عاوز افتح معرض سيارات (الرجاء التواصل مع اهل الخبره لمساعدتي بمقابل مادي)

[khaled200p]

المشاركة الأصلية كتبت بواسطة ahmed.911 السلام عليكم اسمحلى انصح حضرتك نصيحه صغيره انا اشتغلت في معرض الاحمدى موتورز سنتين ونص ودة معرض زيروهى شغلانه مقرفه جداا وفي عربيات مبتكونش جايبه همها وخد بال حضرتك الشغلانه دى بحرهااا كبير اووى وسككها صعبه حقيقي في الاول بس فلوسها بتبقي مضمونه شويه لو تقدر تجيب العربيه بخصم كويس انا ممكن اساعد حضرتك فيهاا بس الاول لازم حضرتك تبقي عارف ان المخاطره كبيره... احمد ربيع

طيب حضرتك الافضل اخد توكيل وابقي موزع معتمد لنوع واحد من السيارات
ولا المعرض يبقي شامل لجميع انواع السيارات

وما هي مخاطرها المتوقعه
وراس المال الازم في البدايه

[romeoalmansour]

المشاركة الأصلية كتبت بواسطة khaled200p طيب حضرتك لو عندك خبره في الموضوع ده ممكن نتقابل وتشوف المكان وتقولي رايك

انا تحت امرك

[memo1100]

السلام عليكم ورحمة الله وبركاتة
شغل العربيات علاقات مع واسم وسمعة
عابز تشتغل اشتغل فى الزبرو والمستعمل متاخدش موزع لعربية معينة لان انت كتاجر وجالك زبون بتتفق معة على سعر قبلها بتكون انت جاييب سعر العربية دى من الموزع بسعر تاجرى لازم تكون عارف مسولين التجارى عند كل الموزعين
انا ايمن صلاح معرض كار وان موتورز مدينة نصر
كلمنى وهتفخك شوية حاجات هتفيتدك وهظبتك مع البنوك ومع التجارى
والكلام دة استاذ احمد الى كان شغال فى الاحمدى موتورز عرفة كويسة لانو زى ما قالك بحر واسع بس مربح
01019634020

[ramy safwt]

لازم دراسة جدوى سليمة و معرفة نبض السوق و حدود رأس مالك القصوى

بمعنى الجديد بيحتاج حد معاه هبر فلوس و يكيش و يصبر على تمن العربية

فى بداية نزولك للسوق بتنزل جينيرال يعنى مع كله و بعدين بتلاقى نبض السوق رايح ناحية شركات معينة و الناس بتحب تاخدها منك فهتبداء انت تتجه ناحية العربيات دية تحديدا

و بعد كده تبداء تتخصص و تاخد توكيل الشركة مش هتوصل للمرحلة دية غير اما تكون بنيت علاقات قوية جدا تخليق تقدر تنافس و تقدر تعمل استراتيجية ناجحة عشان تضمن لنفسك جزء من نصيب الحيتان

بعد ما تاخد التوكيل تبداء تدخل فى الصيانة بتاعة الشركة اللى تخصصت فيها بس ده ميمنعش انك تاخد عربيتين تلاته تبيعهم من ماراكات اخرى عشان تمشى السوق الرزق يحب الخفية


بخصوص مسار المستعمل فلازم يكون عندك خبرة قوية جدا فى صيانة العربيات و التجار و ليك علاقات كويسة تقدر من خلالها تجيب قطع الغيار اللى ترم العربية و تخليها فابريكة

ده غير انك هتحتاج تعمل علاقات مع بتوع المرور عشان تقدر تتحرى عن كل عربية تجيلك

فى مسارات خطيرة و انك مثلا تعرض عربية لحساب زبون و تاخد نسبتك و دية فيها مخاطرة بسمعة المكان اذا كانت العربية متلصمة و ده يرجع لخبرتك برضو لكن ده بيوفر عليك مخاطرة انك ترمى فى عربية و طبعا كل مخاطرة و ليها ابعادها و مكاسبها


مسار الصيانة قبل ما تفكر فيه فكر فى الموارد البشرية اللى ممكن تثق فيهم ثقة مرعبة و برضو هتحطهم تحت عينك طول وقت الشغل ولازم تكون فاهم جدا فى الموضوع متعتمدش على حد يديرهم و يفهم مكانك " هتتاكل "

اعتمادية مركز الصيانة بتكون اسهل لو انت حضرتك المكان والادوات من البداية انها تتطابق معايير كل شركة هتتعاقد معاها

لازم تحط فى اعتبارك ان المركز بيكون فيه تخصصات كتير جدا فمثلا فى مراكز بتجمع بين تخصص الكهرباء و العفشة و ناس بتعمل عفشة و ميكانيكا و ناست بتعمل التلاته و ناس بتعمل عفشة و سمكرة - " لاحظ ان التخصصات التانية بتكون موجودة " بس تجهيز المكان نفسه بيأهله لعدد محدود من التخصصات " غير كده بيبقى محل كشرى "


مركز الصيانة الرفاهية و ده نادر فى مصر و من الصعب ادارته لأنه بيعتمد على نوع معين من العملاء بيكون تفكيرهم كله ازاى تبقى العربية مريحة و ممتعة و حط تحت دية مليون خط بيكون فيها الفيجول " تعديل الشكل و التزويق و التفاصيل دية " البودى و العافشة " و دية بيكون فيها تعديل العشفة و الجسم بتاع العربية عتب و اكصدامات و كماليات " الكهربة و دية بتكون انظمة صوت و اضائة و تكييف و جى بى اس و حركات و متستغربش لو لقيت حد حاطط مكنة قهوة فى عربيته هما كده - تعديل المحركات و ده بيكون فيه كل تفاصيل بقى التعديل و تسقيط المواتير و القصص دية

طبعا المشروع ده صعب جدا لو حد معنهودش خبره يمشيه لأنه بيعتمد على التجار و الفنين اللى عندهم لمسات ابداعية بشكل مدروس ده غير انه صعب التنبؤ بأحتياجات السوق كل زبون و ليه طلبات اللى على مقاسه بس


انا من رأى تحاول تعرف اكتر عن السوق و الادارة و تزور مراكز تانية و تعرف نظامها ازاى و فى النهاية الموضوع هيعتمد على ميولك و قدراتك المادية و الفنية

بالتوفيق و مبروك مقدما

[ahmed.911]

المشاركة الأصلية كتبت بواسطة khaled200p طيب حضرتك الافضل اخد توكيل وابقي موزع معتمد لنوع واحد من السيارات ولا المعرض يبقي شامل لجميع انواع السيارات وما هي مخاطرها المتوقعه وراس المال الازم في البدايه

السلام عليكم اولا لو حضرتك هتاخد موزع دة مش بيبقي سهل بيبقي اجرائات وبيتعمل لحضرتك معاينه للمكان كويسه ولازم يبقي ليك اسم في سوق او يبقي ليك وسطه كويسه جوه الشركه ثانيا لما تشتغل في كله دة افضل صحيح مش هتاخد في العربيه زاي ما انت موزع بس التنوع هيفيد حضرتك كتير وهيعوض ليك الفرق بي مراحل اما بقي المخاطره هو ان حضرتك بتتعامل مع عربيه زيرو يعني الخربوش بفلوس والخبطه لقدر الله به ثانيا في عربيات مش هتقدر تجبها بونش لان اصلا مكسبها مش كبير فا هتجبهاا ماشي واعرف ان اخطر شئ وهي جايه ماشي من غير رخص وكمان هتتطر اوقات تجيب العربيه في عز الزحمه .. اما بقي للتكلفه حسب امكانياتك عايز تبتبقي بي 300 الف كا بدايه وممكن اساعدك في اني اقدر اجيبلك عربيات عرض من المعرض القديم اللي كنت شغال فيه بس لازم علي الاقل تسيب فلوس اما بقي عدد الموظفين محتاج مبيعات كويسه جداا محتاج مكان او مخزن تعرف تركن فيه عربياتك محتاج فرد او اتنين نظافه محتاج سواق علي الاقل والسواق لازم تعلمه ازاي يرخص وكل دي مرتبات شهريه بس بالنسبه للعائد ممكن يكون كويس اوي في شهر وممكن يكون ضعيف في شهر بس لازم هتلاقي شهرين تلاته في السنه يعوضوك وبالنسبه للاقساط عندي مندوبين بنوك اقدر اجيبهوملك ونتعامل معاهم ...