السلام عليكم ورحمة الله وبركاتة
طبعا كلنا شفنا وعرفنا انة افيو اتغير شكلها في موديل 2014 بعد ما شفنا فيديو وصور للشكل الجديد واغلب الاسئلة عند الناس دلوقتي تتلخص في حاجتين اية اللي اتغير فيها واسعارها الجديدة اية وبما اني كنت من اوائل الناس اللي استلمت العربية بشكلها الجديد وجبتها لون فضي اوتوماتيك فهجاوبكم ان شاء الله على الاسئلة واقولكم ملاحظاتي
اولا العربية من ناحية شكلها في الحقيقة فهي افضل من وجهة نظري من الصور واحلى خصوصا في اللونين الفضي والفيراني علشان كدة متتسرعوش في الحكم عليها الا لما تشوفوها الاول على الطبيعة
ثانيا من ناحية التغييرات :
خارجيا : التغييرات الخارجية كلها تتركز في وش العربية من شبكة جديدة زي ماهي باينة في الصور وكبوت في شغل مختلف عن القديمة لانة جاي فية خط في النص بسيط قاسم الكبوت نصين عكس القديمة كان الكبوت كلة مستوى واحد بدون اي شغل ودي من الملاحظات اللي متبانش الا في الطبيعة مش مع الصور والاضافة الاخيرة طبعا والا كانت مضايقة ناس كتير من الشكل القديم هي فوانيس الشبورة او الفوجات بقت خيار اساسي في كل موديلات الشكل الجديد عكس القديمة الا مكانش فيها فوجات في اي فئة اما باقي العربية فهي هي الشكل القديم سواء من الجانبين او خلفية السيارة من شكل وفوانيس وخلافة
داخليا : في اضافتين الاولى هي اضافة مخدع ذراع للسائق على يمينة يمكن فردة ورفعة زي الموجود في الاكسنت الاربي والاضافة الثانية هي اضافة نور للشنطة الخلفية بعد ماكانت من غير اضائة في الشكل القديم غير كدة العربية زي ماهي في باقي كل التفاصيل من فرش السيارة والتابلوة والكاسيت ولوحة العدادات وخلافة
ثالثا : بالنسبة للموتور وعزمة فالماتور هو هو بتاع الافيو القديمة 1500 سي سي ونفس العزم والهورس باور اللي هو 83 حصان يعني محصلش فية اي تغيير
رابعا واخير : بالنسبة للاسعار فالعربية نزل منها فئتين الاولى مانيوال ودي ب 93 الف والثانية اوتوماتيك وسعرها 100 الف يعني الفرق عن القديم في كل فئة حوالي الفين او 3 الاف بالكتير وطبعا تقدر تفاصل وتنزل شوية منها واعتقد انة الفرق بينهم الفتيس بس وباقي الامور هي هي في الفئتين
كدة انا خلصت اللي عندي واتمنى اني اكون افدتكم بالرد على اغلب الاسئلة ولو في حد عاوز يستفسر عن اي حاجة انا تحت امرة وان شاء الله هعمل موضوع مصور للعربية بس لما اجربها اكتر علشان الحكم يكون سليم وموضوع
تحياتي للجميع
20-09-2013, 12:42 PM
بعد استلامي للافيو الشكل الجديد 2014 اليكم بعض الاجابات الهامة التي يسأل عنها الجميع
رد: بعد استلامي للافيو الشكل الجديد 2014 اليكم بعض الاجابات الهامة التي يسأل عنها الجميع
