محتاج حكام مصريين قبل ماشترى من الكوريين

[AbOnOrA]

المشاركة الأصلية كتبت بواسطة mohamedbhit اولا انا مش قادر اعبر عن سعادتى لما لقيت اول رد من حضرتك استاذنا الكبير ابو نورا ثانيا مش هلاقى رد ولا احسن ولا اجمل ولا افضل من كده الا من حد عنده نفس خبرتك ثالثا تقريبا مش لاقى حاجه اقولها غير ان ادعيلك بالتيسير والبركة فى الرزق والاولاد اخر حاجه هغلس على حضرتك فى سؤال انا عايز اعرف 96 ولا 97 ولا 98 ولا 99 افضل ولازم يكون فى تكييف فى العربية ولا عادى الواحد ممكن يعيش من غيره وشاكر جدا لحضرتك على الافادة

اسف للتاخير فى الرد امبارح

بالنسبة لسنين الموديلات مفيش فرق كلهم خط انتاج واحد الى 99 ومن بعد كده اتنقل الخط من كيا - كوريا الى ايران وهنا فى مصر كان بيقفلها مصنع AAV لصالح وليد توفيق الوكيل المحلى للكيا ساعتها

فالخلاصة ان كل ما هو تحت مو 2000 زى بعض

اما موضوع التكييف فهو نسبى طبعاً يعنى لو عربيتك لونها فاتح ابيض مثلا او فضى او سماوى والفرش قماش وبتركنها فى حته ضله هتنزل تلاقيها ظريفه وتمشى بيها من غير ما تتحر اوى

انما لو لونها غامق وعاملها فرش جلد وراكنها فى الشمس ونازل الصبح هتفتح الباب هتلاقى فرن ومش هتهدى حرارتها الا بتكييف

فالخلاصة لون العربيه بيفرق وخامات الفرش ومكان الركن وطبيعة الاستخدام وطبعاَ طبيعتك الشخصية اذا كنت من محبى التكييفات عموماً او لاء

[AbOnOrA]

المشاركة الأصلية كتبت بواسطة mohamedbhit انا لقيت عربية هاتشباك موديل 1998 والميكانيكى بص عليها وعلى سمكرتها وشكرلى فيها هى من غير تكييف بس مجهزة تكييف مش فاهمها دى يعنى ايه وحالتها بره وجوه جيده وفيها سنتر لوك بس المهندس صاحبها طالب 27,500 الف هى كدا غاليه ولا ايه محتاج الرد لانى المفروض ارد على المهندس خلال ساعه وشاكر جدا على ردك استاذ m.elhasafy بس انا فعلا مبمشيش فى اضهرية خالص الحمد لله وربنا يحفظنا يارب محتاج رايكم ضرورى جدا

هو دايماً اسعار المستعمل ليها متوسطات لكن مش قاعدة ثابتة
فسعر الهاتش باك فى المتوسط 25 تزيد الفين او تقل الفين حسب الحالة والكماليات

اللى حضرتك بتكلم عليها لو حالتها جيدة الى ممتازة تستاهل بس برضو العربيه فاضية خالص فحاول تنزل معاه اكتر وتعرف منه اخر صيانة عملها امتى وتعرف حالة العفشه وايه محتاج يتغير وطبعاً حالة الموتور والفتيس والكهرباء

السنتر لوك مش قضيه ولا يتحسب اللى نتكلم فيه اذا كان فيها كاسيت جنوط سبور كاوتش جديد بطارية جديدة لسه مجدد العفشة عامل فرش جلد كل الحاجات ديه تتحسب فلوس لو مفيش حاجة منها يبقى فاصل معاه اكتر ولو خلصتها ب 25 تبقى ممتازة لو اكتر شوية مش مشكلة انت مش هتاجر فيها يعنى
ورحم الله رجل سمحاً اذا باع واذا اشترى
ومتنساش الاستخارة

[mohamedbhit]

بصراحه مش عارف اشكر حضرتك ازاى ربنا يباركلك فى علمك وفى رزقك يارب
انا هجيب لحضرتك انهارده ادق التفاصيل فى العربية على الساعه 6 مساءا ان شاء الله
وبالنسبة للونها يفرق فى السعر او اعاددة البيع يعنى راى حضرتك فى اللون ايه
وبجد الف مليون شكر ليك على الاهتمام والمساعده الغالية ياغالى
ودا لينك مباشر للون العربية
http://i56.tinypic.com/314ezxl.jpg
http://i52.tinypic.com/30062qx.jpg

[mohamedbhit]

انا مش لاقى الاسعار اللى حضرتك بتتكلم عنها دى خالص مع احترامى الكامل لكلام حضرتك
كل اللى بلاقيه حالته نضيفة بيبدأ من 30 و32 الف
مش فاهم فى ايه ولا سعر السوق هو اللى شادد ولا الناس جرالها ايه
انا بدأت افكر فى حاجات تانيه غيرها زى الشاهين مثلا او الاسكودا فليشيا او الهيونداى الاكسيل الهاتش باك وياريت حضرتك تفيدنى بالعيوب والمميزات

[hamaad]

المشاركة الأصلية كتبت بواسطة mohamedbhit انا مش لاقى الاسعار اللى حضرتك بتتكلم عنها دى خالص مع احترامى الكامل لكلام حضرتك كل اللى بلاقيه حالته نضيفة بيبدأ من 30 و32 الف مش فاهم فى ايه ولا سعر السوق هو اللى شادد ولا الناس جرالها ايه انا بدأت افكر فى حاجات تانيه غيرها زى الشاهين مثلا او الاسكودا فليشيا او الهيونداى الاكسيل الهاتش باك وياريت حضرتك تفيدنى بالعيوب والمميزات

انا عاوز اقول لحضرتك ان السيارة البرايد مرغوبة فى السوق فهى شادة وحتى لو جبت برايد حالته مش نظيفة ب 27 مش حتفرق معاك حاجة حترغب فى 3 الف جنيه بس لو جبت حالة نظيفة ب 30 برده حترغب فى الفين جنها فى مش حتفرق حاجة فى الاول والاخر وسهل تتظبط ان شاء الله