حقير يقتل فقير ليرضي غشيم بتأييد من غبي !

[atgps]

المشاركة الأصلية كتبت بواسطة tonsy1979 محدش بقى فاهم حاجة بس الحاجة الوحيدة الواضحة وضوح الشمس ان مصرنا الغالية تتعرض لمؤامرات داخلية وخارجية من قبل خونة ومأجورين حتى تحترق مصر .. لك الله يامصر ستظلين آمنة رغم انف الحاقدين كما ذكرك ربك الكريم وسيظل جنودك خير اجناد الارض ارجعوا الى القرآن الكريم

هو القرآن اللى عند حضرتك مختلف عن القرآن بتاعنا؟؟

[د0تامر محمد]

المشاركة الأصلية كتبت بواسطة TOOLA كلام جميل وواقعى, و لكن غير ممرس سياسيا شىء و ارتكابه نفس الخطأ أكثر من مرة شىء اخر, خصوصا انه تم تعيين مجلس استشارى و حكومة جديدة, و للأسف عينهم كمنظر فقط و كان أقل ما يفعله أن يستشيرهم قبل ان يفجر الأحداث و بما انه لم يفعل و ذلك لاستنكار افراد المجلس الاستشارى نفسهم و تقديم الكثير منهم لاستقلاتهم (و أعتقد خطوة تقديم الاستقالة من الممكن أن تكون خطوة منهم لحفظ ماء الوجه و عدم توريطهم فى الأحداث ليس أكثر), اذن فى رأيى هو مذنب و لابد أن يحاسب. و للأسف هناك بالفعل الكثير من المطبلتيه و من القليل جدا ان تسمع أحد و تراه و تحسه فعلا يتكلم من القلب و خائف على مصلحة الدولة من غير مصلحة شخصيا و لم أرى اكثر من أحمد زويل فى مثل هذا الموقف بصراحة كلام من القلب.

أتفق معك تماما وزويل مصرى أمين محب حتى النخاع
لكن لن تنصلح الأحوال بمغادرة العسكرى وتولى أية جهة الحكم المؤقت فالخطيئة من البداية فى عدم إجراء إنتخابات رئاسية قبل أى شىء وفى ظل التصارع والتناحر مابين القوى السياسية لإغتنام مكاسب الثورة لنفسها لن تستقر الأحوال
الأصلح هو إنتخابات رئاسية لوضع رأس للدولة وإعداد دستور قوى

[TOOLA]

المشاركة الأصلية كتبت بواسطة د0تامر محمد أتفق معك تماما وزويل مصرى أمين محب حتى النخاع لكن لن تنصلح الأحوال بمغادرة العسكرى وتولى أية جهة الحكم المؤقت فالخطيئة من البداية فى عدم إجراء إنتخابات رئاسية قبل أى شىء وفى ظل التصارع والتناحر مابين القوى السياسية لإغتنام مكاسب الثورة لنفسها لن تستقر الأحوال الأصلح هو إنتخابات رئاسية لوضع رأس للدولة وإعداد دستور قوى

اتفق معاك تماما, و لو الجيش صادق فى تسليم السلطة فليقبل بالاسراع و عمل الانتخبات الرئاسية فى شهر يناير بعد الانتهاء من مجلس الشعب و قبل انتخبات مجلس الشورى التى أشك ان كثير مننا (و أنا ضمنهم) لا نعرف واجبات مجلس الشورى و أهميته.

[تامر ديزل]

الله ينور عليك يا دكتور تامر
وعندي كلمتين بالعقل لكل اللي وجهة نظرهم متفقه مع وجههة نظري او مختلف معايا
لما بدأت الاحداث الاخيرة حصل انقسام للمتابعين للاحداث الى فريقين ... فريق رافض المظاهرات والاعتصامات ومعترض حتى على المتظاهرين نفسهم واساليبهم واهدافهم الخفية او المعلنه ( فريق أ ) .... وفريق على العكس تماما مؤيد للمتظاهرين واهدافهم وووو ... ( فريق ب )
في نفس الوقت (فريق أ )مؤيد للجيش ولابس معاه قضية اسمها المجلس العسكري لبسناها غصب ولبسنا كمان قضية سحل المتظاهرين او فتاة العباية او نقدر نقول لقينا نفسنا شايلين ذنوب الجيش اللي بنؤيده
فريق ب مخون الجيش مش هقول اكتر من كده
نيجي بقى للموقف الحالي انا ليه اخترت اني اكون من (فريق أ) ومش هتكلم غير على نفسي وكل واحد في (فريق أ ) له مبرراته اللي مممكن ماتختلفش عن مبرراتي كتير ... ببساطه انا في (أ) لاني مش لاقي نفسي في (ب ) مش شايف انهم بيمثلوني انا بحب الجيش ومش طايق حد يهينه او يحتقره وبحب البلد ومش طايق حد يولعها تحت اي مسمى وبصراحه لما اكون في الفريق المحسوب عليه المجلس العسكري احسن في رايي من اني اكون في فريق محسوب عليه البلطجيه واللي بيولعواالبلد ونازل شتيمه وتخوين وتدمير في سمعة الجيش
وماتفتكروش ان ردودنا دي هدفها اقناعكم ... ابدا انا عارف ان مافيش فايده من الكلام ولكن من حقنا لما واحد عادي بيتابع يلاقي رد من ناحيتنا ولولا كده انامكنتش ارد ابدا
طيب يبقى فريق ب عرف احنا ليه مش معاهم او ليه مينفعش نكون معاهم وبكده كلامي لفريق ب خلص
فيه كلمه لفريق أ ... احنا مش مطلوب مننا نرد على كل كلام الفريق التاني مطلوب بس نرد الردود اللي تعمل توازن بين الفريقين بحيث العضو العادي لما يقرا الموضوع يلاقي توازن بين الردود مايلاقيش الكفه مايله او يظن اننا سكتنا واستسلمنا ... بمعنى تاني مش مطلوب نعمل توازن في الشتيمه ولا مطلوب نبرر الافعال الغلط من بعض العساكر ... حاجه غلط نبررها ازي بس ... انما ممكن نرد مثلا على الصورة بصورة وخلاص .. نرد على الكلمه بكلمه قدها ومن غير ما الموضوع يوسع لان صدقوني مافيش فايده من الكلام احنا اللي بيبقى شكلنا وحش واحنا اللي بيتقال علينا بنحب الذل وخدامين العسكري وووووو وكفاية علينا 7 قنوات فضائيه مشوهه صورتنا
معلش كان لازم اقول الكلمتين دول واديني اهه لا قولت على طرف شريف ولا طرف خاين انا قولت محسوب عليهم الناس دي زي ما احنا محسوب علينا المجلس العسكري

[مادا]

أولآ ارتضى المصريين كلمة حقير على الجيش المصرى ..

ارتضى المصريين ان يتحول مجلس الوزراء المصرى الى ملعب كره (اهانه لهيبة البلد)).. باعتبار ما يسمى حق التظاهر السلمى .. ماشى

ارتضى المصريين بحريق مبنى المجمع العلمى من المعتصمين على اساس انه حق لهم ..

ارتضى المصريين بتخوين المجلس العسكرى ممكن على اعتبار انه كان معين ايام مبارك

ارتضى المصريين كل اخطاء المعتصمين من قطع الطرق واحتلال الميادين وعمل فوضى والكل يظهر لهم الف مبرر .. ويقولون المجلس العسكرى هو اللى عاوز فوضى

يقول المتظاهرين مش عاوزين انتخابات ومش انخلى فى انتخابات ويقول المجلس انعمل الانتخابات فى معادها .. يقولون ان المجلس هو الذى يريد تعطيل الانتخابات مش عارف ازاى

يقول المتظاهرين مش عاوزين رئيس الوزارء ده علشان عجوز وهو يعلمون انها وزارة انتقاليه ومش اتقعد كتير .. يقولون المجلس هو اللى بيصنع المشاكل علشان يقعد فى السلطه مش عارف ازاى ..


هما المتظاهرين دول ملايكه نرضى بكل حاجه لكن منقدرش نطلع المتظاهرين انهم اخطأوا ولا نكلم عليهم نص كلمه .... وكل حاجه نشيلها للمجلس العسكرى على اساس انه مش عارف يدير البلد ومش عاوز ينقل السلطه وبيحابى لمبارك وبيعمل فوضى وهو اللى بيحرق فى البلد وهو اللى بيحتل الميادين .. ايشيل اخطاءوا واخطاء المعتصمين كمان