متاريس الحديد بالشوارع !

[lalala]

بعد اذنكم يا جماعه في ناس عندي قليله الزوق والاحترام كدة وعملت متاريس حديد في الشارع علشان تحجز اماكن لعربيتها علشان لما تيجي بالليل تركن وحاجة زي الفل بس الصراحه انا معملتش زيهم علشان مش بحب اعمل الغلط ومش برضي بيه .. المهم بقي انا كنت عاوز اقدم شكوي عن الموضوع ده ويا تري اقدمه فين ؟ في الحي ولاااا القسم التابع ليه واكون شااااكر افضالكم لو حد يقولي اكتبها بأنهي صيغه علشان انا هتجنن في موضوع الصيغه ده

[AHMED BAHAA ALDEN]

بص هو الموضوع ده بالذات له نظريتين
يعنى بالنسبة ليا انا من سكان شبرا و المربع السكنى اللى انا فيه اتقفل فيه شارعين من ابوابهم من سنتين علشان فيهم كنائس وطبعا فاكرين موضوع الحادثة بتاعة تفجير كنيسة اسكندرية ومن يومها فيه حوالى 40 ل 60 عربية بقى ما لهمش مكان وبيركنوا فى الشوارع المجاورة ووصل عندنا ان الشارع الداخلى الرئيسى بقى بيركن فيه صفين .
دى حاجة والحاجة التانية ان نفس المربع فى خلال 5 سنين اتبنى فيه 11 عمارة جديدة و الدنيا بقت بظرميت لدرجة ان الواحد بيفكر قبل ما يطلع بعربيته هاتبقى ليها ركنة ولا لأ خصوصا ان العمارات الجديدة مش كلها ليها جراج واللى ليها بيبقى صغير

لك ان تتخيل انى من سكان المنطقة من عشرين سنة ومش لاقى مكان اركن لا تحت بيتى ولا حتى بعدى بشارعين . يبقى ايه الحل

انا لحد دلوقتى ما عملتش متاريس مع ان الموضوع شاغلنى بقاله فتره ...

[world_of_kill]

بتقدمه لمجلس المدينه تهيألي و عادي قدمه في كلو في القسم و في الحي و في مجلس المدينه

و اكتب انت الصيغه بالطريقه ا للي انت عاوزها

السيد رئيس المصلحه بعد التحيه
اقدم انا /
شكوي بخصوص قيام بعض الجيران بي اقامه متاريس في الشارع /
و مما تسبب في ضرر لي من اصابه السياره ببعض الخبطات ... الخ الخ
ومما يعتبر مخالف للقانون وحق المواطن في ان يحيا حياه بدون اذي الرجاء عمل الازم و ازاله اثار الاذي ..... الخ


و حاول تظبطهم في الشكوي و تابع علي طول و برضه ممكن تعمل محضر برضه بس مفروض مجلس المدينه المسؤل و الشرطه تنفذ او مجلس المدينه

[hamed2020]

بلطجه ببلطجه
انا من شبرا فاجاه لقين ناس كتير عملت القصه دي
انا و كام واحد من عمارتي اتفقنا مع بعض ان الهبل ده لازم يتشال
و مع اول جمعه صلينا و لقينا ناس كويسه برضو ومن العمارات الي حوالينا قلنلهم و هم قالو لناس تانيه و كل ده واحنا واقفين بعد الصلاه بنسلم علي بعض
بعدها بنص ساعه مكنش فيه ولا اي حاجه من المتاريس دي و لا واحد من الي حطينها فكر او عرف يقولنا انتو بتعملو ايه
هي بقت ماشيه كده المؤدب و الي يكلم الناس بالذوق مبقاش ينفع
:0101 04~171:

[zing0]

مش هأكدب عليكم
أنا شايف أنها من حق صاحب العقار أنه يخصص مكان لسيارته أمام بيته, لأنها تعتبر منافع للبيت و فى بعض الأحياء إللى الأراضى فيها تباع بنظام (تقسيم أهالى) صاحب البيت بيدفع ثمن نص الشارع إللى بينه و بين الجار المقابل.
أنا مش عامل لا متاريس و لا حاجه الحمد لله, بس أحيانا آجى أركن امام المنزل ألاقى عربيات لناس معرفهاش راكنه, و أضطر أركن فى آخر الشارع, طيب ما جحا أولى بلحم ثورة.

و الجميل فى الموضوع جارنا فى المنزل المجاور حاطط أرصفه خرسانة أمام بيته علشان العربيات متركنش, رغم أنه معندوش عربية و البيت مفيهوش محلات!!!
تقريباً هوايه.