أخيرا جبت Proton Gen.2 2010

[tech_lover]

المشاركة الأصلية كتبت بواسطة corsair الف مبروك يا زعيم وربنا يديك خيرها ويكفيك شرها

ألف شكر و الله يبارك فيك. على فكرة أنا معجب فعلا بمواضيعك المميزة.

المشاركة الأصلية كتبت بواسطة munnchy ألف مبروك يا جميل و ربنا يرزقك خيرها ويكفيك شرها البرسونا 2011 هتنزل امتى؟

عز العرب قالولي موديل 2011 حينزل أغلى حوالي 5000 جنيه و يمكن إبتداء من شهر مارس. بس أنا الحقيقة معرفش المعاد ده لدفعات جين 2 و لا لكل البروتون. ممكن تتصل بيهم يوم السبت و إسأل و قولنا.

المشاركة الأصلية كتبت بواسطة احمد الشناوى1981 الف مبروك ياباشا وربنا يباركلك فيها

الله يبارك فيك و شكرا على المرور و الرد.

[tech_lover]

المشاركة الأصلية كتبت بواسطة elmanahry الف مبروك وربنا يحافظ عليك المهم ليس اخبار السرعة للسيارة اخبار التسارع اهم يعنى العربية تسعفك وانت بتعدى عربية تانية لان جيل السيارات القادم نازل بفتيس 6 سرعات من اجل تحقيق تسارع اعلى وشكرا جزيلا

هو من ناحية التسارع..هي الحقيقة العربية ما شاء الله ممتازة..يعني ال 100 كم/ساعة بتوصلها في حوالي 13-14 ثانية. و المحرك الCAMPRO IAFM حل الحتة المزعجة بتاعة الموديلات الCAMPRO الأقدم و هي إن العربية كان العزم بتاعها بينخفض بعد ال2500 RPM ولغاية حوالي 3700 RPM بشكل ملحوظ فعلا بالذات في الأوتوماتيك و أنا كنت بلاحظ في عربيات صحابي الCAMPRO النقطة دي. دلوقتي كل زيادة البنزين لغاية ال3000 RPM معاها في زيادة في التسارع.

وعلى فكرة المصنعين بيكترو غيار السرعات عشان السرعات العالية تكون موفرة للوقود و أخف أكتر على الموتور. التسارع بيبقى في الغيارات لغاية التالت كدة عشان في الغيارات دي العربية بتبقى بتستفيد من العزم أساسا مش السرعة.

[tech_lover]

تحديث لاستهلاك البنزين:
بعد مشاوير كتيرة متنوعة (550 كم) في مدينة نصر و مصر الجديدة و الدائري و المحور و كوبري 6 أكتوبر و صلاح سالم و طريق النصر عداد متوسط استهلاك البنزين بيتراوح دلوقتي بين 6.4 و 6.5 لتر/100 كم

[tech_lover]

تحديث:
العربية عاملة دلوقتي 780 كم فكلمت صيانة عز العرب اللي في الصحراوي عشان أحجز صيانة ال 1000 كم يوم الأربعاء القادم. إن شاء الله أكتب تقرير لما أخلصها.

[tech_lover]

أدي تقرير صيانة ال1000 كم زي ما وعدت:

أنا لما حجزت معاد الصيانة قالولي تعالى بعد 9:30ص. أنا وصلت عموما 10:10ص نظرا لإن الطريق كان بطيء شوية عشان الشبورة.

أنا لما وصلت لقيت الأمن بيسألني عن إن كان في حجز فقولتلوا علي الحجز بتاعي و لقاه و دخلني أقف في مظلة للعربيات اللي في الاستقبال. دقيقة و مهندس الاستقبال جالي و عرفني بنفسه (اسمه محمد عبد الهادي) رحب بيا و سألني عن العربية عاملة إيه معايا.

ده حوار الاستقبال:
أنا: متهيألي الدريكسون ليه صوت غريب شوية لما بتلف و إنت جاي تخرج من ركنة مثلا
المهندس: طب خلينا نجرب
(جربتها)
المهندس: مفيش صوت غريب. هو الصوت اللي قصدك عليه ده بيجي و إنت ماشي كمان؟
أنا: لأ بس و أنا جاي أخرج من ركنة يعني بتحرك من وقوف.
(جربتها تاني)
المهندس: هو ده الصوت اللي قصدك عليه؟
أنا: أيوة.
المهندس: ده صوت طبيعي و مفيهوش مشكلة خالص. ده صوت تحريك الباور للعجل و إنت معشق علي ال D و لسة مامشيتش.
أنا: طيب تمام أنا قلت بس أتأكد.
المهندس: إيه كمان؟
أنا: هو و أنا ماشي هادي و كبست الفرامل لغاية الآخر بسمع صوت تكه جامدة كدة. هو الصوت ده برضه عادي؟
المهندس: الصوت ده و إنت لسة ماشيلتش الغيار من الD؟
أنا: أيوة
المهندس: حضرتك تقريبا معظم سواقتك عربيات مانيوال مش كده؟
أنا: المعظم أيوة بس سوقت أوتوماتك في عربيات قديمة شوية (تسعينات)
المهندس: ده برضه صوت طبيعي. الصوت ده صوت فصل الفتيس لما الفرامل تتكبس لغاية ما العربية تقف و إنت لسة على الD. في إيه كمان؟
أنا: السنتر لوك شغال بالمفتاح علي كل الأبواب بس بالريموت علي البابين الورانيين بس.
(جرب و إتأكد)
المهندس: تمام هنضبطه. صيانة ال1000 بتخلص بسرعة بس التضبيط ده هيأخد وقت شوية.
أنا: مفيش مشكلة.
المهندس: في إيه كمان؟
أنا: متهيألي الرشاش بتاع المساحة الورانية مش شغال و المساحة بتشتغل على الناشف بس.
(جرب)
المهندس: شغال. بص حضرتك المساحة الورانية بتشتغل من غير مية لما تدور المفتاح لتحت. لو عاوز ترش مية دوره لفوق و كدة الرشاش و المساحة هيشتغلو مع بعض.
المهندس: حاجة كمان؟
أنا: لأ بس كدة.
المهندس: تمام. حضرتك صيانة ال 1000 بتبقى ب200 جنية عشان غيار الزيت و الفلتر. حضرتك خد أي متعلقات شخصية ليك و إتفضل في الاستراحة و إن شاء الله معاد خروج العربية هيبقى الساعة 2:00 و حنتصل بيك على الموبايل أول ما تخرج.

الساعة 1:30 تقريبا كلموني و لقيت السنتر لوك إشتغل تمام وكانت تفاصيل الفاتورة:
156.00 فلتر + غيار زيت
20.00 قطع غيار
17.60 ضريبة 10%

الإجمالي: 193.60