يوم البانيميرا (جولة في معارض السيارات في الكويت)

[horas3000]

فوجئت يوم الخميس 29/10/2009 بخبر وصول البورش البانيميرا صالات العرض في وكيلها هنا في الكويت و حيث اني و محمد كمال باشا كنا في شوق الي رؤية العربية دي علي الطبيعة تم الاتفاق علي الذهاب و نيل شرف رؤيتها علي ارض الواقع و تم تحديد الميعاد ليوم السبت 31/10.

و في تمام الساعة العاشرة و النصف كان محمد باشا في انتظاري تحت بيتة و اتجهنا الي وكالة البورش.
لحسن الحظ وجدنا مكان امام التوكيل مباشرة و قدرنا نشوف ملامحها من وراء الزجاج و خلال ثوان كنا داخل المعرض نملي اعيننا بطلتها.

كان يوجد 2 يانيميرا ال S و لونها فضي و ال 4S بلون جديد لون الكافيه

طبعا اخدنا اكتر من لفه حوالين العربية للتدقيق في التصميم و شكل العربية و بخلاف الخلفية المثيرة للجدل العربية احلي من الصور بكتير و يوجد الكثير من التفاصيل الجميلة. طبعا لم تطاوعنا ايدينا في محاولة لمس العربية او محاولة فتحها لكن لما تقدم احد المتفرجين و قام بفتحها و الركوب فيها تشجعنا و اقتربنا لنلقي نظرة علي داخل السيارة و طبعا اول ما وقعت اعيننا علية تعالت نظرات الاعجاب. باختصار ابداع فخامة و جودة عالية جدا. و بعد تردد قرر محمد باشا انه لازم يركبها و انا طبعا مرضيتش و اكتفيت اني اطلع الموبايل و اخد صورة ليه رغم اننا كنا مكسوفين نصور . كل ده كان في ال S الفضي و اللي الداخل بتاعها كان اسود بعد كدة بصينا علي ال 4S بلونها العجيب و داخلها البيج اللي اجمل بكتيييير من الاسود.

بالنسبة للمواصفات ال S بتيجي بمتور 4800 سي سي بقوة 405 حصان و سعرها 35 الف دينار كويتي. ال 4S نفس المواصفات لكن بدفع رباعي مستمر و سعرها 37 الف دينار لان فيها مواصفات اعلي. و للعلم مفيش حاجة اسمها بورش فل اوبشن.... فيه لستة اوبشن و الزبون بيختار اللي هو عايزة

دي الصورة اليتيمة اللي خدتها

[IMG]file:///C:/DOCUME%7E1/nordx/LOCALS%7E1/Temp/moz-screenshot.png[/IMG]


اكتيفينا بكده و خرجنا و احنا شبه سكاري و قعد محمد باشا يندمني عشان مركبتهاش. و بما اننا مكانش ورانا حاجة اقترحت علي محمد باشا ناخد جولة في معارض السيارات و وافق.

اتجهنا الي معرض الفولكس لاني كنت عايز اتفرج علي الجولف ال GTI

و احنا في السكة محمد حب يدخل معرض ال GMC عشان يتفرج علي الاكيديا لعل و عسي تكون العربية اللي بيدور عليها و تكون مناسبة ظروفة. دخلنا اتفرجنا علي العربية و طبعا لفت نظرنا الفرق الكبير بين التقفيل الالماني و الامريكي و قعدنا نطلع العيوب فيها و بعد كدة بصينا علي التاهو (الاتوبيس زي ما محمد مسميها) و نفس السيناريو قعدنا نطلع عيوب التقفيل و جودة المواد المستخدمة.

اكتفينا بكدة و كملنا المسيرة الي معرض الفولكس و هنا فوجئنا انهم شايلين كل العربيات ما عدا الطوارق (4 منها عشان عليها عرض) و الباسات و التيجوان. بصينا علي الطوارق و لقينا انهم عاملين عرض علي اول فئة اللي مفيهاش اي اوبشن تقريبا و بعدين توجهنا الي الباسات ال 1.8 TSI الجديدة و اللي نزلت مكان ال 2.0 و طبعا بعد نزول ال CC قرر التوكيل انه ينزل فئة واحدة من الباسات و هي الفئة الاولي الفاضيه عشان يفسح المجال لل CC. بصينا علي العربية و تفحصناها و مشينا.

اتجهنا الي معرض ميتسوبيشي و هناك اتفرجنا و عاينا اللانسر الشارك ال 1.5 و ال 2.0 اللي نازله بكت الايفو و بصينا علي الباجيرو و الاوتلاندر و الاكليبس و الباجيرو سبورت و اللانسر البوما ال 2009 اللي نزلوها جلد لاول مرة. و طبعا بصينا علي الايفو 10 لكن للاسف كانت مقفولة. و تقريبا قدرت و لو بشكل طفيف تحسين سمعة الباجيرو لمحمد باشا لانة كان مضايق منها جدا و كان واضح انه اعجب باللانسر ال 2.0 و الاوتلاندر.

بعد كده توجهنا الي معرض السوبارو و شفنا اللايجاسي الجديدة و عجبتنا ال 2.5 التيربو جدا و بصينا علي الامبريزا بفئاتها العادية و ال STI و ال WRX.

من سوبارو اتجهنا الي تويوتا علي امل نشوف البرادو الجديدة لكن كانت لسه منزلتش و زي ما دخلنا خرجنا و كالعادة معرض تويوتا ناس كتير و نفس العربيات و الشعور بالملل.

بعدها اتجهنا الي صرح جنرال موتورز شيفورلية و كاديلاك و طبعا نفس حوار التقفيل. و كان لينا فرصة تنفرج علي الكمارو الجديدة بتصميمها المثير سواء من الخارج او من الداخل. و تركيزنا كان علي الشيفوليه ترافيرس بحكم انها قرينة الGMC اكاديا اللارخص ثمنا و استغربنا لما لقينا افضل من حيث المواد و التقفيل و صرفنا عنها نظر لما عرفنا انها دفع امامي مش رباعي.

اتجهنا بعد كده الي معرض كيا عشان نشوف السرانتو الجديدة و شفناها هي و الموهافي و السول و السيراتو و الكارينز و انطباعنا كان ان عربيات كيا بدون روح و لا شخصية مميزة. اللطيف ان محمد باشا فوجئ بالاوبريوس. انا كان عندي فكرة عنها لاني ركبتها قبل كدة لكن واضح ان محمد باشا مكانش متوقع انها كويسة. العربية اكبر ميزة فيها انها واسعة و مريحة جدا من ورا و ده اللي فاجئ محمد باشا و طبعا تقفيلها كويس جدا.

و بما ان وقت اغلاق التوكيلات كان دخل علينا اكتفينا بكدة و رروحنا و طبعا مع كل العربيات اللي شفناها دي كانت البانيميرا هي الملكة المتوجة و انا شخصيا مفهومسي عن العربيات اختلف من بعد ما شفتها.

ده تقرير بسيط عن الجولة و اسف ان مفيش صور لاننا مكناش عاملين حسابنا بصراحة

[bmkbmk]

أولا بشكرك يا باشا على الموضوع الهايل و التغطية الشاملة .....

احنا طبعا كنا مستنيين البورش بناميرا تنزل الكويت علشان نروح نشوفها على الطبيعة و نتأكد من شكلها على الطبيعة كأول عربية سيدان بأربعة ابواب تنزلها بورش فى تاريخها كله .. فا كان لازم نروح نسجل اللحظة التاريخية دى و كنت موصى شريف باشا انه لو عرف اى اخبار عن نزولها يبلغنى علشان نروح نشوفها و لأنى كنت شاكك انا وشريف ان شكلها على الطبيعة احلى من الصور كان لازم نروح علشان نتأكد من شكوكنا .... المهم انطلقنا فى صباح يوم السبت اللى فات الى توكيل بورش و طبعا قبلها بيوم كنت عامل تفحص شامل للبناميرا على السايت بتاع بورش و اتناقشنا شوية انا و شريف باشا و احنا رايحين فى الطريق عن البناميرا .. المهم وصلنا قدام التوكيل و قلبنا بيهفهف و هى محطوطة جوة منورة و نزلنا من العربية و توجهنا فورا الى الباب لنجد التحفة الفنية و الهندسية التى اتت خلاصة خبرة و تاريخ عريقين للوحش الألمانى و بما ان منافسينها فى السوق لا يستهان بهم ابدا زى البى ام و المرسيدس و الاودى و ما سينتج قريبا عن استون مارتن و لامبورجينى .. كان لازم بورش يعملو تحفة فنية حقيقية .. و لها هيبة غريبة بالشكل المبتكر الذى يحافظ بجدارة على الهوية البورشاوية و التصميم الذى يجمع بين الكوبيه و الجيب اللى دخلو الخلاط و طلعوا البناميرا ..... و زى اول مرة شفت الكايين اول ما نزلت و ماكنتش مصدق انها بورش جيب و لأنى شفتها فى الشارع قبل ما اسمع عنها او اشوفها على النت و طبعا مش محتاج اقول انها اثارت اعجابى و ذهولى و ووو ... كان نفس الشعور عندما وقعت عينى على البناميرا بالتفاصيل التى تنم عن ان كل قرش سوف يتم دفعه ثمنا لهذه السيارة .. تستحقه و بجدارة ... الخطوط الفنية و فتحات تهوية ديسكات الفرامل و الجنوط قياس 19 بوصة و المقدمة التى تمزج ببراعة بين الشكل الهجومى و الطابع الكلاسيكى و داخل السيارة الوهمى الشيك بفظاعة و المنظم و المهندس بعقلانية.... و المؤخرة المثيرة (للجدل) طبعا .. من الاخر كدة عربية لما تركبها تحس انك باشا و بتتعامل معاملة بشوات و تحس كمان انك مش محتاج اى حاجة تانية من اى عربية تانية .. و افتكرت كلمة قلتها لشريف باشا ساعتها .. انت بتفرح و انت بتفتح باب العربية دى ... ايه ده .. مفيش تفصيلة الا و حاظية باهتمام مالوش حل و ابتكار فى الشكل و شياكة

و طبعا فى التوكيل كانوا عمالين يجهزوا عربيات للاستلام من قبل العملاء و منهم طبعا الاس و الفور اس و التيربو

و ركبت السيارة على استحياء و ده لأن كان مكتوب عليها انها محجوزة (يا بخته) بس كان لازم اركبها علشان اخذ الاحساس و شريف باشا مرضيش ابدا انه يركبها علشان ماتوهموش اكتر ماهو موهوم بيها و هو كدة كدة راكب بنت عمها الكايين اس ربنا يبارك له فيها يا رب

ماقدرناش نستحمل اكتر من كدة و حملنا ثقل ارجلنا اللى مش مطاوعنا اننا نمشى من جنب محبوبتنا و قلنا نلف لفة على معارض العربيات نشوف ايه الاخبار و انا عارف فى قرارة نفسى ان مفيش ولا عربية هتعجبنى بعد كدة ...بس كنت بحاول احرص و احنا بنشوف كل عربية على انى انسى البورش لأن حرام اننا نقارن القمة بما هو اكيد ليس فى مستواها و زرنا عدة معارض و الكثير سيارات و سوف يكون لى تعليقات مستفيضة ان شاء الله فى مشاركة اخرى عن جميع السيارات التى اختبرناها ... لأنى مش قادر انسى البناميرا دلوقتى

و دمتم بالف خير

[الجرئ]

ربنا يوفقكم وتشتروها
البورش بورش كفايه اسمها
بس كانت ناقصه صور السياره من بره

[bmkbmk]

المشاركة الأصلية كتبت بواسطة الجرئ ربنا يوفقكم وتشتروها البورش بورش كفايه اسمها بس كانت ناقصه صور السياره من بره

هههههههههههههههه يحيينا و يحييك ربنا باشا ....

والله يا باشا احنا خدنا الصورة دى على استحياء كدة بس لو عاوز صورها من برة يا باشا خد دول كدة تصبيرة

[bmkbmk]

و دلوقتى يا جماعة أكمل لكم شوية من الجولة التفقدية الكبرى فى معارض سيارات الكويت

بعد ما اتوهمنا و اتعقدنا من الباناميرا الجديدة قلنا نروح نتفرج على معارض العربيات التانية نشوف ايه الاخبار و بما ان معظمهم كان فى نفس المنطقة اللى كنا فيها كان الموضوع سهل و انطلقنا و اول معرض رحناه كان معرض ملك الجيبات الأمريكى GMC و دخلناه نتفرج على شوية عربيات فى السريع لانى بفكر اغير عربيتى و اجيب عربية دفع رباعى .. و العربيتين اللى ركزنا عليهم فى المعرض هما ال ACADIA و ال YUKON لأنهم الاقرب الى احتياحجاتى ... و لقيت الاكاديا حجمها مناسب جدا و واسعة من جوة 3 صفوف كراسى و القعدة فيها مريحة جدا و موتورها قوى و فيها اوبشنز كويسة جدا و خنقنى منها قوى قلة جودة الخامات المستخدمة فى الداش بورد و كثرة البلاستيكات و انا بصراحة بعانى من العربيات الامريكانى فى الحكاية دى ... فا وقفت فرجة عليها و انطلقنا الى Yukon (الاتوبيس النهرى) فعلا مايتقالش عليها غير كدة عربية مبالغ فيها .... فى كل حاجة .. كبيرة جدا و موتورها قوى جدا و واسعة جدا و حسيت معاها فعلا بمعنى كلمة Over Qualified الى ان ركبتها و بدأت اتحسس خامات الداش بورد و كانت الصدمة البلاستيكية الكبرى هى بصراحة احسن من الاكاديا بس لسة برده لم ترقى لمستوى جيد من الخامات المستخدمة و هى كدة كدة برة حسبتى لأنى مش مستعد بصراحة انزل من البيت كل يوم علشان اتقمص دور نور الشريف فى فيلم سواق الاتوبيس و انتهت الجولة فى معرض GMC مع الاصابة ببعض خيبة الامل و انا بصراحة يا جماعة اكتر حاجة بكرها فى العربية انها تدينى اقل من اللى انا متوقعه منها ... يعنى انا لو ركبت عربية كورى ولا صينى حتى صغيرة ولقيت جودة الخامات و التقفيل مش قد كدة مش هزعل قوى ... لأن هى دى توقعاتى بالسبة لها ... و هقول عليها عربية كويسة و ممتازة ... لكن اركب عربية المفروض انها وحش والاقى فيها غلطة صغيرة ,,,لاااا هقول عربية مش كويسة ....

و الى اللقاء فى المرة القادمة و باقى الجولة التفقدية فى معارض الكويت و كل ماهو ضد و فى صالح السيارات الالمانية و الكورية و اليابانية