ده تقرير مميزات وعيوب الليفان 620 وصيانة الألف الأولى من واقع ما حدث معي
مميزات العربية كتيرة ومنها الكماليات الكتير اللي فيها وقوة تسارعها عند الانطلاق ومتانة الصاج والثبات عند الفرامل واستهلاك بنزين ممتاز حوالي 14 كيلو للتر وعوامل الأمان اللي فيها وسعرها المعقول بالنسبة لامكانياتها وبالنسبة لعدم وجود دعاية لها.
وعيوبها عضة الفتيس وصوت تيل الفرامل والتزييق في العفشة وكركبة الدريكسيون ورعشة كبيرة في دواسات الفرامل والدبرياج عند الضغط عليهم، وأهم شئ انها عايزه المحافظه عليها جداً لان خامات التابلوه مثلا مش للخدمه الشاقة ولا للعمر الطويل وبتتجرح حتى من مسحة بمنديل وأي فك فيها بيترك أثر واضح، وخاصة ان عمال التوكيل مش بيرحموا ومثلا لما وديت العربيه للصيانه العامل قفل الباب بشده وهو بيفحص خبطة الباب فالقفل خرب وقام بتغييره ولكن وهو بيفك بطانة الباب المفروض يرفع سدادة بالراحة ويفك المسامير لكن هو قعد يضرب بسرعه بالمفك أمام عيني على السدادة البلاستيك وخرم حولها حتى ضرب عليها في الاخر وقام برفعها بعد تشويه المكان بلا داع، ولما قلت له بتعمل ايه قال لي دي بلاستيكايه يابيه. حاولت أرفق الصور لكم بس فشلت محاولاتي.
لكن أخطر عيب هو مركز الصيانه اللي عنده وحده قطع الغيار، لما رحت كل واحد من اللي شروا نفس العربية حكي لي قصه مختلفه وأعطاني نصايح شكل، لكن انا طنشت واستبشرت خير، وقابلت مهندس ابن بلد استمع بإنصات شديد لكل ملاحظاتي وكتبها بدقة وقال لي هنمر عليها كلها وتستلم تقرير تراجعه وتمضي عليه وانت بتاخد العربيه وهتستلم كارت للصيانه الخ، وأهم المشاكل كانت ان التكييف سخن بس مفيش بارد نهائي، وفيه صوت خبطه حادة عند غلق الأبواب، ووجود صدأ في عمود الهواية بتاع الباب الخلفي يمين بسبب سوء الشحن، والمسافة بين كبوت العربية والفيبر اللي تحت المساحات طالع نازل بشكل غير مظبوط، وسقاطات مساند الرأس بتاع الكنبة مهرية ومشققه وبتفرك بسبب الحر على سفينة الشحن والعربية مقفولة ومكتومه فالبلاستيكات دابت جوه العربيه لكن قالولي لما شريت العربيه تيجي تركب سقاطات جديدة مجاناً مع أول صيانه، ده بالاضافه لعضة الفتيس وكركبة الدواسات وهي الشكاوى المعتاده. وكنت جاي مخصوص من بلدي في بني سويف من الصبح وقالوا لي تلات ساعات وتستلم عربيتك فجلست اقرأ القرآن في مسجد التوكيل من العاشرة صباحاً حتى صليت المغرب هناك، وكل شويه أوصي نفس المهندس فيطمني بأحسن الكلام ويدخل مركز الصيانة ويخرج أمام عيني ولا يقرب للعربيه أساساً. والناس تروح وتيجي وفين السائل عن المسئول، وبقيت سبع ساعات وفي الاخر جات الساعه خمسه والليل ليل وانطفأت الأنوار وقبلها لقيت الموظفين والعمال بيوقعوا ويجروا ع بره والمهندس اختفى والمكان بقا فاضي فدخلت للصيانه جوا لقيت مهندس واحد ومن تبقى من العمال ولقيته حاطط العربيه ع جهاز شحن الفريون وقاعد يدخن سجاير جوه العربيه ومشغل التكييف وانا مش باطيق ريحتها ومحرم أي مدخن يركبها ومفيش شئ اتعمل غير تغيير الزيوت وتربيط العفشه وتغيير القفل اللي باظ من العامل اللي شوه الباب من جوه بالمفك. ساعتها جريت ع المهندس خالد مدير المبيعات وهو راجل محترم جدا فراح معي وطمني جدا ووعدني ان المره الجايه هيشوف كل العيوب بنفسه ويشرف ع التصليح بنفسه ولن يتركوا شئ وأنا أثق به وأحترمه فسكتت وتاني يوم اتصل التوكيل بي ففهمت ان الاستاذ خالد متابع الحالة واطمأنيت زيادة، أما المهندس المدخن فقال لنا إن دورة التكييف كان لازم تتحط ع الجهاز مدة كافيه وتتفحص كويس عشان يتأكدوا ان مفيش أي تسرب ومايحصلش شئ تاني. بصراحة كلام حلو بس أنا غيرت كمبروسور عربيتي السابقة تماما وكمان صلحت تسرب كان حصل في عربية أخرى وكان يتم اكتشاف المشكله بمجرد ما تتحط العدادات بعد ضغط الهواء وبينتظر العامل ربع ساعه للتأكد مش سبع ساعات وكان التكييف يقعد سنين بعدها زي الفل. المهم لقيت اليوم ضاع وأعصابي تلفت ولقيت تقرير بيقول انه تم عمل الصيانه وتنفيذ الملاحظات دون ذكرها، يعني اللي حصل فعلا هو تغيير الزيوت والفلاتر وتربيط العفشة وشحن الفريون وتغيير قفل الباب ومفيش أي شئ تاني تم، وكان لازم أوقع على التقرير وأدفع الرسوم عشان استلم العربية من الحرس ففعلت وأنا حزين والحراس كانوا يطلبون مني الدفع عندهم بسرعه عشان موظف الخزينة كان مشي. ثم تذكرت إن محدش أعطاني كارت الصيانه فرحت تاني للأستاذ خالد فقابلني بوجهه البشوش المعتاد وطلب من مهندسة كانت طالعة من المعرض انها تعطيني الكارت، وكانت معظم الأنوار مطفأة وبصعوبة وصلت مشكورة لمكتب أحد زملائها وطلعت كارت وهي تجاهد لترى رقم الرخصة وتكتب بيانات الكارت حتى تنفذ أوامر الأستاذ خالد فطلبت منها أن تعطيهم لي وأنا أكمل البيانات ففعلت ثم قامت بمراجعة البيانات ووقعت واعتذرت لي بكل أدب واحترام. طبعا كنت هلكت واضطريت ابيت في مصر وارجع لبني سويف تاني يوم مريض وهلكان من عذاب اليوم السابق وكل الفرق اللي حسيت به ان التكييف اشتغل.
المصيبة اني سافرت بعدها بأسبوع وتركت العربيه في الجراج ولا أحد يستخدمها بس أخويا بيشغلها شويه كل خمسة أيام وهي واقفه مكانها، ورجعت بعد شهرين لقيت التكييف سخن تاني، واتصلت بالاستاذ خالد فقال لي هات العربيه او ارسلها مع أحد وأنا تحت أمرك بس أنا كنت نازل أشوف أهلي وأولادي وكنت اتعقدت من التوكيل ومش عايز أضيع يومين عليهم بلا نتيجة ومن أجازة قصيرة فتحملت اسبوعين اتشويت فيهم من الحر واتبهدلت من التراب لان كان لازم افتح الزجاج. ثم سافرت لعملي مرة أخرى وتركت العربية في الجراج والله يجيب اللي فيه الخير. ومتعشم ان التكييف يتصلح صح المره الجاية وان يكون فيه نظام في انهاء الصيانة بلا إهمال أو تأخير غير مبرر وان يكون فيه اهتمام حقيقي بتنفيذ ملاحظات العملاء في الصيانة.
ورغم هذه التجربة اللي كانت المرة الوحيدة اللي رحت فيها مركز الصيانة إلا أن العربية ممتازة بشكل عام وأنا مش ندمان إني شريتها وأنصح الناس بشرائها وأنصح الوكيل إنه يعمل دعاية للعربية ويراقب أداء مركز الصيانة عشان العربية فعلا تستاهل مكانة اكبر من دي وإنها تتحط في فئة أعلى بحسب امكانياتها ومعايير الأمان والرفاهية اللي فيها ولا ننسى نتائج اختبار التصادم اللي ع اليوتيوب، فيه فرق كبير بين نتائجه المطمئنة وبين نتايج الاسبرانزا والبريليانس ومثيلاتها.
هذه تجربتي أنقلها لكم بكل صدق وأمانة وأرجو منكم التواصل بتجاربكم ونصائحكم.
أحمد سعداوي
أستاذ مساعد بجامعة زايد بالإمارات
25-04-2012, 07:36 PM
توكيل الليفان وموديلاتها ومركز صيانتها: المميزات والعيوب
رد: توكيل الليفان وموديلاتها ومركز صيانتها: المميزات والعيوب
رد: توكيل الليفان وموديلاتها ومركز صيانتها: المميزات والعيوب
مسئول بمبيعات المصرية للسيارات بالمنصورة
