philips xenon تجربة زينون فيلبس

[AbOnOrA]

تجربة زينون ماركة فيلبس
السيارة : BMW e90 model 2006 320
philips xenon تجربة زينون فيلبس
فى الحقيقه انا اديت لنفسى وقت كااااااااااااااااااافى للحكم على الزينون بتاعى خاصة انى مش قديم فى الزينون بصراحة وكان اقصى حاجة ممكن اركبها لمبات فيلبس رالى

لكن مع الحته البافاريه قولت جه الوقت اللى اجرب فيه الزينون ،، مكدبش عليكم برضو احترت فى الاول اركب صينى ولا المانى ولا اصلى



اول حاجة سألت على الاصلى لقيته لمبات بس اما الكنترولر بتاعة فبيجى مع الفانوس الاصلى برضو مع العدسة مع كل الشغل وده سعره معدى ال 8 الاف فى التوكيل للفانوس الواحد



ولقيت فوانيس صينى جايه بالزينون بالعدسة بكل حاجة برضو بس شكلها بالنسبالى بيئه وجودتها فقيره جداً وبيطلبو فيها فى شارع دمشق ارقام خياليه برضو فكبرت دماغى منها




الزينون الصينى ابن حلال وشغال بس لو عملها معايا هيدفعنى فى العربيه قد تمنه عشرتاشر مره فأثرت السلامة برضو

ولقيت ان خير الامور الوسط وكان ساعتها طقم زينون فيلبس الجوز لمبات بالكنترولر بتاعهم ب 1200 من سبير كار ولو عالى واطى اضرب فى اتنين

يعنى الزينون عالى وواطى يعمل 2400 للفانوسين والمانى ومية مية
توكلت على الله روحت لسبير فرع التجمع قابلت امير وقابلت الصنايعى هناك واكدولى انه متوافق مع عربيتى وميه ميه

وفى الحقيقة فيلبس فعلا متوافقة مع بى ام حسب ما هو معلن على الموقع وعلى العلب حتى

المهم ركبناه ومخدش وقت كبير فى تركيبه بس كان اخر اليوم وكانت اخر عربيه تمشى من المول فيادوب جربته على الواقف كده تمام تمام وحطولى العلب (هبقى ارفعلكم صورها) وفيها اللمبات القديمة العادية والضمان فى شنطة العربيه ومشيت

مفيش خمس دقائق ويمكن اقل من بعد ما مشيت من المول ولقيت النور بيطفى ويولع من نفسه بسرعة (غمزة) ويطلع ايرور على شاشة الاعطال


يتبع ــــــــــــــ
philips xenon تجربة زينون فيلبس

[AbOnOrA]

زى ما قولت فى المشاركة السابقة انا مشيت من المول اخر واحد فكنت عارف انى لو رجعت تانى مش هلاقى حد فاتصلت بامير سالته قالى متقلقش وتعالى بكره نبص عليها وكلام تطمين من ده
بينى وبينكم انا متطمنتش بردو وحاولت اتصلت بناس اصدقائى فى التوكيل بس الوقت كان متأخر ومعرفتش اوصل لحاجة برضو
وروحت يوميها متنكد خايف اشغله يعمل مشكلة وزعلان على الفلوس وخايف يكون عمل مشكلة فى العربيه فعلا خاصة انى كنت لسه عامل اخر صيانة فى التوكيل وكله ميه ميه ومش ناقص زيارات وصيانات تانى
كمان دماغى كانت بتودى وتجيب للشك حتى فى اللمبات نفسها بس كنت مطمن انى مركبها فى مكان كويس وجايب لمبات المانى مش صينى

المهم موديتهاش تانى يوم وقولت لازم افهم الحكاية الاول على فرضيه ان المشكلة ليها علاقة بعربيتى مش بالزينون نفسه
عملت اتصالاتى كلها تانى يوم وعرفت عنوان كهربائى جامد اخر 7 حاجات بس بعيد اخر 10 حاجات ولما كلمته فى التليفون مدانيش عقاد نافع الا لازم اروحلة
فكبرت دماغى من الاتجاه ده مؤقتاً وغطست فى بحار مواقع الانترنت الخاصة بالبافاريه كلها مابين المواقع العربيه اللى للاسف ملقيتش فيها اى حل لمشكلتى وحتى المواقع الاجنبيه اللى برضو ملقيتش فيها الحل بسهولة الا بعد بحث لايام وصلت فيه الى ان المشكلة فعلاً خاصة بعربيتى وبالموديل ده تحديداً 2006 - 2007 وتم تلافيها فى الموديلات اللى بعد كده
ثانياً حل المشكلة بيبقى باضافه كنترولر او مديول صغير كده اضافى بيحل المشكلة ديه وبيتباع بره سعره فى حدود 20 -50 دولار بس ملقيتش لسه حد بيبيعة هنا

عرفت كمان ان المشكلة مش خطيرة ولا تتعدى الايرور على الشاشة فتعايشت معاها لحين توفر المديول ده

يتبع ........

[AbOnOrA]

تقييم عام
تقييمى للزينون نفسه عموماً جيد وافضل بكتير من اللمبات العادية العاليه لكن فى تقديرى الزينون من غير عدسات فارق جداً تقريبا نص الاداء والشكل
العدسة بتركز الضوء والرؤيه بتبقى اوضح والاضائه بتبقى اكبر عن تركيب الزينون فى فوانيس عاديه
وعموماً نقدر نقول ان الفانوس نفسه ككل بيساهم فى تحسين او تقليل اداء الزينون

اما مقارنة بالزينون الصينى فبإمانة مفيش فارق كبير فى ملموس فى الاضائه بمعنى اوضح من بره مش هيبان ابدا اذا كنت مركب زينون صينى ولا المانى الفرق فى السعر مقابل الجودة سواء فى اللمبات او الكنترولر والضمان

[soltanfriend]

تقرير جميل
و ان شاء الله مشكلتك تتحل
بس على فكرة فيه هنا فى بورسعيد زينون شونة (استعمل خارج يعنى ) فى حدود 1000 جنيه وهو مختلف تماما وكليا عن اى زينون شوفته بعينى فعلا وكمان فى فوانيس عادية مش عدسات

[sheriefna]

السادة الأفاضل
انا مركب زينون في الكيا سيراتو وكل لما افتحه اوقات بيقوم بإعادة الفلاشه من الأول ف ماهو السبب في ذلك؟ وركبت كتاوت للزينون ولكن دون جدوى