مقارنة بين الكارينز والسيراتو

[mohamed68]

هذة المقارنة مستوحاة من تجربتى للمعايشة والقيادة للسيارتين كارينز وسيراتو..حيث اننى امتلك كارينز 2011 واخى يمتلك السيراتو 2010 وليست النيو سيراتو ..عموما مش هاطول عليكم لاننى قررت ان افيد غيرى ممن يريد شراء اي منهم قبل ان يشترى ..لكن لازم نضع فى الحسبان ان كل شخص له السيارة اللتى تناسبة فهناك من يرغب فى الاداء القوى والسرعة وهذا الامر يميل الى السيارة (كيا سيراتو) وهناك من يفضل الفخامة والراحة الداخلية على الاداء القوى وهذا الامر يميل الى (كيا كارينز) بسم الله نبدأ:

1)الشكل الخارجى: الكارينز سيارة جميلة الشكل ولو ان مأخوذ عليها الضخامة اللتى لم تعد تتناسب مع حركة المرور الكثيفة وضيق الشوارع الذى نعيشة الان يعنى تبقى ماشى عنيك فى وسط راسك احسن حد يحكها او يخبط مراياتها الجانبية العملاقة (مرايات دبابة ربع نقل)هذا من ناحية الشكل الخارجى (شكل سيارة عائلية) وارتفاعها عن الارض مناسب حتى فى حالة التحميل يعنى الشكل غير انسيابى .
السيراتو : تتميز بشكل خارجى رياضى انسيابى اكثر من الكارينز وحجم اقل ولكنها قريبة جدا من الارض يعنى ارتفاعها بسيط وفى حالة التحميل الكامل للكنبة الخلفية ممكن تصطدم باى مطب بسهولة يعنى طول مانت ماشى تحك.
2) الشكل الداخلى : تتفوق الكارينز على السيراتو من ناحية الفخامة الداخلية تماما وكلياً حيث المقاعد المرتفعة والرحابة الداخلية حتى فى حالة وجود ثلاثة اشخاص فى الكنبة الخلفية لا يشعرون باى ضيق عكس السيراتو فالكنبة الخلفية منخفضة جدا وغير مريحة لثلاثة اشخاص يعنى تحس انك قاعد على الارض بالنسبة للتابلوة فان السيارة كارينز تتميز بالتابلوة الانيق الفخم والضخم ايضا (بالرغم من وجود انوار لاتليق بفخامة هذا التابلوة) السيراتو تابلوة اقل فخامة ولكن مناسب للشكل الرياضى(بنفس الانوار الصفراء ايضا)(مش عا رف شركة كيا اتصت فى نظرها ولا اية يعنى مفيش حاجة اسمها ضوء نهار كان يبقى احسن بكتير)عموما خلينا فى موضوعنا..عجلة القيادة فى الكارينز افخم من السيراتو نوعا ما ولو ان هذه امور تقديرية.
3)القوة والاداء: من ناحية القوة فكل من كارينز وسيراتو تم تزويدهم بمحرك 1600 لكى يولد 124 حصان عند 6400 لفة وهذا طبعا غير معقول ولا مناسب من الناحية العملية والتطبيقية ولكن اهو كلام الشركة..نيجى بقى للنقطة المفصلية فى موضوعنا وهو هل نفس المحرك يناسب كارينز وسيراتو معا ..طبعا لا وهذ واضح جدا فى اداء السيارة الكارينز البطيئة نوعا ما عند الطلعة (يعنى لما تيجى تطلع او تقف ثم تطلع مرة اخرى) وهذ يرجع الى وزن السيارة الكارينز المبالغ فية(1450 كيلو ) يعنى طن ونصف فقط وهى فاضية وهذا لايتناسب اطلاقا مع قوة المحرك (هاتقولى الشركة يعنى مش عارفة الكلام دة اقوللك اه عارفة ولكنها اختارت الرحابة والاتساع والحجم على حساب الاداء واللى مش عاجبة يختار حاجة تانية...باختصار السيراتو تتفوق عليها كليا من ناحية القوة والاداء يعنى نسبة التسارع اعلى بكثير فى السيراتو عن الكارينز كما ان نعومة المقود(الطارة )فى السيراتو تحس بيه اكثر من الكارينزوايضا الفرامل بالتالى اقوى فى السيراتو نظرا لوزنها الاخف عن الكارينز بالنسبة للعفشة فهى انشف شوية فى السيراتو عن الكارينز ولو ان السيرتو الجديدة تم تعديل العفشة فيها لانة كانت هناك شكاوى كتير لهذا السبب
من ناحية الثبات والاتزان فالسيارة كارينز اكثر ثباتا واتزانا نظرا لحجمها واتساع قاعدة العجلات الخلفية عن السيراتو ولكن هذا لا يعنى ان السيراتو سيارة خفيفة على الطريق ولكن الكارينز هى اللتى تتميز بذلك عن السيراتو
من الاخر مش عايز اطول عليكم ....
* اللى عايز قوة واداء على حساب الراحة الداخلية= نقولة...سيراتو
* اللى عايز راحة داخلية له ولاسرتة على حساب الاداء والقوة= نقولة...كارينز
هذا وارجو ان اكون قدمت لكم ماقد ينفعكم من خلال تجربتى الشخصية لهذان السيارتان والله ولى التوفيق ..مع تمنياتى لكم باختيار مايناسبكم
والسلام عليكم ورحمة الله وبركاتة .....اخوكم .....محمد سمير

[mar mar]

تسلم ايدك

[oousaoo]

:TH E_PR~18:

[MmFFoR]

تسلم ايديك يا استاذ