أخيرا وبعد طول انتظار سوقت الجاك

[amaboubakr]

سلام عليكم

أولا اوجه خالص شكري لدكتورنا وحبيبنا الدكتور كمال اولا لإنني تشرفت بلقائه وبمعرفته وثانيا لكرمه البالغ ولاتاحة الفرصة لي لقيادة تلك السيارة التي مازالت تبهرني كلما رأيتها وازداد إعجابي بها بعد قيادتها وتفحصها جيدا، وإليكم رأيي الشخصي:

(للعلم أناكان عندي لانسر بومة 2008 ولظروف المباني قمت ببيعها منذ عدة اشهر)

أولا : الشكل الخارجي
لا خلاف عليه ولم أجد أي شخص اختلف معي أو مع اصحاب السيارة أنه رائع وأنا أختلف مع اسم سيندريلا الذي تم اطلاقه على السيارة لانها سيارة ذات طابع هجومي ورياضي بينما سيندريلا اسم ناعم يليق بسيارة صغيرة او سيارة بنات مع كامل احترامي لجميع البنات والسيدات، لذلك أتمنى من ملاك هذه الرائعة اختيار اسم مناسب أو عدة اسماء ولو أمكن يشاركونا بعمل استطلاع رأي لنختار اسم للجاك من خلاله.

ثانيا : من الداخل
والله يا جماعة وبدون أي مبالغة لم أحس بأي فارق عند دخولي من ناحية نضافة التقفيل والتشطيب بينها وبين اللانسر على العكس في الناحية الجمالية أنا أرى أنها من الداخل اشيك بعدة مراحل من اللانسر وهذا رأيي الشخصي، من ناحية الجلوس فهي مريحة جدا وواسعة طبعا بالنسبة لطولي 167 سم وكذلك الكنبة الخلفية بالنسبة لي معقولة جدا جدا، نيجي بقى للخامات ممتازة مقارنة بعربيات صيني في نفس الفئة السعرية ويمكن أعلى وأحلى من عربيات تاني كوري مالية السوق ومش عاوز أقول أسماء عربيات علشان كل واحد شايف عربيته أحلى عربية ومافيش زيها وأنا يمكن الحمد لله لم اشتري بعد هذه السيارة لذلك أرى ان حكمي عليها بالنسبة لي حيادي علشان مايجيش حد ويقول بيقول كده علشان عربيته، وان كانت الرغبة لشراء هذه السيارة ازدادت بعد هذه التجربة، بالنسبة بقى للشياكة فحدث ولا حرج شياكة ايه وفخامة ايه احكي زي مانت عاوز وحدث ولا حرج، كاونسول التكييف والكاسيت جمييييييل جدا وخاماته محترمة وعدادات تحسسك انك في عربية رياضية مش عربية عادية، والله يا جماعة بجد تحب تفضل باصص عليهم بس اوعوا تعملوا كده وانتم سايقين أحسن تحصل لكم حاجة لو ماركزتوش وانتم سايقين ربنا يحفظكوا انتم وعربياتكم ان شاء الله.

ثالثا : الموتور والعفشة
طبعا دي نقطة مهمة جدا للجميع، أنا أول ماطلعت بالعربية لتجربتها كنت خايف أحسن تبطل مني لاني من ساعة اللانسر الاوتوماتيك كل ماسوق مانيوال تبطل مني في اول مرة وخفت احسن دكتور كمال يقول ده مابيعرفش يسوق ولا ايه ويحط بقى ايده على قلبه ويقول امتى هاينزل من على الدريكسيون الجدع ده ربنا يستر على العربية، أنا اللي جيبت لنفسي وجع الدماغ ده مانا كنت في حالي ههههههههههههههههههههههههه ه
طبعا انا بهزر يادكتورنا بس علشان احوش الملل عن اللي بيقرا الموضوع.
المهم نرجع لموضوعنا طلعت العربية من اول مرة معايا بكل سلاسة ونعومة وماكنتش اتخيل النعومة دي والحلاوة دي، ولو أن لي عتاب عند الجماعة اللي بيقولوا فيه نسبة خشونة في العربية ،الخشونة اللي بتتكلموا عليها تكاد لاتذكر ومايلاحظهاش إلا واحد خبيييييييير جدا وشبه مالهاش أي لازمة أنا كنت حاسس اني رجعت كام شهر لورا وحسيت اني سايق اللانسر، ننيجي بقى للباور... ايه ده مش ممكن رهييييييييب ده بقى احسن من اللانسر بكتييييييييييييييييييير وناعم جدا وبيديك تحكم جميل في الطارة، أما بالنسبة بقى لصوت الموتور لازم تركز مع العربية وهيا ماشية أحسن تفكر العربية ماشية وهيا بطاله فعلا صوت الموتور يكاد لايذكر، بالنسبة بقى لموضوع العزم والهورس باور وبعض الامور الفنية دي بصراحة انا مش خبير علشان أفتي فيها أنا راجل بركب عربيات من حوالي عشر سنوات وركبت عربيات كتير فمن هنا جت خبرتي في السواقة فقط وبعض الامور اللي تحدثت عنها، شوفتم بقى كنت هانسى.. حكاية الموتور الــ 1500 سي سي ماحسيتش بفرق في اول طلعة للعربية مع ان وزن العربية كبير وده يثبت ان الموتور شديد وبتكنولوجيا عالية والله الجماعة الصينيين دول حيرونا معاهم.

رابعا: التكييف وصاج العربية
طبعا ماكنش ينفع نشغل التكييف لأن الجو محتاج دفاية مش تكيف اليومين دول فلن أستطيع الحكم عليه مع ان الجواب باين من عنوانه، أما عن الصاج ففعلا تقيل زي ما أصحاب العربية قالوا رفعت الكبوت بجد تقييييييييييييل ويمكن اتقل من اللانسر وباب العربية تقيل ومحترم وكنت سمعت في بداية ظهور العربية ان فيه مشكلة في قفلة الباب انك لازم ترزعه علشان يتقفل ودي انا ركزت فيها ولم أجدها في السيارة، الباب طبيعي جدا وبيتقفل بكل سلاسة.

خامسا وأخيرا : اللي ماعجبنيش في العربية
كنت أتمنى ان الشنطة تكون أكبر من كده لأني بسافر بأسرتي يمكن شهريا البلد وبتكون معانا شيل كتييييييير وطبعا زي مانتم عارفين ان زوجاتنا ربنا يخليهم لينا يا رب ويحفظهم لينا ويباركلنا فيهم يارب قولوا آآآآآآآآآمين ، لو الواحدة منهم طالت تاخد التلاجة والغسالة معاها وهيا مسافرة هاتاخدهم ومش هاتتردد لحظة واحدة هههههههههههههه، دي نقطة النقطة التانية كنت حابب ان الساعة تكون في وسط الكونسول يعني في منطقة التكييف والكاسيت كانت هاتكون أوضح لكل الركاب في العربية مش للسائق فقط كما في الجاك، النقطة الثالثة كنت اتمنى ايضا ان يكون فيها عداد لقياس متوسط استهلاك البنزين ويديك القياس على حسب السرعة ولكنه مش موجود،آخر حاجة للاسف الاستبت جنط عادي مش سبور زي اللي راكب في العربية..
بجد عاوز أطلع عيوب فيها تاني بس مش لاقي آه افتكرت فيه عيييييييييييييييب خطييييييييييييييير جدا وهو ان العربية من جمالها بتتحسد على طوووول هيا وصاحبها اوعوا تنسوا القرآن في العربية على طوووووووول.

معلش اتمنى من الجميع أن يعذروني على الاطالة بس والله ايدي مش عاوزة تبطل كتابة عن العربية دي مش عارف عملت فيا ايه اكيد حب من اول نظرة ربنا يستر ومراتي ماتقراش التقرير ده أحسن مابيتش في بيتنا النهارده وتقولي حبيت حد غيري ولا ايه هههههههه.

ومرة تانية أحب أشكر دكتور كمال على اتاحة هذه الفرصة لي وله مني جزيل الشكر واخيرا اسف على الاطالة.

والسلام عليكم

[odaoda]

ههههههههههههههه تقيم ممتع وجميل وسلس جدا
وربنا يديك ويدينا يا سيدى ويحفظلك اللانسر والجاك وكل عربياتك
وكل الشكر لدكتورنا كمال اكيد

[amaboubakr]

المشاركة الأصلية كتبت بواسطة odaoda ههههههههههههههه تقيم ممتع وجميل وسلس جدا وربنا يديك ويدينا يا سيدى ويحفظلك اللانسر والجاك وكل عربياتك وكل الشكر لدكتورنا كمال اكيد

الله يكرمك أستاذ أودا وشكرا لتعليقك

[د.كمال]

اشكرك يا دكتور محمد على ثناءك عليا وانا مستاهلش كل ده ودا واجب عليا مع انسان حبوب مثلك .....وايه التقرير الحلو ده ....دا محدش فينا كتب تقرير حلو ذى ده عن الجاك .....على العموم أنا أعتز بمعرفتك وان شاء الله هخليك تشبع من السندريلا ..واللى سماها سندريلا انسان كلنا بنعتز بيه هو الاستاذ تيمو وهى سندريلا فى جمالها لكن نظرتها من الامام هجوميه ذى الكوبرا ....تحياتى ليك والى لقاء

[سيف الدين سعيد]

المشاركة الأصلية كتبت بواسطة د.كمال اشكرك يا دكتور محمد على ثناءك عليا وانا مستاهلش كل ده ودا واجب عليا مع انسان حبوب مثلك .....وايه التقرير الحلو ده ....دا محدش فينا كتب تقرير حلو ذى ده عن الجاك .....على العموم أنا أعتز بمعرفتك وان شاء الله هخليك تشبع من السندريلا ..واللى سماها سندريلا انسان كلنا بنعتز بيه هو الاستاذ تيمو وهى سندريلا فى جمالها لكن نظرتها من الامام هجوميه ذى الكوبرا ....تحياتى ليك والى لقاء

أولا أحب اتقدم بالشكر للدكاتره الأعزاء بتوعنا دول اللى الواحد بيعتز جدا بيهم الدكتور محمد على تقريره الممتع واللى ما اغفلش فيه اى تفصيله من العربيه الا المعلوملت المتخصصه فقط . وله منا جميعا كل الحب والإحترام . مع دعاؤنا له بالتوفيق فى شراء ما يشاء ان شاء الله قريبا ....
وكمان باشكر الدكتور الحبيب والأخ العزيز والصديق الصدوق الدكتور كمال أخى الأكبر سنا ومقاما طبعا . على انه بيعتبر فارس من فرسان قسم الجاك . وكنت اتمنى انى احضر مقابلتكم وأحظى بشرف التعرف اليكم وقضاء وقت ممتع معكم . انما بإذن الله تتعوض قريبا .
كمان أحب اقول انه . اسم الكوبرا اسم ظريف للـ B 15 ولو انه غير متناسب مع شكل مقدمتها كليا . بس عيونها توحى بالإسم دا . ودا أول اسم يطلق عليها . وياريت اللى عنده اقتراح باسم يتناسب معاها يتقدم بيه فى موضوع الإستفتاء على اسم لها .