تجرربتى مع مركز المتحدة وصيانة ال50 الف كم هاااااااام جدااااااااا

[محمود حسين المتحدة]

المشاركة الأصلية كتبت بواسطة eng_yeso كلام جميل ومحترم وبجد انا سعيد لردك المحترم بخصوص الجزئية دى بالرغم انى مش مقتنع يعنى ازاى واحد موظف استقبال يا فندم انا قولت لحضرتك انه مش موظف استقبال ده يعتبر راجل بتاع اعمال ادارية ومن اول ما قبلتك مش بعد اما كتبت الموضوع ده يعنى . الكلام ده انا قولته لحضرتك من اول ما اتقابلنا يتكلم فى فنيات طالما هو مش فنى كان المفروض يقول مش عارف افضل بدل ما يقول كلام غلط ويطلع شكلة وشكل المكان وحش انا شايف انه حضرتك اللى مصمم على كدة وثانيا مع احترامى ليك يا استاذ محمود ازاى بتقول انة بياخد مرتب ضعف بتاع التوكيل ( وهو لسة جديد ومبتدىء فى المكان وفى الوظيفة نفسها كمان) بص حضرتك اللى زيه فى التوكيل بياخد 800 ج بالكتير واسأل بنفسك وهو مرتبه عندنا 1500 ج الاولى انة لو هياخد الضعف كان يبقى راجل عندة خبرة ومحترف فى التعامل مع العملاء بص حضرتك فى حاجات معينة كدة يعنى بعض الوظائف زى بتوع المبيعات وخدمة العملاء والاعمال الادارية انا بصراحة مبفضلش اجيب حد اشتغلها قبل كدة لانه بيكون اتعلمها فى مدرسة مش بتاعتى يعنى مثلا انا اتعرض على انه اجيب حد من زملاء الاسطوات اللى كانوا معاهم فى التوكيل وانا رفضت لانه هيبئة جاى من مدرسة التوكيل اللى التارجت بتاع اى مركز خدمة عندهم بيتحدد برقم مالى معين كل شهر وده مالوش علاقة بتارجتنا هنا فى المتحدة احنا تارجتنا هنا هو اننا نكسب الناس ونعمل سمعة واسم كبير وبعد كدة الفلوس هاتيجى بردوا بس بحب الناس (فة نقطة باردو حضرتك ما ردتش عليها والخاصة بموضوع ختم الفاتورة بص ياباشا احنا بختم الفواتير الضريبية فقط بالختم بتاعنا واما كل تعاملتنا بتكون بناء على امر الشغل واللى مكتوب فيه وده بردوا مستند رسمى عليه اسم الشركة وفى كل البيانات الازمة وماعتقدش انه ممكن حد يكلمنا فى حاجة ليها علاقة به ونقول لا مش بتاعنا واكبر دليل على كد انى رفعتلك اصل امر الشغل بدون تردد ومن اول كلامنا ورد فعلة الغريب معايا ) بس فى المجمل ماشى يعنى نقدر نعدى الجزئية دى مع عدم اقتناعى بيها بص حضرتك هو واضح انه حضرتك مش ناوى تقتنع باى حاجة (وهرد على كل مشاركات حضرتك بس ادينى وقتى بس عشان انا فى الشغل واول ما افضى هكمل باقى الردود) حضرتك من حقك ترد زى ما انت عايز بس اتمنى تكون الردود موضوعية وتكون ليها هدف مش مجرد استرسال فى الكلام والتعصب فى الرأى وخلاص ... خصوصا انى قولت لحضرتك انى هاعملك اللى انت عايزه ايا كان وقدمتلك اعتذار مقدم قبل حتى ما حضرتك تقول انت اقتنعت بكلامى ولا لآ .. وده مش لاى سبب غير لانى عارف انه ايا كان اللى ممكن اخسره ماديا فى الموقف ده . هيكون جاى من وراه مكاسب تانية بعد لما حضرتك تعرف انه حضرتك اتعاملت مع حد محترم اسمه محمود حسين ومركز المتحدة واللى اكيد هتبعتله ناس من طرفك او على الاقل هتعمل شغل العربية معاه و كدة كدة الارزاق على الله وعمر ما مركز المتحدة هيقفل او عشان واحد بس من 1000 واحد اتعامله معاه قال عليه وحش او انه شايف فيه سلبيات وانا بمنتهى السهولة كان ممكن ما تعبش نفسى بالرد على كلامك زى ناس كتير بتعمل كدة فى المواقف دى بس الحقيقة مش طبعى انه اشوف حد زعلان مننا او عنده سوء تفاهم ومهتمش بانى اصالحه او على الاقل اوضحله الصورة من وجهة نظرنا .....

عموما حضرتك انا تحت امرك فى اللى انت عايزه

[m_taysser]

تحياتى للجميع وبالاخص م. ياسر صاحب الموضوع
بعد ما قرأت الموضوع بالكامل حبيت اوضح بعض النقاط وبالأخص أنه تم ذكر أسمى وتم الاستشهاد بى أنا كنت متواجد مع م. ياسر يومها وكنت موجود قبله وهو جه واتعرف بى واتكلمنا شوية ولقيت انه جاى يعمل تقريبا نفس الصيانة اللى انا هاعملها وهى تغيير طقم الكاتينة والزيت والفلاتر وزيت الفتيس وتغيير تيل الفرامل ومشكلة فى كهرباء السيارة وبعض المشاكل الأخرى الفرعية وفعلا تم الجلوس مع أ. تامر مع بعض ابتدى بالمهندس ياسر وفعلا قال اتكلمنا معاه فى ضمان سير الكتينة واسعار الزيت والراجل بصراحة قال كلام مش منطقى فى حاجات فنية زى ضمان الكتينة وان العربية بتاخد 4.5 لتر زيت بس انا عادى عدتها وحتى لما جه أ. محمود اتكلمت معاه وقالى انه لسه جديد ومش فنى واستوضحت منه هذه الامور وخلص الكلام على كده وحتى اتكلمت مع م. ياسر وقلته على ان أ. تامر ما نخدش بكلامه فى موضوع الفنيات ونخليها للفنين اللى شغليين وفعلا كنا واقفين على ايدهم وبنسأل على اى حاجة احنا عاوزنها وعلى فكرة هما ابتدو فى عربية م. ياسر قبلى بس انا قلت عادى انا صاحب مكان مش مشكلة يعنى هو كان فى بطئ شوية فى الاداء بس بصراحة كانت هناك سيارات كتير وان عازرهم بس لما اتكلمت مع أحمد علشان ينجزلى شوية وانا موجود من بدرى الراجل ماتأخرش واشتغل على طول وانجزلى
بالرغم من انه كانت فى مشكلة فى الكهرباء وطولت شوية للساعة 6 م والناس كانت شغالة بكل ما يمكنهم بصراحة .
اما بالنسبة لموضوع الاسعار دا وخصوص موضوع الاكرة انا فعلا كنت ما غيرها بـ 45 جنيه بس بصراحة انا مش عارف اصلية ولا لا ولما لقناها 60 جنيه انا قلت للمهندس ياسر انه ممكن تكون خامة افضل .
اما باقى قطع الغيار فانا اعتقد انها زى برة والفرق عندى انى بكون ضامن لما باجبها من المتحدة وحصل فيها حاجة بارجعلهم والناس مش هاتتأخر حتى من غير ضمان وده بشاهدة ناس كتير.

انا طولت عليكم شوية بس بصراحة حابيت اقول رأى لأن الموضوع دى خطير وبيخص سمعة مكان بصراحة اصبح محل ثقة ناس كتير منهم انا واكبر دليل على احترام اصحاب المكان الاهتمام والرد بكل تفصيل على الموضوع .
وبجد مرة تانية باشكر أستاذ محمود على توضيح الامور كلها وارجو من المهندس ياسر مراجعة الامر مرة تانية ويكون اقتنع وما يكنش زعلان .

[محمود حسين المتحدة]

بشمهندس ياسر انا بردوا عشان احاول اوصل لحضرتك انه فعلا حد زى استاذ محمد تيسير مثلا كان فى نفس اليوم وكمان بالتحديد بيعمل نفس الصيانة اللى هى الكاتينة وقام بطلب بعض الصيانات الاخرى وتم حسابه عليها العادى يعنى . المهم نزلت امر الشغل بتاعه بس طبعا بعد اما استأذنته على كدة .... ولكن معلش سامحنى انا عملت تعديل وشيلت الصورة بتاعة امر الشغل تانى ومش عارف ليه بصراحة بس انا حسيت انى كدة اوفر بصراحة فى الشفافية باختصار حسيت ان الموضوع مش مستاهل .
وعموما انا ممكن اعمل كدة تانى وانزل امر الشغل بتاع استاذ محمد تيسير فى حالة واحدة بس. لو كان سوء التفاهم اللى بينا هيتحصر فى حاجة واحدة بس انه الصيانة ال 200 ج بتكون شاملة اى حاجة هتتعمل فى العربية غير تغير الكاتينة والبوجيهات والفلاتر وغسيل المحرك ومراجعة السيارة على الجهاز ...
وفى انتظار انشاء الله انك ترد تقولى بعد كلامى ده كله ... ايه اللى يرضيك عشان اريحك ... مازلت مهتم بازالة سوء التفاهم معاك وتغير الوضع للتفاهم والمصالحة اذا كان الموضوع يستدعى ذلك

[eng_yeso]

الاستاذ محمود حسين
انا قريت كل كلمة انت كتبتها وبجد عينى وجعتنى من كتر القراءة مبالك انت بقا اللى تعبت وكتبت كل دة وبجد انت وضحتلى حاجات كتير وكل دة ان دل فانما يدل على انك بجد شخص محرم بيخاف على سمعتة وسمعة شغلة ومكانة المحترم انا بصراحة ردك الطويل دة وضحلى كل التفاصيل اللى كنت عايز اعرفها واللى للاسف ما لقتش حد يقولهولى فى المركز لكن على العموم حصل خير ومهما كان الموضوع ولا حتى المبلغ اللى اتدفع فى الصيانة فكل دة مش مهم اللى بجد اسعدنى انى اتعرفت عليك ودة بعد اللى شوفتة منك بجد يشرفنى معرفتك لانك انسان محترم وانا بالنسبة لى مش من الناس اللى بتقبل العوض يعنى عمرى ما هاقولك ادفعلى فلوس الصيانة ولا حتى الفرق بتاع ال100 جنية فرق المصنعيات الموضوع مش فلوس خاااااااااالص انا الحمد لله مش محتاج دة هى كل الفكرة انى دفعت مبلغ كبير وكنت حاسس انة كتير على اللى انا عملتة وما لقتش حد يفسرلى دة لكن بعد ردك كلة بقا تمام بالنسبة للاشخاص بقا انا عمرى ما كان طبعى انى اغلط اة اشتم او حتى اتعدى باللفظ على اى حد بجد ويمكن بس طريقتى فى الاول كانت شوية شديدة اللهجة ودة بصراحة نتيجة اللى حصل معايا بس مش اكتر . وفى النهاية يا سيدى الفاضل اعتبر الموضوع خلص وانا مش زعلان خالص واسف لو كنت ارقتك فى الفترة اللى فاتت او سهرتك مطبق فى الشغل او تعبتلك نفسيتك عمرى ما كنت اقصد دة كل الفكرة انى كنت عايز اوصل تجربتى للناس بكل سلباتها وايجابياتها لتداول الخبرات مش اكتر والدليل على دة ان موضوعى من الاول كان فى ثناء وشكر على الشغل وعلى حاجات كتير فى المركز عندكم دة طبعا بالاضافة الى السلبيات اللى انا شفتها من وجهة نظرى انا . وفى النهاية اصبح الامر متضح امام كل الناس بالتفصيل الممل وبالاسعار وبكل شىء واللى عايز يروح المتحدة هيروح واللى شايف انها غالية علية ادية عرف واخد خبرة غيرة بدون ما يتعب او يبذل اى جهد او مال لمجرد انة يجرب مكان جديد بالنسبة لة .
وشكرا يا محمود بية لسعة صدرك وزوقك فى الكلام وادبك بجد انت راجل محترم ويسعدنى معرفتك

[m_taysser]

الحمد لله يا جماعة الموضوع خلص على خير والكل مش زعلان وعلى فكرة فى نقطة انا نسيت اقولها انا اللى حاسبت على الشاى