تجنب أسباب النوم اثناء القياده..

[mesho70]

فعلا ً موضوع خطير جدا ً
- خصوصا ً وانا ممكن اسوق 12 ساعة متواصل واسير حوالى الف كم
- وكان زمان ممكن اركن العربية وانام حتى فى جامع على الطريق الصحراوى
- اما الان فصعب جدا ً
- والاصعب انى قبل السفر بكون قلق وفعلا ً يكون النوم اقل من العادى ومتقطع

[Neo206]

كل عام و أنتم جميعا بخير
عيد سعيد

[luaai]

شوفوا بأه
غالبا والله أعلم ماحدش نام وهو سايق في المنتدى ده أدي
1- خلصت شغلي في 6 أكتوبر وعديت على واحد صاحبي في البشاير والقعدة احلوت عالآخر
افتكرت ان المدام عاملة حظر تجول النهاردة فخرجت من عنده الساعة واحدة بعد نص الليل
وعالمحور قبل أول رادار (النظام القديم) وأنا فوق لسه (بيسموه نفق فودافون) خير اللهم اجعله خير آل إيه أنا فجأة بقدرة قادر بقيت تحت في النفق!!!!!!!!!!
قمت محول من قرآن السهرة لنجوم اف ام عشان انا مش عاوز أموت وأنا باسمع أغاني !!!!!!!!!!
2- كنت في بورسعيد عند أهلي وعامل حسابي اني هسافر بدري جدا
فدخلت زي الشطور شربت اللبن ونمت الساعة 10:30 مساء وقمت بفضل الله عالفجر صليته حاضر ونزلت أحضر العربية لقيت واحد ابن حلال قافل علي بعربية 131 ورافع الهاند!!!!
ما تسألونيش عن المجهود الجبار اللي عملته لوحدي عشان أخرج منها وازاي زقيتها، وفي النهاية أنا فايق 100% وغرقان في العرق!!!!
المهم، أم العيال العشرية نزلت ومعاها ولداي الحسين والأدهم (ماكانش المعتصم لسه جه ) ومعاها فطار وحاجة سخنة في الترمس..
توكلت على الله وطلعت عالطريق في حدود 6:30 متجه من بورسعيد إلى القاهرة.. وأنا سايق حاسس بعينية بتحرقني والشمس بدأت تطلع مقابلة لي في بعض أجزاء الطريق.. جفوني ابتدت تتقل وأبص عاللي معايا لقيتهم خلصوا كل الرز مع الملايكة وماسابوليش حاجة خالص..في سابع نومة!!!!
وقفت ونزلت ألبي نداء الطبيعة وبالمرة أشم شوية هوا نضاف وأفرد عضلاتي شوية
ولقيت كل اللي معايا صحيوا من النوم.. خلصت وركبت والمدام - جزاها الله خير - صبت لي من الشيء الساخن اللي في الترمس ويطلع ايه بأه يا سيدي؟؟؟؟ نعناع!!!
الله .... دااااافي وجميييييييل...
والطريق يطلع بينا بلاد تشيلنا وبلاد تحطنا وداخلين على أول كوبري لمدينة العاشر...
█████████████████████████ █████████████████████████ ███
█████████████████████████ █████████████████████████ ███
█████████████████████████ █████████████████████████ ███
████████████████████████أ ســـود███████████████████ ███████
█████████████████████████ █████████████████████████ ███
█████████████████████████ █████████████████████████ ███
█████████████████████████ █████████████████████████ ███
█████████████████ لؤي (صوت من بعيييييييد قوي بينادي) ██████████████████
█████████████████████████ █████████████████████████ ███
█████████████████ لؤاااااااي (من بعيد برضك بس بصدى جامد المرة دي) ███████████
█████████████████████████ █████████████████████████ ███
█████████████████ لؤااااي حاااااااسب ▓▓▓▓▓▓▓▓▓▒▒▒▒▒▒▒▒▒▒▒░░░░░ ░

فجأة لقيت الخط الأبيض المتقطع بتاع الطريق بيروح عالشمال والسور بتاع الكوبري جاي علي من اليمين
ومسنتر عالعربية في النص بالظبط....رحت لامم العربية بسرعة عالشمال لحد ما جبت الخط الأبيض تاني (الحمد لله)
وعلى 140 لحد ماوصلت (أنت حاطة في النعناع ده ايه يا لينا؟؟؟؟)
لما سألت قالولي ان النعناع مهدئ

3- يوم 5 رمضان قبل اللي فات (بتاع 2010) رجعت من بورسعيد الى الجيزة
ويوم 6 رمضان خالي مجدي توفاه الله في مستشفى القصر العيني (ماكنتش أعرف انه جه من بورسعيد)
قمت رحت بالليل ولقيت أهلى وأهل زوجته هناك وحاولنا لفترة متأخرة من الليل انا نخرج الجثمان عشان ندفنه بدري في بورسعيد لكن مانفعش خالص
روحت على الساعة 2 بالليل ونمت وقمت عالفجر أخدت معايا عديلي وصديقي ورحنا بعد الفجر مباشرة على المستشفى..طبعا ماحدش جه من الموظفين غير الساعة 9 وكل ده وأنا صاحى قاعد في العربية... المهم خلصنا الإجراءات ولقيت خالي الكبير بيتصل بيا: "تعال نغسل خالك".
هو فينا من كده؟؟؟؟؟ اتوضيت وتوكلت على الله جمدت قلبي وخلصت بصراحة كانت صعبة جدااااااااااااااااااااااا اااااااااااااااا
وخصوصا انه كان مقرب لقلبي ودي أول مرة اعملها
وهوبا لقيتهم واخدينه على عربية H1 وطيران!!!!
زي ما أنا مبلول وريحتي غريبة من الغسل جريت (أيوة بجد كنت بجري) عالعربية ومعايا الناس (مصطفى عديلي ومصطفى صاحبي) (اسمي مش مصطفى وإلا تبقى كملت ) ولقيت معايا اتنين كمان مش عارف جم منين قالولي خدهم معاك قلت ماشي (تقريبا من قرايب مرات خالي) وطيرااااان ورا ال H1
المهم وصلنا بورسعيد وصلينا العصر عليه (الله يرحمه) ودفناه...
فكروني أبقى أحكيلكم على موقف غرييييييييييب جدا حصل لي في الطريق وبيه تخلصت من الوزن الرهيب في العربية (كل اللي معايا من الأوزان ماعدا مصطفى صاحبي)!!!!!!
حمايا أصر (أو ألح) انه يعزمنا عالفطار...رمضان بأه وناس تعبانة جدا وسفر وكنا راجعين في نفس اليوم
وفي المعدية إلى بورفؤاد يشاء العلي القدير أننا نقابل واحد صاحب حماي لسه واصل حالا من القاهرة ورايح له زيارة مفاجأة
رحنا البيت وفطرنا على ما أذكر بوري وسردين مشوي على شوية سي فود وحركات من السلاطات والذي منه
ثم دخلنا على الحلو واللي كان جلاش وحاجات تانية مش فاكرها ومئات الجالونات من قمر الدين والتمر والمياة الباردة
وصلينا العشا وقلنا نريح :D لقيت حمايا بيقولي: أنتوا مش مسافرين النهاردة؟؟ (ماكانش يعرف أني كنت ناوي أبلط) قلت آه وعلى استحياء كده
قلى طب خد عمك محمد معاك!!!!!!! أي ماشفتهاش دي وهي جايه
قلت ومالة ياللا بينا
نزلنا وركبنا العربية وطيرااااااااااااااااان عالقاهرة بسرعة 100 كلم بس
والناس معايا مرعوبة..الطريق في اليوم ده أغلبه ضلمة وأنا عمال أنعس وأتطوح بالعربية يمين شمال لحد ماوصلنا عند مدينة المستقبل (الكباري الجديدة ماكانتش اتعملت لسه وكان في تكسير)

المهم الحاج محمد قال: استنى (هيعمل معانا واجب) .. أنا قلت في بالي: "بس عصاير وبسكويتات وشيكولاتات على الأقل بحق تمن تذكرة السوبرجيت اللي ما اشتراهاش"
لقيت أجدع قزايز مية واحد لتر للسواق (عشان بيتعب يا ولداه) وانصاص للشباب اللي ورا!!!!!!!!
مابدهاش...أنا قلت أخلص الحوار ده وأروح أنااااااااااااااااااااااا اااام...
وصلنا القاهرة (اختصارا للحبر ووقت حضراتكم) ووصلته مصر الجديدة والدنيا كانت فعلا زحمة (تقريبا ماتش أو حاجة) وكنت بنام بجد في الطريق جوة البلد بتكلم معاهم وفجأة التيار يفصل وراسي تدلدل على صدري!!!! كانت فضيحة والله
4- مرة كنت مسافر وماكنتش نايم وكان معايا زوجتي والأولاد
المكان: مش فاكر من فين لفين (بورسعيد للقاهرة أو العكس) طريق مصر اسماعيلية الصحراوي
الزمان: منظر ليل خارجي (يعني بالليل)
الحالة: تعباااااان ونفسي أنام
فقلت أعمل زي الأساتذة المحترمين اللي كاتبين فوق وأركن على جنب وأنام..

وعليه.. استنضفت حته كده وركنت فيها وبطلت العربية وقفلت الازاز والسنتر ونمنا (الولاد كانوا نايمين أصلا ثم تبعتهم زوجتي كعادتها وأنا وراهم)
........صمت.......هدوء... ....العدسات في عينيا مضايقاني قوي

وفجأة لقيت نفسي زي المجنون (آه والله) قايم منطور عالكرسي ومدور العربية وحارق وطالع!!!!!!!!
وأنا باتحرك سمعت اللي بيقول استنى اسنتى أما أقولك - تقول لمين ياعم وعلى فكرة الكلام ده قبل الثورة في أواخر الصيف
ولما فقنا زوجتي قالتلي كانوا شايلين حاجات في ايديهم زي عصيان أو بنادق الله أعلم

في كام موقف كده كمان لكن كفايه عشان....مش مهم عشان ايه كفاية وخلاص

فوتكوا بعافية

[nktis]

[koashraf]

اهو ماجبتش حاجه من عندى ..عادى جداً ان الانسان تضطره الظروف انه ينام اثناء القياده خصوصاً لو اتعرض لموقف مفاجىء انه يقود لساعات طويله أو لوقت متأخر بالليل بعد سهره طويله..
انا رايى لوممكن تأجل سفريه زى دى يبقى افضل من انك تسوق تحت الحاح النوم والارهاق..لكن طبعاً فيه حالات طارئه زى الوفاه مثلاً ..وانا اتعرضت لموقف زى كده يبقى الافضل ماتجريش جامد حتى لو مش حتلحق..لان التركيز بيكون أقل تحت تأثير الارهاق الشديد..
وربنا يسلم طريق الجميع...