مجرد فضفضة فى زمن الإخوان

[Eng/salwa]

المشاركة الأصلية كتبت بواسطة نبيل عبدالرحمن سلام الله عليكم ورحمته وبركاته الأخت الفاضلة المهندسة سلوى تحياتى وتحيات الحاجه زوجتى لحضرتك وللدكتور محمد الذى أسأل الله العلى القدير أن يتم عليه نعمته وأن يشفيه ويبرأه من كل داء إنه ولى ذلك والقادر عليه للأسف بعض الساده الأعضاء حين تجرى مناقشة موضوع ما فيما بينهم لا يراعوا إحترام الرأى والرأى الآخر ولا يراعوا أن يكون العضو الذى يناقشه أكبر منه سناً وأنا كانت لى تجربه مع عضو فى عمر بناتى ووجدته يتطاول على بالكلام وآثرت الصمت وأرسلت لأبو نورا نسخه مما قاله هذا العضو فى حقى ووجدت أبو نورا يمسح بكرامته الأرض ويوقفه حتى لم أجد له مشاركه بعد ذلك أما عن الإخوان فنحن للأسف من أوصلناهم الى ما أصبحوا فيه وولينا على أنفسنا واحد منهم فهو خطؤنا إذن وعلينا تحمل نتيجة هذا الخطأ وأمامنا فرصة أخرى فى إنتخابات مجلس النواب لعلنا نصلح ما أفسدنا بأيدينا ونأتى برجل آخر نستحقه ويستحقنا لأننا شعب أصيل وظلمنا كثيراً وآن لنا أن نستعيد وعينا وعقلنا وطريقنا الذى تهنا عنه مع أطيب أمنياتى لحضرتك وللدكتور محمد وللأبناء الأعزاء

ربنا يبارك لك يا م/نبيل ويعطيك والحاجة الصحة والعافيه
أقول ايه لحضرتك فعلا احنا أسأنا الاختيار للأسف بس والله إحنا لميلنا للتدين والالتزام إعتقدنا ان لما يحكمنا متدين يراعى ربنا فينا البلد تنهض ويراعى فئات الشعب كلها ولا يسرق البلد كما فعل من قبله الخير يكون لولاد البلد ولكن مطلوب حسن التخطيط والحنكة والشخصية القيادية اللماحة الذكية مواصفات رئيس دولة حاجة مش عادية ولا سهلة ,,,,,,,,, هو آه طيب وابن حلال بس ده فوجئ بترشحه للرئاسة كبديل للشاطر وكأنه معملش حسابه ولا إييييه مش عارفه ؟؟؟؟
ربنا يسترها على البلد يا شماتة حسنى مبارك وأتباعه فينا منهم لله بالإضافة للخراب اللى بيسعوا لعمله من داخل السجون واللى حاكمين مش أذكياء للأسف
انت شفت حضرتك أولادى وتكلمت معهم يا بشمهندس هل دووول يقال عنهم بلطجية ؟؟؟ طيب من نارهم عاوزين ينزلوا المظاهرات تانى مع أصدقائهم طيب أعمل انا ايييه لو جت طلقة خرطوش او خلافه فى واحد منهم ؟؟؟؟ سيقال بلطجية
الشباب مولع نار من احوال البلد اللى للأسوء ومحاكمات قتلة الشهداء كلهم براءة حسبى الله ونعم الوكيل ربنا يسترها

المشاركة الأصلية كتبت بواسطة tham1010 حصل خير يا باش مهندسة سلوى.. اللى مش يعرفك يجهلك. فضفضى زى ما حضرتك عايزة. كلنا يحتاج لهذه الفضفضة لان كل واحد شايل فى قلبه ومشحون على الاخر لانه مش شايف فى اخر النفق النور اللى يصبره ويجعله يتحلى بالامل. الشعب محتاج بارقة امل، بارقة امل ليس بالمساعدات والمنح ولكن بوجود نظام فعال فى إدارة شؤن البلاد ليوصلها لبر الامان.... ربنا يعينك يا مصر على اللى انتى فيه وتوصلى لبر الامان على خير لاننا مش نستحمل حاجة وحشة تحصل لك...........

فضفضة ايه بقه يا أ/سام ما حضرتك متابع أهو
طيب إليك بعض الأمور اللى تجنن


1-إتسرقنا مرتين
إحنا نسكن فى دوبلكس فى عمارة دخل الحرامى الدور الارضى والحمد لله إبنى كان نايم فوق وسرق موبيلات ولاب توب وذهب والحمد لله ان إبنى لم يراه وإلا كان ممكن يضرب إبنى بمطواه
والمصيبة حرامى دخل عند جارتى سرق مكرونة وأرز وخزين الثلاجة والمطبخ
لا حول ولا قوة الا بالله الجوع والغلاء أدى لإيه ؟؟؟


2- عملنا حديد على الدور الارضى كله بلكونات وشبابيك والجنينة وكله وبوابة عالية وكاميرا مراقبة كمان تمام
متعودة أغسل السجاد طووول عمرى وهو منشور داخل الجنينة والبوابة مغلقة والحديد أهو تمام إتسرق السجاد عندى وعند جارتى إزاى وإمتى معرفش ونط إزاى من البوابة وغير ظاهر فى الكاميرا حرامى فنان والله
وفى نفس الشارع سرقت أبواب عمارتين من الالوميتال تخيل خلع باب العمارة وأكيد حرامية خبرة ومجهزين بسيارات


3- أولادى أنا صديقة لهم علشان يحكوا لى كل حاجة إبنى رجع من الجامعة قالى بائعين المخدرات وافقين كده عادى حول المحلات فى ميدان الحصرى ويقربوا من الشاب ويسألوه عاوز أى نوع مخدرات ونفس الوضع حول أبواب الجامعات الخاصة فى أكتوبر حسبى الله ونعم الوكيل متخيلين بقه اللى دخل جامعه خاصة فلوس اهله كتييير نقول إيييه فاضل إيييه من الخطر نبهت على إبنى يا إبنى يا حبيبى إوعى حد يقولك خد جرب حاجة مش ناقصة حرقة قلب



كفاية كده المره دى أ/ سام علشان طولت عليكم لأن فيه بلااااوى كتييير قوى
وأهى مجرد فضفضة فى زمن الأخوان وربنا يسترها وما فيش حد يزعل ويقول ماهو السرقة من أيام مبارك بس الأمن هل كان بهذه الدرجة والمخدرات علنى كده ؟؟ منك لله يا مبارك أحسن حد يقول إنى فلول

[nktis]

طمني على مصر يا عمـ الحاج ...
مصر زي الفل وتمامـ

* قلتله والناس ؟
- قالي بيفطروا بيتزا وبيتعشوا حمامـ

* قلتله والعيشه لساها مره ؟
- قالي دي الناس من كتر الفرحة مش عاوزة تنامـ

* قلتله يعني البلد حالها اتعدل ؟
- قالي طبعا دي مفيهاش كلامـ

*قلتله أمال البلطجة والسرقة ؟
- قالي دآ ابراهيم الأبيض و دآ شغل افلامـ

* قلتله والضحايا والشهدا ؟
- قالي يا عمـ دي تفآهات إعلامـ

* قلتله ايه أخبارالخصخصة ؟
- قالي خلاص كلها قطاع عامـ

* قلتله طب والدعمـ ؟
- قالي مع التموين كل شهر ليكـ بلح الشامـ

* قلتله وأطفال الشوارع ؟
- قالي ملهمش غير الصنعة والعلامـ

* قلتله والعشوائيات ؟
- قالي كلها سراميكـ ورخامـ

* قلتله صحيح جرامـ الدهب عامل كامـ ؟
- قالي جرامـ ايه دآ الدهب بيتباع خامـ

* قلتله طب علي كدآ بقى ما تشوف لي عروسة
- قالي خلاص مبقاش في عنوسة كلها بقيت مدامـ

* قلتله إية أخبار ثورتنا ؟
- قالي مطالبنا اتحققت و الباشا خد إعدامـ

* قلتله مصر اللي بتكلمني عليها دي مصر أمـ الدنيا ؟
ولا مصر أمـ الأحلامـ و الأوهامـ ؟
ولا مصر كمان 100 سنة لقدامـ ؟

ألووووووووووووووووو

إنت سامعني

يا فلان يا فلان

قفل الـ ...... من غير حتي ما يقولي سلامـ !!!!

[abokoko]

غالبا بدخل فى منتدى السيارات ومتفرعاته
ومشاركاتى قليله فى الاجتماعى وسياسه البلد

لكن المشاركة استوقفتنى

انا مش تبع الاخوان
اتجاهى مؤيد لكل ما هو اسلامى
طبعا لان دينى هو الاسلام الذى هو دين ودنيا
وهو يتضمن الدين لله والوطن برضه لله
ولو اى عضو فى المنتدى مسيحى تصرف بالمثل وكان ولاؤه لدينه فمن حقه

حضرتك بتتحسبنى فى نظام د مرسي
كما لو كان الاخوان ومرسي هما السبب فيما نحن فيه الان
كما لو كان الزمن ايام المخلوع كان وردى
كما لو كان العلاج فى افخم المستشفيات كان متاح للجميع
كما لو كان اجراء العمليات الصغيره والكبيره حق يناله الكل

سبحن الله
الريس بيتحارب
وبرلمانه اللى كان ممكن يخرج لنا بافضل القرارات فى التامين الصحى
والعداله الاجتماعيه وغيرها من القوانين - تم حله وتجاهل الملايين التى كانت فى عرس ايام الانتخابات ( اخدت اسرتى كلها واولادى ودخلت ابنى معايا اللجنه من بره بيصور بالكاميرا كان عرس فعلا ولكنهم بحقدهم اغتالوا الحلم وحلوا البرلمان )
وحاليا بيتجهوا لمحاوله حل الشورى وبعدها الريس نفسه

سبحن الله
البلد كانت فى حالة اقرب للافلاس
والدولار اقترب فى الواقع من ال12 جنيها
والريس حارب وسافر شرقا وغربا لانقاذ الجنيه والى الان يبذل الجهد
ولو الاعلان منصف لجعلوا منه زعيما شعبيا

الانجازات كتير
والاعاقات كتير
بس ربنا موجود

عموما الدوله المتحضره بتحترم الصندوق
والتغيير بيكون بالترتيب لخطوات وبرنامج عملى يتم نشره للاصلاح
وان اعجب الشعب
بيتم تنفسذه بالصندوق ( بانتخاب الافضل )

[AbOnOrA]

المشاركة الأصلية كتبت بواسطة nktis طمني على مصر يا عمـ الحاج ... مصر زي الفل وتمامـ * قلتله والناس ؟ - قالي بيفطروا بيتزا وبيتعشوا حمامـ * قلتله والعيشه لساها مره ؟ - قالي دي الناس من كتر الفرحة مش عاوزة تنامـ * قلتله يعني البلد حالها اتعدل ؟ - قالي طبعا دي مفيهاش كلامـ *قلتله أمال البلطجة والسرقة ؟ - قالي دآ ابراهيم الأبيض و دآ شغل افلامـ * قلتله والضحايا والشهدا ؟ - قالي يا عمـ دي تفآهات إعلامـ * قلتله ايه أخبارالخصخصة ؟ - قالي خلاص كلها قطاع عامـ * قلتله طب والدعمـ ؟ - قالي مع التموين كل شهر ليكـ بلح الشامـ * قلتله وأطفال الشوارع ؟ - قالي ملهمش غير الصنعة والعلامـ * قلتله والعشوائيات ؟ - قالي كلها سراميكـ ورخامـ * قلتله صحيح جرامـ الدهب عامل كامـ ؟ - قالي جرامـ ايه دآ الدهب بيتباع خامـ * قلتله طب علي كدآ بقى ما تشوف لي عروسة - قالي خلاص مبقاش في عنوسة كلها بقيت مدامـ * قلتله إية أخبار ثورتنا ؟ - قالي مطالبنا اتحققت و الباشا خد إعدامـ * قلتله مصر اللي بتكلمني عليها دي مصر أمـ الدنيا ؟ ولا مصر أمـ الأحلامـ و الأوهامـ ؟ ولا مصر كمان 100 سنة لقدامـ ؟ ألووووووووووووووووو إنت سامعني يا فلان يا فلان قفل الـ ...... من غير حتي ما يقولي سلامـ !!!!

[Eng/salwa]

المشاركة الأصلية كتبت بواسطة abokoko غالبا بدخل فى منتدى السيارات ومتفرعاته ومشاركاتى قليله فى الاجتماعى وسياسه البلد لكن المشاركة استوقفتنى انا مش تبع الاخوان اتجاهى مؤيد لكل ما هو اسلامى طبعا لان دينى هو الاسلام الذى هو دين ودنيا وهو يتضمن الدين لله والوطن برضه لله ولو اى عضو فى المنتدى مسيحى تصرف بالمثل وكان ولاؤه لدينه فمن حقه حضرتك بتتحسبنى فى نظام د مرسي كما لو كان الاخوان ومرسي هما السبب فيما نحن فيه الان كما لو كان الزمن ايام المخلوع كان وردى كما لو كان العلاج فى افخم المستشفيات كان متاح للجميع كما لو كان اجراء العمليات الصغيره والكبيره حق يناله الكل سبحن الله الريس بيتحارب وبرلمانه اللى كان ممكن يخرج لنا بافضل القرارات فى التامين الصحى والعداله الاجتماعيه وغيرها من القوانين - تم حله وتجاهل الملايين التى كانت فى عرس ايام الانتخابات ( اخدت اسرتى كلها واولادى ودخلت ابنى معايا اللجنه من بره بيصور بالكاميرا كان عرس فعلا ولكنهم بحقدهم اغتالوا الحلم وحلوا البرلمان ) وحاليا بيتجهوا لمحاوله حل الشورى وبعدها الريس نفسه سبحن الله البلد كانت فى حالة اقرب للافلاس والدولار اقترب فى الواقع من ال12 جنيها والريس حارب وسافر شرقا وغربا لانقاذ الجنيه والى الان يبذل الجهد ولو الاعلان منصف لجعلوا منه زعيما شعبيا الانجازات كتير والاعاقات كتير بس ربنا موجود عموما الدوله المتحضره بتحترم الصندوق والتغيير بيكون بالترتيب لخطوات وبرنامج عملى يتم نشره للاصلاح وان اعجب الشعب بيتم تنفسذه بالصندوق ( بانتخاب الافضل )

السلام عليكم ورحمة الله وبركاته

حضرتك زعلان إنى بتحسبن فى نظام د/مرسى
وطبعا عينك لم تقع ولم تقرأ إننى إتحسبنت كمان على نظام مبارك وما فعله بنا وهو سبب ما نحن فيه الآن أخى الكريم
طبعا لأن العين ترى ما ترغب رؤيته فقط
أنا لست فلول ولا بقول ياريت يوم من أيامك يا مبارك بل حتى الآن بقول حسبى الله ونعم الوكيل فيك يا مبارك انت وأتباعك
ياريت حضرتك تقرأ الموضوع كله قبل الرد حتى لا تتعب نفسك بالهجوم عليه ظلما

يا فندم أنا مسلمة واكيد أفضل الشريعة الاسلاميه وأم و زوجة مكافحة عانيت من نظام مبارك وتعبت ولازلت أعانى من النظام الحالى من أجل علاج آدمى وبكرامة وخايفة على اولادى من عدم الأمن اللى عايشين فيه ولم ألمس حتى الآن فرق بل بالعكس شايفة حزب الحرية والعدالة نسخة من الحزب الوطنى بحترم الرئيس الطيب الملتزم دينيا والمحترم شخصيا د/مرسى بس شايفاه مش الشخصية اللى تعرف تحكم مصر

إقرأ دائما ابعاد ومشاركات أى موضوع كلها قبل الرد

شرفتنى بمشاركتك هذه وتحياتى
أرجو لبلدنا الحبيبة ان تعبر بسلام من هذه المرحلة وتنتهى معاناتنا كلنا ولا يفرق بين المصريين كلهم مسلم - مسيحى - ليبرالى - علمانى - اخوانى كل أطياف الشعب