انطباعى عن الابيزا بعد تسقيط المكنه ال1.4الانجيكشن

[ahmedibeza]

السلام عليكم

الموضوع ده متاخر عن معاده اكتر من شهر وده لانى فعلا مكنشى معايا فلوس عشان اظبط العربيه عشان اقدر احكم عليها
القصه انا كنت قايلها فى موضوع تانى ومجملها انى اشتريت عربيه ابيزا من غير مكنه فيها فتيس من غير مجموعه الدبرياج والصاج من بره واخد سكينه معجون من غير ذمه بس مفيهاش خبطات خالص
حاله الدواخل ممتازه العربيه مرفوعه 4 سنوات عداد 158 الف مش اكيد قوى العربيه سى ال اكس تانى فئه فاضيه من غير باور او تكييف جنوط بس سبور 13 وعداد الكيلومتر انالوج مش ديجيتال
الحاله العامه ما شاء الله واقفه على حيلها ومش محتاجه مصاريف كتير من جوه ده بالنسبه للحاله اول ما جبتها .

بالنسبه للتسقيط

هى كان فيها مكنه 1.3 هاف انجيكشن او spi رشاش واحد وبصراحه انا معرفشى اداؤه فالمقارنه هتكون بعربيات ركبتها فى نفس سنه الصنع ,
المهم دورت على مكنه تكون عدله ومش محتاجه تغيير فى القواعد عجبتنى ال 1.4 الفول انجيكشن او mpi تقريبا 65 او 75 حصان مش متاكد بالظبط بس هى اعلى من اللى فيها مش اقل من 15 حصان
المكنه من غير فتيس بتركيبها بالكنترول بنص ضفيره من ناحيه الموتور ب3500 عند ملك الجولف فى الهرم و فى الحرفيين ممكن تقل عن كده بس المشوار علقه وفى ناس شكرت فى ملك الجولف
بالاضافه الى 300 جنيه مجموعه دبرياج دسك واسطوانه وبليه وكمان جبت حبه حاجات زى البوجيهات وبطاريه جديده وقلب طرمبه بنزين المهم الموضوع دخل فى 4300 وده لان كان فى حاجات فى العربيه ناقصه كان لازم اكملها الاول
وقت التسقيط كان تقريبا اسبوعين بس كان لظروف المفروض الموضوع ياخد اسبوع واحد

الانطباع الاول :

بصراحه انا ركبت جولف 1 مكنه 2000 وركبت بعديها جيب رانجلر مكنه تويوتا 2000 وركبت هوندا si 1600 مكنه فى تك وميجان 2006 1600 ستيبترونيك
المهم انه كنت عمرى ما ركبت عربيه بموتور صغير وبصراحه الابيزا كنت بحتقرها وكنت فاكرها عربيه لعبه وبتاعت بنات لما جيت اتفرج عليها وهى مركونه نظرتى اتغيرت خالص وخصوصا بعد ما شفت سمك الباب اللى قدام وحجمه ومتانه الصاج وتقريبا كانت زى الجولف اللى معايا من حيث اماكن الزراير وطريقه استخدام العربيه
بشكل عام نظرتى اتغيرت وبعد ما كنت هجيب بى ام شارك قلت افكر فى دى شويه واتوكلت على الله مع انى مكنتش مقتنع قوى

الانطباع التانى :

سيات ابيزا الموديل ده بالذات مخدشى من سيات غير العلامه لانه تقريبا كل حاجه معموله فيها تكنولوجى المانى يخليك تحس باحساس الجولف بالظبط واكتشفت حبه حاجات فيها بعد ما اخدتها من صاحبها خلتنى احبها جدا وده هيبان لما اتكلم عن تجربه القياده فى شارع زحمه

تجربه القياده قبل ظبط المكنه :

العربيه انا استلمتها وكنت المفروض اكون هادى عليها شويه لاننا منعرفشى المكنه اتركنت قد ايه المهم كنت بمشى بيها تاتا تاتا ومبحاولشى اقرص خالص عليها وبريحها فى الغيارات
وبعد اسبوع حاولت اقرص عليها بس للاسف لقيت العربيه بتكتم وكانى مش دايس بنزين اصلا حسيت منها ان المكنه مش مظبوطه مش عطل كبير يعنى المهم مشيت بيها على كده بس استنتجت الاتى
1- العربيه دى صغيره وممكن تدخل فى اى ركنه
2- فى حاله زياده خبره السواقه عن سنتين فموضوع ان العربيه تتخبط ده مستحيل لانها فعلا عربيه صغيره
3- تحكم ممتاز وخصوصا ان العربيه مفيهاش باور وممتعه فى الغرز لان الدركسيون بيوسطن تانى بسرعه كان فيه سوسته
4- العربيه مع الحموله المتوسطه ثابته وادائها جيد
5- مع زياده الحموله ووجود حمل فى الشنطه بحس ان العربيه بتموت وبتدعى عليا
6- العربيه عاليه نسبيا مقارنه بالسيفيك بس اى حموله فى الشنطه بتفقدك الميزه دى
7- الشكمان بايت فى جسم العربيه بشكل مثالى ومفيش خوف لو العربيه اتحكت فى مطب ولا حاجه الا لو من قدام لازم تبص مكان الخبطه
8- مساحه التخزينيه للعربيه عاليه جدا واكتر من العربيه اللى بشنطه وده فى حاله انك تتنى الكنبه وتشيل فبره السماعات اللى ورا تقدر تحط فيها تلاجه غير ان الشنطه لما بتفتح لفوق بتدى وسع رهيب وده عن تجربه

تجربه القياده بعد ظبط المكنه :

بعد ما فضلنا محتارين مين اللى بايظ يا ترى طرمبه البنزين ولا فلاتر ولا ايه احمد صاحب الورشه ظبطلى المكنه وقاللى اطلع جرب وكانه داس على زرار يلا اشتغلى العربيه اتظبطت ولان عداد الكيلومتر والاربى ام فيهم مشاكل فانا هتكلم تقريبيا
1- الطلعه فرقت والاولانى فكرنى بفتيس الجولف طلعه ممتازه مع عمر طويل للغيار
2- التانى والتالت بينقلك العربيه لسرعه محترمه مع عمر طويل بس التالت يزيد شويه
3- الغيارات سلسه والعربيه لما بشبعها وبديها الغيار اللى بعده بتكمل جرى طبيعى من غير كتمه
4- العربيه فى الغيارات من اول التالت فيما فوق على عدد لفات موتور اقل مش بتدى عزم كويس بس لما العربيه صوتها بيعلى بتفتح بدون مبالغه وببقى مش عارف المها
5- طلعلى كلب بيعدى الشارع اتفاجئت بيه لانى كنت طالع من ورا تاكسى حاولت اتفاداه اضطريت اضرب فرامل وكسرت شمال فجأه الحمد لله كان الطريق فاضى وبسرعه لميت نفسى وكانت ملاحظاتى كالاتى :
أ- العربيه لما دوست فرامل وحاولت اكسر العجل جابت معايا وكنت تقريبا فى نص الغيار التالت
ب- لما العربيه كسرت شمال وصلت لحد نص الحاره اللى جنبى وده شئ هايل لانها لو كانت زودت شويه كنت طلعت على الرصيف
ج- لما سبت الدريكسيون العربيه عدلت نفسها ومشيت طبيعى فوق خط الحارات بالظبط
د- الاربع عجلات فضلوا لمسين الارض ومحصلشى زحلقه خالص
6- التجميع على غيار عالى محتاج صبر بس بعد 3 ار بى ام اظن العربيه بتبقى عايزه تطير
7- العربيه بقت تفرك بسهوله بعد ما كنت متعقد منها ههههههههههههههه
8- احسن وقت تجرى فيه لما عداد الحراره يكون فى النص بالظبط بتلاقى العربيه سلسه ومطاوعاك

مقارنه بينها وبين السيفيك ال1600 الاوتوماتيك :

1- السحب فى السرعات البطيئه قريب جدا مع ملاحظه وزن العربيه بتحس ان السيفيك تقيله شويه
2- بعد التالت السيفيك بتروح بعيد بس منقدرشى نقول ان الابيزا بطيئه
3- حجم العربيه بيطمنك فى الغرز جدا والعربيه بتلم نفسها بسرعه
4- العربيتين مكلبشين فى الارض بس السيفيك هايله فى الملفات زى ما الابيزا هايله فى الغرز
استهلاك البنزين لا يقارن بالعربيتين وده لفرق الموتور ونوع الغيار

- يارب يكون افدت فى الموضوع ده واسف على الاطاله

[a_e]

الف مبروك ياستاذ / ahmedibeza عليك العربيه وبأذن الله تاخد خيرها ويبعد عنك شرها
وفعلا العربيه دى وحش والله بمعنى الكلمه مش مجامله او هزار لو العربيه مضبوطه محدش هيعرف يعمل معك حاجه ابداً لانها وحش وجامده ومكنتها ملهاش حل عن تجربه
ربنا يباركلك فيها

[برق بنزين]

الف مبروك يا باشا عربية محترمة وتستاهل التعب فى تظبيطها بس اللى بتتكلم عنها سيات موديل كام ؟؟

[ahmedibeza]

المشاركة الأصلية كتبت بواسطة a_e الف مبروك ياستاذ / ahmedibeza عليك العربيه وبأذن الله تاخد خيرها ويبعد عنك شرها وفعلا العربيه دى وحش والله بمعنى الكلمه مش مجامله او هزار لو العربيه مضبوطه محدش هيعرف يعمل معك حاجه ابداً لانها وحش وجامده ومكنتها ملهاش حل عن تجربه ربنا يباركلك فيها

ربنا يبارك فيك شكلك من عشاق السيات على العموم ربنا يكرمك وتجيب منها الزيرو وتكون ليون بقى ولا حاجه من الحاجات الحلوه دى

المشاركة الأصلية كتبت بواسطة برق بنزين الف مبروك يا باشا عربية محترمة وتستاهل التعب فى تظبيطها بس اللى بتتكلم عنها سيات موديل كام ؟؟

ربنا يبارك فيك ويرزقك هى ابيزا موديل 94 اول حاجه فى الشكل المشهور

[a_e]

المشاركة الأصلية كتبت بواسطة ahmedibeza ربنا يبارك فيك شكلك من عشاق السيات على العموم ربنا يكرمك وتجيب منها الزيرو وتكون ليون بقى ولا حاجه من الحاجات الحلوه دى

يسمع منك ربنا