نظره اولى على عيوب اللوجان الاوتوماتيك

[mohamedsalahelden]

بعد ما رحت التوكيل تم عمل سوفت وير جديد للعربيه وبحمد الله النتشه اختفت بدرجه 80% وان شاء الله مسافر القاهره بكره وهتبان اوى على الطريق الصحراوى واشكر كل من تابع معى موضوعى من البدايه الى النهايه وعلى العموم كلنا استفدنا من التجربه واما ارجع هيبان ايه الاخبار وانا عاوز بس ادى كل واحد حقه التوكيل كما قولت سابقا وبكرر تانى توكيل محترم مش علشان اختلفت معاه اشكك لا انا قولت فى اول موضوعى محترم وانا بكرر ده دلوقتى ثانيا جهاز حمايه المستهلك كان له دور واضح فى حل المشكله ودى وان شاء الله اما ارجع هقولكم الاخبار

[aymanlaw]

اولاً:ربنا يطمنك وتتحل المشكلة نهائياً..
ثانياً:ارجوا الايؤثر هذا الحوار من اختلاف فى الرأى على اسلوب الحديث لذلك احيك على حسن اخلاقك للمرة الثانية ودائماً اخوة وعلى الحب والتسامح والمودة وحسن الخلق نلتقى ونتواصل ..
ثالثاً:الهدف هو تحقيق ماتتمناه بأذن الله وهو ان تسعد بسيارتك ويزداد جبك لها ان شاء الله رب العالمين

[ahmedashraf]

المشاركة الأصلية كتبت بواسطة mohamedsalahelden بعد ما رحت التوكيل تم عمل سوفت وير جديد للعربيه وبحمد الله النتشه اختفت بدرجه 80% وان شاء الله مسافر القاهره بكره وهتبان اوى على الطريق الصحراوى واشكر كل من تابع معى موضوعى من البدايه الى النهايه وعلى العموم كلنا استفدنا من التجربه واما ارجع هيبان ايه الاخبار وانا عاوز بس ادى كل واحد حقه التوكيل كما قولت سابقا وبكرر تانى توكيل محترم مش علشان اختلفت معاه اشكك لا انا قولت فى اول موضوعى محترم وانا بكرر ده دلوقتى ثانيا جهاز حمايه المستهلك كان له دور واضح فى حل المشكله ودى وان شاء الله اما ارجع هقولكم الاخبار

ياباشا أنا مش عارف أقوللك إنت فرحتني قد إيه, وأغلب الظن إن ال 20 ٪ إللى فاضلة نتيجة تركيزك الشديد مع الموضوع, لو سيبتة ونسيتة ممكن جدا متحسش بأي مشكلة. وإن شاء الله تطمننا أكتر بعد مترجع بالسلامة.

على فكرة فعلا زي ماقريت رد على سؤالك فى نفس الموضوع على منتدى تاني, الجير الأوتو بيستنتج طريقة سواقتك ويحفظها لفترة لحد مايحس إنك غيرت فى ستايل سواقتك يرجع يأقلم نفسه عليها تاني, جرب كده تسوق سواقة رياضية لفترة (أقرص سنة على البنزين فى الطلعات وكده), حتلاقيه بيأخر في النقلات شوية, لكن فى السواقة الهادية بينقل بدري شوية زي أي جير أوتو. أنا لاحظت ده عن تجربة ولسه بختبرة.

[mohamedsalahelden]

انا اتحركت من اسكندريه ومعايا 4 افراد فى العربيه ورحت القاهره ووصلت زى الفل و النتشه زى ما قلت انخفضت بشكل ملحوظ جدا وانا راجع كنت لوحدى فى العربيه النتشه رجعت تانى اسوء من الاول والله انا زهقت انا حاسس ان العربيه فيها حاجه مش مظبوطه وعلى العموم انا قررت انى ابعها وكفانى بهدله فى عربيه زيرو على العموم انا حظى جه فى العربيه كده بس يارتنى ماغيرت عربيتى القديمه المانيوال كانت زى الفل بس هوه نصيب و الحمد لله دى اخر تجربه وان شاء الله هبعها واشكر كل من تابع موضوعى وربنا يبعد عنكم كل شر وسوء حظ فى عربيتكم

[amak313]

المشاركة الأصلية كتبت بواسطة ahmedashraf للأسف يا ستاذ محمد هو ده الواقع, لما تبقى جماركنا على العربيات زي دول الخليج وينتهي جشع التجار نبقى نتشرط بمزاجنا, غير كده ..... إنسى. يعنى الأكسنت آر بي إللى راكبها فى السعودية من السعوديين بيبقى من الغلابة إلى حد ما, ياعيني مش عارف يجيب كامري ولا حتى كورولا, عندنا إللى راكب أعلى فئة (إللى هي فئة متوسطه عندهم) بيبقى عامل فرح ودافع فيها إللى وراه وإللى قدامه وعليه أقساط ويمكن مستلف جزء من المقدم كمان. أكتر ميزه عجبتني فى اللوجان وأنا بشتري إن الوكيل مش منفضها من الأوبشنز زي عربيات تاني ولا سيما الهيونداي, يمكن بس ال ABS والإيرباج الثانيه لاكن كل الباقي واحد المواتير الأوبشنز, كله, وده مش علينا بس, فيه دول تانيه في أوروبا أعتقد رومانيا وروسيا بتنزل فيهم فئه كده برده من غير إي بي إس ولا إيرباج ثانيه, في المقابل شوف الإلانترا الجديده, الكاسيت متغير, مدخل الأيبود مش موجود ومكان اليو إس بي زفت, متشال منها 4 إيرباج عن إللى بتنزل بره, مفيش تدفئه فى الكراسي, الموتور مختلف مش ال GDi وغيره وغيره وفوق ده كله شوف سعرها, عربية حلوه ماشي بس ليه كده؟!! يعني لو نزلها كاملة هتبقى بكام؟؟ ده قليلو لو عدت ال 180 ألف بسياسة غبور التسعيرية دي!!!! ينهار.....!!!! ياباشا الوضع ده علينا كلنا للأسف, ويارب يصلح الأمور ويعدل المايله. بالنسبة لموضوعك, ده خبر جميل جدا! يارب كده تفرحنا قريب إن المشكلة إتحلت, وأنا تحت أمرك لو حبيت نتقابل زي ما قولتلك, بس اليومين الجايين مش حينفع عشان ظروف كده, لو حبيت كلمني ونتفق. بس هو موضوع السوفت وير ده بس عشان المشكلة إللى عندك ولا هيعمموه على كل العربيات, زي موضوع مجموعة البريك إللى كان في المانوال؟!

معلش أنا عندي استفسار...
هوة ايه بالضبط موضوع مجموعة البريك الي في المانيوال؟؟؟