سخونية السيارة فى السفر و الدائري

[hobaus3000]

السلام عليكم ورحمة الله وبركاته

عندى مشكلة بسيطة فى عربيتى 128 موديل 85 -1100 سي سي وهى سخونة العربية فى الطرق الطوالى سواء بالليل أو بالنهار وهى ان وانا ماشى على 90 أو 100 الاقى مؤشر الحرارة فوق 90 يعنى 100 والمروحة شغاله علطول ده بالليل فى جوه درجة حرارة معقولة فى طريق مصر – اسكندرية الصحراوى الساعة واحدة بالليل أما بالنهار المشكلة اكبر من كده لأن العربية السخونة بتزيد عن كده يمكن فى تلتين الحرارة يعنى قرب الاحمر ولكن فى وسط البلد الحرارة ممتازة فى عز الحر الساعة اتنين الظهر ودرجة حرارة الجو39.

هبدأ بالتغيير اللى حصل فى العربية بعد ما كانت شغاله كويس حصل ان العربية سخنت قبل حتى ما اعمل طقم الشمبر وكان الكلام ده فى شهر يناير اللى فات بسبب فقدان مياه الراداتير وبعدين غيرت جوانات وش السلندر وتم كشط الوش بنسبة 15من ميه وكانت العربية بتسخن جامد قوى فبعدها بمده ومع دخول الصيف ومع وجود فقعات مياه فى الراداتير مقتنعتش بكشط وش السلندر اللى حصل قبل كده وتم التربيط على الوش يمكن يكون مجرد تربيط ولكن لم يفيد فى شئ ومازالت الفقعات موجودة فاتفقت مع ميكانيكى اخر نفك الوش ونقيسه عند الخراط عشان نتأكد من اذا كان فى تقفيع فى الوش ولا لأ وبالفعل فكينا الوش وذهبت بالوش لخراط تانى وقولتله يقيسه ويشوف لو فى تقفيع وبالفعل لقى فى تقفيع وتم كشط الوش للمره التانيه وقال انه كشط 15 من ميه وبعدين احنا كنا مركبين جوانين عاده قبل كل الكشط فى المرتين وقبل كل المشاكل وكانت الحرارة طبيعية ولكن بعد الكشط الاخير الميكانيكى قاللى هنغيير جوان من الاتنين بواحد دوبل وكده يبقى اللى راكب واحد دوبل وواحد عاده وركبنا والحمد لله الفقعات فى الرداتير اختفت والحرارة قلت عن الاول ولكن مازالت كما شرحتها فى الأول.

وكمان انا لسه عامل طقم شمبر والحمد لله خلصت تليين بحوالى 1600 كيلو تقريبا وتغيير زيت فى مواعيد مناسبة للتلين.

طيب اهى اللى انا عاملته لعلاج السخونة:

1- شراء راداتير جديد نحاس 3 ماسورة من 4 شهور وكمان الكشف عليه عند بتاع الراداتير وعلى التقليب وقال ان الحمد لله مفيش فيهم مشكلة وقال اي مشكلة يبقى هما خارج الحسبه وتم غسيل دورة التبريد بالكامل والعربية دايرة وتم تغيير غطاء الراداتير.

2- تغيير ثرموستات الحرارة اكثر من مره ومنهم مره جبت الثرومستات الاصلى بتعها وكان ثمنة 40 جنية لكن لقيته جايب نفس النتيجة فرجعته وهى ان الحرارة فى وسط البلد طبيعية المروحة تشتغل قبل النص وتفصل على التلت ولكن فى الطوالى المروحة تشتغل بعد النص وتفضل شغالة علطول ومبفصلش الا لما انزل بالسرعة للوقوف فى اشارة او بالتهدئة بسبب الطريق.

3- شراء مروحة جديدة للراداتير فيبر.

4- ضبط الكهرباء و التكيهات على الشعرة.

5- تم تغيير طقم كهرباء.

6- ضبط تقسيم السيارة والكاتينة.

7- تغيير علبتين الشكمان والكشف على الشكمان بالكامل ولايوجد تنفيث.

8- تغيير الزيت والفلتر قبل السفر.

انا طبعا عندى دلوقتى بعد كل ده شوية خبرة بسيطة فعلى خبرتى البسيطة انا قدام حاجة من الاتنين ياريت تساعدونى فيها لأنكم أدرى منى فى المواضيع دى الاول ان يكون هناك تصغيير حجم غرفة الحريق بسبب كثرة الكشط وانا عايز اعرف هو كده الجوانات كفايه ولا بعد الكشط مرتين 15 من ميه و 15 من ميه لأنى مش عارف احسب يبقى كده النسبه اد ايه اللى اتكشطت من الوش يعنى نعوضهم بكام جوان وسمكهم اد ايه يعنى اتنين دوبل ولا واحد وواحد ولا ايه.

تانى حاجة ودى شاكك فيها شوية وهيفدنا فيها الخبراء هل لو فى مشكلة فى الصبابات والقواعد والدلايل هل ده بيسمح بهروب جزء من السخونة الى منطقة التكيهات ولكن الميكانيكى لما فك الوش عشان يغيير طقم الشمبر كان بيقول ان الوش مش محتاج شغل او بمعنى اصح انه شغال مع العلم ان كاوتش الصباب سليم الدليل عدم وجود دخنة من الشكمان اول الدوارة الصبح طيب وهل ممكن يكون هروب جزء من الكبس هو اللى يسخن العربية بالدرجة الكبيرة دى.

ملحوظة وانا ماشى فى الطريق السريع وفى بداية طلوعى بالعربية وهى لسه حرارتها على الربع مثلا ولسه مسخنتش الاقى مؤشر الحرارة بيزيد الى تقريبا فوق النص اللى هو 90 بسنه وبعدين الاقى المروحة اشتغلت على العكس فى وسط البلد او العربية واقفة الاقى مؤشر الحرارة على اقل من النص وبعدين المروحة تشتغل وبعدين الحرارة تنزل كتير والمروحة تفصل وبالنسبة لنقص المياة يعتبر معقول والمياه بتنقص فى القربة ولكن فى الراداتير المياه معقولة.

انا اسف على الاطالة ولكن المشكلة تعبت تفكيري

[mr_astra]

والله انا شاكك فى حاجة غريبة
غير خرطومين المياة من والى الموتور لانى حاسس ان مع السرعة العالية وتقليب الطلمبة بشكل اكبر ان خرطوم منهم وخصوصا اللى فوق ( السحب ) بيتشفط لجوة وبيمنع سريان المياة
معلش خدنى على اد عقلى وجرب تغير حتى الخرطوم اللى فوق مش هاتخسر حاجة

[atgps]

المشاركة الأصلية كتبت بواسطة mr_astra والله انا شاكك فى حاجة غريبة غير خرطومين المياة من والى الموتور لانى حاسس ان مع السرعة العالية وتقليب الطلمبة بشكل اكبر ان خرطوم منهم وخصوصا اللى فوق ( السحب ) بيتشفط لجوة وبيمنع سريان المياة معلش خدنى على اد عقلى وجرب تغير حتى الخرطوم اللى فوق مش هاتخسر حاجة

ليه على قد عقلك!!! ده تفسير عقلانى جدا.
وبرضه ياريت يتم تغيير طلمبة المياه، حضرتك لم تذكر أى شئ عنها، وموضوع التقليب بالرؤية ده مش كافى، فاحتمال التقليب غير كافى فى السرعة العالية.
واحتمال آخر شوف اتجاه سحب مروحة التبريد من بره لجوه وده الطبيعى ولا بالعكس؟؟؟

[hobaus3000]

شكراً على اهتتمام حضرتكم
وبالنشبة لطرمبة المياة لسه مغيرها جديدة من حوالى 7 شهور او 8 شهور وجايبها جديدة ايطالى وبعدين العربية كانت شغاله بيها ومفيش مشكلة قبل الكشط وبعدين الراجل بتاع الراداتير لما كشف على الراداتير وتقليب الطرمبة قاللى شغالين كويس .
وبالنسبة لخراطيم المياة اللى خارجة و داخلة من والى الماتور تم الكشف عليهم ولا يوجد مشاكل فيهم لكن انا عايز اعرف النسبة اللى اتكشطت من الوش دى تكفى بتعويضها جوان دوبل و جوان عادة بدل من جوانين عادة اللى كانوا راكبين ولا المفروض نزود ويبقى اتنين دوبل انا مش عارف
وخصوصاً النسبة اللى اتكشطت 15 من ميه مرتين

[mr_astra]

وبالنسبة لخراطيم المياة اللى خارجة و داخلة من والى الماتور تم الكشف عليهم ولا يوجد مشاكل

انا عارف انك اكيد كشفت عليهم لكن مش هايبانو الا فى المشى ودة شىء لا يمكن هاتشوفة بعينك لان العربية ماشية
بخصوص جوانات دوبل انا مش بحب الشغل دة بامانة لان وش السلندر العقل المفكر للموتور ولما بيتلعب فية مش بيرجع زى الاول اما انة يسخن العربية او انة ياكل بنزين او المكنة مش بتظبط فلو عرفنا نتغلب على مشكلة السخونية من غير فك الوش بالنسبة لى افضل وبينى وبينك الحل العملى كان مفروض تجيب وش استيراد احسن ما تعمل الوش بتاعك مرتين