )
بسم الله الرحمن الرحيم
انا لسه جديدة فى المنتدى بس قلت اكتب لاخواتى اللى نفسهم يتعلموا سواقه السيارات حكايتى مع التعليم وحتى الان عشان نستفيد من بعض وعشان لاحظت الهجوم الغريب من اعضاء المنتدى على الستات اللى بتسوق يمكن لما يشوفوا احنا ليه نزلنا نسوق يعذرونا ويبطلوا هجوم ويراعوا ان احنا لسه بنتعلم:w6w200504112236376 d الهدف من تعليم القيادة فى الاول انا حاولت اتعلم السواقه على ايد بابا من حوالى 5 سنين بس هو بيخاف علينا جدا والموضوع فشل وبصراحه انا ماكنشى عندى هدف واضح لتعليم السواقه يعنى ماكنتش محتاجه الموضوع اوى خصوصا ان المواصلات من بيتى لشغلى كويسه الحمد لله ومتاحه لغايه ما بنتى الكبيرة دخلت المدرسه من سنتين وبدات عذاب الباص من الصحيان بدرى والرجوع متاخر وبهدله الباص والحر والهوا وغلاسه الطلبه الكبار فى الباص على الاطفال الصغيرين دة غير ان مافيش وقت للمذاكرة ولا النوم ولا اللعب يعنى طول الدراسه ضغط عليها وعليا كل دة خلانى انا وجوزى نقرر ان العام الجديد مش هانوديها بالباص هو يوديها الصبح وانا اجيبها وانا راجعه من الشغل بس فضلت مشكله مهمه مافيش مواصله بتوصل لغايه المدرسه يعنى بننزل من توكتوك او ميكروباص وبنمشى حوالى ربع ساعه منهم تعديه طرق عشان نوصل للمدرسه يعنى مجهود برضه فقررنا نشترى عربيه واتعلم السواقه بما انى انا اللى هاجيبها اشتريت عربيه 128 واتركنت تحت البيت يمكن شهر وانا بدور على مدربه تعلمنى السواقه كل المدارس بيعلموا على عربيه من عندهم ودة من وجهه نظرى مش مفيد خصوصا ان عربيتهم بتبقى معدله عشان التعليم التعليم المهم ربنا وفقنى الحمد لله ولاقيت مدربه ممتازة بمعنى الكلمه كانت بتيجى لغايه البيت وترجعنى تانى من اول يوم كنت انا واختى بنسوق عشان اختى كانت بتاخد معايا الكورس برضه ومن اول يوم رحت سايقه العربيه لغايه شغلى بصراحه هى جريئه اوى ونزلتنا على طول فى الزحمه والشوارع الرئيسيه والكبارى والانفاق ودة خلانا مش بنخاف من الشارع بعد 3 حصه قلت انزل اتمرن مع بابا بما انه بيسوق ماشاء الله بقاله اكتر من 40 سنه وياريتنى مانزلت من كتر التوتر اللى عملهولى لانه بيخاف علينا جدا دخلت فى عربيه ورجعت منهارة ورميت مفتاح العربيه اللى كان مضايقنى انى محتاجه غصب عنى اتعلم السواقه ومش عايزة اى حاجه تحبطنى المهم توكلت على الله ونزلت تانى اكمل الكورس مع المدربه والحمد لله سوقت كويس وبعد ما الكورس خلص طلبنا منها ناخد معاها كورس تانى عشان نتدرب اكتر وفعلا خدنا حصتين واختى يقدر الله تقع على رجلها ومانكملشى الكورس الرخصه قلت فرصه احاول اطلع الرخصه رحت التحقت بمدرسه بين السرايات اللى تبع مرور بين السرايات عشان اطلع الرخصه لانى رفضت ادفع قرش رشوة عشان اطلع الرخصه واتعرض عليا انى اطلعها وانا فى البيت من غير اى امتحان ب 1400 وممكن افاصل معاهم كمان على فكرة دة كلام واحدة من مرور فيصل بس انا رفضت لانى مش مستعدة ابدا مرحله جديدة من حياتى بحاجه تغضب ربنا ميزة المدرسه انها بتدى اول حصه نظرى معلومات عن الصيانه واجزاء العربيه باقى حصص الاسبوع لان الكورس اسبوع بيكون تدريب على الامتحان اللى هو حرف اس فعلا الحمد لله اتدربنا كويس ورحنا الامتحان وانا قلبى هايقف من الخوف والتوتر اهم حاجه فى الامتحان انك تكون هادىء جدا ومركز وبس وماتطلعشى بالعربيه بسرعه على مهلك خالص المهم الامتحان بيبقى على نفس العربيه اللى كنت بتدرب عليها بس بركبها لوحدى من غير المدرب نجحت فى العملى بفضل ربنا ودخلت على النظرى اللى هو عبارة اسئله اغلبها موجود فى سى دى خدناة فى مدرسه المرور نجحت فى النظرى ورحت على مرور بين السرايات اسحب ملفى ووديته مرور فيصل وخلصت الرخصه فى نفس يوم الامتحان ورجعت بيها بفضل ربنا يعنى من غير رشوة ولا واسطه نجحت يبقى ليه نغضب ربنا واللى بيقول ان اللى تبع مدرسه المرور بينجح احب اقولكم ان فى ناس معايا سقطوا فى الامتحان يعنى كل شىء نصيب طول فترة المدرسه ماكانتشى بلمس عربيتى خالص لانى كنت مشغوله جدا جدا وبعد ما خدت الرخصه للاسف نفسى اتسدت عن العربيه وبقيت مش عايزة اركبها وكل اللى يعرف انى خدت الرخصه وبجى بمواصلات يزعل ويقولى كدة غلط اللى حصل بقى ان اختى كانت المفروض ترجع شغلها بعد الاجازة اللى خدتها ومش معقول اكون بعرف اسوق وعندى عربيه ونروح الشغل انا وهى فى مواصلات وهى تعبانه كمان لانها بتشتغل معايا ربنا قوانى ونزلت جمعه وسبت مع جوزى بالعربيه عشان اتمرن وفعلا اهم من التعلم هو الممارسه كل مرة بنزل فيها بالعربيه بتعلم اكتر وبغلط وبتعلم من الغلط وبفضل ربنا رحت بالعربيه انا واختى والحمد لله بقيت اروح بيها الشغل ومشاويرى وفعلا فرقت معايا خصوصا فى مشاوير دكاترة بناتى اللى كنا بنتبهدل فيها نصائح مبتدئه 1- لازم تستخيرى ربنا قبل ما تقدمى على الخطوة دى واى خطوة فى حياتك 2- لازم يكون عندك هدف مهم لانه هو اللى هايشجعك لو لا قدر الله حصلك احباط فى نص الطريق 3- اوعى تنزلى تتمرنى مع باباكى او جوزك الاول هايخاف عليكى والتانى هايخاف على العربيه 3- لو خفتى وانتى بتسوقى هاتغلطى كتير لكن الحرص مطلوب عشان تتفادى اخطاء الغير 4- مايهميكشى اللى بيضرب كلاكس وراكى طالما انك ماشيه صح وفى حارتك وياريت طالما انك لسه مبتدئه التزمى الحارة اليمين عشان تسيبى اللى عايز يعدى يعدى وتمشى براحتك 5- الممارسه مهمه جدا بعد التعليم لازم تنزلى اكتر من مرة عشان تتعلمى 6- الافضل تتعلمى فى الشوارع الزحمه لان دى السواقه داخل القاهرة والمحافظات الكبيرة لكن لو اتعلمتى فى شوارع فاضيه هاتنزلى فى الزحمه هاتحسى انك محتاجه كورس تانى 7- ماتنسيش دعاء الركوب طول ما انتى ماشيه وطول ما العربيه كويسه معاكى لانها مجرد حديدة وربنا سخرها لينا 8- انوى ان عربيتك تبقى لخدمه الغير مش ليكى ولاسرتك بس اى حد محتاج توصيله بلاش طناش وافتكرى فى يوم انك كنتى بتتبهدلى فى مواصلات ومن المشى معلشى طولت عليكم بس حبيت اقولكم مشوارى عشان اللى عايزة تشجيع واحب اسمع حكايتكم ونصائحكم بالنسبه للسواقه عشان نتعلم الموضوع مفتوح لجميع الاعضاء والعضوات |
#2
|
|||
|
|||
رد: مشوارنا مع السواقه ( للدردشه والاستفادة )
رائع يا ام مريم
انا اشهد ان ما شاء الله عليكي بقيتي برفكت بجد عقبالي بقى ملحوظه : انا اخت ام مريم |
#3
|
|||
|
|||
رد: مشوارنا مع السواقه ( للدردشه والاستفادة )
التوتر ضد التعلم تماماً و بصراحة الرجاله بيخافوا عالعربية أكتر من زوجاتهم, ده العادى, أومال بتغيروا من العربية ليه؟
__________________
|
#4
|
|||
|
|||
رد: مشوارنا مع السواقه ( للدردشه والاستفادة )
الله يخليكى يا دكتورة ان شاء الله تركبى عربيتك وتبقى احسن عشان سواقتك احسن
|
#5
|
|||
|
|||
رد: مشوارنا مع السواقه ( للدردشه والاستفادة )
شكرا لمرورك بالموضوع |
|
|