الطريق من حدائق القبة لجسر السويس

[m e d o]

عايز اروح من حدائق القبة لجسر السويس اروح ازاى

[ابوشروق]

السلام عليكم
اولا من ميدان حدائق القبه هتاخد الطريق كأنك ذاهب الى باب محطة المترو
ثانيا هيبقا صور القصر الجمهورى على شمالك خد الطريق على طول لحد ماتلاقى كوبرى
ثالثا أطلع الكوبرى هيلف بيك يمين بعد ماتنزل من الكوبرى هتلاقى الطريق يمين أجبارى
رابعا بعد اليمين الاجبارى شغل الاشارة شمال وأدخل شمال مع سير السيارات وأوعى تطلع على طول
خامسا تمشى فى الطريق تقريبا 100متر هتلاقى صينيه بتاعت قصر الطاهرة او سراى القبه كمل على طول
سادسا هتلاقى أشارة دى أشارة روكسى مع جسر السويس هو الى قاطع الطريق
لو رايح حفلة مصر موتورز عدى الاشارة وأدخل شمال فى جسر السويس وأمشى على طول لحد ماتلاقى بنزينه على أيدك اليمين وبعديها تقاطع أشارة عديها وخش أول يمين بعد الاشارة يبقا كده انت وصلت لمكان الاحتفال
تقبل تحياتى

حضرتك هتمسك سوار المترو لحد سراي القبة وتطلع كوبري قصر الطاهره وتنزل منه وتاخد شمالك واول صنيه هتقابلك هتلف نص لفه وتاخد الشارع اللي في وشها طوالي اسمه طومان باي

وبعد ما تخلص الشارع ده لاخر هتاخد يمين واول ما تلاقي كوبري بيعدي من فوقيك هتاخد معاه شمال هو ده جسر السويس

انتا عايز تروح فين بالظبط في جسر السويس

[m e d o]

انا عايز اروح جنينة 6 اكتوبر اللى هناك

[mr_astra]

جنينة 6 اكتوبر فى محطة الجراج
اى طريق من الاتنين المقترحين تمشى فيهم تفضل ماشي فى جسر السويس لا يمين ولا شمال عدى الالف مسكن عدى فندق السلام عدى العرب لغاية ما هتلاقى جراج جسر السويس وعربيات كتيرة ميكروباص بتندهة سلام موقف العاشر السلام السلام هتلاقى حديقة 6 اكتوبر على شمالك طبعا عشان توصلها لازم تعدى المزلقان واول يو ترن تعملة وتدخل الحارة البطيئة عشان تعرف تركن عربيتك ويوم سعيد عليك وعلى اسرتك بامر الله