|
#1
10-09-2013, 02:25 PM
|
||||
|
||||
تقرير عن صيانه ال 30000 كم فى مركز مستر كير شيفروليه اند اوبل
السلام عليكم ورحمه الله وبركاته
طب والله العظيم انتم واحشنى وواحشنى اعده الكى بورد وكتابه المواضيع اخباركم ايه يا شباب يارب تكونو دايما بخير ووالله الواحد على عينه انه يغيب كده بس هنعمل ايه بقى ظروف الشغل المهم مطولش عليكم انا عربيتى بقالها معايا 4 سنين اهى وزى الفل الحمد الله مفيش مشاكل واخر صيانه ليها اثناء خبطه الرفرف كنت عملت موضوع بيه من فتره قررت اضبط النور بتاع العربيه بنفسى لان مفيش حد عرف يضبطهولى كويس وعلشان اقدر اتحكم فى تعديل الاضائه فكيت عمه الهوا من مكانها وركبتها تانى المهم من بعدها وبسمع صوت زنه غريب فى العربيه تحس انه طالع من التابلوه مش من المكنه طبعا مريحتش نفسى وفكيت التابلوه حته حته انى الاقى اى حاجه سايبه او مهزوزه مفيش اى حاجه .. وفضلت متعكنن بسبب الصوت ده فى مره بقى كنت واخد حبوب الشجاعه وقلت اخد العربيه واروح بيها توكيل شيفروليه منصور (الوكر) فرع المنصوره الى فى سندوب محطه موبل شاوا طبعا الراجل الى برا لما شاف العربيه كان هيقيم عليا الحد فى ساعتها اه والله ...  فركنت فجمب وعملت نفسى هطلع اشترى قطع غيار واعدت ادور على المهندس الى هناك لحد ما لاقيته وهووووووب مسكت فيه ( بصراحه راجل فى قمه الادب والاخلاق م / عمرو ) واعدت اتكلم معاه واحكيله مشكلتى وهو يقولى ممنوع وانا اقوله بس متفولش فى وشى وهى هى نفس العربيه وبعدين دى مشكله تافهه مهياش معقده ولا حاجه ومفيش حاجه تخوف وبتاع واعدت اثبت فيه لحد ما اقتنع اخيرا انه يدخل العربيه وبالفعل العربيه دخلت وطلعت فوق عملت امر شغل ب 150 جندى وسمع صوت الزنه ورفع العربيه وفضل متابعها حته حته بتاع 3 ساعات وانا متشعلق فوق عمال ازود بنزين علشان يدور على الصوت ده جاى منين المهم فى الاخر وصل للمكنه كل حاجه تمام بالصدفه بيحل عمه الهوا .. الصوت راح فبدأ يركز فى المنطقه دى يشيل العمه الزنه تروح .. يركب العمه الزنه تيجى وهكذا .. المهم فضل يضبط فيها لحد ما الزنه راحت وكله تمام وخرجت طاير من الفرحه مش هى كانت مجرد زنه بس كانت قرفانى اخر قرف لان من النوع الى بركز فى الصوت اوى المهم بعدها وانا بغسل العربيه (( ابو كده الواحد مبيرحش نفسه ابدا )) قلت افك الفلتر علشان انضفه بالمره .. وفكيت وركبت اجى امشى الصوت يرجع تانى كل الكلام ده كان قبل الصيانه الاخير الى هى صيانه ال 30000 جيت اول امبارح واتصلت بتوكيل المنصوره قلتلهم عاوز اجى اعمل صيانه كل ده وهو مفكرين ان معايا كروز مش لاستى وعاوز اعرف المواعيد لحد امتى فقالى مش هتلحق انهارده بدور ع النت بالصدفه لقيت مركز صيانه معتمد لمنصور شيفروليه فاتح جديد من شهر 3 تقريبا .. وانا طبعا لما صدقت توكيل جديد يكون فاتح قريب منى لان فرع المنصوره عباره عن مغسله لبنزينه مش مركز صيانه ابدا كلمت المركز رد عليا واحد اسمه م / اكرم ( ده بقى السكره ) هو تحسه وانت بتكلمه فى التليفون انه هيمسك فيك بس بصراحه طلع راجل زى العسل المهم كلمنى وقولتله انى معايا لاستى وعاوز اعمل الصيانه وسألنى عاوز تعمل ايه بالضبط فحكيتله وحجزلى صيانه شامله تانى يوم الساعه 11 روحتلهم تانى يوم ع الساعه 12 كده نظرا لظروف الطريق طبعا انبهرت من المركز وجماله ونضافته جه مهندس / محمد استلم منى العربيه وسألنى الى عاوز اعملها فيها كنت انا مجهز لسته بكل حاجه وكانت كالأتى 1-استهلاك بنزين عالى تم معالجته الحمد الله 2-تنظيف فتحه السقف وتشحيمها لانها كانت بتركن فى القفل تم الحمد الله 3-تغير فلتر هواء + فلتر تكيف + فتر زيت + زيت 10000 ك تم الحمد الله 4-تغير مياه التبريد كنت فى موقف لا يحسد عليه واضطريت ازود العربيه مياه عاديه كتير علشان كده غيرت مياه التبريد وتم التغير والحمد الله 5-تغير البوجيهات تم الحمد الله 6-تغير تيل خلفى وامامى وتغير زيت الباكم تم الحمد الله ماعدا التيل الخلفى لسه فيه كتير اتنضف وركب تانى 7-صوت الموتور عالى وخشن تم الحمد الله 8-الكشف على الفتيس وزيت الفتيس تم الحمد الله والفتيس كان مسجل فى الهيستورى ان درجه الحرارة كانت مرتفعه وبعد السوفت الفتيس ما شاء الله بقى ناعم واتضبط 9-تنظيف فلتر البنزين غير متاح الا التغير فقط ولازم التانك كله ينزل ويتحل والمهندس هناك نصحنى استخدم منظف دوره البنزين الى بيتباع فى توكيل متسوبيشى بيشكر فيه جدا وهجربه ان شاء الله 10-الكشف على العفشه وتربيطها تم الحمد الله وكان فى صوت طقطقه خفيفه وراح ومقص كان مهوى والكوبلن كان جايب شخم افتكرناه باظ وعاوز يتغير بس الحمد الله طلع الافيز بتاعه بس الى مهوى وكله بقى تمام 11-تحديث السوفت للموتور والفتيس تم بالنسه للفتيس فقط الموتور غير متاح 12-مسح الطنابير الاماميه كنت ركب تيل مش اصلى لان مكنش ودامى غيره للاسف وبوظ الطنابير وتم عمل مسح بالجهاز والطنابير رجعت جديده الحمد الله 13-مراجعه السيور والبلىه كله تمام وهيتم تغيرهم فى صيانه ال 45000 14-صوت زنه من عمه الهوا تم تركيب عمه الهوا بطريقه صحيحه ولكن للاسف لسه الصوت موجود انطباعى عن المركز .. بصراحه محترمين جدا جدا جدا وشباب زى الورد هناك وهناك انا حسيت انى كنت فى بيتى مش مكان غريب والاعده هناك نضيفه وتكيف وبوفيه وحركات ( علشان الزبون يدفع وهو مستريح برده )  والشباب هناك فاهمين وبياخدو ويدو معاك فى الكلام كده اى نعم انا هبلتهم صحيح وممنوع حد يدخل جوه فى الورش بس بصراحه هما كانو متساهلين معايا فى الجزئيه دى ( اصلهم حبونى بقى ) هههههههههه  العربيه اخدت منهم وقت كتيييييير فعلا اليوم كله وكان فيه تركيز فى الشغل ومكان الصيانه بجد نضيف وراقى جدا وكذا مهندس واقف على العربيه وفى حاجه جميله اوى عملتها وانا هناك العربيه كانت متبهدله من تحت من المطبات سمكرو فيها من تحت وضبطوها ورشوها كلها انتر كوت زى بتاع المصنع الى بتيجى بيه بالضبط ورجعوها جديده من تحت والفرامل بصراحه ... معلون ابو اى تيل مش اصلى بجد اخص على عليه لانه ولا فرامل ولا اى حاجه .. يعنى فى التيل الاصلى لما اجى افرمل مهما كانت قوه الفرمله مش بحس بيها والى معايا مش بيحسو بيها انما التانى كنت تحس انه بيقفش كده ويرج العربيه مره واحده المهندس / اكرم كلمنى تانى انهارده وبيطمن ويشوف اخبار الشغل ايه وعرفته ان كل حاجه تمام ماعدا موضوع الزنه ده وقالى فى اى وقت تيجى ونشوف الموضوع ده طبعا هما امبارح فضلو شغالين معايا لحد الساعه 6 بالرغم ان معادهم يروحو الساعه 5 او 5.5 تقريبا مش متذكر اوى فلو كان فى وقت شويه كنت ركزت فى موضوع الزنه ده اكتر من كده تقيمى استقبال 10/10 راحه مكان ونضافه 10/10 الخبره والشغل 10/10 توافر قطع الغيار 8/10 مصنعيات غاليه شويه 7/10 بالنسبه لقطع الغيار اتأخرا ساعتين لحد ما التيل والمياه جم من فرع المنصوره للفرع بتاعهم ممكن دى متبقاش مشكله مزمنه بس كان نفسى مركز زى ده وانضف واكبر من مركز المنصوره بمراحل يبقى هو فيه مخزن قطع الغيار الرئيسى مش العكس بالنسبه للمصنعيات هى مش مزعلانى اوى بس هو ده حال التوكيلات كلها عموما يعنى مثلا اعمال البوهيه والسمكره 250 ج.م فعلا كتير علبه الانتركوت النضيف الالمانى كانت ب 70 مع العلم ان العلبه تعمل عربيتين او اكتر مرتاحه وقول يا سيدى يوم ما هتدى للبوهيجى مصنعيه هتديله 50 جنيه لان الموضوع ماخدش 10 دقايق او اقل كمان وسمكره بسيطه فى الرفرف قول ياعم كنت هدى للسمكرى 50 جنيه هو كمان يبقى كله 170 ج.م يا دوبك حلو اوى فانا شايف ان 250 كتير ترصيص 4 اطارات ب 40 جنيه عادى بس كان المفروض تبقى هديه (شعب استغلالى) محسوب صيانه ال 3000 ب 308 دى ماشى بس كان يلغى الى فات ضريبه 300 جنيه حرااااااااااااام اهى دى بقى اكتر حاجه مزعلانى وقهرانى غير كده الناس بصراحه زى الفل والخدمه ممتازه هناك وانا بفكر المره الجايه افاصل معاهم بس اعتقد المهندس / اكرم هيرمينى من ع السطح ( اكتر حاجه عجبتنى فى الراجل ده انى لما اعدت واتكلمت معاه تعب بجد علشان يوصل للى هو فيه دلوقتى ولف كتير واتعلم كتير وما شاء الله هو فاهم كويس وخبره فى مجاله ) اسيبكم مع الصور بقى علشان انا رغيت كتير معلش بقالى كتير محروم من الكتابه بقى http://www.mediafire.com/folder/ziqf...n8tp2w1/shared معلش يا جماعه انا رافع الصور على الميديا فاير لان الموقع الى برفع عليه مش عارف معلق ولا ماله كده
__________________
 HaMaDa-ToUB@R 01000902024  
|
|
#2
10-09-2013, 07:18 PM
|
||||
|
||||
رد: تقرير عن صيانه ال 30000 كم فى مركز مستر كير شيفروليه اند اوبل
         
__________________
HaMaDa-ToUB@R 01000902024
|
|
#3
10-09-2013, 11:00 PM
|
||||
|
||||
رد: تقرير عن صيانه ال 30000 كم فى مركز مستر كير شيفروليه اند اوبل
     
__________________
HaMaDa-ToUB@R 01000902024
|
 |
|
|
