عايز رأيكم فى الاقتراح ده

[casper348]

ممكن بس بعد اذن صاحب الموضوع اعرف ايه احسن سماعات اماميه مدوره مقاس 16 للانسر بومه؟؟ واسعارها ايه ؟! وهل فيه فرق كبير بنها وبين الكمبوننت على انها تستهل فرق الفلوس مقابل الاداء؟!

[ahmed-casper]

مستنين انجكشن باشا يقولنا لأنو موسوعه و هو هيفيدك و انا كمان عايز اجيب زيك

[Injection]

بصوا يارجالة, المقاس اللى بيقابل ال 16 هو ال 6.5 بوصة, الأنواع المتوافرة كتير, فى كينوود 240 وات.



وفيه كينوود 160 وات



ودى ملائمة أكثر للكاسيتات القديمة, والفرق بينها وبين اللى فوق أن الأولى 3 واى والتانية 2 واى

يعنى الأولى بتطلع بيز وميدرينج وتريبل, والتانية بيز وميدرينج بس

وفيه البايونيير 180 وات, ودى 2 واى وبرضه ملائمة للأنظمة القديمة.



لو قعدنا نعد فى السمعات مش هنخلص, فأسمحولى أقول شوية حاجات.

السماعة بتتقاس قوتها بعدة حاجات, أهم 2 هما الماكس وات وال rms , الماكس وات هو اللى بيبقى مكتوب على السماعة من بره زى البايونيير ال 180 وده أقصى وات السماعة تقدر تشتغل بيه من غير وش أو خطر عليها, الأر أم أس هو الوات اللى السماعة تقدر تشتغل عليه بصفة مستمرة بدون أجهاد ليها وبصوت جيد.

دلوقتى لو الواحد بيشترى سماعات, أنت بتشترى حسب الكاسيت أو بأعتبار ماسيكون اللى هو مثلا الأمب, فلازم تجيب حاجة واتها مناسب, يعنى الكاسيت العادى بيطلع فى حدود 60 وات ماكس أو أقل (بين 35 و 65, وبيبقى مكتوب غالبا على باب الكاسيت), علشان تجيب سماعات تستفيد بيها من قدرة الكاسيت, بتجيب سماعات مش عالية قوى ولا قليلة قوى, زى الكينوود ال 160 وات, بحيث تستفيد من كل قدرة الكاسيت وتسمع صوت نقى وكويس, وتقلل الخروشة.

لكن القدرة اللى بيطلعها الكاسيت تعتبر ضعيفة جدا, علشان كده الناس بتركب أمبليفاير, علشان يسمعوا الصوت الصح.

لكن لو ركبت سماعات كبيرة على الكاسيت, يبقى ما أستفدتش حاجة, لأنك مش هتستفيد بالقوة الزيادة وتبقى صرفت على الفاضى, الا لو ناوى تركب جى أم.

وعلى فكرة معظم السماعات النضيفة اللى فى السوق الكاسيت مابيشغلهاش بكل قدرتها, يعنى سماعة 160 وات وكاسيت بيطلع 60 وات, فكده كده أنت مش هتشغل سماعات بكل قدرتها من غير أمبليفاير, لكن الفرق عن الصوت الأصلى مالوش حل وعن تجربة.

ومعلش ياجماعة, الكومبوننت هو الطقم اللى بيبقى فيه التويترات بتتركب لوحدها, وسماعة ميد لوحدها وصب لوحدها, زى دى مثلا



أنما أنا كان قصدى على السماعات ال 3 واى وال 2 واى زى اللى صورهم فوق.

وبالنسبة ليستحقوا ثمنهم ولا لأ, فهما يستحقوا ثمنهم جدا, السماعات الأصلية بتبقى ضعيفة جدا, علشان كده بتخروش لما تعلى الصوت, وكمان عبارة عن رق واحد فقط بيصدر كل الترددات الصوتية بيز على تريبل على ميد, وده غلط والصوت بيبقى وحش, والرق بتاعها معمول من الورق المقوى

أما ال 2واى أو ال 3واى, بتبقى متقسمة حسب الترددات وكل "واى" بيطلع تردد معين, فالصوت أحسن ومجسم أكثر, ده غير أنها أقوى من الأصلى, لو كانت الأصلية بتخروش عند 15 مثلا دى هتخروش على 26 وصوتها هيبقى أعلى من الأصلى.

وخلوا بالكم أنهم يعتبروا رخاص مش غاليين, بين 120 ل 200 جنيه للطقم.

أنما لو قصدك يا كاسبر باشا على الكومبوننت الحقيقى اللى زى فوق, فدى قصة يطول شرحها دلوقتى.

أرجو أنى أكون أفدتكم, وأسف على العك الكتير وأسف جدا على التأخير.

[ahmed-casper]

مش بقولك موسوعه و ربنا . بص انا لو فضلت اسألك عن كل حاجه انا عايزها هتزهق منى بس انت كده تمام اوى
بس بص بقا اخر حاجه قولى على الحاجه اللى هشتريها بالظبط بالظبط بالوات و RMS ‎.بكل المواصفات يعنى علشان اجبهم على طول و ميتضحكش عليا . و انت عارف اللى عندى كاسيت العربيه الاصلى و مش عايز صبات .....و شكرا

[Injection]

معلش ياباشا أنا لحد النصيحة ماشى, لكن ماقدرش أقولك على الحاجة بالظبط, لأنى مش مختص, ومين يعرف مش ممكن أقولك حاجة غلط؟

أنا أفضل حضرتك تستفسر من المحل اللى هتشترى منه, علشان يبقى هو المسئول قدامك, وتركب فى نفس اليوم علشان تشوف النظام عاجب حضرتك ولا لأ.

وأحنا قلنا الرينج هيبقى فى حدود 150 وات الى 200 وات للسماعات المدورة للكاسيت (الكينوود ال 180 تمام قوى), ولو هتركب جى أم وسماعتين بيضاوى ومدورين زى ماقلنا, السماعتين معاك لحد 400 وات فيما فوق بشوية, والمدورين فوق ال 200 وات (فيه كينوود 300 ينفعوا تمام), والأمب 400 أربع قنوات.

الموضوع كله محاولة أنك توصل لأفضل أستفادة من المكونات الموجودة والجديدة وتوفقهم مع بعض, يعنى السماعات اللى هتركب على الكاسيت هتبقى 160 مثلا علشان تبقى أستفدت من الكاسيت وعندك سماعات تستحمل وات أعلى, واللى هتركب على الجى أم الوات بتاعها زى أو مقارب للجى أم علشان تستفيد من الأثنين وميفضلش فائض فى القوة, مثلا جى أم 400 على سماعات 380, أو سماعات 450.

وبالتوفيق ياباشا, ومعلش أعذرنى أنا مش متخصص فمقدرش أساعدك أكثر من كده, متعتمدش على كلامى او كلام أى حد, لازم تسأل حد متخصص ومخضرم فى المجال.

بس ها أكون سعيد بأنى أرد على أستفسارات حضرتك