خدعــــــــــــــــــــــ ــوك فقالوا مستعملة...؟؟؟

[tarek_sayed]

للعلم الوصول الي حد الكمال في العربيات المستعملة دة امر مستحيل يعني الناس كلها بتكدب وتقولك مرفوعة كذا سنة ولا هي اساسا مرفوعة ولا مضمومة...؟؟ ولما تيجي تشوف المستعمل وتركبة وتشغل تكييفة يقولك لا لالالا دة عايز يتشحن بس ويبقي عايز كباس والسربنتينة مخرومة والكويل بايظ وما خفي كان اعظم وحتي وبعض الناس يعرضوا علي النت انهم بيبيعوا لظروف السفر المفاجئ ولا هم مسافرين ولا رايحيين ولا جايين دة غير انتشار اللعب في العدادات الديجيتال وخلافة وللعلم اللي بيبيع عربية اعرف انة هالكها وجاب اخر اللي في جيبة مصاريف ويقولك البيع للبدل بأكبر ولما تقابلة وتتفاوض معاة في السعر يقولك لا والله دة ناس جم شافوها وانشاء الله هايخلصوا وتفوجأ بعد يومين بيرن عليك ويقولك انت مين دة نمرة حضرتك رنت عليا ...؟؟ قال يعني مش عارفها....ويبدأ يتفاوض معاك ويجر رجلك وتقع في الخية....المحاولات كتير وما خفي في سوق المستعمل كان اكبر...وللعلم افضل المستعمل ما لا يتعدي موديلة 3 سنوات وعداد كيلو متر 60 الف فقط
شكرا للأطالة
...................
طارق اسيوط

[tefa_memo]

معاك حق ناس كتير بتعمل كده عشان يخلص من عربيته ويبعها لاي زبون واغلبهم يقولك لسه مغير كذا وكذا وطقم سيرفيس وبطارية ووش نظافة فقط لاغير من اسبوع ....(( الله طالما انت ناوي تبيع بتصرف ليه )) ... ما تبيع زي ما هي ولا انت اكتشفت انك هتبيع فجأة بعد ما صرفت يجي حوالي 5 - 6 الاف بيع علي عيبها وبمنتهي الامانة لو فيها عيب عرف اللي هيشتريها لان الدنيا صغيرة وممكن ينضحك عليك لما تيجي تشتري واغلب الاعلانات بيكون صاحبها مسافر فجأه
بس للامانة زي ما فيه كده فيه ناس محترمين كتير في عملية البيع وعندهم ضمير وصدق ودول ربنا بيبارك لهم
تقبل مروري لك كل الاحترام

[abdelrahman kamel]

بالمناسبه بقى يا زعيم انا معروض عليا عربيتين واحده لانسر بومه (half sport) موديل 2005 عامله 80 ألف كيلو وصاحبها طلب 67 الف وأخرى اسبرانزا عامله 60 الف موديل 2010 وصاحبها طلب 47 الف ايه رأيك ولا اجيب زيرو وخلص بس المشكله انى مستخسر الزياده العبيطه اللى حصلت دى اليومين دول

[AbOnOrA]

والله يا استاذ طارق انت اصبت جانب من الصواب مفيش كلام لكن مستحيل يكون الكلام ده ينطبق على كل الناس ولا حتى اغلبهم
يعنى فيه نسبة طبعاً بالشكل دة بس مش كبيرة مقارنة بحجم سوق المستعمل اللى هو فعلاً اكبر سوق فى مصر

وعلشان حجم السوق ده برضو فيه شرائح وتفاصيل كبيرة تخلى الواحد صعب يحط كلة فى صورة واحدة

يعنى مثلاً سوق العربيات من 20 - 50 الف غير تماماً سوق العربيات الاعلى من كدة

وسوق العربيات الشعبية الكورى واليابانى غير سوق الاوربى فى المستعمل وحتى سوق الاروبى زى البى ام غير سوق المستعمل بتاع المرسيدس

وسوق المستعمل اللى فى العاشر غير معارض العربيات غير الناس اللى بتبيع على النت غير واحد جارك ولا معرفة الميكانيكى بتاعك ولا السمكرى

كل حالة وليها نظامها وغالباً كلامك بينطبق على سوق المستعمل اللى فى العاشر وجزء من البيع عن طريق مواقع الانترنت والجرائد

وبصراحة انا دايماً اقول المستعمل ده (قرف) او حظوظ فيه ناس بيبقى حظها كويس فى المستعمل وفيه ناس ممكن يتضحك عليه فى عربيه يكرهو المستعمل كلة

لكن فى النهاية هنلاقى ان المستعمل هيفضل حل لا غنى عنه بل من اهم الحلول فى ظل الظروف الاقتصادية للبلد وسياسات التسعير اللى بتتبعها التوكيلات او بتفرضها عليها الاوضاع

ولما تلاقى ان مئات ان لم يكن الاف متقدمة لجهاز حماية المستهلك عن عربيات زيرو فيها مشاكل من اول العربيات الصينى لحد الالمانى وتحسب مصاريف الصيانات الدورية فى التوكيل علشان ميضيعش عليك الضمان وقيمة العربية زيرو وخساتك فى قيمتها لما تيجى تبيعها (مستعملة) ومصاريف الترخيص او التأمين او التقسيط هتلاقى برضو متعة الزيرو لا تخلو من الكثير من الألام

[Hisham.Elgazzar]

وعشان كده عمرى ما بصيت لموديل العربية ولا يهمنى كماليات ولا حاجة
وبتعامل مع العربية كأنها وسيلة موصلات بس على مزاجى انا
أكتر مشكلة فى الوقت الحالى اقبال الناس على شرا العربيات الزيرو والمنظرة والبهرجة على اه مش عارف !!!!!