لاول مرة علي النت n200 وn300

[hamada666]

السلام عليكم
أنا وأعوذ بالله من كلمة انا عانيت كتير لما جيت اشتريهاملقيتش حد يكلمني عنها وسمعت كلام كتير منه الصح ومنة الكذب.
اولا:- شركة منصور بطلت تستورد ال n200 وبقيت شغالة في الn300 تمام والاتنين انتاج مشترك مع شركة ويلنج الصينية والشركة دية كانت هتفلس وجنرال موتور طبعا لحقيتها والعربيتين ميفرقوش كتير لدرجة ان أغلب القطع الداخلية هية هية اما الفوانيس والاجزاء الخارجية المختلفة.ودة موقع الشركة الصيني http://www.wulingmotors.com/
وصفحة n200 http://www.wulingmotors.com/1-hongtu-minivan-5.html
وصفحة n300 http://www.wulingmotors.com/1-rongguang-minivan-4.html
وصفحة مواتير الشركة
http://www.wulingmotors.com/4-SGMW-engines.html
ملاحظة مثيلتها في مصر اللي مش شيفورلية بتيقي ارخص 10000 جنية في المعدل دة
ثانيا نبدا بالحلو المزااااااااااااااااااااا ااااااايا ( بحبها مش عارف ليه)
1- العربية شيك وواسعة وعندي احساس ان n200 اجمل من n300 في الشكل الخارجي وتعتبر اجمل واوسع من مثيلتها ( السوزوكي مثلا مع كل احترامي للمارد الياباني).
2- العربية راسية في الطريق يعني احتمالات قلبها وربنا يسترها قليلة مع الاخذ في الاعتبار انها خفيفة شواية في الطرق السريعة يعني ممكن تتهز لو عدي جمبها اتوبيس او ميكروباص بسرعة او كان الهوا شديد.
3-الصالون واسع وتحس انك راكب ملاكي مش ميكروباص واللي معاك يبقوا مش مزنوقين ومتحسيش انها صيني او زي ما بنقول كدة في مصر فرز اول .
4- انا معنديش تكييف بس اللي معاهم تكييف بيشكروا فية وعموما كل الصيني تكييفة بيبقي كوايس وبالاخص ان فيها سبلونة في مقدمة الجزء الخلفي وبالتالي التكييف بيوصل للناس اللي ورا و بيكيفو.
5-العربية مزودة بموتور مزدوج الكامة يعني عنده قدرة علي التسارع وبالتالي متسحسيش انها 1206 سي سي زيها زي ال n300 ( المعلومة ديه البركة في المنتدي هو اللي علمنا المزدوج واللي مش مزدوج)
6- العربية مزودة براديو بة مكان للفلاشة وهوكوايس مبيحصلش غالبا مشاكل به بس يعيبة عدم وجود سماعات بالخلف هما اتنين بس بالبابين الاماميين بس صوتهم كوايس0
7- سير الكاتينة جنزير يعني مش هتبص علية الا بعد 125000 كيلو
8- العربية تعمل بنظام الحقن الاليكتروني الانجيكشن بتوفر في البنزين ومفهاش مشاكل الكاربيرتير بس ادني نوع بنزين ممكن تحطة هو 90 علشان متبوظش طرمبة البنزين علي المدي الطويل نسبيا
9- تعمل علي نظام الكمبيوتر اللي يساعد في تسجيل الاعطال ومعرفة اسبابة زي كل العربيات الحديثة
ثالثا العيوب
1- التوكيل متعب جدا جدا وكان اغلبيت الفروع متعرفش تتعامل معاها الا فرع الصحراوي اللي في اخر الدنيا ( انما دلوقتي العملية احسن شواية ممكن فروع اخري فيها قطع الغيار تكون قريبة ) المثال رحت احد الفروع علشان في المرشددير( الرجوع للخلف) لمبة واحدة اللي بتنور فقالولي ان اللمبة الثانية محروقة والعربية كانت لسه جديدة بكيسها وهتكلف حاجة وثلاثين جنية وبعد التفحص وسؤالهم لفرع الصحراوي قالولي احنا اسفين هية لمبة واحد اللي بتنور في الرجوع0
ملحوظة زي اكثر التوكيلات في مصر لازم تحجز قبلها ويبلغوك باليوم اللي ممكن تروح فية وتتطلطع من الساعة 8 علي البوابة وبعدين يلطعول لاخر اليوم لغاية ما تستلم العربية حتي لو بتعمل الصيانة اللي هية تغير زيت وربط عفشة اللي في البنزينة بالكتير قوي ساعة0
2- قطع الغيار غااااااااااااااااااااااال ية جدا في التوكيل مقارنة بمثيلتها مثلا فانوس امامي 550 جنية وخلفي 250 جنية وبعضها مبيبقاش متوفر ولازم تحجزة وكان لازم تجيبها من فرع الصحراوي ( بس الحمد لله الناس بعد انتشار العربية شواية وبعض التدوير هنا وهناك لقينا ليها قطع غيار برة التوكيل أصلية وارخص وعندي امل كبير الموضوع دة يتحل ولكن قل الامل دة بعد منصور ما بطل n200 واشتغل في الn300 ) وعل سبيل المثال مرة في التوكيل قالولي التيل الامامي لازم يتغير في الصيانة والعربية ما كنتش عاملة كتير بس قالولي اني لو ما غيرتوش الطنابير ممكن تبوظ وانا هبقي المسئول طب بكام التيل قلولي 150 جنية ويارتني ما غيرتة قعد يصفر والعربية ما بتسحبش وحاسس انها قافشة وبتطلع عليه صهد كلمت المهندس قالي عادي بس علشان جديد اصبر كام يوم وصبرت ولكن الموضوع استمر فكلمتة تاني ورحت التوكيل راح عمل رجلاش علي التيل ونظفة وسمعت ان فية نوع تيل ثاني في التوكيل احسن ما بيعملش المشاكل اللي حصلت معايا أصلي يعني عرفت ان التوكيل ممكن يبيع اللي مش اصلي ب 150 جنية يا حلاوة ماروحتش تاني غير غلشان اشتري قطع الغيار اللي كتير ما بعرفش اجيبها من برة بس بركبها عند ميكانيكي برة0
3- العفشة ناشفة ولكن الحل الوحيد اللي لقيتة ان الواحد مايملاش الكاوتش قوي وبالتالي بتكون احن في المطبات او يغيرة بنوع اندونيسي من اللي بنسمع عنهم الحلوين دول0

اللي هافتكرة بعد كدة هاكتبة في الموضوع 0

ولاول مرة في النت بعض اسعار قطع الغيار لل n200
1- فانوس امامي كان اول م شتريت العربية 450 جنية دلوقتي 550 جنية في التوكيل وبرة 175 جنية
2- فانوس خلفي في التوكيل 225 وبرة 95 جنية
3- رفرف امامي في التوكيل 235 جنية
4- أكصام امامي 400 جنية في التوكيل
5- فلتر هواء 60 في التوكيل
6- سير كاتنة جنزير من 465 ال 630 في التوكيل حسب السير تقريبا بيختلف لانه كان عاوز يشوفه برة 175 جنية
7- سير دينامو 49 جنية في التوكيل
8- طقم بوجيهات عدد 4 في التوكيل 40 جنية وبرة 65 أغلي هههههههه
9- طرمبة بنزين كهرباء 825 جنية في التوكيل
10- فلتر زيت 41 جنية في التوكيل وبرة 20
11- فلتر بنزين 58 جنية في التوكيل
12- تيل فرامل امامي 150 جنية في التوكيل وبرة 60 نفس التيل صيني بس مش حلو انا عن نفسي بركب بتاع الاسبرانزا 113 احلي وكوري من 40 لحد 80 حسب الصناعة
13- تيل فرامل خلفي كان ب 250 في التوكيل ومبيبقاش موجود اوقات وبرة 135
14- طرمبة مياة برة 185
15- اسطوانة ديسك ودبرياج وبلية قي التوكيل 1100 جنية برة 350 جنية
16- طقم شنبر 150 جنية برة التوكيل
17- طقم جونات 175 برة التوكيل
18- جوان وش سلندر 55 برة التوكيل
19- مرايا امامية 135 جنية
20- مقاص امامي 110 في التوكيل 90 برة
21- مساعد امامي بسوستة برة التوكيل 225
22- مساعدين خلفي 160 جنية برة التوكيل
23- فنوس شبورة امامي الطقم 170 برة التوكيل
الا سعار دية تقريبية لان التوكيل مبيديش الاسعار الا بالعافية وبيغلب الواحد علشان يعرف سعر قطعة زي ما تكون مخدرات

انا اسف للاطاله بس انا حبيت ادي العربية حقها لاني من قبل ما اجيبها لحد دلوقتي ما لقيتش موضوع يكلم عنها بالتفصيل 0
اتمني من اللي يعرف سعر اي قطعة تقريبي ليها يكتبة ويشاركنا في الموضوع وشكرا

[كومندا]

تمام ياباشا ربنا يباركلك فيها
بس مقلتلناش الn200 كانت بتنزل بكام وn300بتنزل دلوقتى بكام
وهما اعلا عن الارض ولا السيزوكى

[hamada666]

بس يا أستاذ كومندا n2oo كانت بتنزل 3 فئات
مكيفة وباور 73000
مكيفة 71000
فاضية 67000

أما الn300 اللي اعرفة عنها انها بردة فئات وبتتراوح اسعارها من 75000 الي 77000
انا بالنسبة للعلو فالشيفورلية بنوعية كوايس في علوه عن الارض يعني المطبات متخوفيش اما السوزوكي فتكون كوايسة في حاله التجنيط العريض ولكن الجنط العادي بتاعها بيكون واطي نسبيا بس اللي اقدر احكم علية n2oo مجربها علوها كوايس جدا 0

[SAMER_ENGINES]

ربن يباركلك فيها يا أستاذ حمادة و بصراحة الكلام اللى قولته عن العربية غير الكلام اللى بسمعه عنها خالص و فعلا الواحد لما يجى يسأل يسأل حد يكون مالك للعربية او امتلكها يوما ما يكون افضل.

[hamada666]

المشاركة الأصلية كتبت بواسطة SAMER_ENGINES ربن يباركلك فيها يا أستاذ حمادة و بصراحة الكلام اللى قولته عن العربية غير الكلام اللى بسمعه عنها خالص و فعلا الواحد لما يجى يسأل يسأل حد يكون مالك للعربية او امتلكها يوما ما يكون افضل.

لا شكر علي واجب ودية سمه المنتدي ده الصراحة والمصداقية وربنا يديم المعروف