أدب الرحلات

[zago boss]

المشاركة الأصلية كتبت بواسطة خالدخليفة ونقول كمان عمك محمود(اعتقد ان ده اسمه ان لم تخننى الذاكرة) ده من الشخصيات المحترمة اللى قابلتها خلال رحلاتى الكتيرة ومن المصرييين الشرفاء فعلا وفى يوم جاى من المنـصـورة وشفت واحد بينادى قاهرة قاهرة واحد يامصر وقربت منه شكله مش سواق ميكروباس لانه وبصراحة شكله محترم وركبت جنبه انسان مهذب ومحترم وبشوش (يعنى بيبتسم فى وش الواحد /معلش بنترجم علشان انا عارف الغالبية بتسقط فى العربى دلوقت ) المهم انا شكيت فى امره وكل شوية احاول افتح كلام وهو بيزوغ منى واحترمت رغبته وسكتت لكن حدث ما كنت ابحث عنه وصلنا كمين كفر شكر وظابط المباحث وقف العربية ازيك ياعم محمود مفيش فايدة مش هتبطل ابدا عايزين ناكل بالحلال يابيه انت عارف شغل المباحث وانا عندى عيال عايز اربيهم بالحلال طب م احنا ياراجل فى المباحث ايه يعنى احنا مش محترمين العفو يابيه بس سيادتك ميسور الحال لكن انا فلاح ابن فلاح م انت عارف ياواد ده كل زمايلك اللى له عربية وا2 و3 على الخط وانت لسه شغال سواق عند الناس كده احسن يابيه ماشى ياعم محمود سلملى على فلان بيه يوصل ياباشا ومشينا بصراحة انا مسكتتش فقلت / ايه الحكاية ياعم محمود متاخدش ف بالك معلش قل لى وبعد الحاح وغلاسة منى قال كلام انا صعقت (بضم الصاد وكسر العين)منه قال انا ياسيدى امين شرطة قديم بقى لى اكتر من 35 سنة فى المباحث وشغلة المباحث كلها فلوس للى معندهومش دم ولاضمير وعندى 6 اولاد منهم 4 بنات وبضطر اشتغل سواق على خط المنـصـورة / القاهرة بعد الشغل او فى الوقت اللى مفيهوش شغل المباحث اهو بعمل دورين والا حاجة يساعدونى على المعيشة وأأكل اولادى بالحلال وجوزت بنتين وبجوز ال3 وربنا يسهل وزمايلى فعلا فيهم ناس اللى اشترى عربيتين واللى اشترى 3 ومشغلهم على الخط لكن فلوسهم حرام و من دم الناس وعلشان كده الباشا بيقول لى مش هتبطل تشتغل عند الناس طب اجيب منين مرتبى من المباحث على القرشين اللى بيطلعو من مشوار المنـصــورة/ القاهرة يادوب بيصرفو على العيال وانا نظرت لهذا الرجل نظرة اجلال وتقدير واحترام لانه فى مكان يقدر يعمل منه فلوس للركب وبدون م يرهق نفسه ويجرى رايح جاى لكنه فضلها بالحلال الله يمسيك بالخير ياعم محمود

الراجل ده احسن واحد يمسك الداخليه كلها دلوقتي
ان مكانش احسن واحد يحكم البلد
عندك حق فعلا الله يمسيك بالخير يا عم محمود

[koashraf]

والله البلد دى محتاجه ييجى كده ألف عم محمود على الاقل عشان ينصلح حالها ......!!!!

[zago boss]

المشاركة الأصلية كتبت بواسطة خالدخليفة دور منصور منصور هو طفل الحكومة المدلل وشريك جمال مبارك (كما سمعت فىى بعض مشروعاته / اعتقد منها باسكن روبينز و دى مجموعة مقاهى معروفة ولها فرع فى سيتى ستار) (توكيل مقهى(كوفى شوب) ؟؟؟ والله دى حاجة عجيبة انا بفكر اروح للمعلم حمدون صاحب قهوة حمدون اللى جنبنا واخد منه توكيل واعمل فرع فى عباس العقاد) وعلى رأى المتنبى وكم ذا بمصر من المضحكات و لكنه ضحك كالبكا وساعتها كان زعلان ان دولة زى مصر بحجمها ده كله يحكمها عبد اسود مملوك ومقشف ورجله مشققة من كتر القشف اللى فيها واسمه كافور كمان يعنى حتى اسمه كان غايظ المتنبى نرجع لمنصور طبعا لما عصام شرف رفض اعطاء تراخيص لعبارات السلام ممدوح اسماعيل(امين الحزب الوطنى بدائرة مصر الجديدة /دائرة الريس) هدده وقال انا رايح اجتماع مهم الليلة مع ناس مهمين و لم نفسك احسن ولم يهتم عصام شرف وحصل تغيير وزارى مين اللى مشى فيه ؟؟؟ عصام شرف وحده (جريدة الدستور) و جه منصور خريج كلية الزراعة ومش فاهم ولاحاجة فى النقل مواهبه الوحيدة انه رجل اعمال ناجح ومقرب جدا من اهل الحكم فى البلد ويقولو يمين يبقى يمين وشمال يبقى شمال على راى عبد الفتاح القصرى بعد تولى سيادته بحوالى شهر حصلت حادثة العبارة طيب مين اداها الترخيص تمشى وهيا اصلا نازل نشرات لجميع الموانى بانه عبارات شركة السلام ممنوع اعطائها تراخيص سير الا بأذن شخصى من الوزير وتقرا ملابسات الحادث تستعجب اى سفينة عبيطة الغاطس بتاعها لما ينزل تحت الميه بمسافة حوالى متر ونص عن المعتاد فيه جهاز بيبعت استغاثة للقمر الصناعى والقمر الصناعى بيبلغ محطة الاستغاثة بالشرق الاوسط ومقرها فيييييييييييييين الماظة عندنا فى القاهرة فى اقل من 5 دقايق من هبوط الغاطس بتكون الجهة المنوط بيها تنفيذ الانقاذ اخدت خبر وبدات عمليات الانقاذ لكن لاحس ولاخبرمن 12 بالليل لحد الساعة 7 صباحا ايه ده؟؟؟؟؟ يعنى الموضوع مقصود ؟؟؟؟؟؟؟؟ وبسلامتى جاى من صلاة الجمعة الساعة 2ظهرا وافتح قناة الجزيرة الاقى الحادثة والجزيرة بتتصل بوزير النقل تسأله عن الاخبار وملابسات الحادث فرد ردا ما تــــــعا موجعا قامعا جامعا مانعا ممتعا الى آخره وقال الشاويش منصور / انا معرفش حاجة ولسه هركب الطيارة و رايح موقع الحادث وانا سمعت الكلمتين دول وقلت الراجل ده يااما حمار ومش فاهم حاجة وبيستعبط يااما عارف كل حاجة وبيستعبط برضه ومعنى كده ان فى كارثة حصلت وكله مخبيها واتضح ويااسفاه انه مش حمار وعار ف كل حاجة وبعدها باسبوعين قطارين دخلو فى بعض فى ابو حمص مستحيل طبعا اى واحد عارف نظام السكة الحديد يعرف انه مستحيل لان الاشارات كلها بتقفل بعد مروراول عجلة من جرار القطار جنبيها ولمسافة اعتقد 5كيلو تقريبا حوالى 5 اشارات كلها حمراء يبقى ازاى ده عدى كل دول ودخل جرى فى اللى ادامه لازم فى سر طبعا بعد الموضوع ده روحت البيت كتبت وصيتى وبالبحث اتضح ان الباشا خريج كلية الزراعة وجاى لاهداف معينة وهى كالأتى (كما تبين من استقراء الجرائد والاحداث) اولا انقاذ ممدوح اسماعيل من ورطته الماليه باعادة السماح لعباراته بالمسير بغض النظر عن غير الادميين اللى هيركبوها( للاسف لم اجد تعبير افضل من ده لاسلوب معاملة الحكومة معانا ) (بالمناسبة فى وزير اسمه زهير جرانة (وزير السياحة ) يوم ان تولى كرسى الوزارة كان مدينا ب300 مليون جنيه واليوم هو اصبح على عتبة لقب ملياردير (قناة دريم / اعتقد برنامج خط احمر) وعلشان حسن الظن بس هو غالبا سدد كل ده من مرتبه كوزير احسن حد يفهمنى صح ثانيا /تجديد اسطول النقل البحرى بناء على اى مصيبة تحصل وبالتالى كله مش ببلاش وانما بمزيد من السبوبة ثالثا / بيع السكة الحديد والمترو ولما الناس اعترضت بقى يبيعهم بالحتة امن المحطات لشركة كذا قطارات معينة لشركة كذا نظافة المحطات لشركة كذا صيانة القطارات او وحدات المترو لشركة كذا وهكذا وهو الوحيد اللى اجمع على انهاء خدمته جميع اعضاء المجلس الغير موقر ومع ذلك استمر ولاحياء متناهى (على راى واحد صعيدى قريبنا) يقصد ولاحياة لمن تنادى ايه الجبروت ده ؟؟ وارواح الناس التى ليس لها قيمة عند حاكمى هذا البلد ؟؟ حتى جاءت حادثة العياط وحاولو يلمعوه ويقولو ان ملوش دعوة ياولداه وان السواقين هما اللى حيوانات مبيفهموش لانهم مش عارفين يسوقو الجرارت القديمة (الحديثة) اللى جايبهالنا الباشا لكن مفيش فايدة الضغط الجماهيرى كان اكبر بل وضغطو على رئيس الوزرا انه يمشيه فاضطر اسفا ان يعلن ان هناك 6 وزرارات لايستطيع تعيين وزرائهم ولايمشيهم ومنهم النقل وزكريا عزمى قال للريس مامعناه انه مش هينفع يقعد تانى لازم يمشى وقد كان مشى لكن بعد تلميع اعلامى كبير له وعلى اساس انه من شهداء الهيئة والكلام العبيط ده للاسف مشى على جثث الركاب ولنا الله من قبل ومن بعد والله قريت حادثة العياط ولم انم طول الليل لانى اعلم ان هناك مصيبة لايعلمها الا الله والخونة المسئولين مستحيل قطار حديد ووزن جراره حوالى 40 طن تقلبه جاموسة ده انا بعينى شفته دخل فى تريللا محملة زلط طيرها ادامه لمسافة حوالى 500 مترويادوب جراره اتقلب

اهو يا استاذ خالد كلهم بيقعوا دلوقتي واحد ورا التاني
بس فعلا انا مش عارف ابطل قراءه في الموضوع
خلصت شغل ورجعت اكمل في البيت

[zago boss]

المشاركة الأصلية كتبت بواسطة خالدخليفة وانا شخصيا اصول عائلتنا من مدينة حلب بسوريا ولكن هذا من اكثر من 400 سنة

كده انت بلدياتي بس انا من دمشق مش حلب

[momen_bondok]

آلْآن وبعد مرور اكثر من ثلاثين يوما تقريبا منذ بدء قرائتى للموضوع
اشعر كاننى ذهبت الى جميع محافظات الجمهورية دون التحرك من مقعدي من خلال هذه المواقف والطرائف
والتى كانت لا تخلو من المراجيح والجواز (انا بهزر طبعا)

شكر خاص للاستاذ : خالد خليفة على ما قدمة من خبرات وتجارب شخصية
والتى بلا شك استفاد منها الجميع وفى الحقيقة هذا الموضوع من اجمل ما قرءت فى حياتى عن التجارب الشخصية
ارجو منك يا استاذ خالد الأ تحرمنا من كل ما هو جديد
وأتمنى من الله أن أراك فى اقرب وقت وأنت فى تمام الصحة والعافية