العودة   مصر موتورز مجتمع السيارات > منتديات السيارات العامة > سلامتك على الطريق

سلامتك على الطريق خاص بالسلامة المرورية ووسائل الامان ونظم حماية البيئة


إضافة رد
 
أدوات الموضوع
  #1  
قديم 31-12-2009, 08:28 AM
الصورة الرمزية خالدخليفة
خالدخليفة خالدخليفة غير متواجد حالياً

من انا؟: محب لكل الناس / وارجو من الله العفو والمغفرة
التخصص العملى: تاجر عطور بالجملة -تاجر اراضى
هواياتي: القراءة والاهتمام بعلم الحديث الشريف
 
تاريخ التسجيل: Sep 2009
الموقع: الزيتون
المشاركات: 1,810
خالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond reputeخالدخليفة has a reputation beyond repute
حافظ على نفسك وعلى غيرك اثـناء القيادة

الحقيقة ان الموضوع ده فى دماغى من زمان وسبقنى اخى احمد كامل ولذلك هستبعد النقط اللى اتكلم فيها وهكمل على كلامه
أولا - استعمال الأشارات
من الملحوظات الغريبة ان 99% من قائدى السيارات فى مصر لايستعمل الاشارات رغم انها من الاساسيات مش كماليات واللى بيستعملوها كتير منهم بيستعملها خطأ
أ-عند انحرافك يمينا او يسارا بسيارتك يجب اعطاء الأشارة المناسبة ثم انتظار رد فعل القادم فأن تمهل فاعبر وان لم يعطيك الفرصة فانتظر
ب-عند التوقف يجب عمل 3 حركات تلقائية فى اقل من 3 ثوان اولا** النظر فى المرآة الداخلية لمعرفة مدى قرب القادم خلفك منك ثانيا **تضع يدك على مفتاح اشارة الانتظار ثالثا- السير بالسيارة قليلا قبل التوقف ولمسافة تتوقف على حسب سرعتك
ملحوظة - كثيرون يعتقدون ان الانتظار عند التوقف فقط ولكن عند تهدئة السرعة ايضا
ولذلك يجب عند رؤيتك لاشارات الانتظار معرفة مايريده من أمامك عن طريق ملاحظة طريقة تحركه بالسيارة
ج- كثيرين عندما ينوى ان يركن جهة اليمين مثلا يعطى اشارة يمين وهذا خطا لانك توحى لمن خلفك انك ستنحرف يمينا بل يجب اعطاء اشارة انتظار
د-على الطرق السريعة وخاصة طريق القاهرة اسيوط الزراعى او طريق المنصورة القاهرة وهذه طرق ضيقة نسبيا وطريق الصعيد اتجاهين فيجب متابعة اشارات قائدى اللوارى امامك فان اعطاك اشارة شمال ثم انتظار فهذا معناه اصبر لاتتخطاه لان الاتجاه الشمال مشغول وستجد فعلا سيارات قادمة ثم ستجده فى لحظة ما اعطاك اشارة يمين ووسع لك الطريق ولاتحاول اعطاؤه كلاكسات كتيرة لان فى منهم مجرمين عندما يمل من كلاكساتك وانوارك يوسع لك الطريق ويزنق عليك لكى تواجه القادم
ثانيا - القيادة اثناء الشبورة او فى الظروف الصعبة

عند وجود شبورة ممنوع منعا باتا ركوب السيارة يجب عليك ان تركن سيارتك والمبيت فى اى فندق طيب لنفترض انك لاتستطيع البيات لاى سبب كان فيجب عليك الأتى

أ- اضاءة اشارات الأنتظار
ب-السير ببطء
ج-عدم الاقتراب من الجانب الايمن من الطريق لاحتمال وجود ناس على جانب الطريق او جرارات زراعية او اى مشاكل
د-تشغيل المساحات باستمرار طالما الرؤية منعدمة مع محاولة مسح الزجاج الداخلى بمنديل ورق فى المساحة التى امامك فقط
هـ - اذا احسست انك لاترى امامك فاغلق النور العالى فان وضحت الرؤية نسبيا فاغلق الواطى فان اتضحت اكتر فاستمر حتى تجد انك لاترى فافتح الواطى ثم العالى وهكذا وغالبا فى الشبورة العالى مع بخار الماء يعملان كمرآة صغيرة فيكثف بخار الماء بدلا من اختراقه
و ـ مازلت غير قادر على الرؤية اتخذ من اى سيارة امامك دليلا لك وضع عينك على انوارها واترك بينك وبينها مسافة كبيرة لتفادى اى مشكلة تقع فيها فتستطيع ان تلحق نفسك طيب لايوجد امامك شىء فأجعل الجزيرة او السور الفاصل بين اتجاهى الطريق دليلك يعنى عين على الطريق وعين على رصيف الجزيرة مع ترك مسافة لاتقل عن متر ونصف بينك وبين الرصيف
جـ - لايزال الوضع متأزم واحسست انك لاتستطيع القيادة بهذه الطريقة فيجب ان تترك الطريق السريع تماما واقرب كافتيريا او بلد تدخل اى حارة او شارع جانبى وتركن بحيث تتاكد انه مهما حدث لن يقترب احد من سيارتك
ثالثا - القيادة السريعة

اخواننا
مدمنى القيادة بسرعة وانا واحد منهم نقول لهم الجرى له اصول مش هيصة
أ- مش اى طريق تنفع فيه السرعة ولكل طريق سرعاته التى يتحملها يعنى مثلا القاهرة اسكندرية الزراعى من القاهرة لبنها زيادة عن 90 او 100 بالكتير فهذا انتحار وانا اتحدث عن معاملات امان لان ممكن واحد يقول طيب انا بجيب فى المسافة دى 140 و 150 غلط ليه لان المسافة دى منحنياتها كتير ولذلك نسبة الحوادث فيها عالية من بنها لطنطا ممكن تزود شوية ماعدا فى مداخل القرى لان قرى المنوفية مزدحمة الصحراوى من القاهرة لاسكندرية مثلا ممكن توصل 140 وده حسب سيارتك يعنى السرعة دى للسيارات الكبيرة اما الصغيرة زى الاكسنت والابيزا والفيرنا والاسبرانزا اخرها 110 ولازلت اتحدث عن معاملات امان
ب - طيب سعادتك بتجرى يبقى لازم عندك 3 عمليات تقوم بها باستمرار وتلقائيا اولا عينك كاشفة الطريق امامك ويمينا ويسارا حتى مد البصر لان هناك خطأ كبير يقع فيه الكثيرون وهو انه باصص امامه فقط ثانيا عند الاقتراب من سيارة امامك وانت تجرى بسرعة يجب اولا اضاءة النور وغلقه ليلا(الرعاش) وثانيا الكلاكس طيب ليه كده لان بعض قائد السيارات ودى انا لاحظتها كتير بيتخض او بيخاف او بيرتبك لما يشوفك فى المرايه الداخلية بتقرب بسرعة واحيانا لما بتجرى بسرعة جدا وتمر جنبه فيحدث تفريغ هوا ء بسبب فرق السرعات ممكن يعمل نوع من الفرقعة او الاهتزاز فى سيارته فيخاف وهنا بقى نتذكر حديث النبى صلى الله عليه وسلم ( من روع (خوف ) مسلما روعه الله يوم القيامة ) خلى بالك وخاصة انى شفت واحد اتخض من الحكاية دى فانحرف يسارا جدا ودخل فى السور الفاصل بين الاتجاهين ثالثا -ماسك الدركسيون بايديك ال2 للسيطرة على السيارة وسيبك من المظهرية وانك ماسك بايد واحدة والكلام ده
ج- حسيت انك مش مسيطر على العربية لاتتمادى نزل السرعة حتى ولو كانت سرعتك 30 كيلو فى الساعة وحاسس انك بتسوق بطريقة مش مظبوطة او بتهيس متقولش انا ماشى بالراحة لان معنى كده ان جهازك العصبى مش بيدى اى ردود افعال مع السواقة فلازم تركن وتريح فترة لاتقل عن نص ساعة لانى شفتها كتير واحد عامل حادثة وطالع يستعجب ويقول ده انا ماشى على مهلى لكن فى الواقع جهاز ه العصبى مش مدى رد فعل مظبوط وده بقى احساسك الداخلى محدش هيقدر يحكمه غيرك
د- عند المنحنيات يجب تخفيض السرعة و متقولش انا عربيتى تستوعب والكلام ده لانه مهما كان مدى اتزان العربية هتحس انها مالت ولو شوية جهة الانحناء وده يدل على تقليل السيطرة عليها
هـ - اذا كان معاك اخرن فى السيارة فاعلم ان احساسك وانت خلف عجلة القيادة ومدى سيطرتك علي السيارة لايشعر به الجالس بجوارك او خلفك لان زاوية الرؤية بالنسبة له مختلفة عنك وبالتالى يمكن ان يتملكه الخوف وخاصة ان كان بجوارك زوجتك او بنتك او اختك فالسيدات اكثر تقبلا او احساسا بالخطر ولذلك حتى ولو كنت من مدمنى السرعة فيجب ان تمشى بطريقة عاقلة وهم معك لكى تكون الرحلة معك ممتعة ولاينزل الواحد من السيارة يقرأ الشهادتين ويحمد الله على السلامة وخايف ومرعوب وحاجات كده وفى كل الاحوال يجب ان نحمد الله على السلامه
و - داخل المدن لايجب الجرى بسرعة ويجب ان تكون اقصى سرعة 60 بالنسبة للسيارات الحديثة والقديمة 40 او 50 ولازلت اتحدث عن معاملات امان( عارف ان فى ناس هتتريق على السرعات دى لكن كثرة المواقف اللى شفتها خلتنى اقول كده لان دى تجارب شخصية )

د- التسابـق اثناء القيادة

ممنوع منعا باتا التسابق اثناء القيادة حتى ولو كنت راكب هامر ولقيت عربية 128 بتعدى منك لان الطريق ده زى الرزق كل واحد وله ظروف طريقه حتى ولو كنتم ماشيين جنب بعض وانا شفت واحد حرق او فوت الموتور مش فاكر لانه بيجرى بعربيته 132
مع ميكروباس تويوتا من الجديد وحتى لو عربيته بورش بوكستر لاشوارعنا ولاطرقنا تتحمل الكلام ده ولاسلوكيات المشاة تقول كده لانهم وبالذات فى القرى الواقعة على الطرق السريعة يقول لك هو انا هتقيد فى بلدنا كمان ويمشى وياخد راحته على الطريق ولا كأنه على طريق سريع وممكن تلاقى تلاتة او اربعة ماشيين جنب بعض منهم 2 شاغلين اول حارة يمين من الطريق ولذلك فى الطرق الزراعية تجنب بلاوى اليمين
رابعا - التسامح اثناء القيادة
طبعا انا عارف ان البند ده بالذات ممكن ميعجبش ناس كتير لكن لقيته بيحل 99,9%
من مشاكل الطريق والحقيقة لما ركبت عربيتى اول يوم رجعت البيت حسبتها لقيت الشغلانة خسرانة شتمت ده و رديت على ده واتريقت على دى و هكذا وحسبتها لقيتها بالمنظر ده العربيه هتاكل شوية الصلاة والحسنات اللى بنعملها فقررت اقول كلمتين متشكر وآسف وخاصة ان الاعتذار لايعيبنى طالما انا غلطان والكبير فقط هو اللى يعترف بخطؤه والنبى م تصلى عليه ( عليه الصلاة والسلام ) قال / انما بعثت لاتمم مكارم الاخلاق طب هيا فين الاخلا ق لما ارد على واحد شتمنى ولما حد يغلط فى حقك قول له متشكر ده مش هينقص من قدرك بالعكس انا جربتها والناس قلت عليه مش متربى وهتقول عليك محترم وابن ناس بالاضافة الى ان ده فى ميزان حسناتك مفيش كلام يبقى هتكسب من ورا العربية ولو انت اخطأت صدمت عربية تانية خوفت واحد اتنرفزت على واحد اى شىء وقلت انا آسف هيحترمك جدا حتى لو كان ناوى يتخانق معاك هيحرج وان لم يحرج وقرر يزعق وكررت اسفك هيسكت ولو طلع سافل وقرر يزعق وكررت اسفك غصب عنه هيسكت لانه مش لاقى رد طبعا الكلام ده محتاج تمرين لكن هييجى بفايدة
اخيرا نكتة فى الموضوع ده سواق نقل ماشى عكس اتجاه فقابلنى فطبعا اتقابلنا فجيت قصاده فقال لى وع ياحمار قلتله متشكر فحب يدارى على كسوفه فقال لزميله شوف الجدع البارد بشتمه يقول لى متشكر فزميله قال ايه
قال له انت اللى بارد ومعندكش دم ولاتربية وبص لى وقال احنا متأسفين يأستاذ وخلص الموقف
تفتكرو لو رديت عليه كان الموضوع هيكبر والشارع يقف ومصالحنا ومصالح الناس تتعطل صح ؟ وانا لاحظت ان معظم مشاكلنا فى الطريق لاسباب تافهة
انا عارف انى طولت عليكم شوية ولذلك لكى لاتملوا هكمل الموضع مرة تانية ويارب يعجبكم ومنتظر ردودكم وتعليقاتكم



التعديل الأخير تم بواسطة خالدخليفة ; 31-12-2009 الساعة 09:24 AM
رد مع اقتباس
  #2  
قديم 31-12-2009, 03:56 PM
المناور المناور غير متواجد حالياً
التخصص العملى: Network Administrator
 
تاريخ التسجيل: Oct 2009
المشاركات: 259
المناور is a splendid one to beholdالمناور is a splendid one to beholdالمناور is a splendid one to beholdالمناور is a splendid one to beholdالمناور is a splendid one to beholdالمناور is a splendid one to beholdالمناور is a splendid one to behold
افتراضي رد: حافظ على نفسك وعلى غيرك اثـناء القيادة

ربنا يبارك فيك يا أخى والله موضوع مهم جدا جدا للناس المبتدئة اللى زيى وأنا استفدت منه كتير وحفظته عندى علشان ارجع اقرأه تانى واعمل بكل اللى فيه

ربنا يجزاك خير على التعب اللى تعبته فى الموضوع ده
رد مع اقتباس
  #3  
قديم 31-12-2009, 11:09 PM
الصورة الرمزية horas3000
horas3000 horas3000 غير متواجد حالياً
من انا؟: شريف بيومي منسي
التخصص العملى: Executive Manager
هواياتي: السيارات و التكنولوجيا و الموسيقي
 
تاريخ التسجيل: Feb 2009
الموقع: Kuwait, Naser Ciry
المشاركات: 2,363
horas3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond reputehoras3000 has a reputation beyond repute
افتراضي رد: حافظ على نفسك وعلى غيرك اثـناء القيادة

شكرا اخي علي النصيحة
و ياريت الناس تلتزم و لو بنص الكلام ده
__________________

Sharief Mansy

Farewell my Cayenne, you were the best car i ever had and driven
رد مع اقتباس
  #4  
قديم 01-01-2010, 12:24 AM
DocAmro DocAmro غير متواجد حالياً
 
تاريخ التسجيل: Nov 2009
المشاركات: 88
DocAmro is just really niceDocAmro is just really niceDocAmro is just really niceDocAmro is just really nice
افتراضي رد: حافظ على نفسك وعلى غيرك اثـناء القيادة

ربا يباركلك جزاك الله خيراً
النصائح ديه مهمة جداً انشاء الله الناس تلتزم بيها لأنها فعلاً هتحل مشاكل كتير

انا عن نفسي ملتزم بمعظمهم الحمدلله بس محتاج اشوف موضوع السرعة ده احسن شوية

شكراً مره اخري علي وقتك ومجهودك
رد مع اقتباس
  #5  
قديم 01-01-2010, 12:57 AM
الصورة الرمزية m.genedy
m.genedy m.genedy غير متواجد حالياً
من انا؟: مصري
التخصص العملى: مدرب كرة قدم - محاسب ضريبى
هواياتي: كرة القدم-الكمبيوتر-السيارات
 
تاريخ التسجيل: Jun 2008
الموقع: انا مصري
المشاركات: 905
m.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond reputem.genedy has a reputation beyond repute
افتراضي رد: حافظ على نفسك وعلى غيرك اثـناء القيادة


المشاركة الأصلية كتبت بواسطة خالدخليفة مشاهدة المشاركة

الحقيقة ان الموضوع ده فى دماغى من زمان وسبقنى اخى احمد كامل ولذلك هستبعد النقط اللى اتكلم فيها وهكمل على كلامه
أولا - استعمال الأشارات
من الملحوظات الغريبة ان 99% من قائدى السيارات فى مصر لايستعمل الاشارات رغم انها من الاساسيات مش كماليات واللى بيستعملوها كتير منهم بيستعملها خطأ
أ-عند انحرافك يمينا او يسارا بسيارتك يجب اعطاء الأشارة المناسبة ثم انتظار رد فعل القادم فأن تمهل فاعبر وان لم يعطيك الفرصة فانتظر
ب-عند التوقف يجب عمل 3 حركات تلقائية فى اقل من 3 ثوان اولا** النظر فى المرآة الداخلية لمعرفة مدى قرب القادم خلفك منك ثانيا **تضع يدك على مفتاح اشارة الانتظار ثالثا- السير بالسيارة قليلا قبل التوقف ولمسافة تتوقف على حسب سرعتك
ملحوظة - كثيرون يعتقدون ان الانتظار عند التوقف فقط ولكن عند تهدئة السرعة ايضا
ولذلك يجب عند رؤيتك لاشارات الانتظار معرفة مايريده من أمامك عن طريق ملاحظة طريقة تحركه بالسيارة
ج- كثيرين عندما ينوى ان يركن جهة اليمين مثلا يعطى اشارة يمين وهذا خطا لانك توحى لمن خلفك انك ستنحرف يمينا بل يجب اعطاء اشارة انتظار



[/COLOR][/COLOR]

الموضوع رائع فى الحقيقة
شكرا استاذ خالد خليفة--ولو انى اختلف مع سيادتك فى
استخدام الاشارات!!
اذا حسبنا ان هناك 99% من قائدى السيارات لا يستخدمون الاشارات
وال 1% يستخدمها بطريقة خاطئة
فلا غرابة خاصا بعد طريقة شرح سيادتك لاستخدام الاشارات لانها الى حد ما خاطئة
مع احترامى الشديد لسيادتك
قبل اتخاذ قرار اعطاء الاشارة يمينا او يسارا لابد من اتخاذ بعض الخطوات البسيطة والمدة
الزمنية ليست مهمه اذا كانت 3 ثوانى او اكثر او اقل
الخطوة الاولى النظر فى المراية الداخلية ومن بعد النظر للمرايا الجانبية
يليهم النظر بالعين المجردة للتأكد ان النقطة العمياء لم تؤثر--
ومن ثم واخيرا تعطى الاشارة-
بمعنى اوضح سيادتك تنظر للمرايا الداخلية ومن بعدها الجانبية ومن بعد النظر بالعين المجردة
ويكون بعدها اعطاء الاشارة--
هناك ملحوظة غاية فى الاهمية--
بكل اسف لم اجدها الا فى مصر ان قائدى السيارات عند قيادتهم للسيارات
ينظرون لبعضهم ولا ينظرون للسيارات وهذة مصيبة كبيرة واعتبرها السبب
فى كثير من المشاكل--
ولكن يكفينا انها السبب وراء عدم الانتباة للاشارات -
ايضا السبب وراء الخناقات التى تحدث والاشتباك بالايدى-اننا ننظر لعيون بعض اثناء القيادة
وهذا خطاء يجب ان انظر للسيارة وليس لقائدها-
وتكون المصيبة اكبر لو فى بنوتة بجانب قائد السيارة-ماعلينا-
يجب على قائد السيارة ان يتعامل مع السيارات التى تحيطة وليس مع الاشخاص--
-هناك شىء اخر بخصوص اشارة الانتظار
عند السير فى الطريق بمجموعة سيارات تابعة لبعضها من حقك ان تشغل الانتظار
لو حصل وتهت فى الطريق من حقك ان تشغل انتظار-ولا قدر الله اذا كان هناك حادث ما
ايضا يجب ان تشغل الانتظار
هذا بالاضافة للاسباب اللى ذكرتها سيادتك-
اذا اردت ان تركن يمينا لا فرق ان تعطى اشارة انتظار او اشارة يمين فقط
فقد يكون الطريق لا يوجد بة شارع جانبى على اليمين--
ارجوا ان تتقبل تعقيبى--
شكرا على الموضوع الجميل وجزاك الله عنة خيرا--
رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML متاحة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 04:27 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017