إحذر : الطريق الساحلي الدولي من بلطيم إلي رأس البر

[islam_galal]

السلام عليكم و رحمة الله و بركاته



الإخوة الأعزاء ، للأسف أعمال إصلاح في منتهي الغباء الهندسي في المنطقة من بلطيم إلي رأس البر ، شركات مختار ابراهيم و طارق علام و و و للأسف جزء صغير من الأعمال للمقاولين العرب و عشان كده كل المساوئ ممكن تخيلها موجودة



تخيل طريق اسمه الدولي فيه وصلة حوالي 20 كم من الأسفلت المكسر و حوالي 2كم من الزلط السن في الاتجاهين و مفيش جزيرة



أنا مشيت علي الطريق نهارا رايح جااي و شفت عربيتين نقل بمقطورة مقلوبين و كل واحدة قافلة الطريق بحمولتها ، طبعا دي كانت خسائر الليلة اللي قبلها و الشبورة



حذار حذار من الطريق ده و ربنا يستر لغاية ميخلصوا الأفخاخ أو ما يسمس تصليحات

[نبيل عبدالرحمن]

للأسف الطريق مازال تحت الإصلاح منذ 3 سنوات ولا يوجد أى اشارات أو تحويلات للمرور مثل التى نجدها على طريق القاهرة - الإسكندرية الصحراوى وكل من يعبر الطريق أنصحه ألا يسير عليه ليلاً

[hazem_khidr]

هو الطريق الدولي دا اساسا مخيف بالليل جدا من بورسعيد للاسكندريه
مافيش اي اناره ولا اي خدمات عليه ولا مرافق ولا حاجه خالص
و مليان قطاع طرق كمان
لو ربنا كتبها لحد يمشي عليه يحاول بقدر الامكان يكون مجهز عربيته كويس
علشان حتي ما ينزلش يغير فرده كاوتش عليه
لان مره واقفين نغير فرده كاوتش كنا جايين من راس البر لجمصه
كان معايا اتنين زمايلي فيهم واحد ضابط و كان معاه سلاح
و هو دا اللي انقذنا لما واحد جه و حاول يعرض مساعدته بس باسلوب بقي عاوز يقرب
و يشوفنا كام واحد علشان يحاول يسرقنا
قام صاحبي دا مطلع الطبنجه و مسكها مش بيهدده ولا حاجه بس عاوز يوريهاله
فأخد بعضه و مشي

[moslem2]

انا مشيت عالطريق ده بالليل من جمصه لاسكندريه بس طبعا مش انا الى كنت سايق لان الطريق ده الى يمشى عليه لازم يكون بيمشى عليه كل يوم وحافظه زى اسمه ولاانصح اى شخص بالمشى عليه فى الفتره الحاليه وممكن ربنا يكرم ويتظبط عالصيف وشوفت والله حادثه قدامى ملاكى دخل فى الكرف ستون لان طبعا مفيش اى اناره عالطريق وطلبنا الاسعاف ماجاش ولما مشينا لقينا نقطة اسعاف والسواق قاعد فيها ولا فى دماغه وقولنا له الحق فيه حادثه,,,,,,,,,,,استحاله اسوق عالطريق ده ,,,نار الزراعى ولا جنة الدولى

[zego]

لا واللى افظع بقى انهم بيعملوا عليه رادار
هههههه