التريللا

المشاركة الأصلية كتبت بواسطة تامر ديزل العربيه اللي هتكلم عليها دلوقتي عربيه صيني .... صناعتها صيني 100 % اسمها فوتون ودي عربيه موتورها 420 حصان موتورتقليدي جدا 6 سلندر وفتيس عاده 9 غيار زهر مش المونيوم والكابينه زي ما هنشوف ف الصور اللي جايه دي صورةالعربيه [IMG][/IMG] وزي ما هنلاحظ ان الكابينه معتمده بشكل كبير على البلاستيك يعني هنلاقي الاكصدام والرفارف والخدود بلاستك غير العربيه المرسيدس اللي اكصدامها صاج فيه نقطه عايز اوضحها ليه انا مش بحط مقارنات بين العربيات من حيث الموتور ومكوناته وامكانيات الفتيس وليه مكتفي بالمقارنه بين العربيات من خلال الشكل العام والكابينه والرد ان دي بدايه وان فيه ناس كتير ميعرفوش حاجه عن العربيات دي وهيا بالنسبه لهم طلسم فرعوني مغلق فلازم ف البدايه نبدا ندردش من السهل لحد ما ندخل للصعب نرجع تاني ايه حكايةالعربيه دي ؟ زي مابقولك دي عربيه صيني نقل 6X4 وبتشتغل زيها زي اي عربيه نقل بمعنى انها بتشيل نفس حمولات المرسيدس وبتسافر لنفس الاماكن ومشاكلها نفس مشاكل اي عربيه نقل تانيه طيب ليه اخترتها علشان تكون تالت عربيه في التصنيف ؟اقولك دي عربيه رخيصه تمنها من 350 الى 400الف جنيه جديده وقطع غيارها رخيصه جدا وبدات تتوفر في مصر وعشان هيا عربيه عاده كل حاجه فيها عاده مش كهربا فاي حد ميكانيكي ممكن يشتغل فيها بعد ( تدريب بسيط ) يعني صيانه واعطال ما تشيلش هم وكمان عاوز اناقش معاكم الفكره الظريفه جدا دي دلوقتي العربيه الاكتروس مكيفه ودبرياج اوتو شيفت وكابينه ملاكي وموتور تحكم كهربا ووحدات حقن الكتروني تمام ؟ وجنبها العربيه الفوتون اوالصيني عموما مفيش تكييف ودبرياج عاده والكابينه ناشفه شويه والموتور صوته عالي وعاده والاتنين بيمشوا على الطرق المصريه السيئه جدا والاتنين هيشتغل عليهمسواقين من المفتريين اللي ف رجليهم ملح وهيدغدغوا العربيات من الجري والسرعه والاتنين هيحتاجوا قطع غيار بشكل دوري زي تيل الفرامل مثلا تلاقي قطعة الغيار المرسيدس بكام الف وقصادها الفوتون قطعة الغيار شبه ببلاش ايه رايك انا هقولك رايي قبل ما اسيبكم مع شوية صور للعربيه : لو عايز تشتري عربيه تحوش فيها فلوسك واهي شغاله ولما تيجي تبيعها تلاقي فلوسك معاك هات المرسيدس الاكتروس انما لو عايز تجيب عربيه تفرتكها شغل وماتشيلش هم تكاليف قطع غيارها وف الاخر بظروفها لو عرفت تبيعها يبقى عليك وعلى الصيني ارجع واقول الاتنين نفس الاستخدام والحموله هابسطهالك لو هاتجيب تاكسي تطحنه شغل هات الفيرنا لو هاتجيب عربيه تتعايق بيها و قرشك متحوش هات الاوكتافيا مثلا ... اسيبكم مع الصور وانشاء الله هكمل باقي الاجابات من غير تأخير دي صورة العدادات [IMG][/IMG] ودي صوره لجزء من التابلوه والكاسيت وزرايرالتكييف [IMG][/IM

اية يا سيدي العدادات دي كلها
اتاريها بتبقى ماشية طايرة جنبي على الدائري
ما السواق فاكر نفسة سايق طيارة

[transporter]

بسم الله الرخمن الرحيم
أنا متابع ومستمتع بطريقة شرحك_وكل التقدير لطمئنتك للأعضاء أنك لن تنسي الإجابة علي ما أثاروه من أسئلة فأنا واحد منهم _ومنتظر بشوق أن تتابع الموضوع وفق برنامجك_وكلي ثقة أنني سأحظي بإجابات لكل ما يجول بخاطري.
تقبل تحياتي

[حسام البورسعيدى]

بجد من اروع المواضيع اللى شفتها على المنتدى يا تامر باشا ..

لازم تكمل الموضوع ده فى اسرع وقت ...

واتمنى تتكلم شويه عن المعلومات التقنية بالنسبة للمواتير والفتايس العاده والكهربا ...

وبالمناسبة كان عندى سؤال بسيط كده .. ليه تصميم الدركسيون فى التريلات بيكون افقى بعكس العربيات الصغيره .. يعنى ايه الميزه فى كده ....

[تامر ديزل]

سلامو عليكم
النهارده جايب لكم العربيه رقم 4 : العربه الطائشه
نشوف الصوره الاول
[IMG][/IMG]
دي عربيه امريكاني ماركتها فريتلاينر والفريتلاينر دي الماركه رقم واحد في الولايات المتحده واول ملحوظه هنلاقي ان العربيه دي ليها بوز ... ايوه بوز زي المدام كده ما تكون ضاربه بوز .. ما علينا ... البوز ده اللي هوا في مقدمة العربيه قدام الكابينه وده كان التصميم المعتمد في العربيات النقل القديمه ولما عدلو التصميمات شالوا البوز او بالبلدي قطشوه فبقت العربيات بالشكل اللي شفناه في المرسيدس والصيني وسموها ف السوق العربيات القطش
البوز هنا موضع تركيب الموتور اللي هوا ف عربيتنا من مصنع GM الشهير في مدينة ديترويت وبيدي 420 حصان وتحكمه بالكهربا من خلال كنترولات زي الاكتروس الحديث والفتيس كمان تحكمه بالكهربا
البوز ده ليه فوايد تانيه منها انك ممكن تفتح على الموتور بسهوله من غير ماترفع الكابينه يادوب ترفع الكبوت اللي فوق البوز وهوا بالمناسبه من الفيبر المقوى ولكن خفيف جدا كمان فايده ان العربيه يكون ليها بوز ان السواق بعيد ورا عن الاكصدام ييجي بمتر ونص غير القطش السواق قدام ف امكانية الاصابه الجسديه اكبربكتير
العربيه دي ليه طائشه لان حظها الوحش ف السوق المصري خلاها تنقرض عند ناس كتير من اللي اشتروها لان ماليهاش قطع غيار ولازم تبعت تجيب من امريكا باسعار مولعه انما انا ازعم ان العربيه دي لو كان ليها قطع غيار متوفره كانت سبقت المرسيدس .... لانها عربيه حديد وموتور حمال قسيه حتى المشكله بتاعت الكنترولات والكمبيوتر محلوله لان جهاز كشف اعطالها بدائي جدا واي حد ممكن يتعامل معاه الفتيس بتاعها فيه مفاجاه هقولهالكم بعد ماتشوفوا الصوره دي
[IMG][/IMG]
واخد بالك من الزراير التلاته اللي في يمين الصورة وعليهم الحروف RND ؟ بيفكروك بايه الحروف دي ؟
ايوه الفتيس بتاع العربيه اوتوماتيك .... ايوه اوتوماتيك وبزرايركمان مش بعصايه ... دي اول عربيه اتعلممت عليها السواقه وبكل سهوله تدوس D هتلاقي العربيه بتمشي تفرمل وتدوس N ها تمور العربيه بعد كده تدوس بصابعك R العربيه ترجع لورا ايه رايك ؟
نكمل بعد شويه

[تامر ديزل]

نكمل كلامنا بقى عن العربه الطائشه :
نروح لنقطة البوز مره تانيه اصله مهم جدا وموجود ف حياتنا اليوميه بشكل مكثف فلازم نديله حقه ونسال : لما هوا البوز له مميزات كتير كده ليه المصانع العالميه سابت التصميم القديم ده وراحت للجديد اللي هوا القطش زي ماتفقنا ؟ الاجابه ببساطه لان البوز مدي طول للعربيه زياده عن القطش فبتكون العربيه ام بوز محتاجه مكان اوسع تلف منه او تناور فيه اكبر بكتير من القطش وطبعا فيه مخازن واماكن ما بتقدرش العربيه دي تدخلها لانها طويله ودي ميزة العربيه القطش اللي خلتها تنتشر على مستوى العالم ماعدا امريكا اللي معندهومش مشكله ف وسع الطريق ويمكن تلاحظوا ان دايماالعربيات الامريكاني حتى الملاكي منها كانت اضخم بكتير من الياباني او الاوروبي وده لان شوارعهم واسعه جدا غير ان الامريكان ميالين للضخامه والقوه في كل شئ
اول مره ركبت العربيه دي علشان اتعلم عليها السواقه كانت جوا الورشه من ست سنين تقريبا السواق راجل طيب جدا قالي دوس يابيه على الزرار اللي تحت D دوست راحت ماشيه لقدام شويه ولقيتني داخل على السور هوب دوست فرامل هوب مش عايزه تقف دوست بزياده برضه مفيش فايده مفيش حاجه وقفتني غير السور والحمد لله ان العربيه كانت ماشيه تاتا تاتا والا كنت لبست ف السور بعنف ومش عارف كان زماني دلوقتي بكلمكم عن موضوع تاني خالص غير التريللات يمكن كنت هعمل موضوع عن النابوليا الدمياطيه ولا الجبنه الدمياطي العال لانهم اكيد كانوا هيرفدوني ويحرموا البشريه او يرحموها من مجهوداتي
طيب حد يقدر يقولي العربيه مكانتش عايزه تقف ليه ؟